ঙসি ভিদিও কনফরেন্স অমগী খুৎথাংদা প্রধান মন্ত্রীনা মনিপুরদা ৱাতর সপ্লাই প্রোজেক্তকী উরেপ-উয়ুং তমখ্রে।

থৌরম অদুদা প্রধান মন্ত্রীনা হায়খি লৈবাক অসিনা কোবিদ-১৯ থেংনরিঙৈদা, ভারতকী নোংপোক অমসুং অৱাং-নোংপোক থংবা শরুক্তা নোং কন্নবা চুবা অমসুং ঈশিং ইচাউ মায়োক্নরি অমসুং মীওই কয়া শিহনখ্রে অমসুং মীওই কয়া ময়ুম লৈতবা মীওইশিং ওইহল্লে।

প্রধান মন্ত্রীনা হায়খি লোকদাউন মনুংদা মনিপুর সরকারনা দরকার ওইবশিং পায়খৎলে অমসুং মপান্দগী হল্লকপা শিন্মীশিংগীদমক অখন্নবা থৌরাংশিং পায়খৎলে। প্রধান মন্ত্রী গরীব কলয়ান অন্ন য়োজনাগী মখাদা মনিপুরদা লায়রবা মীওই লাখ ২৫ রোম লেম্না চেঙ ফংখ্রে। উজ্জ্বালা স্কিমগী মখাদা মনিপুরগী নুপী লাখ ১.৫ হেনবদা লেম্না গ্যাস সিলিন্দরশিং পীখ্রে।

লুপা করোর ৩০০০ চঙনা পায়খৎকদৌরিবা ৱাতর সপ্লাই প্রোজেক্ত অদুগী মতাংদা প্রধান মন্ত্রীনা হায়খি মসিনা রাজ্য অসিদা ঈশিংগী অৱাবশিং হন্থহনগনি অমসুং মরুওইনা রাজ্য অসিগী নুপীশিংগী অৱাবা কোকহনগনি। গ্রেতর ইম্ফালগী মথক্তা প্রোজেক্ত অসিনা রাজ্য অসিগী অপীকপা তাউন ২৫ অমসুং খুঙ্গং ১৭০০০দা কান্নবা ফংহগনি। মথং চহি ২০দা দরকার ওইরক্কবা অদু য়েংলগা প্রোজেক্ত অসি দিজাইন তৌরে।

মহাক্না হায়খি মসিগী প্রোজেক্ত অসিনা মীওই মিল্লিয়ন কয়া মখোয়গী য়ুমদা অফবা থক্নবা ঈশিং ফংলগনি অমসুং মীওই লিশিং কয়াসু থবক ফংলগনি। মমাং চহিদা হৌদোকখিবা জল জিবন মিসন্না য়ুম করোর ১৫ হেনবদা তোতি ঈশিং পীনবা পান্দম থম্লি অমসুং মীয়াম্না শরুক য়াবদগী ঙসিদি লৈবাক অসিদা নুমিৎ খুদিংগী তোতি কন্নেক্সন লাখ ১ রোম পীরে। হেন্না নুংঙাইবা পুন্সি অমগীদমক হিংবদা লাইহনবা অসি তঙাইফদবা অমনি অমসুং লায়রবশিং য়াওনা খুদিংমক্কী হকনি।

মহাক্না হায়খি থাক খুদিংমক্তা, হিরম খুদিংমক্তা মরুওইনা লায়রবশিং হিংবদা লাইবা হেনগৎহন্নবা হৌখিবা চহি ৬ অসিদা থবক কয়া পায়খৎলে। মনিপুর য়াওনা ভারত পুম্বা ঙসিদি লমহাংদা খোঙহামদ্রে। লায়রবশিংগী মরক্তগী খ্বাইদগী লায়রবশিং এল.পি.জি গ্যাস ফংলে, খুঙ্গং খুদিংমক অফবা লম্বীশিং লৈরে অমসুং য়ুম লৈতবশিংদা চেক্কী য়ুম ফংহল্লে। য়ুমথোং খুদিংদা অফবা থক্নবা ঈশিং ফংহন্নবা মিসন ওইনা থবক পায়খৎলে।

প্রধান মন্ত্রী মোদীনা হায়খি নুংঙাইবা পুন্সি অসি চৎথোক-চৎশিনগা হকথেংননা মরী লৈনৈ। অত্মানির্ভর ভারত অমা শোইদনা লৈহন্নবা অৱাং-নোংপোক্কী লম্বী-থোং ফগৎহনবা অসি তঙাইফদবনি। মসিনা ভারতকী এক্ত ইস্ত পোলিসিগী অৱাৎপা অমা মেনখৎকনি অমসুং মসিনা লৈবাক অসিগী চৎথোক-চৎশিন অমসুং তুরিজমগী থবকশিংগী থোঙ্গাল অমা ওইরগনি। অৱাং-নোংপোক রাজ্যশিংদা লম্বীশিং, হায়ৱেজশিং, এয়রৱেজশিং, ঈশিং লম্বীশিং, আই-ৱেজশিং অমসুং  গ্যাস পাইপলাইনশিং য়াওনা অনৌবা মচাক-মথুমশিং শেমগৎলে। অৱাং-নোংপোক শীনবা থুংনা চাউখৎহন্নবা হৌখিবা চহি ৬দা লুপা করোর লিশিং কয়া থাদখ্রে।

