মখল অসিগী অহানবা ওইনা শোৎথরবা কাংলুপকী শউনগী পোৎথোকশিং শাবা খুৎহৈবশিংগীদমক খোঙউপ শানবা ত্রেনিং সেন্তর অমা ঙসি দিল্লিদা কে.ভি.আই.সিনা হাংদোকখ্রে। সেন্তর অদু এম.এস.এম.ই মিনিস্ত্রিগী য়ুনিত অমা ওইরিবা, অগ্রাদা লৈবা সেন্ত্রেল ফুদৱিয়ার ত্রেনিং ইন্সতিতুৎকী তেক্নিকেলগী মতেংগা লোয়ননা লিংখৎপনি। রাজঘাতকী গান্ধী দরসন্দা লৈবা “কে.ভি.আই.সি-সি.এফ.তি.আই ফুদৱিয়র ত্রেনিং কম প্রদক্সন সেন্তর”না অফবা মগুন লৈবা খোঙউপ শানবা খুৎহৈবশিংদা থা অনিগী ত্রেনিং পীগনি।

সেন্তর অসি খুৎহৈবশিংগী “চার্ম চিকিতসক”(শউনগী দোক্তরশিং)নি হায়না কে.ভি.আই.সিগী চেয়রমেন ভি.কে সক্সেনানা ফোংদোকখি। মখোয়গী থা অনিগী ত্রেনিং অসি মাইপাক্না লোইরবা মতুংদা ত্রেনিং ফংলবা খুৎহৈবশিংনা মশাগী খোঙউপ শানবা থবক পায়খৎপদা সেন্তর অসিনা মতেং পাংগনি। মখোয়গী থবকশিং পাংথোক্নবা খুৎহৈবশিংদা লুপা ৫০০০গী মমল ওইগদবা খুৎলায়শিং পীগনি।

কে.ভি.আই.সি-সি.এফ.তি.আই ফুদৱিয়র ত্রেনিং কম প্রদক্সন সেন্তর অসিদা থা অনিগী মনুংদা রেকোর্দ ওইনা অফবা মখলগী খুৎলায়শিং অমসুং মেছিনশিং থম্লে। লোকদাউন্না মরম ওইদুনা শঙ্গাবা থেংথখিবনি। অহানবদা ত্রেনিং প্রোগ্রাম অসি মীওই ৪০না শরুক য়ানবা থৌরাং  তৌরম্বদা কোরোনা লাইচৎ লাকপদগী থাপ্না লৈবা দরকার ওইবদগী মীওই ২০দা হন্থখ্রে। কে.ভি.আই.সিনা মসিগা মান্নবা খোউপ শানবা ত্রেনিং সেন্তর অমা বরানাসীদসু লিংখৎলে।

কে.ভি.আই.সিগী চেয়রমেন্না হায়খি প্রধান মন্ত্রীগী পান্দম “সবকা সাথ, সবকা বিকাস” অসিগা লোয়ননা শউনগী পোৎথোকশিং শাবা খুৎহৈবশিং ত্রেনিং নৎত্রগা ‘চার্ম চিকিতসক’ অসি পাংথোকপনি। খোঙউপ অসি ফেসনগী তৎনবা য়াদ্রবা শরুক অমা ওইরে অমসুং খোঙউপ শাবা অসি  অৱাবা থবক অমা ওইদ্রে। সেন্তর অসিগী মখাদা মীওই মশিং য়াম্না খোঙউপ শাবগী ত্রেনিং পীনবা হোৎনরি। থা অনিগী ত্রেনিং অসিদা খুৎহৈবশিংনা মখল খুদিংমক্কী খোঙউপশিং য়াবা ঙম্নবা পায়খৎপনি। মসিনা মখোয়গী শেন্থোক হেনগৎহনগনি।

*****