പ്രധാനമന്ത്രി 2020 മെയ് 12 ന് ഇന്ത്യയുടെ മൊത്തം ആഭ്യന്തര ഉൽപാദനത്തിന്റെ 10 ശതമാനത്തിന് തുല്യമായ 20 ലക്ഷം കോടി രൂപയുടെ പ്രത്യേക സാമ്പത്തിക, സമഗ്ര പാക്കേജ് പ്രഖ്യാപിച്ചു. "ആത്മനിർഭർ ഭാരത് അഭിയാൻ"അഥവാ സ്വാശ്രയ ഭാരത് പ്രസ്ഥാനത്തിലേക്ക് നാം ചുവടുമാറ്റണം എന്നും അദ്ദേഹം ആഹ്വാനം ചെയ്തിരുന്നു. ഇത് സാക്ഷാത്കരിക്കുന്നതിനു ആവശ്യമായ അഞ്ചു തൂണുകളെപ്പറ്റിയും - സമ്പദ്‌വ്യവസ്ഥ, അടിസ്ഥാനസൗകര്യങ്ങൾ, സംവിധാനക്രമങ്ങൾ ,ഊർജ്വസ്വലമായ മാനവിഭവശേഷി, ഡിമാൻഡ്- അദ്ദേഹം എടുത്തുപറഞ്ഞിരുന്നു.

കേന്ദ്ര ധനമന്ത്രി ശ്രീമതി നിർമല സീതാരാമൻ ഇന്ന്‌ കുടിയേറ്റ തൊഴിലാളികൾ, തെരുവ് കച്ചവടക്കാർ, നഗരത്തിലേക്കു കുടിയേറിയ ദരിദ്രർ, ചെറുകിട വ്യാപാരികൾ സ്വയംതൊഴിലുകാർ, ചെറു കിട നാമമാത്ര കർഷകർ എന്നിവ നേരിടുന്ന ബുദ്ധിമുട്ടുകൾ പരിഹരിക്കുന്നതിനുള്ള രണ്ടാം ഘട്ട നടപടികൾ പ്രഖ്യാപിച്ചു. കുടിയേറ്റക്കാർ, കൃഷിക്കാർ, ചെറുകിട വ്യാപാരികൾ, തെരുവ് കച്ചവടക്കാർ എന്നിവരുൾപ്പെടെ ദരിദ്രരെ സഹായിക്കുന്നതിനുള്ള ഹ്രസ്വകാല, ദീർഘകാല നടപടികളാണ്‌ നിർമല സീതാരാമൻ വാർത്താസമ്മേളനത്തിൽ വിശദീകരിച്ചത്‌.

1. കുടിയേറ്റക്കാർക്ക് 2 മാസത്തേക്ക് സൗജന്യ ഭക്ഷ്യധാന്യം

സംസ്ഥാനങ്ങളിലെയും കേന്ദ്രഭരണപ്രദേശങ്ങളിലെയും കുടിയേറ്റ തൊഴിലാളികൾക്ക്, ഒരു കുടിയേറ്റ തൊഴിലാളിയ്ക്ക് 5 കിലോയും ഒരു കുടുംബത്തിന് ഒരു കിലോ കടലയും എന്ന നിരക്കിൽ രണ്ട് മാസത്തേക്ക് സൗജന ഭക്ഷ്യധാന്യം അനുവദിക്കും. 2020 മെയ്, ജൂൺ മാസങ്ങളിലേക്കാണ്‌ ഇത്‌ നൽകുക. ദേശീയ ഭക്ഷ്യസുരക്ഷാ പദ്ധതിയിൽ ഇല്ലെങ്കിലും സംസ്ഥാനത്തിന്റെയോ കേന്ദ്ര ഭരണപ്രദേശത്തിന്റെയോ റേഷൻ കാർഡ്‌ ഇല്ലെങ്കിലും കുടുങ്ങിക്കിടക്കുന്ന കുടിയേറ്റ തൊഴിലാളികൾക്ക് ഇതിന്‌ അർഹതയുണ്ട്. പദ്ധതിയിൽ വിഭാവനം ചെയ്തിട്ടുള്ള ഭക്ഷ്യധാന്യ വിതരണത്തിനായി പ്രത്യേക സംവിധാനം ഏർപ്പെടുത്താൻ സംസ്ഥാനങ്ങൾക്കും കേന്ദ്രഭരണപ്രദേശങ്ങൾക്കും നിർദ്ദേശം നൽകും. 8 ലക്ഷം മെട്രിക് ടൺ ഭക്ഷ്യധാന്യവും 50,000 മെട്രിക് ടൺ കടലയും അനുവദിക്കും. ഇതിനായി ചെലവാകുന്ന 3500 കോടി രൂപ കേന്ദ്ര സർക്കാർ വഹിക്കും.