মহাক্না হায়খি অৱাং-নোংপোক রাজ্য ৪গী কোনুংশিং শম্ননবা, দিস্ত্রিক্ত হেদক্বাতরশিং লেন অনিগী লম্বী শেম্নবা অমসুং খুঙ্গংশিং নোংজু-নুংশা খাক্তনা চহি চুপ্পা চৎপা য়াগবা লম্বীশিং শেম্নবা থবকশিং পায়খৎলে। মসিগীদমক কিলোমীতর ৩০০০গী লম্বীশিং শেম্লে অমসুং অতোপ্পা কিলোমীতর ৬০০০০গী লম্বীগী প্রোজেক্তশিং পায়খৎলে। অনৌবা রেলৱেজ স্তেসনশিংগী শেমগৎনবা অমসুং হৌজিক লৈরিবা রেল নেতৱার্কশিং ব্রোদ গেজ ওন্থোক্নবা প্রোজেক্তশিং পায়খৎতুনা অৱাং-নোংপোক্কী মফমশিং রেলনা শম্নবগী থবক ফিবম য়াম্না ফগৎলে। অৱাং-নোংপোক্কী রাজ্যশিংগী কোনুংশিং শম্নগদবা রেল নেতৱার্ক অমগী থবক হৌখিবা চহি ২ অসিদা য়াম্না য়াংনা পায়খৎলি।

লম্বীশিং অমসুং রেলৱেজশিংগী মথক্তা, নোংথক্কী লম্বী অসি অৱাং-নোংপোক্কী ওইনা য়াম্না মরুওই। ঙসিদি অৱাং-নোংপোক্তা এয়রপোর্ত ১৩ লৈরে। ইম্ফাল এয়রপোর্ত য়াওনা অৱাং-নোংপোক্কী হৌজিক লৈরিবা এয়রপোর্তশিং মতমগা চুনবা মওংদা শেমগৎনবা লুপা করোর লিশিং ৩ হেন্না চাদিং তৌখ্রে হায়না মহাক্না মখা তাখি।

প্রধান মন্ত্রীনা হায়খি অৱাং-নোংপোক্কী অমা য়াওনা লৈবাক শীনবা থুংনা পায়খৎলিবা নেসনেল ৱাতরৱেজ ২০ অসিনা অপনবা লৈতবা চৎথোক-চৎশিনগী খুদোংচাবা ফংহল্লগনি। ভারতকী কলচরগী খেন্নবশিং অমসুং কলচরগী মপাঙ্গল অদুগী মীহুৎ অমা অৱাং-নোংপোক্না ওইরি। লমদম অসিদা মীয়াম্না উদ্রিবা মফম কয়া লৈদুনা তুরিজমগী খুদোংচাবা কয়া লৈরি। অৱাং-নোংপোক লমদম্না লৈবাক অসিগী গ্রোথ ইঞ্জিন অমা ওইরগনি। ঙসিদি অৱাং-নোংপোক্কী মীয়াম অমসুং নহারোলশিংনা হিংশা থাদোক্তুনা চাউখৎ-থৌরাংগী মাইকৈদা ওনশিল্লে। হৌজিক মনিপুরদা ব্লোকেতশিং অসি পুৱারিগী শরুক অমা ওইরে।

প্রধান মন্ত্রীনা হায়খি হৌজিক অসাম, ত্রিপুরা অমসুং মিজোরমগী মীয়াম্না হিংশাগী লম্বী থাদোক্লে। ব্রু-রিয়াং রিফুজিশিং হেন্না ফবা পুন্সি অমদা চঙশিল্লে। অৱাং-নোংপোক লমদমদা ৱাগী ইন্দস্ত্রিগী খুদোংচাবা কয়া লৈরি অমসুং লমদম অসিদা ওর্গানিক্কী পোৎথোকশিং মরাংকাইনা পুথোকপা ঙম্মি। অত্মনির্ভর ভারত অভিয়ানগী মখাদা লমদম অসিগী পোৎথোকশিং মগুন হাপকৎনবা অমসুং য়োনফমগী খুদোংচাবা ফংহন্নবা ক্লস্তরশিং শেমগৎলে।

মহাক্না হায়খি এগ্রো স্তার্দ-অপশিং অমসুং অতোপ্পা ইন্দস্ত্রিশিং হায়রিবা ক্লস্তরশিং অসিদগী কান্নবা ফংগনি। ভারতনা মপানদগী ৱা লৈরিবা অসি অৱাং-নোংপোক্তা পুথোক্লিবা ৱাগী পোৎথোকশিংনা মহুৎশীনবা ঙমগনি। লৈবাক অসি ধুব য়াম্না শীজিন্নরি অদুবু ঐখোয়না লুপা বিল্লিয়ন কয়াগী ধুবশিং মপান লৈবাকশিংগী লৈরি। ৱা থারিবা লৌমীশিং, ৱাগী পোৎথোকশিং শারিবা খুৎহৈবশিং অমসুং অতোপ্পা খুদোংচাবশিংগীদমক নেসনেল বেম্বু মিসনগী মখাদা লুপা করোর কয়া থাদখ্রে। মসিনা অৱাং-নোংপোক্কী নহারোলশিং কান্নবা ফংগনি।

প্রধান মন্ত্রীনা হায়খি হৌজিক অৱাং-নোংপোক্তা হকশেল, ইজুকেসন, স্কিল দিবলপমেন্ত, স্তার্দ-অপস অমসুং অতোপ্পা ত্রেনিংশিংগী ইন্সতিতুৎ কয়া লিংখৎলে। স্পোর্তস য়ুনিভর্সিতি অমসুং মালেম থাক্কী স্তেদিয়ম অমা লিংখৎপদগী, মনিপুর লৈবাক অসিগী অফবা শান্নরোইশিংগী অচৌবা মফম অমা ওইরগনি।

***