লোকদাউন তৌরিঙৈগী মনুং অসিদসু সরকার অসিনা ফার্ম তৌবা অমসুং লৌউ-শিংউবগী হিরম্না পুম্নমক্কী মকোক্তা মরু ওইনা থম্লি হায়না কেন্দ্রগী লৌউ-শিংউ অমসুং লৌমীশিংগী য়াইফ-থৌরাং মন্ত্রী শ্রী নরেন্দ্র সিংহ তোমারনা ফোংদোকখ্রে। মসিগী ফলনা, ইনশাং নাপী অমসুং শঙ্গোম ৱাত্তনা লৈ হায়না সরকারনা ফোংদোকপগা লোইননা লৈবাক অসিদা ফুদ গ্রেন অমসুং হৱাই চেংৱাইগী অৱাৎপা লৈতে হায়না মহাক্না ফোংদোকখ্রে। ঙসি পাউগী মীফম অমদা ৱা ঙাংলদুনা, শ্রী তোমারনা হায়খি, প্রধান মন্ত্রী শ্রী নরেন্দ্র মোদীনা 'গাও, গরীব, কিসান' (খুঙ্গং, লাইরবা অমসুং লৌমী)শিং চাউখৎপদা মরু ওইবা মিৎয়েং থম্লি। হন্দক্কী সরকার অসিনা লৌউ-শিংউ অমসুং লৌমীশিংগী য়াইফনবা হোৎনরিবা অসিগুম্না মমাংদা পানখিবা সরকার অমত্তনা হোৎনখিদ্রি হায়না শ্রী তোমারনা ফোংদোকখি। শ্রী মোদীনা হৌদোকখিবা মরু ওইবা থৌশিলশিংগী মনুংদা, প্রধান মন্ত্রী কিসান সম্মান নীধি (পি.এম.- কিসান), প্রধান মন্ত্রী ফসল বিমা য়োজনা অমসুং হন্দক্তা নৌনা পহৌদোকখিবা কিসান ক্রেদিত কার্দ (কে.সি.সি.) য়াওরি।

শ্রী তোমারনা হায়খি, সরকার অসিনা লোকদাউন মনুং ওইরবসু লৌউ-শিংউবগী থবক লেপতনবা মরুওইনা হোৎনখ্রে। লোকদাউন মনুংদা লৌউ-শিংউবগী থবক থৌরমদা কোমথোকখ্রবশিং মখাদা পীরিঃ

• লৌবুক্তা লৌমীশিং অমসুং ফার্মগী শিন্মীশিংনা থবক শুবা;
• এম.এস.পি.গী থবক য়াওনা লৌউ-শিংউগী পোত্থোক লৈবগী থবক তৌরিবা এজেন্সীশিং;
• এগ্রিকলচর প্রদ্যুস মার্কেত কমিতীনা চলাইবা নত্ত্রগা রাজ্য সরকারনা শকখঙলবা 'মন্দী'শিং;
• মরু, হার, অমসুং লাইনাদগী ঙাকথোক্নবা হিদাকশিং শাবা/য়োম্বা অমসুং য়োনবা দুকানশিং;
• কম্বাইন হার্বেস্তর অমসুং অতোপ্পা লৌউ-শিংউ/হোর্তিকলচরগা মরী লৈনবা খুৎলাইগুম্বা লোক্নবা অমসুং মরু হুন্নবা মেচিনশিংনা রাজ্য অমগী মনুংদা অমসুং রাজ্যশিংগী মরক্তা চত্থোক- চৎশিন তৌবা;
• কোল্দ স্তোরেজ অমসুং ৱেয়রহাউসিংগী থবকশিং;
• তঙাইফদবা পোৎলমশিং পুথোক-পুশিন তৌবা;
• লৌউ-শিংউগী মেচিনশিং, মখোয়গী স্পেয়র পার্ত (মসিগী সপ্লাই চেন য়াওনা) অমসুং রিপেয়র তৌবা দুকানশিং;
• কস্তম হাইয়রিং সেন্তর্স (সি.ঐচ.সি.)গা মরী লৈনবা ফার্ম মেচিনরি।

