ಗ್ರಾಮೀಣ ರಸ್ತೆಗಳ ನಿರ್ಮಾಣದಲ್ಲಿ ನಾರಿನ ಭೂ ಹೊದಿಕೆ ಬಳಕೆಗೆ ಒಪ್ಪಿಗೆ

ಈ ನಿರ್ಧಾರದಿಂದ ವಿಶೇಷವಾಗಿ ಕೋವಿಡ್ ಜಾಗತಿಕ ಸಾಂಕ್ರಾಮಿಕದ ಹಿನ್ನೆಲೆಯಲ್ಲಿ ನಾರು ಉದ್ಯಮಕ್ಕೆ ಉತ್ತೇಜನ ದೊರೆಯಲಿದೆ

ನಾರಿನ ಭೂ ಹೊದಿಕೆಯು ನೈಸರ್ಗಿಕ, ಬಲಿಷ್ಟ, ಧೀರ್ಘಾವಧಿ ಬಾಳ್ವಿಕೆಯ, ಕೊಳೆಯಲಾರದ, ನೀರು ಬಸಿದು ಹೋಗುವ , ತೇವಾಂಶ ಪ್ರತಿಬಂಧಕ ಮತ್ತು ಯಾವುದೇ ಸೂಕ್ಷ್ಮಾಣುಗಳ ದಾಳಿಯನ್ನು ತಡೆಯಬಲ್ಲ ವಸ್ತುವಾಗಿ ಪರಿಗಣಿಸಲ್ಪಟ್ಟಿದ್ದು, ಇದು ಗ್ರಾಮೀಣ ರಸ್ತೆ ನಿರ್ಮಾಣಕ್ಕೆ ಅತ್ಯುತ್ತಮ ಸಾಮಗ್ರಿ ಎಂದು ಅಂಗೀಕೃತವಾಗಿದೆ.

ನಾರಿನ ಭೂ ಹೊದಿಕೆಯನ್ನು ಪಿ.ಎಂ.ಜಿ.ಎಸ್.ವೈ-III ಅಡಿಯಲ್ಲಿ ಗ್ರಾಮೀಣ ರಸ್ತೆಗಳ ನಿರ್ಮಾಣಕ್ಕೆ ಬಳಸಲಾಗುತ್ತದೆ ಎಂದು ಭಾರತ ಸರಕಾರದ ಗ್ರಾಮೀಣಾಭಿವೃದ್ದಿ ಸಚಿವಾಲಯದಡಿಯ ರಾಷ್ಟ್ರೀಯ ಮೂಲಸೌಕರ್ಯ ಅಭಿವೃದ್ದಿ ಏಜೆನ್ಸಿಯ ಪ್ರಕಟಣೆ ತಿಳಿಸಿದೆ.

ಈ ಬೆಳವಣಿಗೆಯ ಬಗ್ಗೆ ಮಾತನಾಡಿರುವ ಎಂ.ಎಸ್.ಎಂ.ಇ . ಮತ್ತು ರಸ್ತೆ ಸಾರಿಗೆ ಹಾಗು ಹೆದ್ದಾರಿಗಳ ಸಚಿವರೂ ಹಾಗು ನಾರಿನ ಎಳೆಗಳ ಪರ್ಯಾಯ ಬಳಕೆಯ ಬಗ್ಗೆ ಹಿನ್ನೆಲೆಯಲ್ಲಿ ನಿಂತು ಕಾರ್ಯಪ್ರವೃತ್ತರೂ ಆಗಿದ್ದ ಶ್ರೀ ನಿತಿನ್ ಗಡ್ಕರಿ ಅವರು” ಇದೊಂದು ಮಹತ್ವಪೂರ್ಣ ಬೆಳವಣಿಗೆ , ನಾವು ಈಗ ನಾರಿನ ಭೂ ಹೊದಿಕೆಗಳನ್ನು ರಸ್ತೆ ನಿರ್ಮಾಣಕ್ಕೆ ಬಳಸುವುದರಲ್ಲಿ ಯಶಸ್ವಿಯಾಗಿದ್ದೇವೆ . ಈ ನಿರ್ಧಾರ ನಾರಿನ ಉದ್ಯಮಕ್ಕೆ ಅದರಲ್ಲೂ ವಿಶೇಷವಾಗಿ ಕೋವಿಡ್ -19 ಜಾಗತಿಕ ಸಾಂಕ್ರಾಮಿಕದ ಈ ಸಂದರ್ಭದಲ್ಲಿ ಬಹಳ ದೊಡ್ಡ ಉತ್ತೇಜನ ನೀಡಲಿದೆ” ಎಂದರು.

