সছিদ্ৰ সুঁতা, প্ৰাকৃতিক, শক্তিশালী, স্থায়ী, পচন ৰোধ ক্ষমতাসম্পন্ন, জীৱানুৰ আক্ৰমণৰ পৰা মুক্ত কয়ৰ জিঅ’ টেক্সটাইলে গ্ৰাম্য পথ নিৰ্মাণত ব্যৱহৃত উপযোগী সামগ্ৰী হিচাপে স্বীকৃতি লাভ কৰিছে৷

ভাৰত চৰকাৰৰ কেন্দ্ৰীয় গ্ৰামোন্নয়ন মন্ত্ৰালয়ৰ অধীনত ৰাষ্ট্ৰীয় গ্ৰাম্য আন্তঃগাঁথনি উন্নয়ন অভিকৰণৰ সৈতে হোৱা আলোচনাত পিএমজিএছৱাই-৩ পৰ্যায়ত গ্ৰাম্য পথ নিৰ্মাণত কয়ৰ জিঅ’  টেক্সটাইল ব্যৱহাৰ কৰা বিষয়টোৱে স্থান লাভ কৰে৷

এই সন্দৰ্ভত কেন্দ্ৰীয় এমএছএমই তথা পথ পৰিবহণ আৰু ঘাইপথ মন্ত্ৰী মন্ত্ৰী শ্ৰী নীতিন গাডকাৰীয়ে কয়, “এয়া এক গুৰুত্বপূৰ্ণ উন্নয়ন, কিয়নো এতিয়া কয়ৰ জিঅ’ টেক্সটাইলৰ জৰিয়তে আমি পথ নিৰ্মাণত সফল হৈছো৷ এই সিদ্ধান্তই বিশেষকৈ ক’ভিড মহামাৰীৰ জটিল ক্ষণত নাৰিকল উদ্যোগক উদ্ননি যোগাব৷”

পিএমজিএছৱাইৰ নতুন প্ৰযুক্তি নিৰ্দেশনা অনুসৰি পথ নিৰ্মাণৰ ক্ষেত্ৰত প্ৰতিটো পৰ্যায়ৰ পথ নিৰ্মাণৰ ১৫% পথত নতুন প্ৰযুক্তি ব্যৱহাৰ কৰিব লাগিব৷ ইয়াৰে ৫% পথ আইআৰচি স্বীকৃতিপ্ৰাপ্ত প্ৰযুক্তি ব্যৱহাৰ কৰি নিৰ্মাণ কৰা হ’ব৷ এই আইআৰচিয়ে এতিয়া গ্ৰাম্য পথ নিৰ্মাণৰ বাবে কয়ৰ জিঅ’ টেক্সটাইলক স্বীকৃতি প্ৰদান কৰিছে৷

এই পৰামৰ্শৰ ভিত্তিত পিএমজিএছৱাই-৩ পৰ্যায়ত অধীনত গ্ৰাম্য পথৰ ৫% কয়ৰ জিঅ’ টেক্সটাইল ব্যৱহাৰ কৰি নিৰ্মাণ কৰা হ’ব৷ সেই হিচাপে কয়ৰ জিঅ’ টেক্সটাইল ব্যৱহাৰ কৰি অন্ধ্ৰপ্ৰদেশত ১৬৪ কিলোমিটাৰ, গুজৰাটত ১৫১ কিলোমিটাৰ, কেৰালাত ৭১ কিলোমিটাৰ, মহাৰাষ্ট্ৰত ৩২৮ কিলোমিটাৰ, ওড়িশাত ৩৬৯ কিলোমিটাৰ আৰু তেলেংগানাত ১২১ কিলোমিটাৰসহ মুঠ ১,৬৭৪ কিলোমিটাৰ পথ নিৰ্মাণ কৰা হ’ব৷ ইয়াৰ বাবে ১ কোটি বৰ্গ মিটাৰ কয়ৰ জিঅ’ টেক্সটাইলৰ প্ৰয়োজন হ’ব আৰু এই ক্ষেত্ৰত ব্যয় হ’ব ৭০ কোটি টকা৷

ক’ভিড-১৯ৰ ফলত প্ৰভাৱিত নাৰিকল উদ্যোগত এই সিদ্ধান্তই এক বজাৰ সৃষ্টিৰ সম্ভাৱনাকে প্ৰকট কৰিছে৷

*****

RCJ/SKP/IA/DB