মরূপ পুম্নমকপু পঞ্চায়তি রাজ দিবসকী য়াইফ-পাউজেল পীজরি। মালেমগী লাইচৎ কোরোনানা ঐখোয় পুম্নমক্কী থবক তৌবগী মওং মতৌ পুম্নমক্তা অহোংবা য়াম্না পুরক্লে।  মমাংদদি ঐখোয় থৌরম অমা হেক্তদা অমনা অমগা উনরম্মি, হৌজিক্তি থৌরম অদু ভিদিও কনফরেন্সকী থোংদা পাংথোক্লি।

মতম অসিদা লৈবাক পুম্বগী সরপঞ্চ অমদি পঞ্চায়ৎকী মীহুৎ লাখ কয়া তেকেনোলোজীগী খুত্থাংদা শম্নরি। ময়াম পুম্মকপু তৌবীমল খঙবা উৎচরি। ঙসি পঞ্চায়ৎ কয়া অফবা থবক তৌবগীদমক মনাসু ফংলি। মনা ফংলবা পঞ্চায়ৎ পুম্নমকপু, মীয়ামগী মীহুৎ পুম্মকপুসু হন্না-হন্না নুংঙাইবা ফোংদোকচরি।

মরূপশিং, পঞ্চায়তি রাজ দিবস, খুঙ্গংদা অফবা সাসন য়ৌহন্নবা ঐখোয়গী সংকল্প অমুক হলহন্নবা খুদোংচাবসুনি। মসি অচু্ম্বনি মদুদি কোরোনা লাইচৎনা ঐখোয়গীদমক খুদোংচাদবা কয়া অমা থোকহল্লি।

অদুবু মসিদগীসু হেন্না চাউবা ৱাফমদি লাইচৎ অসিনা ঐখোয়দা অনৌবা শিক্ষা অমসু পীরি, অনৌবা পাউজেল অমসু পীরি। ঙসি থৌরম অসিগী খুত্থাংদা ঐহাক্না লৈবাক অসিগী নাগরিক খুদিংমক, খুঙ্গংদা ওইগেরা শহরদা ওইগেরা, মখোয় ফাওবা পাজেল অসি য়ৌহনবা পামই।

মরূপশিং, কোরোনাগী অৱাবনা খ্বাইদগী চাউবা পাউজেল ঐখোয়দা পীরি মদুদি ঐখোয় সেল্ফ-সফিসিয়েন্ত ওইগদবনি। খু্ঙ্গংনা মশাগী থাক্তা মশাগী দরকারওইবশিং অদুগীদমক সেল্ফ-সফিসিয়েন্ত ওইগনি, জিলানা মশাগী থাক্তা, রাজ্যনা মশাগী থাক্তা, মতৌ অসুম্না লৈবাক পুম্বা মতৌ করম্না সেল্ফ-সফিসিয়েন্ত ওইগনি, ইশাগী দরকারওইবশিংগীদমক ঐখোয়না মপান্দা য়েংলুদবা, হৌজিক মসি য়াম্না দরকার ওইরে।

ভারত্তা ৱাখল্লোন অসি চহি চা কয়াদগী লৈরক্লি অদুবু ঙসি অহোংবা লাক্লিবা ফিভমনা, ঐখোয়বু অমুক হন্না নীংশিংহল্লে মদুদি সেল্ফ-সফিসিয়েন্ত ওইরো। ঐখোয়গী লৈবাক্কী গ্রাম পঞ্চায়ৎশিংগী মসিদা অচৌবা থৌদাং লৈরি।    

মরা চেৎপা পঞ্চায়ৎশিং সেল্ফ-সফিসিয়েন্ত খুঙ্গংগীসু য়ুম্ফমনি। মরম অসিনা পঞ্চায়ৎকী সিস্তেম অদুক্কী মতিক চেৎলিবা মখৈ লোকতন্ত্রসু চেৎকনি।