ರಸ್ತೆ ನಿರ್ಮಾಣಕ್ಕೆ ಪಿ.ಎಂ.ಜಿ.ಎಸ್.ವೈ. ನ ಹೊಸ ತಂತ್ರಜ್ಞಾನ ಮಾರ್ಗದರ್ಶಿಗಳ ಪ್ರಕಾರ ಪ್ರತೀ ಪ್ರಸ್ತಾವಗಳ ಗುಂಪಿನಲ್ಲಿ 15 % ಉದ್ದವನ್ನು ಹೊಸ ತಂತ್ರಜ್ಞಾನ ಬಳಸಿ ನಿರ್ಮಿಸಬೇಕಾಗುತ್ತದೆ. ಇದರಲ್ಲಿ 5 % ರಸ್ತೆಗಳು ಐ.ಆರ್.ಸಿ. ಮಾನ್ಯತೆ ಪಡೆದ ತಂತ್ರಜ್ಞಾನ ಬಳಸಿ ನಿರ್ಮಾಣ ಮಾಡಬೇಕಾಗುತ್ತದೆ. ಐ.ಆರ್.ಸಿ.ಯು ಈಗ ನಾರಿನ ಭೂ ಹೊದಿಕೆಯನ್ನು ಗ್ರಾಮೀಣ ರಸ್ತೆಗಳ ನಿರ್ಮಾಣಕ್ಕೆ ಬಳಸಲು ಮಾನ್ಯತೆ ನೀಡಿದೆ.

ಈ ಸೂಚನೆಗಳ ಪ್ರಕಾರ ಪಿ.ಎಂ.ಜಿ.ಎಸ್.ವೈ-III ಅಡಿಯಲ್ಲಿ ನಿರ್ಮಾಣವಾಗುವ ರಸ್ತೆಗಳ 5 % ಉದ್ದದ ರಸ್ತೆಗಳನ್ನು ನಾರು ಭೂ ಹೊದಿಕೆಗಳನ್ನು ಬಳಸಿ ನಿರ್ಮಿಸಲಾಗುತ್ತದೆ. ಇದರನ್ವಯ ಆಂಧ್ರಪ್ರದೇಶದಲ್ಲಿ 164 ಕಿಲೋ ಮೀಟರ್ ರಸ್ತೆಗಳನ್ನು ನಾರಿನ ಭೂ ಹೊದಿಕೆಗಳನ್ನು ನಿರ್ಮಿಸಿ ರಚಿಸಲಾಗುತ್ತದೆ. ಗುಜರಾತಿನಲ್ಲಿ 151 ಕಿಲೋ ಮೀಟರ್, ಕೇರಳದಲ್ಲಿ 71 ಕಿಲೋ ಮೀಟರ್ , ಮಹಾರಾಷ್ಟ್ರದಲ್ಲಿ 328 ಕಿಲೋ ಮೀಟರ್, ಒಡಿಶಾದಲ್ಲಿ 470 ಕಿಲೋ ಮೀಟರ್ , ತಮಿಳುನಾಡಿನಲ್ಲಿ 369 ಕಿಲೋ ಮೀಟರ್, ತೆಲಂಗಾಣದಲ್ಲಿ 121 ಕಿಲೋ ಮೀಟರ್, ರಸ್ತೆಗಳನ್ನು ನಾರಿನ ಹೊದಿಕೆ ಬಳಸಿ ನಿರ್ಮಿಸಲಾಗುತ್ತದೆ. ಹೀಗೆ 1674 ಕಿಲೋ ಮೀಟರ್ ರಸ್ತೆಯನ್ನು 7 ರಾಜ್ಯಗಳ ವ್ಯಾಪ್ತಿಯಲ್ಲಿ ನಾರಿನ ಭೂ ಹೊದಿಕೆಯನ್ನು ಬಳಸಿ ನಿರ್ಮಿಸಲಾಗುತ್ತದೆ. ಇದಕ್ಕಾಗಿ 1 ಕೋಟಿ ಚದರ ಮೀಟರ್ ನಾರಿನ ಭೂ ಹೊದಿಕೆ ಅವಶ್ಯವಿದ್ದು, ಅಂದಾಜು ಮೌಲ್ಯ ಸುಮಾರು 70 ಕೋಟಿ ರೂ.

ಈ ನಿರ್ಧಾರವು ದೇಶದಲ್ಲಿ ನಾರು ಭೂ ಹೊದಿಕೆಗೆ ಉತ್ತಮ ಮಾರುಕಟ್ಟೆಯನ್ನು ಒದಗಿಸಲಿದೆ ಮತ್ತು ಕೋವಿಡ್ -19 ಪೀಡಿತ ನಾರು ಉದ್ಯಮಕ್ಕೆ ವರವಾಗಲಿದೆ.

***