লৌউ-শিংউগী থবক থৌরমশিং হিংহন্নবা অমসুং য়োকখৎনবা, শ্রী তোমারনা হায়, ফৌ, হৱাই, চেংৱাই অমসুং থাও পুথোকপা য়াবা মরুশিং য়াওনা খরিফ অমসুং রবীগী মহৈ-মরোংগী মিনিমম সপোর্ত প্রাইস (এম.এস.পি.) অসি পুথোকপদা চংলিবা মমলদুগী শরুক ১.৫কী থাক য়ৌনবা কুম খুদিংগী হেনগৎলি। এম.এস.পি.দা হেনগৎপা হায়বসিনা তোঙান-তোঙানবা মহৈ-মরোং পুথোকপগী অচংবা মমলদুগী মথক্তা ৫০%দগী ১০৯% ফাওবা হঞ্জিনবা ঙমগনি হায়না মহাক্না হায়খি। রবীগী হৱাই চেংৱাই অমসুং থাও শুংবা য়াবা মরুগী মফম অসি মমাং চহীদা ১৪৮৫ ওইরম্বদগী হন্দক চহীদা ২৭৯০ ওইরে। লৈশিনবগী থবক য়াংখৎলকপগী মতুং ইন্না দরকার লৈবা সেন্তরশিং হাংগনি হায়না মহাক্না মখা তাখি।

লৌউ-শিংউ মন্ত্রীনা হায়খি, হোৎনরিবা ময়াম অসিনা মরম ওইদুনা মমাংদা অমুক্তা ওইখিদ্রিবা মওংদা হৱাই-চেংৱাইগী পোত্থোক পুথোক্লে। ২০১৮-১৯দা তন মিলিয়ন ২৮৫.২০ পুথোকখিবদগী হন্দক্কী শেনবা চহী অসিদদি তন মিলিয়ন ২৯১.৯৫ পুথোক্লে,অমসুং মথংগী শেনবা চহীদা তন মিলিয়ন ২৯৮.৩গী পান্দম থম্লি। মহাক্না হায়, প্রোতিন রিবোলুসনসু হৱাই চেংৱাই পুথোকপগী চাং ২৮.৩% হেনগৎপদগী মাই পাকপা ঙমখিবনি, হায়রবসি, ২০১-১৫দা মেত্রিক তন ১৭.২০ ওইরম্বদগী ২০১৯-২০দা মেত্রিক তন ২৩.০২ য়ৌখি। কালেন্থাগী মহৈ-মরোংদা মিৎয়েং থম্বনা মমাং চহীদা হেক্তর লাখ ৪১.৩১ হুল্লম্বদগী হন্দক চহীদা হেক্তর লাখ ৫৭.০৭ পাক শন্না হুল্লে। মসিগা মান্ননা, হোর্তিকলচরগী মহৈ-মরোংসু ২০১৮-১৯দা মেত্রিক তন মিলিয়ন ৩১০.৭৪ পুথোক্লম্বদগী অমুক্তা পুথোকখিদ্রিবা মওংদা হন্দক্কী শেনবা চহী অসিদা মেত্রিক তন মিলিয়ন ৩১৩.৩৫ পুথোক্লে।

শ্রী তোমারনা হায়, কোবিদ-১৯না লান্থেংনবগীদমক পীরিবা সোসিএল দিস্তেন্সিংগী কাংলোনশিং য়েংদুনা লৌউ-শিংউগী থবক থৌরমদা তেক্নোলোজী শিজিন্নদুনা মীনা শুবা হন্থহন্নবা সরকারনা হোৎনরি। লৌউ-শিংউ, কোওপরেসন অমসুং লৌমীশিংগী য়াইফ-থৌরাংগী বিভাগনা লৌখৎলিবা তেক্নোলোজীগী থবক থৌরমশিংদা য়াওরিবশিংদিঃ

