ভিদিও কনফরেন্সকী খুৎথাংদা কমর্সিএল মাইনিংগীদমক কোয়লা ব্লোক ৪১ নিলাম লাউবগী থবক ঙসি প্রধান মন্ত্রী নরেন্দ্র মোদীনা হৌদোকখ্রে । নিলাম লাউনবগী থৌরাং অসি অত্মানির্ভর ভারত অভিয়ানগী মখাদা ভারত সরকারনা পরিং নাইনা লাউথোকখিবশিং অদুগী শরুক অমনি । কোয়লা মন্ত্রলয়না এফ.আই.সি.সি.আইগা লোয়ননা হায়রিবা কোয়লাগী মাইনশিং নিলাম লাউবগী থবকশিং হৌদোকপনি । কোয়লাগী খনিশিং য়েন্থোক্নবা তাঙ্কক অনি লৈবা ইলেকত্রোনিক্কী নিলাম লাউবগী থবক অমা চৎনরে ।

থৌরম অদুদা প্রধান মন্ত্রী মোদীনা হায়খি ভারতনা কোবিদ-১৯ লাইচৎ মাইথিবা পীবা ঙমগনি অমসুং মসিগী অৱাবা অসিদগী লৈবাক অসিনা খুদোংচাবা অমা লৌহৌগনি । মসিগী অৱাবা অসিনা অত্মানির্ভর ভারত হায়বদি মশা-মরোমদোম হিংজবা ঙম্নবগী পারা অমা ভারতনা তমহৌরে । মসিনা ভারতনা লৈবাক অসিগী লন-থুমশিং শেমগৎচবদগী লৈবাক অসিনা মপান লৈবাকশিংদগী পুশিল্লকপগী মখা পোন্দ্রে । মসিনা তাক্লিবদি হৌজিক ঐখোয়না মপান লৈবাকশিংদগী পুশিল্লক্লিবা অসি খ্বাইদগী চাউনা মপান্দা য়োনবা ঙম্বা লৈবাক অমা ওইরক্লগনি ।

প্রধান মন্ত্রীনা হায়খি মসি ফংবা ঙম্নবা, অকক্নবা হিরম খরদা ভারত মশা-মরোমদোম লেপচবা ঙম্নবা হিরম অমা, পোৎথোক অমা, থবক অমা ৱাখলদা লৈগদবনি অমসুং অচুম্বা মওংদা থবক তৌগদবনি । ইনর্জিগী লমদা ভারত মশা-মরোমদোম লেপচবা ঙম্নবা ঙসি মরুওইবা থবক অমা পায়খৎলে । মসিগী থৌরম অসিনা কোয়লা পেকপগী থবকশিংদা অওনবা পুরকপা খক নত্তনা নহারোল কয়া থবক লাখ কয়া ফংহন্নবগী অহৌবা অমনি । ঙসি ঐখোয়না কমর্সিএল কোয়লা মাইনিংগী নিলাম লাউবা হৌদোকপা খক নত্তনা চহি কয়া থিংজিন্দুনা লাক্লবা কোয়লাগী সেক্তর মনিংতমহল্লে ।

মহাক্না হায়খি ভারত মালেমদা কোয়লাগী রিজার্ব খ্বাইদগী য়াম্না লৈবা মরিসুবা লৈবাক্নি অমসুং পোৎথোক য়াম্না পুথোকপা অনিসুবনি , অদুগা মপান লৈবাকশিংদগী কোয়লা খ্বাইদগী য়াম্না পুশিল্লকপা অনিসুবনি । ফিবম অসিদা চহি কয়া লৈরক্লি অমসুং কোয়লাগী থবক অসি কেপতিব অমসুং নন-কেতিব মাইনশিংগী মরক্তা য়েৎশিন্নদুনা লৈরে । সেক্তর অসি চাংদম্নবা অমসুং অরোন-অথুপ লৈতনবা থবকশিংদগী লাপ্না থম্লিবা অসি অচৌবা ৱাথোক অমনি । মসিনা মরম ওইদুনা কোয়লাগী থবকশিংদা শেন থাদবা ৱাৎলে অমসুং মসিগী থবকশিং অসি ৱাহং হংনিঙাই ওইরে ।

