ঙসি ভিদিও কনফরেন্সকী খুৎথাংদা প্রধান মন্ত্রীনা লুচিংদুনা বরানসিদা পায়খৎলিবা চাউখৎ-থৌরাংগী প্রোজেকশিং য়েংশিনবগী মীফম অমা পাংথোকখ্রে । দ্রোন ভিদিও অমা শীজিন্নদুনা মফম অদু উৎতুনা কাসি বিশ্বনাথ মন্দির শেমগৎপগী থবক খুমাংচাউশিনবা অদু মীফম অদুদা পাউদমখি । কোবিদ লাকশিন্নবা পায়খৎলিবা থবকশিংসু খন্নখি ।

মীফম অদুদা বারানসীগী মীহুৎশিং হায়বদি রাজ্য মন্ত্রী(ইন-চার্জ) নিলাকান্থ তিৱারি, বারানসী (সাউথ)কী এম.এল.এ রবিন্দ্র জাইসৱাল, বারানসী (নোর্থ)কী এম.এল.এ সুরেন্দ্র নারায়ন সিংহ, রোহনিয়াগী এম.এল.এ সৌরাব শ্রীবাস্তভা , বারানসী কেন্তগী এম.এল.এ নিল রতন নিলু, সিবপুরিগী এম.এল.এ অশোক ধৱান, এম.এল.সি লক্সমন অচার্য়া, এম.এল.সি ওফিসিএল দিপক অগরৱাল, বারানসী দিবিজনগী কমিসন্নর কৌসাল রাজ শর্মা, বারানসীগী দিস্ত্রিক মেজিস্ত্রেৎ গৌরাঙ্গ রাথি শরুক য়াখি ।

• কাসি বিশ্বনাথ ধাম প্রোজেক্কী থবকশিং য়েংশিনবগী মতাংদা প্রধান মন্ত্রীনা কাসি বিশ্বনাথ পারিসার শেমগৎপা মতমদা থেংনবা অসিগুম্বা অরিবা লাইশঙশিং ঙাকশেন্নবা খঙহনখি । লাইশঙশিংগী পুৱারি ওইরবা মচাকশিং কন্নবা অখঙ-অহৈশিংগী মতেং লৌগদবনি । কাসি বিশ্বনাথ মন্দির য়েংবা অমসুং খুরুমবা লাকপশিংদা হায়রিবা লাইশঙশিং অসিগী মরুওইবা খঙহনগদবনি অমসুং লাইশঙশিং অসি কার্বোন দেতিং তৌগদবনি । লাইশঙ অসি য়েংবা লাকপশিংগী খুদোংচানবা লম্বীগী মেপ অমা কাসি বিশ্বনাথ ত্রস্তনা থৌরাং তৌগদবনি ।

• বরানসিদা পায়খৎলিবা প্রোজেক পুম্নমক প্রধান মন্ত্রীনা য়েংশিনখি । হোস্পিতালশিং, নেসনেল ৱাতরৱেজ, রিং রোদ, বাই-পাস অমসুং ইন্দো-জপানগী মতেংগা লোয়ননা ‘রুদ্রক্ষ’ ইন্তরনেসনেল কনভেন্সন সেন্তর শাবা য়াওনা লুপা ক্রোর ৮০০০ রোমগী অচৌবা প্রোজেক ১০০ হেন্না বরানসিদা পায়খৎলি ।

• অপীবা মতমগী মনুংদা চাউখৎ-থৌরাংগী থবকশিং লোইশিন্নবা অমসুং মগুন লৈনা থবক শুনবা ওফিসিএলশিংদা প্রধান মন্ত্রীনা খঙহনখি । য়ারিবমখৈ নন-রিনিউএবল ইনর্জি শীজিন্ননবা প্রধান মন্ত্রীনা খঙহনখি । বারানসী জিলা শীনবা থুংনা মিসনগী মওংদা য়ুমশিং অমসুং লম্বীশিংদা এল.ই.দি ব্লবশিং থান্নবা থবক পায়খৎনবা খঙহনখি ।