• ই-নামনা অনৌবা তেক্নোলোজী শিজিন্নদুনা লৌমীশিংগী মতেং পাংলি।
• এপ্রিল ২০২০দা ই-নামগী অনৌবা মোদ্যুলশিং হৌদোকখ্রে।
• ৱেয়রহাউসতা য়ুম্ফম ওইবা ত্রেদিং মোদ্যুলঃ ই-এন.দবল্যু.আর. হাপ্লবা ই-নাম।
• মখোয়গী কলেক্সন সেন্তরদগী হকথেংননা পোত্থোকশিং, বিদিং, অমসুং মমল পীবা য়াহল্লিবা এফ.পি.ও. মোদ্যুল।
• এফ.পি.ও.শিং অসিনা অনকপা শহর অমসুং শহর মচাশিংদা মনা মশিংশিংবু থাদোক্লি। পোত্থোকশিং পুথোক-পুশিন তৌবদা অমসুং ললোন ইতিক তৌবগা মরী লৈনবা খুদোংচাদবশিং খুদক খুদক্তা ৱারোইশিন পীরি। রাজ্যশিংনা এফ.পি.ও.শিংদা পাস/ই-পাসশিং পীনবা ৱারেপ লৌখ্রে।
• "কিসান রথ" এপ অসি লৌমী অমসুং ললোনবশিংদা ফার্মদগী পুথোকপা পোত্থোকশিং পুথোক-পুশিন তৌবদা খ্বাইদগী চানবা মওং খঙদোক্নবা ১৭.০৪.২০২০দা হৌদোকখ্রে। লোজিস্তেক এগ্রিগেতরগী  য়ুবেরাইজেসনগী মোদ্যুল ওইনা ত্রক লাখ ১১.৩৭ অমসুং ত্রান্সপোর্তর লাখ ২.৩ হেন্না।
• ভারত পুম্বগী ওইনা এগ্রি ত্রান্সপোর্ত কোল সেন্তর অমা এপ্রিল, ২০২০দা হাংদোকখ্রে। মসিগী কোল সেন্তর অসি পত্থগনবা পোত্থোকশিং হায়বদি মনা মশীং অমসুং উহৈ, লৌউ-শিংউগী পোত্থোকশিং রাজ্য অমদগী অমদা পুথোক পুশিন তৌবদা পাউ ফাউননবা লিংখৎখিবনি। কোল সেন্তরশিংগী নম্বরশিংদি ১৮০০১৮০৪২০০ অমসুং ১৪৪৮৮নি।
• কিসান রেলগী বজেৎ লাউথোকপা। লোকদাউনগী মনুংদা, তঙাইফদবা পোৎলমশিং থুনা য়াংনা পুথোক-পুশিন তৌবা য়ানবা রেলৱেনা পার্সেল স্পেসল ৫৬৭ (মসিগী মনুংদা ৫০৩ অমনা মতম খাইদোকতুনা চৎপা পার্সেল ত্রেনশিংনি) চেন্নবা লম্বী ৬৭ নৌনা হাংদোকখ্রে। মসিগী ত্রেনশিং অসিনা লৈবাক শীনবা থুংনা তঙাইফদবা পোৎলম তন ২০,৬৫৩  পুথোক-পুশিন তৌখ্রে।

সরকারনা মার্চ ২৪, ২০২০দগী লৌমীশিংদা লুপা করোর ১৭৯৮৬ থাবীদুনা কোবিদ-১৯গী মনুংদা লৌমীশিংবু পি.এম. কিসান স্কিম্না য়াম্না চাউনা কান্নবা ফংহনখ্রে। হৌজিক ফাওবদা, লৌমীশিংগী ইমুং করোর ৯.৩৯দা কান্নবা ফংহনখ্রে অমসুং লুপা করোর ৭১০০০ থাখ্রে হায়না শ্রী তোমারনা হায়খ্রে। এপ্রিল ১দগী জুলাই ৩১, ২০২০ফাওবগী ইন্সতোলেসন দ্যুসু কান্নবা ফংগদবা মীওই করোর ৮.১৩দা এপ্রিলগী অঙনবা শরুক্তা পীথোকখ্রে। স্কিম অসিগী মাই পাকপসি য়েংদুনা, প্রধান মন্ত্রীনা চহী ফারবা স্কিম অসি হান্নদি মশীং য়ামদবা ইমুং অমসুং লৌমী খরখক্তা কোল্লম্বনা হৌজিক্তি লৌমীগী ইমুং মনুং খুদিংমক্তা য়ৌহন্নবা অয়াবা পীখ্রে।

শ্রী তোমারনা হায়, সরকার অসিনা ফেব্রুৱারীদা পি.এম.-কিসানগী কান্নবা ফংগদবশিংদা কে.সি.সি.গী খুদোংচাবা ফংনবগীদমক কিসান ক্রেদিত কার্দ (কে.সি.সি.) সেচুরেসন দ্রাইবসু হৌদোকখ্রে। বেঙ্কশিংনা পি.এম.-কিসানগী খুদোংচাবা ফংগদবশিংদগী এপ্লিকেসন লাখ ৭৫ হেন্না থাজল্লকখ্রে, মসিগী মনুংদা অপুনবা শেনফম লুপা করোর ১৮,০০০গী সেঙ্কসন এমাউন্ত ওইগদবা এপ্লিকেসন ২০গী শেল কাইথোকখ্রে।