প্রধান মন্ত্রীনা হায়খি কোয়লাগী থবকশিং ফিবম ফগৎহন্নবা ২০১৪দা কোএল লিঙ্কেজ হৌদোকখি । চাংদম্নবা, শেন থাদবা, শরুক য়াবা অমসুং তেক্নোলোজি হেনগৎহন্নবা কোয়লা অমসুং মাইনিংগী থবকশিং মপুংফানা হাংদোক্নবা ভারতনা ৱারেপ লৌরে । মাইনিংগী থবকশিংদা নৌনা চংলকপা লনাই কম্পেনিশিং শেন-থুমগী অৱাবা থেংনদনবা চেকশিন-থৌরাং পায়খৎলে । মপাঙ্গল কনবা মাইনিং অমসুং মিনরেলগী থবকশিং য়াওদনা মশা-মরোমদোম হিংজবা ঙম্লোই অমসুং মখোয় অনি ঐখোয়গী শেন-থুমগী মরুওইবা য়ুম্বীশিংনি ।

প্রধান মন্ত্রীনা হায়খি অওনবশিং অসিগী মতুংদা, কোয়লা পুথোকপা অমসুং কোয়লাগী থবক খুদিংমক মশা-মরোমদোম লেপচবা ঙম্লগনি । হৌজিক কোয়লাগী কৈথেল মনিংতমহল্লে মরম অদুনা সেক্তর অমনা মখোয়না দরকার ওইবা কোয়লা লৈবা য়ারগনি। হায়রিবা অওনবশিং অসিনা কোয়লাগী সেক্তর খক কান্নবা পীবতা নত্তনা অতোপ্পা সেক্তরশিং হায়বদি স্তিল, এলুমিনিয়ম, ফর্তিলাইজর অমসুং সিমেন্তগী সেক্তশিংসু কান্নবা ফংলগনি । মসিনা মৈ পুথোকপা হেনগৎহনবদা মতেং পাংলগনি ।

প্রধান মন্ত্রীনা হায়খি য়োৎ, বাউসাইদ অমসুং অতোপ্পা মিনরেলশিং কোয়লাগী রিজার্বশিংগী ময়া নক্না লৈবা মরম্না কোয়লা পেকপগী থবকশিংদা অওনবশিং পুরকপা অসিনা মিনিরেল সেক্তরদা অওনবশিং পুরকপগী থবক কনখৎহল্লে । কোয়লা কমর্সিএল মাইনিংগীদমক ঙসিগী নিলাম লাউবগী থবক হৌদোকপা অসি ইন্দস্ত্রিশিংগী মরী লৈনবা খুদিংমক্কী তোংজবনি । রাজ্য সরকারশিং শেল হেন্না ফংলগনি অমসুং লৈবাক অসি য়াম্লবা মীওই থবক ফংলগনি । সেক্তর খুদিংমক্তা কান্নবা ফংলগনি ।

প্রধান মন্ত্রী মোদীনা হায়খি থবক অসিনা ভারতনা অকোয়বগী ফিবম ঙাক্তুনা থম্নবা পায়খৎলিবা থবকশিং শোন্থহল্লোই । কোয়লাদগী গ্যাস শুংনবা খ্বাইদগী নৌবা তেক্নোলোজি শীজিন্নগনি অমসুং কোয়লাদগী গ্যাস শুংনবগী থবকশিংদা অকোয়বগী ফিবম ঙাক্কনি । কোয়লাদগী পুথোকপা গ্যাসনা গারি অমসুং চাক থোংবগী শীজিন্নগনি অমসুং য়ুরিয়া অমসুং স্তিল পুথোকপগী ইন্দস্ত্রিশিং য়োকখৎকনি । ২০৩০ ফাওবগী মনুংদা কোয়লা তন মিল্লিয়ন ১০০ রোম গ্যাস ওন্থোক্নবা সরকারনা পান্দম থম্লি অমসুং মসিগীদমক প্রোজেক মরি মশক খঙদোকলে অমসুং লুপা ক্রোর লিশিং ২০ রোম থাদগনি ।

প্রধান মন্ত্রীনা হায়খি কোয়লাগী থবকশিংদা অওনবশিং পুরকপা অসিনা ভারতকী নোংপোক থংবা অমসুং ময়াই থংবা শরুক, ঐখোয়গী ত্রাইবেলশিংগী মফমশিং চাউখৎপগী য়ুম্বীশিং ওইরগনি । হায়রিবা মফমশিং অসিদা ওইহন্নিংবা চাউখৎপা অমসুং নুংঙাইবগী থাক অদু য়ৌদ্রিবা মশিং য়াম্লবা জিলাশিং লৈরি । লৈবাক অসিগী এস্পিরেসনেল দিস্ত্রিক ১৬দা য়াম্লবা কোয়লা লৈরি অদুবু মসিগী কান্নবা মফম অদুগী মীওইশিংনা ফংবা ঙমদ্রি । হায়রিবা মফমশিং অসিগী মীওইশিং থবক শুনবা থাপ্লবা সহরশিংদা চৎলি ।