• কাসিদা তুরিজম চাউখৎহন্নবা ক্রুইজ তুরিজম, লাইত অমসুং সাউন্দ সো পাংথোক্নবা, খিরকিয়া অমসুং দাসৱামেধ ঘাৎশিং নৌনা শেমগৎনবা, ওদিও-ভিদিও স্ক্রিনশিংদা গঙ্গা-আর্তি উৎনবা মীফম অদুদা পাউতাক পীখি । মালেমগী অরিবা চৎনবীশিং লৈরিবা মফম অমা ওইরিবা কাসিগী মরুওইবা য়োকখৎবা থবক খুদিংমক পায়খৎকদবনি । বুধিজম চৎপা জপান অমসুং থাইলেন্দগুম্বা লৈবাকশিংদা চয়োল অমগী কুম্মৈশিং পাংথোক্নবা মহাক্না ওফিসিএলশিংদা খঙহনখি ।

• মফম অসিগী মীয়াম শরুক য়াদুনা কাসিগী হেরিতেচ মমি তাগদবা চুনবা থিমদা মোদেল রোদ অমা শেমগৎনবা মফম খঙদোক্নবা মহাক্না ওফিসিএলশিংদা খঙহনখি ।

• কাসি অসি লমকোয়বশিংগী মফম অমা ওইবনা সেনিতেসন অমসুং লু-নানবগী থবক খুদিংমক মতিক চানা পায়খৎনবা মহাক্না মখা তানা খঙহনখি । লমহাংদা খোঙহামদবা মফম অমা ওইহন্নবা থবক খুদিংমক পায়খৎকদবনি অমসুং মেছিন্না ৱাই শীৎনবা, য়ুমথোং চাদা ১০০ অমোৎপা খোমগৎনবা অমসুং অফবা অকোয়বগী ফিবম অমা শেমগৎনবা খঙহনখি ।

• বরানসিদা মালেমগী থাক্তা লৈগদবা কমুনিকেসন অমসুং লম্বী-থোং শেমগৎনবা মীফম অদুদা খন্নখি । বারানসীদগী হালদিয়া ফাওবা শম্নহন্দুনা নেসনেল ৱাতরৱেজগী মফম অমা ওইনা শেমগৎনবা প্রধান মন্ত্রীনা য়াথং পীখি । পোৎ-চৈ পুবা অচৌবা জহাজশিং চৎপা য়ানবা শেমগৎনবা থৌরাং তৌগদবনি । লাল বাহাদুর সাস্ত্রি ইন্তরনেসনেল এয়রপোর্ত পাকথোক-চাউথোকপা অমসুং মতমগা চুনবা মওংদা শেমগৎপগী থবক লোইশিন্নবা মহাক্না ওফিসিএলশিংদা খঙহনখি ।

• অত্মানির্ভর ভারতকী মখাদা পায়খৎলিবা থবকশিং প্রধান মন্ত্রীনা অমুক য়েংশিনখি অমসুং স্কিম অসিগী কান্নবা মীওই খুদিংমক্তা ফংহন্নবা খঙহনখি । লম্বী মতাইদা পোৎ য়োল্লিবশিংগী প্রধান মন্ত্রী সবানিধি স্কিম কুপ্না য়েংশিনগদবনি । মখোয়না কেসলেস ত্রান্সসেক্সন পাংথোকপা ঙম্নবা লম্বী মতাইদা পোৎ য়োল্লিবশিংদা চুনবা তেক্নোলোজি অমসুং খুৎলায় ফংহনগদবনি । মখোয়গী বেঙ্ক একাউন্তশিং হাংদোক্কদবনি অমসুং মখোয়গী ললোন-ইতিক অমসুং শেন্থং ফংবগী মতাংদা দিজিতেল ওইনা শম্নগদবনি ,মসিনা স্কিম অসিগী মখাদা কোলেতেরেল য়াওদনা লোন লৌনবগী খুদোংচাবা লৌবা ঙমগনি ।

