য়ুথ এফিয়র্স অমসুং স্পোর্তসকী কেন্দ্র মন্ত্রী শ্রী কিরেন রিজিজুনা জুলাই ১৪ অমসুং জুলাই ১৫দা লৈবাক অসিদা খ্বাইদগী মরু ওইবা শান্ন-খোৎনবগী থবক্তা চাওখৎপা পুরক্নবা অমসুং  নেহরু য়ুব কেন্দ্র সঙ্গথন(এন.ৱাই.কে.এস.) অমসুং নেস্নেল সর্ভিস স্কীম(এন.এস.এস.)না পাংথোক্লিবা থবকশিংগী লম্বি য়াত্থোক্নবা রাজ্যশিং/য়ুনিয়ন তেরিতোরীশিং পুম্নমক্কী স্পোর্তস অমসুং য়ুথ এফিয়র্সকী মন্ত্রীশিংগা নুমীৎ নিনিগী ভিদিও কনফরেন্স পাংথোক্কদৌরি।

ৱারেপ অসিগী মতাংদা ৱাফম ফোংদোক্লদুনা শ্রী কিরেন রিজেজুনা হায়খি,  “লৈবাক অসি হৌজিক অনলোক্কী অনিশুবা তাঙ্কক্তা লৈরি অমসুং শান্ন-খোৎনবা  অমসুং নহারোলশিংগা মরি লৈনবা থবক-থৌরমসিংদা লম্বি য়াত্থোক্নবা রাজ্যশিংগা ৱারী শান্নবা অসি মরু ওই। লোকদাউনগী মতম অসিদা স্পোর্তস অমসুং য়ুথ এফিয়র্স বিভাগনা মথৌ নিংথিনা পাংথোক্তুনা মখা তানা হেন্না অচৌবা পান্দমশিং ফংননবা শেমগৎখি। ফীলদা ত্রেনিং পাংথোকপগা নকশিন্নবা ওইবা তারবসু এথলেৎসিং অমসুং কোচশিংনা শান্ন-খোৎনবগা নকশিন্নননা লৈহন্নবা থাক খুদিংমক্কী এথলেৎশিংগা লোয়ন-লোয়ননা কোচশিংগী ওনলাইন ত্রেনিংশিং পাংথোকখি। মতৌ অসিগুম্না, ঐখোয়গী এন.ৱাই.কে.এস. অমসুং এন.এস.এস.কী ভোলুন্তিয়রশিংনা পোত্থাদবমখৈ কোবিদ-১৯ লান্থেংনবদা মতেং পাংনবা জীলাগী এদ্মিনিস্ত্রেসনশিংগা নাকন্দা লৈদুনা থবক তৌখি।  ভোলুন্তিয়র লাশ্ক্ষ ৭৫ রোম্না চেকশিন-থৌরাংশিং অমসুং অশোই-অঙাম থোক্তনবগী লমজিং-লমতাকপদা, মাস্কশিং য়েন্থোকপদা, অতৈ থবকশিংদা মথক থোংবশিংবু মতেং পাংবগী থবক্তা য়াওখি। ঐহাক্না মসিগী থবকশিং অসিগী ইথীল অসি ফংহন্দুনা মমাং থানা চেংশিনগদবা লম্বিশিং থৌরাং তৌনবা রাজ্যশিংগী খুৎশম্নবা পাম্মি।”

মীফম অসিগী এজেন্দা অসিদা কোবিদ-১৯গী তৌখিবা থবকশিং অদু য়েংশিনবগা লোয়ন-লোয়ননা রাজ্যগী থাক্তা শান্ন-খোৎনবগী থবকশিং অমুক হৌনবগী মতাংদা অমসুং রাজ্যশিং অমসুং য়ুনিয়ন তেরিতোরীশিংদা ব্লোক অমসুং জীলাগী থাক্তা চাংদম্নবশিং পাংথোক্তুনা শান্ন-খোৎনবদা ময়োল চোংখৎলক্লিবা হৈথোই-শিংথোইবশিং অদু মশক খংদোক্নবগী মতাংদা খন্ননবগী ৱাফমশিং য়াওখি।  ফিৎনেস অমসুং শান্ন-খোৎনবা অসি লৈবাক অসিগী স্কুলশিং পুম্নমক্তা করিকুলম ওইনা হাপচিন্নবসু খন্নগনি। হন্দক্কী চহিদা নত্রগা মথংগী চহিগী অঙনবদা খেলো ইন্দিয়াগী থৌরমশিং অমসুং য়ুথ ফেস্তিবেলশিং পাংথোক্নবা থৌরাংশিং তৌনবসু লেপ্লগনি।  

“করিগুম্বা ভারত অসিবু ঐখোয়না ২০২৮কী ওলেম্পিক্কী পোদিয়মদা মালেমগী মকোক থোংবা লৈবাক ১০গী মনুংদা অমা ওইহন্নবগী মংলান অসি মংফাওনবা পাম্লগদি খ্বাইদগী মরু ওইবা থাক্তা শান্ন-খোৎনবগী ইকোসিস্তেম হেন্না মপাঙ্গল কনখৎহনবা হায়বসি মরু ওই। শান্ন-খোৎনবগী মন্ত্রালয়না রাজ্যশিং অমসুং য়ুনিয়ন তেরিতোরী পুম্নমক্তা খেলো ইন্দিয়া স্তেত সেন্তর ওফ এক্সেলেন্স(কে.আই.এস.সি.ই.) থম্নবা হান্ননা ৱারেপ লৌখ্রে।  মখা তানা খেলো ইন্দিয়া সেন্তর(কে.আই.সি.) ১০০০ জীলাগী থাক্তা লম-লমশিংদা লৈরিবা হৈথোই-শিংথোইবশিং অসি মশক খংদোক্তুনা মশক খংলবা ওলেম্পিক্কী শান্ন-খোৎনবা অমসুং নাৎকী ওইবা শান্ন-খোৎনবদা ত্রেনিং তৌনবা লিংখৎলগনি। কে.আই.এস.সি.ই.শিং অমসুং কে.আই.সি.শিং অনিমক অসিনা ভারত্তা খ্বাইদগী মরু ওইবা থাক্কী শান্ন-খোৎনবগী ইকোসিস্তেম অসি য়াম্না চাওনা মপাঙ্গল কনখৎহল্লগনি অমসুং মসিদা য়াম্না অচৌবা থৌদাং লৈ। মসিদা নত্তনা রাজ্য অমা শান্ন-খোৎনবগী থৌশিল-থৌরাং অসিদা মথৌ তাবশিং অমসুং থুনা চৎনহন্নবা সরকারনা তৌখ্রে। ঐখোয়না মসি শোইদনা ওইহন্নবগীদমক ৱাখল্লোনশিং অসি রাজ্য পুম্নমক্কা হায়দোক-হায়জিন তৌনদুনা ভারত অসি শান্ন-খোৎনবদা খ্বাইদগী শক্তি লৈবা অমা ওইহন্নবা খুৎশম্নবা মওংদা লম্বি য়াত্থোক্নবগী আশা তৌই, ” হায়না কিরেন রিজিজুনা ফোংদোকখি।

মীফম অসিদা তোঙান-তোঙানবা ৱাফমশিং খন্ননবগী মতম ফংনবা রাজ্য খুদিংমক অসি কাংলুপ অনি থোক্না খায়দোক্কনি।

***