কেন্দ্রগী লো মন্ত্রী, শ্রী রবী শঙ্কর প্রশাদনা ঙসি ভারতকী এতোর্নী জেনেরেলনা লুচিংবা তীম অমগা ভিদিও কনফরেন্সিংগী খুত্থাংদা ৱারী শানখ্রে। ভারতকী এতোর্নী জেনেরেল শ্রী কে.কে. ভেনুগোপাল, সোলিসিতর জেনেরেল শ্রী তুশার মেহতা, এদিস্নেল সোলিসিতর জেনেরেল অমসুং এসিস্তেন্ত সোলিসিতর জেনেরেল পুম্নমক, দিপার্তমেন্ত ওফ লিগেল এফিয়র্সকী সেক্রেতরী অমসুং দিপার্তমেন্ত ওফ জস্তিস্কী সেক্রেতরীনা মীফম অদুদা শরুক য়াখি। কোরোনা ভাইরস পাক শন্না শন্দোক্লকপা থিংনবা চত্থবা লোকদাউনগী মনুংদা অসিগুম্বা মীফম পাংথোকপা অসি মসিনা অহানবনি।

লো মন্ত্রীনা মহাক্কী ৱা ঙাংবগী অহৌবদা হায়খিবদা ঐখোয় পুম্নমক লুরবা তাঞ্জা অমদা লৈরি অমসুং প্রধান মন্ত্রী শ্রী নরেন্দ্র মোদীনা লৈবাক অসিবু তীম ইন্দিয়া ওইনা লুচিংদুনা ভারত সরকার অমসুং রাজ্যগী সরকারশিংনা তোইনা ৱারী ৱাতাই শাদুনা ইরাং অসি থেংননবা মতমগা চান্নবা মহৈ পুরক্তুনা লাক্লি। শ্রী প্রশাদনা লো ওফিসরশিংদা হায়খিবদা প্রধান মন্ত্রী মশামক্না মুখ্য মন্ত্রীশিংগা ভর্চুৱেলগী মীফম কয়া তৌদুনা লোকদাউনগী তঙাইফদবগী মান্নবা ৱারেপ পুরক্তুনা লাক্লি অমসুং মসিগী মতুংদা লাক্কদবা খুদোংচাদবা কয়াগী মতাংদসু খন্ন-নৈনরি। কেবিনেৎ সেক্রেতরী অমসুং হেলথ সেক্রেতরীশিংনসু তোঙান তোঙানবা চীফ সেক্রেতরীশিং অমসুং হেলথ সেক্রেতরী কয়াগা পাউ ফাওনরি। য়াম্লবা ফীদবেক কয়াদা য়ুম্ফম ওইদুনা গৃহ মন্ত্রালয়, হকশেল মন্ত্রালয় অমসুং অতোপ্পা মরী লৈনবা মন্ত্রালয়শিংনা দিজেস্তর মেনেজমেন্ত এক্তকী মখাদা চৎন-কাংলোন কয়া অমসু ফোংলি।

হৌজিক ওইরিবা অরুবা লাইচৎ অসিনা থোকহল্লিবা মখল কয়াগী খুদোংচাদবশিং অসি লৈঙাক্না য়েংশিন্দুনা লাক্লি অমসুং অসিগুম্লবা ভারত সরকার অমসুং রাজ্য সরকারগী ৱারেপ লৌবগী থৌওং অসিদা ঐখোয়না থাজবা থম্ফম থোকই হায়না মন্ত্রীনা য়াম্না অকনবা ৱাফম থমখি। এতোর্নী জেনেরেলনা ৱাফম অসিদা য়ানীংবা ফোংদোকখি অমসুং কোর্তনা মসিবু থাগৎফম থোকই হায়খি। সরকারনা পীরকপা চৎন-কাংলোন অমসুং থবক ওইনা পাংথোকখিবশিংবু শৌগত্তুনা সুপ্রীম কোর্তনা ফাইল তৌখিবা কেসকী মওংশিং অমসুং অয়াবা পীখিবা ওর্দরশিংগী মরমদসু সোলিসিতর জেনেরেল শ্রী তুশার মেহতানা শন্দোক্না তাকখি।

