সিপ্পিংগী কেন্দ্রগী রাজ্য মন্ত্রী (ইন্দিপেন্দেন্ত চার্জ) ওইরিবা শ্রী মন্সুখ মান্দবিয়ানা ঙসি ভারত্তা লৈরিবা লাইৎ হাউস ১৯৪ রোম্বু মরুওইবা তুরিস্তশিংগী পুক্নিং চিংশিনবা য়াবা মফম অমা ওইনা শেমগৎনবগী খন্ননবা অৱাংবা থাক্কী মীফম অমা পাঙথোকখ্রে। শ্রী মান্দবিয়ানা হায়খি, মসিনা লাইৎ হাউস অমসুং মসিগী অকোইবশিংদা তুরিজম চাউখৎহনগনি অমসুং লাইৎহাউসশিংগী মশক থোক্লবা পুৱারীশিংবু খঙহন্নবগী খুদোংচাবা অমা পীরগনি।

ওফিসিএলশিং অদুনা লাইৎহাউসশিং অসিবু তুরিজমগী মফম অমা ওইনা শেমগৎনবগীদমক অকুপ্পা প্লানশিং পীখৎখি। শ্রী মান্দবিয়ানা ওফিসিএলশিংদা চহী ১০০দগী হেন্না লিরবা লাইৎহাউসশিং খনগৎনবা পাউতাক পীখি। মহাক্না লাইৎহাউসশিং অসিগী পুৱারীশিং, লাইৎহাউসশিং অসি মথৌ তৌহন্নবা হোৎনবদা চঙলিবা খুৎসু খুৎলাইশিংগী মরমদা উৎনবা ম্যুজিয়ম শাগৎনবা পুক্নিং চিংশিনখি।

লাইৎহাউসশিং অসি চাউখৎনবগী মরুওইবা প্লানশিংগী মনুংদা শেমগৎপা য়াবশিংদি ম্যুজিয়ম, এক্বারিয়ম, অঙাংশিংনা শান্নবা য়াবা মফমশিং, অমসুং ঈশিংগা লোইননবা লৈবা হৈকোল-লৈকোলশিংনি।

মন্ত্রীনা গুজরাত্তা লৈবা গোপিনাথ, দ্বার্কা, অমসুং ভেরাবালগী লাইৎহাউসশিংদা চত্থরিবা তুরিস্তশিংগী পুক্নিং চিংশিনবা য়াবা শেমগৎ শাগৎলিবশিং কয়াম চাউখৎলবগে হায়বগী মতাংদা হংখি।

মন্ত্রীনা ওফিসিএলশিংদা য়ারিবমখৈ ঙন্না প্রোজেক্তকী অকুপ্পা মরোলশিং থাগৎলক্নবা খঙহনখি। মীফম অদুদা সিপ্পিং মন্ত্রালয়গী সেক্রেতরী, লাইৎহাউস অমসুং লাইৎশিপকী দিরেক্তোরেৎ জেনরেলগা লোইননা অতোপ্পা স্তেকহোল্দরশিং শরুক য়াখি।

***