৬শুবা মালেমগী য়োগ নুমিৎ অসি য়াম্না থৱায় য়াওনা ইলেক্ত্রোনিক অমসুং দিজিতেল মীদিয়াগী খুত্থাংদা লৈবাক শিনবা থুংনা পালন তৌখ্রে। প্রধান মন্ত্রী শ্রী নরেন্দ্র মোদীনা থৌরম অসিদা ৱা ঙাংবদা য়োগনা ইমুং মনুং নকশিন্নহনবগী মতাংদা পনখি। মহাক্না য়োগনা মীওই খুদিংবু নক্নহল্লি অমসুং অঙাং অমসুং অহল য়াওনা ইমুং মনুংগী মীওইশিংগী মরীসু চেৎহল্লি হায়খি। মরম অসিনা “ইমুং মনুংদা য়োগ তৌমিন্নবা” অসি হন্দক চহীগী আই.দি.ৱাই.গী হীরম অমা ওইরিবনি।

প্রধান মন্ত্রীনা কোবিদ-১৯না মীওইবগী হকচাংগী পল্মোনরী ওর্গানশিংদা শোকহল্লি অমসুং প্রানায়মস অসিনা নিংশা হোনবগী পথাপ ফগৎহল্লি হায়না মখা তানা হায়খি। করিগুম্বা ঐখোয়না হকশেল অমসুং অফবা মংলান অসি তান চান্নহনবা ঙম্লবদি মালেম অসিনা হকচাং ফবা অমসুং নুংঙাইবা খুন্নাই অমা ওইরকপগী নুমিৎ অদু কুইদ্রবনি অমসুং মসি য়োগনা ওইথোকহনবা ঙমগনি হায়না হায়খি।

হৌজিক ওইরিবা কোবিদ-১৯গী লায়চৎ অসিনা আই.দি.ৱাই.দা মীয়াম তিনবা অসি মতাং চাদে। হীরম অসি য়েংলদুনা সরকারনা নুমিৎসিদা মীয়াম্না ইমুং মনুংগী মীওইশিংগা লোয়ননা য়ুমদগী য়োগ তৌননবা পুক্নিং থৌগৎখি। মসিগী মতাংদা আয়ুশ মন্ত্রালয়না সোসিএল মীদিয়াগী প্লেৎফোর্ম হেন্না শিজিন্নদুনা মীয়াম্না ওনলাইন্দগী শরুক য়ারকপা য়ানবা খুদোংচাদবা কয়া শিল্লি।

থৌরম অসিদা আয়ুশ রাজ্য মন্ত্রী, শ্রী শ্রিপদ নাইকনা মালেমগী য়োগ নুমিৎ অসি মীয়ামগী হকশেলগী খ্বাইদগী চাউবা ঈহৌ অমা ওইরে হায়না হায়খি। হৌজিক্তি মালেমগী লৈবাক খুদিংনা আই.দি.ৱাই.গী থৌরম পালন তৌনরি অমসুং মীয়াম্না থৌরম অসি কোন্সিন্দুনা ভারতকী নাৎ অমসুং চৎনবিগী পালন তৌবা ওইনা লৌনরে হায়না মখা তানা হায়খি। হন্দক্কী চহীসিদদি আই.দি.ৱাই. অসি হকশেলগী ফিভম চাদবা মতম অমদা থোক্লে অমসুং মসিনা মরম ওইদুনা আয়ুশ মন্ত্রালয়না হৌখিবা থা অহুমদগী ওনলাইন প্লেৎফোর্ম কয়াগী খুত্থাংদগী য়ুমদগী য়োগ তৌরকপা য়ানবা থবক থৌরম কয়া অমা শিল-লাংনবা হোৎনদুনা লাক্লি। প্রধান মন্ত্রীনা হৌদোকখিবা “ঐগী পুন্সি-ঐগী য়োগ” হায়বা ভিদীও ব্লোগিং কন্তেস্ত অসিবু য়োগগী মরমদা মীয়াম্না খংবা হেনগৎহনবগীদমক মহাক্না থাগৎখি।

