ঙসি ত্রান্সপোর্ত অমসুং হাইৱেজগী য়ুনিয়ন মিনিস্তর নীতিন গরকরীনা হায়খ্রে মদুদি অৱাংবা থাক্কী মহৈ লোয়শঙশিংনা শেন-থুম ফজনা শিজিন্নবা য়াম্না মরুওই । হায়রিবা মহৈ লোয়শঙশিং অসিনা মগুন হন্থহন্দনা মখোয়গী চাদিং হন্থহনবা দরকার ওই ।

তুংদা ওইরক্কদবা অৱাংবা থাক্কী মহৈ-মশিং তম্বগী মতাংদা ভিদিও কনফরেন্সকী খুৎথাংদা এম.আই.তি এ.দি.তি. য়ুনিভর্সিতীগী মীহুৎশিংগা উনবা অমদা মহাক্না ৱা ঙাংখি ।

মিনিস্তরনা হায়খি, য়ুনিভর্সিতীশিং ফগৎহনবা দরকার ওই অমসুং খুন্নাইদা মগুন লৈবা লাইরিক-লাইসু তম্বগী থবক ফগৎহনগদবনি । ঐখোয়গী নহারোলশিংনা মখোয়গী থৌনাশিং অমসুং অশোনবশিং খঙগদবনি অমসুং মখোয়না থেংনরিবা অৱাবশিং অদু খুদোংচাবশিং ওন্থোকপা ঙমগদবনি । তাঞ্জা অসিদা লৈবাক অসিগী ওইনা নহারোলশিংগী তৌবা ঙম্বা হেনগৎহনবা অসি য়াম্না মরুওই ।

মহাক্না হায়খি মরীলৈনবশিংগী মরক্ত পুন্না থবক তৌমিন্নবা , মতেং পাংনবা অমসুং অপুনবা ৱাখল্লোন অমদা থবক তৌমিন্নবা দরকার ওই অমসুং মসিগী অৱাবা তাঙ্কক অসি থেংননবা ইন্দস্ত্রীশিংনা মশা-মরোমদোম থাজবা থমগদবনি ।

মহাক্না হায়খি ইন্দস্ত্রীনা অনৌবা পুথোকপা, ওন্ত্রপ্রিনরশিপ , সাইন্স, তেক্নোলোজী, রিসর্স স্কিল অমসুং লৌশিংনা শেন তানবগী থবকশিংদা মিৎয়েং চংগদবনি । জাপানগী ইনভেস্তমেন্তশিং চাইনাদগী লৌথোক্লগা অতোপ্পা মফম অমদা হোংনবা জাপান সরকারনা মসিগী ইন্দস্ত্রীশিংদা অখন্নবা পেকেজ অমা পীরি । মসি ভারতকী খুদোংচাবা অমনি অমসুং মসিগী কান্নবা লৌগদবনি ।

মহাক্না হায়খি ইন্দস্ত্রীশিং মফম কয়াদা চাইথোক্তুনা লিংখৎনবা থবক পায়খৎপা দরকার ওই অমসুং লৈবাক অসিগী খুঙ্গং, ত্রাইবেলশিংগী মফমশিং অমসুং চাউখৎত্রিবা মফমশিংদা মিৎয়েং চংগদবনি । লৌউ-শিংউদা য়ুম্ফম ওইবা ইন্দস্ত্রীশিং থিদোকপা মথৌ তাই ।

মিনিস্তরনা হায়খি অমনবা গারীশিং অনৌবা গারীশিংনা মহুৎশিনবগী থৌশিল অমা হৌদোক্নবা সরকারনা খন্নরি । হিথাংফমশিং ময়াদা রিসাইক্লিং ক্লস্তরশিং লিংখৎপা য়াই, মসিনা লৈবাক অসিদা গারী শাবগী ইন্দস্ত্রী চাউখৎহনগনি ।

ওন্ত্রপ্নিনর অমা ওইবদা দরকার ওইবা গুনশিং অমসুং ৱারেপ লৌবগী মতাংদা শরুক য়াখিবশিংনা হংলকপা ৱাহংশিংগী পাউখুমশিং মিনিস্তরনা পীখি ।

****