এম.এস.এম.এম.ই. অমসুং রোদ ত্রান্সপোর্ত অমসুং হায়ৱেজগী য়ুনিয়ন মিনিস্তর নিতিন গাদকরিনা ঙসি হায়খি অপীকপা য়ুনিৎশিং শৌগৎনবা শেনগী মতেং পীনবা অনৌবা শেন শান্দোকপা ইন্সতিত্যুৎশিং সরকারনা থিরি । অপীকপা ললোন-ইতিক্কী থবকশিংদা লাইনা শেন্থং ফংহনবদা মতেং পাংগদবা এন.বি.এফ.সি.শিং মপাঙ্গল কনগৎহন্নবা সরকারনা থবক পায়খৎলি ।

কোবিদ-১৯না এম.এস.এম.এম.ই.শিংদা পীরিবা চৈথং অমসুং মসি থেংননবা পায়খৎলিবা থবকশিংগী মতাংদা ভিদিও কনফরেন্সকী খুৎথাংদা পাংথোকপা মীফম অমদা মহাক্না কোলকাতা চেম্বর ওফ কম্মর্সকী মেম্বরশিংদা ৱা ঙাংখি ।

মিনিস্তরনা হায়খি মতম অসি হৌজিক ঐখোয়না কোবিদ-১৯ লাইচৎ অমসুং মসিনা থোকহল্লিবা শেন-থুমগী লৈতাদবা ফিবম অসিগী মায়োক্তা লাল অমা শোক্নরি । মরী লৈনবশিংনা থবক ফজনা পাংথোক্কদবনি অমসুং মসিগী অৱাবা তারবা মতম অসিদা ইন্দিস্ত্রিনা অচুম্বা ৱাখল্লোন অমদা লৈগদবনি । লনাই ওইনা অমসুং থবক শুফমশিংদা পি.পি.ই., মাক্স অমসুং সেনিতাইজর শীজিন্ননবা অমসুং থাপ্না লৈনবা মিনিস্তরনা তকশিনখি ।

হন্দক লাউথোকখিবা অখন্নবা ইকোনোমিক পেকেজ অত্মানির্ভর ভারত অভিয়ানগী মতাংদা মহাক্না হায়খি কোলেতরেল য়াওদবা লোন অমসুং দিসত্রেস ফন্দ য়াওনা এম.এস.এম.এম.ই.শিং শৌগৎনা থবক কয়া লাউথোক্লে ।লাউথোক্লিবা থবকশিং অসিনা এম.এস.এম.এম.ই.শিংনা শেন-থুমগী অৱাবা মায়োক্নবদা দরকার ওইবশিং ফংহনগনি ।

মিনিস্তরনা হায়খি ২০২০গী মার্চ ফাওবদা এম.এস.এম.এম.ই. লাখ ৬ অমুক হন্না শেমগৎলে অমসুং ২০২০গী দিশেম্বর ফাওবদা অহেনবা লাখ ২৫ কোনশিন্নবা মিনিস্ত্রিনা পান্দম থম্লি । হৌজিক মপান্দা থাদোকপদা এম.এস.এম.এম.ই.শিংনা মতেং পাংলিবা অসি চাদা ৪৮নি, মসি চাদা ৬০দা হেনগৎহল্লগনি । হৌজিক এম এস এম ইশিংনা থবক ক্রোর ১১ পীরি অমসুং মসি ক্রোর ৫ হেনগৎহল্লগনি ।

মহাক্না হায়খি মপান্দা পোৎ থাদোকপা হেনগৎহনবা অসি হৌজিক য়াম্না দরকার ওইরি । শেন্দোং হেন্না ফংনবা ঐখোয়না পোৎ পুথোকপদা অমসুং পুথোক-পুশিন তৌবদা চংবা শেনফম হন্থহনবা দরকার ওইরি । হৌখিবা চহি অহুমদা মপান্দা থাদোকখিবা অমসুং পুশিল্লকপগী অকুপ্পা মরোলশিং য়াওবা লাইরিকমচা অনি পুথোক্নবা এম এস এম ই মিনিস্ত্রিনা থবক পায়খৎলি ।

হংলকখিবা ৱাহংশিং অমসুং পাউখুম পীখিবশিংগী মনুংদা য়াওখিবদি: এম.এস.এম.এম.ই.শিংদা পীথোকপা থোকপা শেনফমশিং পীথোকপদা মতম থেংবা, এম.এস.এম.এম.ই.শিং মতেং পাংনবা চাদা ৪গী ইন্তরেস্ত সবভেন্সন পীবা অমসুং মখোয় এন.পি.এ. অমা ওইদনবা মতেং পাংবা , পায়খৎনবা থৌরাং তৌরিবা থবকশিং ফজনা পাংথোক্নবা কমদৌনা বেঙ্কশিং মতেং পাংবা অসিনচিংবনি ।

শরুক য়াখিবশিংনা হংলকপা ৱাহংশিংগী পাউখুম মিনিস্তরনা পীখি অমসুং সরকারগী মাইকৈদগী পাংবা য়াবা মতেং পাংগনি হায়না থাজবা পীখি ।

***