লৈঙাক্না গেহু লৈশিনবগী থৌরাং অসি কোবিদ-১৯ ভাইরস শন্দোরকপা অমদি লৈবাক পুম্বা থিংজিনখিবনা মরম ওইদুনা খুরৌ থাংবা কয়া লান্থোক্তুনা ২৪.০৫.২০২০দা এল.এম.তি. ৩৪১.৫৬ য়ৌদুনা মমাঙ চহীগী চাং মেত্রিক তন লাখ ৩৪১.৩১দগী হেল্লে‍। গেহু লোকপসি পাকতক্ননা মার্চ থা লোইশিল্লকপদা হৌই অমসুং লৈশিনবগী থৌরাং অসিনা চহী খুদিংগী এপ্রিলগী অহানবা চয়োলদা হৌই‍। অদুবু ২৪.০৫.২০২০ অমসুং ২৫গী লোন্নবা অহীং নোংয়াইদগী লৈবাক্কী ওইনা অথিংবা থমবা হৌখিবনা থৌরাং অদু লেপখি‍। মতমদুদা মহৈ মরোংশিং অদু মুনশিল্লক্তুনা লোকপা য়াবগী ফীভমদা লৈখি‍। ৱাফমসি খন্নরবা মতুংদা ইন্দিয়া লৈঙাক্না অথিংবা থম্লিঙৈ তাল্লক্তা লৌউ শিংউবা অমদি মসিগা মরী লৈনবা থবক থৌরমশিং কোমথোকপা হৌখি অমদি অয়াম্বা স্তেৎশিংদা লৈশিনবগী থৌরাং অসি ১৫.০৪.২০২০দগী হৌনখি‍। হরিয়ানাদদি খরা থেংথনা ২০.০৪.২০২০দগী হৌখি‍।

মসিদা খ্বাইদগী চাউনা শিংনবদি লাইচৎ মনুংদুদা লৈশিনবগী থৌরাং অদু খুদোংথিনিংঙাই ওইরোইদবা মওংদা পাঙথোকপা অসিনা ওইখি‍। মসি মীয়ামদা ৱাখল তাহনবা, সোসিএল দিসন্তেন্সিং অমসুং তোক্নোলোজী শীজিন্নদুনা মায়ওন য়াম্বা লাল্লোং শীজিন্নদুনা ফংবা ঙমখি‍। লৈবগী মফমশিং মশীং য়াম্না হেনগৎহন্দুনা মফমশিংদা লৌমী মশীং য়াম্না লাকপা হন্থহনখি‍। গ্রাম পঞ্চায়ৎকী থাক্তা লিরিবা ফেসিলিতি খুদিংমক শীজিন্নদুনা অনৌবা সেন্তর কয়া লিংখৎখি‍ অমদি চাউনা লৈবা স্তেৎশিংদা হায়বদি পঞ্জাবতা সেন্তর ১৮৩৬তগী ৩৬৮১দা, হরিয়ানাদা ৫৯৯দগী ১৮০০দা অমসুং মধ্য প্রদেশতা ৩৫৪৫তগী ৪৪৯৪দা মশীং য়াম্না হেনগৎহনবা ঙমখি‍। তেক্নোলোজী শীজিন্নদুনা লৌমীশিংদা মখোয়না লাক্কদবা অকক্নবা নুমীৎশিং অমদি পালি খঙহন্দুনা মী মশীং য়াম্না পুনহন্দবা ঙমখি‍। সোসিএল দিসন্তেন্সিংগী চৎন-কাংলোনশিং নীংথিনা ইনখি অমদি মহিক মতাং হাত্তোকপগী থৌরাংশিং চাং নাইনা লৌখৎখি‍। পঞ্জাবতা লৌমী খুদিংমক্তা মখোয়গী পোত্থোকশিং থাদনবা তোখায়বা মফম পীখি অমদি অতোপ্পা মীওই অমত্তা মফম অদুদা চঙবা য়াহন্দে‍। নুমিৎ খুদিংগী নিলাম লাউফমদুদা হকথেংননা শরুক য়াগদবা মীওই নত্তনা অতৈ চঙহনখিদে‍।