প্রধান মন্ত্রীনা হায়খি কমর্সিএল মাইনিংগী পায়খৎলিবা থবকশিং অসিনা মখোয়গী য়ুম ময়াদা মফম অদুগী মীওইশিং থবক ফংহন্দুনা ভারতকী নোংপোক অমসুং ময়াই থংবা শরুকশিং কান্নবা ফংলগনি । থবক য়াম্না ফংহন্নবা খুদোংচাবশিং লৈরিবা কোয়লা পেকপা অমসুং পুথোক-পুশিন তৌবগী থবকশিং অসিগীদমক মচাক-মথুমশিং শেমগৎনবা লুপা ক্রোর লিশিং ৫০ চাদিং তৌনবা সরকারনা ৱারেপ লৌরে ।

প্রধান মন্ত্রীনা হায়খি কোয়লাগী থবকশিংদা শেন থাদবা অমসুং অওনবশিং পুরকপনা ত্রাইবেলশিং হিংবদা লাইহনবদা অচৌবা থৌদাং অমা লৌগনি । কোয়লা পুথোকপগী ফংলকপা শেনফম অদুনা মফম অদুগী মীয়ামগী য়াইফনবা স্কিমশিং পায়খৎপদা শীজিন্নগনি । রাজ্যশিংনা মখা তানা দিস্ত্রিক মিনরেল ফন্দগী মতেং ফংলগনি অমসুং হায়রিবা ফন্দ অসিগী অয়াম্বা শরুক অকোয়বা মফমশিংগী চাউখৎ-থৌরাংগী থবকশিংদা শীজিন্নগনি ।

প্রধান মন্ত্রীনা হায়খি শেন-থুমগী থবকশিং য়াম্না য়াংনা মহৌশাগী ফিবমদা হঞ্জিল্লকপা মতমদা নিলাম লাউবগী থবক পাংথোকলি । কোয়লা শীজিন্নবগী চাং কোবিদ-১৯ মমাংগী থাক অদু য়ৌরে । মৈ শীজিন্নবা অমসুং পেত্রোলিয়মগী পোৎথোকশিং শীজিন্নবা, ই ৱে বিলশিং, তোল তেক্স লৌবা, রেলৱেজদা পোৎ পুবা , রিতেল দিজিতেল ত্রান্সসেক্সনগী চাং কোবিদ-১৯ মমাংগী থাক অদু য়ৌরে ।

মহাক্না হায়খি খুঙ্গংগী শেন-থুমগী ফিবমসু ফগৎলক্লে । চহি অসিদা কালেন লৌরোক্কী মখাদা মহৈ-মরোং হুনবা অমসুং গেহু লৈবা হেনগৎলে । মসিনা তাক্লিবদি লৌমীশিংগী ফুরিৎখাউদা শেল য়াম্না চঙখ্রে হায়বনি । ময়াম অসিনা ঐখোয়দা উৎলে মদুদি ভারতকী শেন-থুমগী ফিবম হান্নগী ফিবমদা হল্লক্লে অমসুং মাংলোমদা চঙশিল্লে ।

মমাংদা হেন্না শাথিবা অৱাবশিং লৈবাক অসিনা মাইপাক্না মায়োক্নদুনা লাকখিবা মরম্না মসিগী অৱাবা অসি ভারতনা নান্থোকপা ঙমগনি হায়না প্রধান মন্ত্রীনা থাজবা পীখি । প্রধান মন্ত্রীনা হায়খি ভারতনা অত্মানির্ভর ভারত ওইবা ঙমগনি অমসুং ভারতকী মাইপাকপা অমসুং চাউখৎপা অসি শোইফদ্রবনি । চয়োল খরগী মমাংদা ঐখোয়গী দরকার ওইবা এন-৯৫ মাক্সশিং, কোরোনা তেস্তিং কিৎশিং, পি.পি.ইশিং অমসুং ভেন্তিলেতরশিং মপান লৈবাকশিংদগী পুশিল্লক্লম্বা অদু হৌজিক মেক ইন ইন্দিয়াগী মখাদা লৈবাক অসিদা ওক্নবা পুথোক্লে । হায়রিবা মেদিকেলগী পোৎথোকশিং অসি য়াম্না থুনা ভারতনা মপান লৈবাকশিংদা য়োল্লগনি । ঐখোয়না অত্মানির্ভর ভারত অমা শেমগৎনবা মীয়ামগী থাজবা অমসুং থকশি-খাসি ৱাংনা থমগদবনি ।

*****