লো মন্ত্রীনা য়াম্না অকক্নবা ওইনা অসিগুম্লবা লুরবা মতম অসিদা অঙম তানবা পি.আই.এল.শিংদি পাইরোইদবনি হায়খি। মীওই অমনা কেস ফাইল তৌবদা অথিংবা থম্বা য়াদ্রবসু অসিগুম্বা কেসকী মতাংদদি খরা হক্না থেংনগদবনি। ৱাফম অসিদা এতোর্নী জেনেরেল অমসুং অতৈ অতোপ্পা লো ওফিসরশিংনা থাগৎনখি। দিপার্তমেন্ত ওফ জস্তিস্কী সেক্রেতরীনা কান্নবা হেনগদবা ই.-কোর্ত অমসুং হৌজিক চত্থরিবা অতোপ্পা থৌওং খরগী মতাংদসু পনখি। লোকদাউন মনুংসিদা কেসশিং ই.-ফাইলিং তৌনবা রেজিস্তর তৌবা উকিলশিংগী মশীং য়াম্না হেনগৎলক্লি হায়খি। লোকদাউন মনুংসিদা উকিল ১২৮২না পেতিসন ই-ফাইলিং তৌনবা রেজিস্তর তৌরকখি অমসুং মসিগী মনুংদগী উকিল ৫৪৩দি মমাংগী চয়োলদা রেজিস্তর তৌরকখিবনি। দিপার্তমেন্ত ওফ লীগেল এফিয়র্স্কী সেক্রেতরীনা কোবিদ-১৯গা মরী লৈনবা কেসশিং য়েংশিন্নবা লো মন্ত্রালয়গী মনুংদা মতেং পাংনবগী থৌওংগী মতাংদা শন্দোক্না তাকখি। ঐখোয়না থবক অমা পাংথোকপগী মওংদা মান্নবা লৈগদবনি হায়বসি পুম্নক্না য়ানরবা ৱাফম্নি অমসুং সুপ্রীম কোর্তকী য়াথং খুদিংমক তোঙান তোঙানবা হায়-কোর্তশিংদা খুদক্তা য়ৌহনগদবনি হায়খি।

এতোর্নী জেনেরেল অমসুং অতোপ্পা লো ওফিসরশিংনসু কনেক্তিবিতী ইস্যুশিং য়েংশিনবীদুনা অমসুং ই-কোর্ত মেনেজমেন্ততা উকিলশিংবু ত্রেন তৌদুনা ই.-কোর্তকী থৌওং অসি মপাঙ্গল কনখৎহনবগী তঙাই ফদবা লৈ হায়বা অকনবা ৱাফম থমখি। লো মন্ত্রীনা সুপ্রীম কোর্তকী ই.-কোর্ত কম্মিতীগী মেম্বরসু ওইরিবা সেক্রেতরী জস্তিস্তা খুদোংচাদবশিং অসি এন.আই.সি. অমসুং অতোপ্পা এজেন্সীশিংগা খুৎশম্নদুনা শেমদোক্নবা হায়খি। লাইচৎ অসিগী অরুবা ফিভম অসি য়েংলুবদা কোর্তকী থবক কয়া ভিদিও কনফরেন্সিংগী খুত্থাংদা পাংথোকপা অসি লাক্কদৌরিবা মতম খরগীদি চৎনবী অমা ওইরগনি হায়বসি য়ানখি। লোকদাউনগী খুদোংচাবা লৌদুনা দিজিতেল সিস্তেমগী খুত্থাংদা অচুম্বা ৱায়েল ফংহনবগী থৌওংবু হেন্না চাউথোকহনসি হায়বা ৱাফম অসি লো মন্ত্রীনা য়াম্না মরু ওইনা পনখি।

****