ভাইরস শন্দোকপগী খুদোংথিবগী মথক্তা গেহু লৈশিনবা মতমদতা লৈশিনগদৌরিবা এজেন্সীশিংনা অচৌবা শীংনবা ৩ মায়োক্নখি‍। জুত মিলশিং মথৌ তৌবা লেপখিবনা মরম ওইদুনা গেহু হান্নবা শুতলিগী বোরা পুথোকপা লেপখিদুনা অচৌবা ৱাথোক অমা ওইখি‍। মদু প্লাস্তিক্কী বোরা অমদি মশা ফরিবা হান্না শীজিন্নরুরবা বোরাশিং শীজিন্নদুনা লাকশিনখি‍। লেপ্পা লৈতনা য়েংশিন্দুনা অমদি মতম চানা থবক লৌখত্তুনা হান্ননবা পোৎচাক ৱাৎপনা মরম ওইদুনা লৈবাক্কী মফম খুদিংমক্তা লৈশিনবগী থবক্তা খুরৌ থাংবা ওইহনখিদে‍।

চাউনা লৈশিনগদবা স্তেৎশিংদা মতম চাদবা নোং চুরক্তুনা গেহুশিং নোং চোৎপগী ফীভম লাকখি‍। অদুগুম্বা পোৎচাকশিং অদু চৎনরিবা কাংলোনগী মতুং ইন্না লৈশিনবা য়াদবনা মরম ওইদুনা লৌমীশিংদা খুদোংচাদবা কয়া মায়োক্নবগী ফীভম লাকখি‍। ইন্দিয়া লৈঙাক্না অমদি ফুদ কোর্পোরেসন ওফ ইন্দিয়া (এফ.সি.আই.)না খুদক্তা খুৎ থিংজিন্দুনা সাইন্তিফিক এনালাইসিস তৌরবা মতুংদা লৈশিনগদৌরিবা পোত্থোকশিং অদুসু কঞ্জ্যুমরশিংনা শীজিন্নবদা কায়রোইদবা মওংদা অমদি লৌমীশিংদসু অৱাবা মীরোইদবা মওংদা স্পেসিফিকেসন হোংদোকখি‍।

অহুমশুবা শীংনবা অদুনা শিন্মী মরাং কায়না লৈতবা অমদি ভাইরস অসিনা মীয়ামদা পোকহল্লিবা অকিবা অসিনি‍। মসি স্তেৎকী এদমিনিস্ত্রেসননা লোকেলগী থাক্তা থাজবা পীবগী থৌরাং কয়া লৌখৎলবা মতুংদা কোকহনবা ঙমখি‍। শিন্মীশিংদা মায়খুম, সেনিতাইজরনচিংবা ঙাকথোক্নবগী মচাক মথুমশিং মরাং কায়না পীবগা লোয়ননা মখোয়দা খুদোংথিবা নংদনবা লৌখৎফম থোকপা চেকশিন থৌরাং মতিক চানা লৌখৎখি‍।

ইন্দিয়া লৈঙাক, এফ.সি.আই. স্তেৎ লৈঙাকশিং অমসুং মখোয়গী এজেন্সীশিংনা নীংথিনা কোক চুংশিন্নদুনা চাথোক মরাং কায়ননা লৈবা স্তেৎশিংদা গেহু লৈশিনবগী থৌরাং নীংথিনা পায়খৎপা ঙমদুনা লৌমীশিংদা মতেং পাংবা ঙমখি অমদি সেন্ত্রেল পুলদা স্তোক থনগৎহনবা ঙমখি‍। গেহু লৈশিনফম ওইরিবা স্তেৎশিংদা লৈখিবা লৈশিনবগী দেতা মখাদা পীরি:

*****