শ্রী নাইকনা মকোক চিংবা য়োগ ইন্সতিত্যুৎ কয়ানা থবক অসিগা মরী লৈননা মন্ত্রালয়গা খুৎশম্নদুনা চৎলি হায়না হায়খি। থবকশিং অসি মমাং থাদগীদি হেন্না কনশিল্লক্তুনা কম্মন য়োগ প্রোতোকোল (সি.ৱাই.পি.)দা অহেনবা মিৎয়েং থমখি অমসুং চহী খুদিংগী ওইনা মীয়াম পুন্না য়োগ তৌমিন্নদুনা নুংশি চান্ননা লৈবা আই.দি.ৱাই.না মতুং ইনখি।

আয়ুশ মন্ত্রালয়গী সেক্রেতরী শ্রী বাইদ্যা রাজেশ কোতেচানা থাগৎ ৱাহৈ পীরদুনা হৌজিক ওইরক্লিবা অনৌবা ফিভম অসিদা আই.দি.ৱাই.গী মিৎয়েংদি হকশেলগী কান্নবনি অমসুং য়োগ নুমিৎসিদা য়ুম য়ুমদা য়োগ তৌবনি হায়খি। আয়ুশ মন্ত্রালয়না মসিগী চৎনবি অসি শৌগৎপা ওইনা মখোয়গী আই.দি.ৱাই.গী থবক থৌরমশিংদা মসিগী থীম ওইরিবা “য়ুমদা য়োগ তৌবা, ইমুং মনুংগা য়োগ তৌমিন্নবা” অসি খুমাং চাউশিলহল্লি।

শ্রী কোতেচানা আয়ুশ মন্ত্রালয়না অয়ুক খুদিংগী সি.ৱাই.পি. সেসন য়াওনা থৌরম কয়া অমা দুরদর্শন অমসুং সোসিএল মীদিয়াদা মীয়ামশিংনা প্রোতোকোল অসি তম্নবা খুদোংচাবা পীনবা শন্দোক্লি। ইদুকেস্নেল ইন্সতিত্যুসনশিং, সরকারগী বোদিশিং, কারবারগী ফর্মশিং, ইন্দস্ত্রীশিং অমসুং নাৎকী ওইবা লুপশিং য়াওনা তোঙান তোঙানবা ইন্সতিত্যুসনশিং অমসুং মীওই কয়ানা মখোয়গী থবক তৌরিবশিং, মেম্বরশিং অমসুং অতোপ্পা স্তেকহোলদরশিংগী কান্ননবা হায়দুনা আই.দি.ৱাই.দা শরুক য়ারি হায়না সেক্রেতরীনা হায়খি। লৈবাক অসিগী তোঙানবা মফমশিংদা লৈবা য়োগ ফ্রেতর্নিতিশিংনা মীওই লিশিং কয়া অমনা মশাগী ইমুংদগী থৌরম অসিদা য়াওরক্কদৌরিবশিং অসিগা লোয়ননা আই.দি.ৱাই.গী থৌরম পালন তৌনবা শেম শাদুনা লৈরে হায়না সেক্রেতরীনা হায়খি। পান্দম ওইরিবা মীওই মিলিয়ন ৫গী য়াম্লবা মীশীংগী দেতা জেনেরেৎ তৌনবা আয়ুশ সঞ্জিবনি মোবাইল এপকী মতাংদশু মহাক্না পনখি। মসিদগী মপুং ওইনা ফংগনি থাজরিবা দেতাশিং অদুদি আয়ুশনা শন্দোক্লিবা পাউজেলশিং অসি য়াদুনা শিজিন্নবা, মীশিং ওনবা অমসুং মসিনা কোবিদ-১৯ ঙাকথোক্নবা হোৎনরিবশিং অসিদা পীরিবা ইথিলনি।

থৌরম লোইশিনবদা মোরারজি দেসাই ইন্সতিত্যুৎ ওফ য়োগগী অহৈবশিংনা কম্মন য়োগ প্রোতোকোল পাংথোক্তুনা তাকখি অমসুং মদুগী মখা তারকপদা য়োগগী অখং-অহৈশিংনা খন্ন-নৈনখি। থৌরম অসি দুরদর্শনগী চেনেল খুদিংমক্তা শন্দোকখি।

*****