2. ഒരു രാജ്യം, ഒരു റേഷൻ കാർഡ് 2021 മാർച്ചിൽ

ദേശീയ തലത്തിൽ റേഷൻ കാർഡ്‌ പോർട്ടബിലിറ്റി 23 സംസ്ഥാനങ്ങളിലേക്ക് വ്യാപിപ്പിക്കും. അതിലൂടെ, പൊതുവിതരണ സംവിധാനത്തിന്റെ 83% വരുന്ന 67 കോടി ഗുണഭോക്താക്കൾ 2020 ഓഗസ്റ്റിൽ റേഷൻ കാർഡുകളുടെ ദേശീയ പോർട്ടബിലിറ്റിയിൽ ഉൾപ്പെടും. 2021 മാർച്ചോടെ സമ്പൂർണ ദേശീയ പോർട്ടബിലിറ്റി കൈവരിക്കാനാകും. ഇത് പ്രധാനമന്ത്രിയുടെ സാങ്കേതിക വിദ്യാ ഉപയോഗിച്ചുള്ള പരിഷ്കാര നടപടികളുടെ ഭാഗമാണ്. രാജ്യത്തെ ഏതെങ്കിലും റേഷൻ കടയിൽ നിന്ന് പൊതുവിതരണ ആനുകൂല്യങ്ങൾ കൈപ്പറ്റാൻ കുടിയേറ്റ തൊഴിലാളിയെയും അവരുടെ കുടുംബത്തെയും ഇത് പ്രാപ്തമാക്കും. സഞ്ചരിച്ചു കൊണ്ടിരിക്കുന്നവർക്ക്‌ പ്രത്യേകിച്ച് കുടിയേറ്റ തൊഴിലാളികൾക്ക് രാജ്യത്തുടനീളമുള്ള പൊതുവിതരണ സംവിധാനത്തിന്റെ ആനുകൂല്യം ലഭിക്കുമെന്ന്ഉറപ്പാക്കും.

3. കുടിയേറ്റ തൊഴിലാളികൾക്കും നഗര ദരിദ്രർക്കും താങ്ങാനാവുന്ന വാടക വീടുകൾ

കുടിയേറ്റ തൊഴിലാളികൾക്കും ദരിദ്രർക്കും മിതമായ നിരക്കിൽ വാടകയ്ക്ക് താമസിക്കാനുള്ള വീടുകൾ നിർമിക്കാനുള്ള പദ്ധതി കേന്ദ്ര സർക്കാർ ആരംഭിക്കും. കുടിയേറ്റ തൊഴിലാളികൾക്കും നഗരങ്ങളിലെ ദരിദ്രർക്കും വിദ്യാർത്ഥികൾക്കും താങ്ങാനാവുന്ന വാടക സമുച്ചയങ്ങൾ സുരക്ഷയും നല്ല ജീവിതനിലവാരവും പ്രദാനം ചെയ്യും. നഗരങ്ങളിലെ സർക്കാർ ധനസഹായമുള്ള ഭവന സമുച്ചയങ്ങളെ പൊതു സ്വകാര്യ ഉടമസ്ഥതയ്‌ക്കു കീഴിൽ വാടക ഭവന സമുച്ചയങ്ങളാക്കി (എആർഎച്ച്‌സി) മാറ്റും.
നിർമാണ യൂണിറ്റുകൾ, വ്യവസായങ്ങൾ, സ്ഥാപനങ്ങൾ, അസോസിയേഷനുകൾ എന്നിവക്ക്‌ അവരുടെ സ്വന്തം സ്ഥലത്ത്‌ വാടക ഭവന സമുച്ചയങ്ങൾ നിർമിക്കാനും പ്രവർത്തിപ്പിക്കാനും അനുവദിക്കും.
സമാന രീതിയിൽ സംസ്ഥാന ഏജൻസികളെയും കേന്ദ്ര സർക്കാർ സംഘടനകളെയും പ്രോത്സാഹിപ്പിക്കും. പദ്ധതിയുടെ കൃത്യമായ വിവരങ്ങൾ മന്ത്രാലയം പുറത്തുവിടും.

4. മുദ്ര വായ്പക്കാർക്ക് 12 മാസത്തേക്ക് 2% പലിശ ഇളവ്‌

50,000 രൂപയിൽ താഴെ വായ്പ എടുത്തിട്ടുള്ള മുദ്ര ശിശു വായ്പക്കാർക്ക് 12 മാസത്തേക്ക് കേന്ദ്രസർക്കാർ 2 ശതമാനം പലിശ ഇളവ്‌ നൽകും. നിലവിലെ മുദ്ര ശിശു വായ്പകളുടെ വിതരണം 1.62 ലക്ഷം കോടിരൂപയാണ്. തീരുമാനത്തിലൂടെ മുദ്ര വായ്പക്കാർക്ക്‌ ഏകദേശം 1,500 കോടി രൂപയുടെ ആശ്വാസം ലഭിക്കും.