• প্রধান মন্ত্রীনা হায়খি সরকারনা মরুওইনা লৌরিবশিংগী মনুংদা লৌমীশিংসু অমনি অমসুং মখোয়গী শেন্থোক হেনগৎহন্নবা অকনবা থবক পায়খৎকদবনি । লৌমীশিংগী শেন্থোক হেনগৎহন্নবা খোই লোইবা অমসুং খোইরু পুথোকপগী থবক হেনগৎহনগদবনি । বরানসিদা পেকেজিং ইন্সতিতুৎ অমা লিংখৎনবা মহাক্না ওফিসিএলশিংদা খঙহনখি , মসিনা লৌমীশিংনা মখোয়গী পোৎথোকশিং মপান্দা থাদোক্নবা বারানসী মশামক্তা শেম-শাবা ঙমহনগনি । এপেদাগা লোয়ননা লৈঙাক্না ইন্সাং-নাপী অমসুং হৈনৌ মপান্দা থাদোকপা হেনগৎহন্নবা পায়খৎলিবা থবকশিং মহাক্না থাগৎখি ।

• অমোৎ-অকায়শিংদগী ইনর্জি নৎত্রগা হার পুথোক্নবা মিৎয়েং চঙগদবনি । শেল চংদবা লৌউ-শিংউগী থবকশিং পুক্নিং থৌগৎকদবনি অমসুং মসিগী কান্নবশিং লৌমীশিংগী মরক্তা শন্দোক্কদবনি ।

• কোবিদ-১৯ থেংননবা পায়খৎলিবা থবকশিং অমুক হন্না য়েংশিনখি । চাংয়েং তৌনবা, খোঙ্গুল লিনবা অমসুং লায়েংনবা অরোগ্যা সেতু এপ্প মপুংফনা শীজিন্ননবা প্রধান মন্ত্রীনা খঙহনখি । মফম অসিগী লৈঙাক্না চানবা অমসুং লৈফম পীনবা অমসুং ক্বারেনতাইনগী থবকশিংগীদমক মহাক্না থাগৎখি ।

• ময়ুমদা হল্লক্লবা শিন্মীশিং থবক পীনবা চুনবা স্কিল মেপ্পিংগী থবক পায়খৎনবা মহাক্না খঙহনখি । প্রধান মন্ত্রী গরিব কলয়ান য়োজনানা কান্নবা পীবগী মতাংদা অমসুং কোবিদ-১৯গী অৱাবা কোকহন্নবা পায়খৎলিবা স্কিমশিংগী মতাংদা প্রধান মন্ত্রীনা ফিদবেক লৌখি ।

• বরানসিদা মরুওইবা হিরমশিং হায়বদি খুঙ্গং চাউখৎহনবা, পঞ্জয়াতি রাজ, সেনিতেসন, হকশেল , লাইরিক তম্বা, খুন্নাইগী য়াইফ-থৌরাং, লৌউ-শিংউ অমসুং মরী লৈনবা থবকশিং অমসুং হিংনবা লম্বী পীনবগী মতাংদা নিতি অয়োগনা শেমদুনা পায়খৎখিবা গ্রাম পঞ্জয়াত দিবলপমেন্ত প্রোগ্রামগী ফিবমশিং প্রধান মন্ত্রীনা য়েংশিনখি ।

• অঙাংশিংদা অফবা মচি ওইবা চিঞ্জাক ফংহন্নবা পায়খৎলিবা থবকশিংদা য়ারিবমখৈ নুপীশিং, সেল্প হেল্প গ্রুপশিং শরুক য়াহন্দুনা অঙ্গনৱাদি সেন্তরশিংগী থবক ফগৎহন্নবা মহাক্না ফোংদোকখি । অঙ্গনৱাদি সেন্তরশিংনা তোঙান-তোঙানবা লুপশিং অমসুং মীয়ামগা লোয়ননা অঙাংশিং মশা ফবা তান্নবা আমসুং অঙাংশিংগী চানবা চীঞ্জাক মখল কয়া শেম্নবা প্রধান মন্ত্রীনা পাউতাক পীখি ।

• বারানসীগী মীয়ামদা অফবা মগুন লৈবা থবকশিং ফংহন্নবা অমসুং মখোয়গী পুন্সি মহিংগী থাক ৱাংখৎহন্নবা চাউখৎ-থৌরাংগী থবকশিং খুমাংচাউশিন্নবা মিৎয়েং চঙনবা প্রধান মন্ত্রীনা ফোংদোকখি ।