লৈবাক্কী মফম কয়াগী লাকপা রেলৱেজ ৱার্কস য়ুনিয়নগী মীহুৎশিংনা শরুক য়াবা অহানবা ওনলাইন ৱার্কমেন সঙ্গোসতি রেলৱেজ মিনিস্ত্রিনা পাংথোকখ্রে। ৱার্কমেন সঙ্গোসতি অদুদা রেলৱেজ মিনিস্তর পিয়ুস গোয়াল, রেলৱেজগী রাজ্য মন্ত্রী সুরেস সি অঙ্গাদি, রেলৱেজ বোর্দকী চেয়রমেন ভি.কে য়াদব অমসুং রেলৱেজ বোর্দকী সেনিয়র ওফিসারশিং শরুক য়াখি।

মীফম অদুদা, এ.আই.আর.এফ অমসুং এন.এফ.আই.আরগী রাখল দাস গুপ্তা, সুম্মান সিংহ, সিব গোপাল মিশ্রা অমসুং দোক্তর এম রগাভাইয়া অমসুং ফেদেরেসনগী অতৈ থৌমীশিংনা মখোয়গী ওইবা ৱাফমশিং ফোংদোকখি।

য়ুনিয়ন মিনিস্তরনা হায়খি লোকদাউন মনুংদা খ্বাইদগী চাউবা থাক্তগী হৌরগা খ্বাইদগী নেম্বা ওফিসারশিং অমসুং স্তাফশিংনা থম্মোয় শেংনা মথৌ পাংথোকখি। লাইচৎ অসিনা মরম ওইদুনা হৌজিক ভারত রেলৱেজ অরুবা ফিবম অমা মায়োক্নরি। মসিগী অৱাবা অসি রেলৱেজনা কমদৌনা লাকশিনগনি হায়বগী ৱাখল্লোনশিং পুথোক্নবা ফেদেরেসনশিংগী লুচিংবশিংদা মিনিস্তরনা খঙহনখি। মহাক্না হায়খি রেলৱেজগী ফিবম ফগৎহন্নবা অমসুং চাউখৎহন্নবা ফেদেরেসনশিংনা অনৌবা ৱাখল্লোনশিং পুথোরক্কদবনি। হৌজিক লৈরিবা স্তাফশিং অশোই-অঙাম থোকহন্দনা হোৎনবা দরকার ওই।

অখন্নবা খোঙথাং অমা ওইনা,  রেলৱেজনা রেভেন্যু হেনগৎনবা, খরচ হন্থহন্নবা, অশোই-অঙাম থোক্তবা হেনগৎহন্নবা চুংশিন্নদুনা ৱাখল্লোনশিং পুথোক্নবা মিনিস্তরনা খঙহনখি। জেনেরেল মেনেজরশিং অমসুং দিবিজনেল রেলৱেজ মেনেজরশিংনা এমপ্লোয়িশিংদগী অনৌবা ৱাখল্লোনশিং লৌশিল্লবা মতুংদা মদু মিনিস্ত্রিদা পীখৎলক্কদবনি হায়না রেলৱেজ মিনিস্তরনা খঙহনখি।

মীফম অদুদা রেলৱেজগী রাজ্য মন্ত্রী সুরেসনা হায়খি হৌখিবা চহি ১৬৭ অমুক্তা লেপখিবদ্রিবা ভারত রেলৱেজ মসিগী লাইচৎ অসিনা মরম ওইদুনা লেপখ্রে। লাইচৎ মনুংদা রেলৱেজ এমপ্লোয়িশিংনা চোকথবা নাইদনা থবক তৌখি। লান্মী অমা ওইনা থবক তৌবগীদমক রেলৱেজগী স্তাফ খুদিংমক থাগৎ।ই। মতুংদসু রেলৱেজ স্তাফশিংনা থবক কন্না শুগনি অমসুং ভারত রেলৱেজ অসি মালেমদা খ্বাইদগী ফবা রেলৱেজ অমা ওইহনগনি হায়বগী থাজবা থম্লি।

রেলৱেজ বোর্দকী দি.জি দোক্তর অনন্দ এস খাতিনা হায়খি ভারত রেলৱেজগী এমপ্লোয়ি লাখ ১২.১৮ হেন্না লৈরি। হন্দক মীওই লাখ ১.২১ থবক হাপখ্রে। অহাংবা ফম লাখ ১.৪০গী থবক হাপ্নবা থবক পায়খৎপা হৌরে।

মীফম মনুংদা ফেদেরেসনশিংগী থৌমীশিংনা কোবিদ শিংনদুনা রেলৱেজগী এমপ্লোয়িশিংনা পায়খৎখিবা থবকশিং পাউদমখি অমসুং রেলৱেজদা অহোংবা পুরক্নবা থবক ফজনা পায়খৎকনি হায়না ফোংদোকখি।

রেলৱেজ য়ুনিয়নশিংগী থৌমীশিংনা হায়খি মিনিস্ত্রিনা রেলৱেজ চাউখৎহন্নবা পায়খৎলিবা থবকশিংদা রেলৱেজগী এমপ্লোয়িশিংনা লেপ্লি। শেন-থুমগী ফিবম ফগৎহনবা অমসুং থবক ফজনা পাংথোকপা হেনগৎহনবা অসি এমপ্লোয়িশিংগী য়াইফনবা খক নত্তনা লৈবাক ওইনসু অফবনি।

*****