মাইক্রো, স্মোল অমসুং মেদিয়ম ইন্তর্প্রাইস অমসুং রোদ অমসুং ত্রান্সপোর্তকী কেন্দ্রগী মন্ত্রী শ্রী নিতিন গদকরীনা মাইক্রো/অপিকপা কারবার/ঙা-ফাবা, রিক্সো থৌবা, পোৎ থাংদোক থাংজিন তৌবা মীওইশিং, মনা-মশিং য়োনবশিং, লায়রবশিং, সেলফ হেল্প গ্রুপনচিংবগী থবক তৌবা মীওইশিংদা শেলগী তেংবাং পীবা ঙম্বা পোলিসী নত্ত্রগা মোদেল অমগী হৌজিক্কী মতমসিদা তঙাই ফদবগী মতাংদা হায়খ্রে। মহাক্না ঙরাং অথেংবদা ভিদিও কনফরেন্সিংগী খুত্থাংদা পাংথোকপা “পেন আই.আই.তি. গ্লোবেল ই.-কঙ্কলেব ওন রি-ইমেজিনিং এম.এস.এম.ই.শিং অমসুং লাইবলিহুদ”কী থৌরম অমদা ৱা ঙাংখি।

লৈবাক অসিগী মীশিং অয়াম্বনা ঙা-ফাবা, খোয় য়োকপা, ৱা পুত্থোকপনচিংবা অপিকপা ইন্তর্প্রাইসশিংদা লৈ অমসুং শেন্মিৎলোন অমসুং খুন্নাইগী থাক্তা শোত্থদুনা লৈদুনা মতিক চাবা শেলগী তেংবাং ফংদনা লৈ হায়না মহাক্না হায়খি। মখোয়শিং অসি থবক শুবা কনবা, মখুৎ-মশা শিংবা অমসুং পুকচেল শেংবা ওইগল্লি অদুবু শেলগী তেংবাং ফংদবা মরম্না মখোয়গী থবকশিং/কারবারশিং চাউখৎহনবা ঙমদে। শেলগী, তেক্নোলোজীগী অমসুং পোৎ-য়োনবগী হীরমশিংদা শৌগৎপিরবদি মখোয়গী কারবারশিং অসিদা চাউখৎপা পুরক্তুনা খুঙ্গং, এগ্রিকলচরেল অমসুং ত্রাইবেল সেক্তরশিংদা থবক পীবা ঙম্বগী খুদোংচাবা কয়া থোক্লক্তুনা ঐখোয়গী জি.দি.পি.দশু মপাঙ্গল হাপ্পা ঙমগনি।

শ্রী গদকরীনা শেন্মিৎলোন্দা, খুন্নাইগী থাক্তা অমসুং লাইরিক লায়শুগী মরমদা শোত্থরবা ওন্তোপ্রিনরশিং অসিবু শেলগী মতেং পাংবা য়াবা মোদেল অমা শেগৎনবগীদমক্তা মীয়াম্না পাউতাক পীবিরকউ হায়না হায়খি। হায়রিবা মোদেল অসি ময়েক লাবা, শেঞ্জা থুমজা লৈতবা, য়াম্না লুদবা মওংদা আই.তি. শিজিন্নবা ওইগদবনি হায়খি। মোদেল অসি নিতি আয়োগ, শেলথুম মন্ত্রালয়না অয়াবা পীরবদি মসিনা ৱা, খোইহী পুথোকপা, অতোপ্পা মখলগী ফুএল অমসুং অতোপ্পা হীরমশিংদা থবক তৌবা কারবার কয়া অমা শৌগৎপা ঙমগনি হায়খি। নোবেল পীস মনা ফংখিবা বঙ্গলাদেশকী গ্রামীন বেঙ্ককী ফাউন্দর প্রোফঃ মুহম্মদ য়ুনুসনা ভিদিও কনফরেন্স অসিদা মহাক্কী মংলানশু ফোংদোকখি।

***