ইন্দস্ত্রীশিংনা পোজিতিব ওইবা মিৎয়েং অমা থমগদবনি অমদি কোবিদ লাইচৎ লোইখ্রবা মতুংদা লাকবা য়াবা খুদোংচাবশিং লোকশিনগদবনি‍  হায়না কেন্দ্রগী এম.এস.এম.ই. অমসুং রোদ ত্রান্সপোর্ত অমদি হাইৱেজ মন্ত্রী শ্রী নীতিন গরকরীনা হায়খ্রে‍। মহাক্না ৱাফম অসি ইন্দোর মেনেজমেন্ত এসোসিএসননা শিন্দুনা “এম.এস.এম.ই. এন্দ ইনফ্রাস্ত্রকচর, পোস্ত কোবিদ-১৯: লাইফ ওফ দিজ তু লাইফলাইন্স ওফ ইন্দিয়ন ইকনমী” হায়বা হীরমদা পাংথোকখিবা ৱেবিনার অমা শরুক য়ারদুনা ফোঙদোকখিবনি‍।

কোবিদ-১৯ শন্দোকপা থিংননবা মথৌ তাবা চেকশিন থৌরাংশিং লৌখৎনবা ইন্দস্ত্রীশিংনা হোৎনগদবনি হায়না শ্রী গরকরীনা ইন্দস্ত্রীশিংদা হায়খি‍। লুপশিংনা মখোয়গী শিন্মীশিং অমসুং একজেক্যুতিভশিংগীদমক লৈফম চাফম নিংথিনা শেম্বীদুনা অমদি সোসেল দিস্তেন্সিংগী চৎন-কাঙলোন ঙাকহন্নবদগীদমক তৌফম থোকপশিং তৌগদবনি হায়না মহাক্না ফোঙদোকখি‍। ইন্দস্ত্রীশিংনা পোজিতিব ওইবা খোংথাং লৌখত্তুনা কোবিদ-১৯গী লাংফম অসিনা লোইখ্রবা মতুংদা লাক্কদবা খুদোংচাবশিং লোকশিনগদবনি হায়বা অকনবা ৱাফম থমখি‍।

স্তেকহোল্দর খুদিংমক্না লাংফম অসিদগী লানথোক্ননবা অমদি মীয়ামগী পুন্সি অমসুং হিংবগী পাম্বৈ ঙাক্তুনা থম্ননবা অপুনবা খোঙথাঙ লৌখৎকদবনি‍ হায়না মহাক্না হায়খি‍। শ্রী গরকরীনা লাংফম অসিদগী লান্থোক্নবগীদমক ইন্দস্ত্রীশিংদা তানফম অসিদা পোজিতিব ওইবা ৱাখল্লোনসু লৈননবা ৱাফমসু থমখি‍।

হৌজিক্কী মতমসিদা মথৌ তারিবদি মপান্দা পোৎচৈ থাদোকপগী চাং হেনগৎহন্নবা পুক্নীং চঙবদুনা হায়না কেন্দ্র মন্ত্রীনা ফোঙদোকখি‍। মহাক্না মখা তারদুনা হায়খি মদুদি মপান্দগী পুশিল্লকপা পোৎলমশিং লমদমসিগী পোত্থোক্না মহুৎ শিন্নবগীদমক পুশিল্লক্লিবা পোৎলমশিংগী মহুৎ শিনবা য়াবা পোৎলমশিংদসু পুক্নীং চংবা মথৌ তাই হায়না হায়খি‍।

জাপান লৈঙাক্না মখোয়গী ইন্দস্ত্রীশিংদা চাইনাদা জাপান্না শেল থাদরিবশিং লৌথোক্তুনা অতোপ্পা মফমদা হোংদোক্নবগীদমক অখন্নবা পেকেজ লাউথোকখ্রে হায়না ৱাফম মন্ত্রীনা নিংশিংখি‍। মসি লেম্না মাঙহনবা য়াদবা ইন্দিয়াগী খুদোংচাবা অমনি হায়না মহাক্না ফোঙদোকখি‍।

থৌরমদুদা ফোঙদোকখিবা মচং ওইবশিং অমসুং মরুওইবা সজেসনশিংদি: ৱর্কিং কেপিতেল পীবগী চাং চাদা ১০দগী অহেনবা ফন্দ ওইনা চাদা ৩০দা হেনগৎপা, সোসেল সর্কলদগী শেন-থুম মরাং কায়হন্নবগীদমক কম্পেনী এক্ততা কোমথোকপা, কোবিদ-১৯না নারবা শিন্মীশিংদা কান্নবা পীবা, লেবর লোদা কোমথোকপা, অথিংবা লৈরিঙে মনুংদা ইলেক্ত্রিসিতী বিলদা কোমথোকপা, জি.এস.তি. অমসুং এদভান্স তেক্স য়ৈথোকপা, ভোলুন্তরী দিসক্লোজর ওফ ইনকম স্কিমগা মান্নবা মওংদা কোবিদ-১৯গী স্কিম হৌদোকপা অসিংনচিংবশিংনি‍।

মীহুৎশিংগী ৱাহংশিংগী পাউখুম শ্রী গরকরীনা পীখি অমসুং লৈঙাক্কী মায়কৈদগী পাংবা য়াবা মতেং পুম্নমক পাংগনি হায়না থাজবা পীখি‍। মরি লৈনবা লোয়শঙশিংদা মখোয়গী ৱাফমশিং অদু মহাক্না পুখৎকনি হায়নসু মহাক্না থাজবা পীখি‍।

*****