শ্রী তোমারনা হায়, পি.এম. ফসল বিমা য়োজনা অসি লৌমী খুদিংমক্তা লৌমীশিংগী অপাম্বগী মতুং ইন্না প্রেমিয়মদা অহোংবা অমত্তা লৈহন্দনা ভোলুন্তরী ওইহল্লগনি। অৱাং নোংপোক রাজ্যশিংগী হান্না ৫০% ওইরম্বা সরকারনা পুগদবা প্রেমিয়ম সবসিদী অদু হৌজিক্তি ৯০% সরকারনা পুরগনি। লৌমীশিংদা কান্ননবগীদমক রাজ্যশিংনা কোনশিল্লিবা রিস্ক অমসুং পীগদবা শেনফম অদু খঞ্জনবগী অয়াবা পীখিবনি।

শ্রী তোমারনা হায়, ২০১৭-১৯গী মনুংদা, লৌমীশিংগী কন্ত্রিব্যুসন অসি লুপা করোর ৯,০০০ হেনবা মতমদা, লুপা করোর ৫০,০০০ হেন্না ওইবা মহৈ মরোংগী ইন্সুরেন্স ক্লেম অদু খুদোংথীরবা লৌমীশিংদা কাইথোকপীখি। লোকদাউন মনুংদা অপুনবা ওইনা পীখিবা ক্লেম অসি লুপা করোর ৫,৩২৬.৭নি হায়না মহাক্না হায়খি।

শ্রী তোমারনা হায়, হন্দক্কী চহীগী বজেৎ অসিসু ২০২২ ফাওবদা সরকারনা লৌমীশিংগী ইঙ্কম অসি হান্নদগী শরুক অনি হেনগৎনবা হোৎনরি। লৌউ-শিংউবগা মরী লৈনবা থবক থৌরমশিংগীদমক লুপা করোর লাখ ২.৮৩ থমখ্রে অমসুং লৌউ-শিংউ, এলাইদ অমসুং ইথৈ-লৌখোংগীদমক ওইনা লুপা করোর লাখ ১.৬ থমখি।  হায়রিবসি ২০০৯-১৪গী মতমদা য়ু.পি.এ. সরকারনা চহী ৫গী লৌউ-শিংউ বজেৎকী লুপা করোর লাখ ১.১ খাকখিবদুদগী হেল্লি হায়না মহাক্না হায়খি। সরকার অসিনা লুপা করোর ৬৮৬৬কী অয়াবাগা লোইননা ২০২৪-২৫ ফাওবদা ফার্মর প্রদ্যুসর ওর্গনাইজেসন (এফ.পি.ও.) ১০,০০০ শেমগৎনবা স্কিম অমা হৌদোকখ্রে।  মসিনা অপুনবা ওইনা পোত্থোকশিং লৈশিনবা অমসুং হেন্না পুথোক্নবা তেক্নোলোজী অমসুং কৈথেলদা চাউনা মতেং পাংলগনি হায়না মহাক্না হায়খি।

থৌরম অদুদা ৱা ঙাংলদুনা, নীতি আয়োগকে মীহুৎ শ্রী রামেস চন্দনা হায়, লৌউ-শিংউনা ভারতকী শেন্মিৎলোন চাউখৎপগী মশক থোকপা পাম্বৈনি অমসুং সরকার অসিনা সরকার অসিনা হন্দক্কী শেনবা চহী অসিদা লোকদাউন্না মরম ওইদুনা ইন্দস্ত্রীগী ওইবা থবক থৌরমশিং ৬০% চপ লেপ্তুনা লৈনরবসু জি.দি.পি.দি ৱাংখৎনবা হোৎনরি। মোন্সুন মতম চানা লাক্কনি খনবগা অমসুং রিজর্বরশিংদা ঈশিং ৫০-৬০% ফাওবা লৈবগা লোইননা, লৌউ-শিংউগী হীরমদা মতীক চানা মথৌ পাংথোক্কনি হায়না মহাক্না হায়খি। মমাং চহীগী এপ্রিলদা হার তন লাখ ১২.৮৬ লৈখিবদগী হেন্না হন্দক থাগী এপ্রিল ২৮ ফাওবদা হার তন লাখ ১৩.৫ লৈখ্রে, মসিগী মনুংদা কৃশী বিগ্যান কেন্দ্রশিংনা হন্দক চহীগী থা মরিসিদা মমাং চহীগী মতম অসিদা চাংদম্নবদা মরু মরাং ২০% হেন্না য়োল্লে হায়না মহাক্না হায়খি। মহৈ মরোংগী মমল ৱাংনা লৈগনি হায়বগী থাজবা পীরদুনা, মসিনা লৌমীশিংদা পুক্নিং থৌগৎলগনি অমসুং তুং কোইনা য়েংবদা লৌউ-শিংউদা ৩% য়োউনা চাউখৎলগনি হায়না মহাক্না হায়খি।

****