প্রধান মন্ত্রী শ্রী নরেন্দ্র মোদীনা ২০২০গী জুলাই ২৩দা মনিপুর ৱাতর সপ্লাই প্রোজেক্তকীদমক ভিদিও কনফেরেন্সকী খুত্থাংদা উরেপ উয়ুং তম্গনি। রাজ্যপাল, মনিপুরগী মুখ্য মন্ত্রী অমসুং মাগী মন্ত্রীমন্দল, এম.পি.শিং অমসুং এম.এল.এ.শিংনা থৌরম অসিদা ইম্ফালদগী শরুক য়াগনি।

ভারত সরকারনা জল জীবন মিসন হৌদোক্তুনা অফবা অমসুং থক্ননবা ঈশিং মরাং কাইনা লৈবাক অসিগী খুঙ্গং খুদিংগী য়ুমথোং খুদিংদা ২০২৪ ফাওবদা “হর ঘর জল” হায়বা মোত্তোদা য়ৌহনগদৌরি। থৌরম অসি তঙাই ফদনা চংদবা য়াদ্রবা হায়বদি রিচার্জ অমসুং রিইয়ুজ গ্রে ৱাতর মেনেজমেন্ত, ঈশিং তুংশিনবা অমসুং নোংগী ঈশিং লোকপা মচাক ওইহন্দুনা পাংথোকপনি।

জল জীবন মিসন অসিগী মরু ওইবা মচাক্তি কাংলুপ অমদা ঈশিংগী মরমদা হেন্না খঙহনবা, তাকপী তম্বীবা অমসুং পাও ফাওনবদুনি। মীপুম খুদিংমক্কী অহানবা থৌদাং ওইনবা, জন অন্দোলন অমা ঈশিংগীদমক শেম্লগনি।

ভারত্তা চাউরাক্না য়ুম করোর ১৯ লৈরি। মসিগী মনুংদা ফ্রেস হাওশোল্দ তেপ কনেক্সন্স (এফ.ঐচ.তি.সি.) ফংবসি ২৪% নি। পান্দম অসিনা য়ুম ১৪,৩৩,২১,০৪৯দা এফ.ঐস.তি.সি.না রাজ্য সরকার, পনচায়ত রাজ ইন্সতিত্যুসনশিং অমসুং লৈকাইগা খুৎশমনরগা য়ৌহনগনি।

ভারত সরকারনা জল জিবন মিসনগী মখাদা এফ.ঐচ.তি.সি.গীদমক মনিপুরদা হেবিতেসন ১,১৮৫ অমসুং য়ুম ১,৪২,৭৪৯গীদমক ফন্দ থাদখ্রে। মনিপুর সরকারনসু লেমহৌরিবা য়ুমথোংশিংবু দিপার্তমেন্ত ফোর দিবেলপমেন্ত ওফ নোর্থ ইস্তর্ন রিজনদগী ফন্দ লৌদুনা য়ৌহন্নবা হোৎনরি।

তোঙানবা ফন্দ অমদা মনিপুরগী ৱাতর সপ্লাইনা ইম্ফালগী মরুওইবা মফমশিংদা এফ.ঐচ.তি.সি. ফংহন্নবা শেম্লি, লোয়ননা জিলা ১৬কী শহর ২৫ অমসুং খুঙ্গং ১,৭৩১ পুন্না য়ুমথোং ২,৮০,৭৫৬সু য়াওরি। মনিপুর ৱাতর সপ্লাই প্রোজেক্তনা ২০২৪গী হর ঘর জলগী পান্দম ফংনবা হোৎনবদা রাজ্য সরকারদা মপুং ওইরি। প্রোজেক্ত অসি করোর ৩০৫৪.৫৮ চংদুনা ন্যু দিবেলপমেন্ত বেঙ্কনা ফন্দ পীরকপনি।   

******