ঙসি ভারতকী উপ-রাস্ত্রপতি এম ভেনকিয়া নাইদুনা হায়খি লৈবাক অসিগী য়ুমশাবশিংনা অকোয়বগী ফিবম কাইহন্দবা য়ুমশারোল শীজিন্নগদবনি। পায়খৎকদৌরিবা য়ুম শাবগী প্রোজেকশিংদা নুমিৎ মঙাল শীজিন্নবা য়াওনা রিনিউএবল ইনর্জি শীজিন্নগদবনি।

ইন্দিয়ান ইন্সতিতুৎ ওফ আর্কিতেক্সকী নেসনেল কনভেন্সন : আই আই এ নাতকোন ২০২০-ত্রান্সসেন্দ হৌদোকপগী থৌরমদা উপ-রাস্ত্রপতিনা হায়খি য়ুম-কৈ অমা হেক্তা শাবা মতমদা ফজবা অমসুং অকোইবগী ফিবম কাইহন্দবা অনিগী মরক্তা খল মানহনবা দরকার ওইরে।

ইন্দস তম্পাক সভাত্যদগী হৌরগা কোনার্ক সন তেম্পল ফাওবা অমসুং হৌজিক্কী মতম অসি ফাওবদা ভারতকী য়ুমশারোলদা লাক্লিবা অওনবশিং নিংশিংলদুনা মহাক্না হায়খি ঐখোয়গী লৈবাক অসি মফম অসিদা ফংবা মচাকশিং অমসুং য়ুমশারোলশিং শীজিন্নদুনা শাবা লাইশঙ কয়াগী মফম অমনি। সভাত্য অমদা খ্বাইদগী মাইপাকপশিংগী মনুংদা য়ুমশারোল অসিসু অমনি।

অশোই-অঙাম থোকপা ঙম্লোইদবা য়ুমশারোল শীজিন্ননবা তকশিল্লদুনা উপ-রাস্ত্রপতিনা হায়খি শীনফম অসিদা লৈরিবশিংনা ভারতকী তোঙান-তোঙানবা য়ুমশারোলশিংদগী তমগদবনি অমসুং অকোইবগী ফিবম শোইকহল্লোইদবা অমসুং মীয়ামগী দরকার ওইবা ফংহনগদবা খ্বাইদগী চুনবা নমুনাশিং শীজিন্নগদবনি।

মহাকনা হায়খি সরকারগী স্মার্দ সিতি অমসুং হাওসিং ফোর ওল হায়রিবা প্রোজেকশিং অসি পায়খৎলিবা মফম অদুগী কলচর অমসুং হেরিতেচ য়োকখৎপা দরকার ওই। হায়রিবা প্রোজেকশিং অদুদা মফম অদুগী কলাকারশিং অমসুং খুৎহৈবশিং নেক্কদবনি। মসিনা মফম অদুগী কলচরগী ফজবা হিংহনবা খক নত্তনা, মখোয়গী থবকশিংগী খুৎথাংদা ঐখোয়গী চৎনবী ঙাক্নবা কন্না হোৎনরিবা হৈশিংলবা খুৎহৈবশিং থবক ফংহনগনি অমসুং পুক্নিং থৌগৎকনি।

উপ-রাস্ত্রপতিনা মখা তানা হায়খি অনৌবা প্রোজেক অমা পায়খৎপা মতমদা মফম অদুগী মীয়ামগী দরকার ওইবা অদু ফংহনবা ঙম্নবা য়ুমশাবশিংনা মফম অদুগী মীয়ামগী পাউতাক অমসুং ৱাখল্লোনশিং লৌগদবনি। য়ুম অমা শানবা দিজাইন তৌবা মতমদা, লৈবা নুংঙাইনবা অমসুং নুংঙাইবা অমসুং ফজবা অনি পুনশিন্নবা হোৎনগদবনি। শাগদৌরিবা য়ুম অদুনা শুপ্নগী লৈফম ফংহনবা অমসুং অশোই-অঙাম থোকহন্দবা খক নত্তনা নুংঙাইবা ফাওহনগদবনি।

মহাক্না হায়খি অনৌবা বিল্দিংশিং শাবা মতমদা শুকশোই শোইদনা সোলার রুপ পেনেলশিং হাপ্নবা অমসুং নোংগী ঈশিং লোকশিন্নবা খুদোংচাবা থম্নবা লৈবাক শীনবা থুংনা লৈরিবা মিউনিসিপাল ওথোরিতিশিংদা মহাক্না খঙহনখ্রে। নোং কন্না  চুবা মতমদা সহরদা ঈশিং চাউরিবা অসি কোকহন্নবা ইরম-নালা ফজনা শেমগৎকদবনি। মীশিং হেনগৎলকপগী মতুংইন্না দরকার ওইবা য়ুমশিং ফংহন্নবা অনৌবা শেমগৎ শাগৎপা মতমদা অকোয়বগী ফিবম শোকহল্লোইদবনি।

কোবিদ-১৯ লাইচৎনা হকশেলগী লমদা অমসুং মীওই কয়াগী হিংনবগী লম্বী ফংহন্দ্রিবা অসিগী মতাংদা উপ-রাস্ত্রপতিনা হায়খি লাইচৎ অসিনা য়ুম-কৈ শাবগী থবকশিংদা চাউনা অকাইবা থোকহল্লে অমসুং লাইচৎ অসিনা পীরিবা চৈথেং অসি ঙাকথোক্নবা আর্কিতেকশিং অমসুং দিজাইন্নরশিংনা থবক পায়খৎকদবনি। লাইচৎ অমসুং মসিগী মতুং  তারকপদা  ফিবম থেংননবা পাম্বৈশিং থিনবা আর্কিতেকশিংনা অনৌবা ৱাখল্লোনশিং পুথোকপা দরকার ওই।

****