মরূপশিং, ৱাখল্লোন অসিগা লোয়ননা সরকারনা পঞ্চায়তী রাজগা শম্নরিবা সিস্তেমশিংবু, ইনফ্রাস্ত্রকচরবু, অনৌবা থাক্তা পুখৎনবা লেপ্পা লৈতনা থবক তৌরি। মদু ওইরমদ্রগদি চহি ৫-৬কী মমাংদা লৈবাক অসিগী পঞ্চায়ৎ চামা য়ৌদনা ব্রোদবেন্দগা শম্নরম্মি। হৌজিক পঞ্চায়ৎ লাখ ১.২৫ হেনবদা ব্রোদবেন্দ য়ৌরে।

মসিদসু নত্তনা খুঙ্গংশিংদা কমন সর্বিস সেন্তরগী মশিংসু লাখ অহুম হেনখ্রে।

সরকারনা ভারতমক্তদা মোবাইল শেম্নবা কেম্পেন চত্থখিবা অদুগী মহৈ ওইনা ঙসি খুঙ্গং-খুঙ্গংশিংদা অহোংবা মমলদা স্মার্ত ফোন য়ৌরক্লে। ঙসি মশিং অসুক য়াম্না ভিদিও কনফরেন্স পাংথোক্লিবা অসিদসু মসিগী অচৌবা থৌদাং লৈরি।

মরূপশিং, খুঙ্গংগী ইনফ্রাস্ত্রকচরবু হেন্না চেৎশিলহন্নবগীদমক, খুঙ্গংশিং অমসুং শহরশিংদা অরাপ্পা হন্থহন্নবগীমক, ঙসি সরকারনা অচৌবা প্রোজেক্ত অনি হৌদোক্লে। হৌজিক ভিদিও ফিল্ম কাপখিবা অদুদা অদোম্নসু উবীখ্রে, অহানবদা ই-গ্রাম স্বরাজ পোর্তেল অমসুং মদুগী এপ্লিকেসনগী লোঞ্চিং অমদি অনিশুবদা স্বামিত্ব য়োজনা হৌদোকপা।

ই-গ্রাম স্বরাজ হায়বদি ‘সিমপ্লিফাইদ ৱার্ক বেজ একাউন্তিং এপ্লিকেসন ফোর পঞ্চায়তি রাজ’ অসি মখল অমরোমদা গ্রাম পঞ্চায়ৎশিংগী অপুনবা দিজিতেলাইজেসনগী মায়কৈদা অচৌবা খোংথাং অমনি।

মসিনা তুংদা গ্রাম পঞ্চায়ৎকী তোঙান-তোঙানবা থবকশিংগী একাউন্ত থমগদবা সিঙ্গল প্লেৎফোর্ম অমা ওইগনি। হৌজিক অদোম্না তোঙান-তোঙানবা এপ্লিকেসন্দা তোঙান-তোঙানবা থবক তৌবা মথৌ তাররোই।

হৌজিক হায়খিবা অদুম্না পোর্তেল অসিদা, এপ্লিকেসন অসিদা, পঞ্চায়ৎকী দিবেলপমেন্ত ৱার্কশিংগী দিতেলদগী হৌরগা মদুগীদমক লেপখিবা ফন্দ অমদি মদুগী চাদিংগা মরী লৈনবা ইনফোর্মেসন পুম্নমক লৈগনি। মসিগী খুত্থাংদা হৌজিক্তি মীওই অমা হেক্তনা মখোয়গী গ্রাম পঞ্চায়ৎতা পায়খৎলিবা থবকশিং খঙবা ঙম্লগনি।

মসিনা পঞ্চায়ৎশিংদা ত্রান্সপরেন্সীসু হঙ্গৎহল্লগনি, রেকোর্দ থম্বগী থবকসু হেন্না লায়থোকহল্লগনি অমদি প্রোজেক্তশিংগী প্লানিংদগী হৌরগা কম্প্লিসনগী থৌওংদসু য়াংশিল্লগনি। ই-গ্রাম স্বরাজকী খুৎথাংদগী অদোম ময়াম্না কয়া য়াম্না চাউবা শক্তি ফংলগনি হায়বদু অদোম্না ৱাখলনা শাগৎপা ঙম্লগনি।

মরূপশিং, খুঙ্গংশিংদা প্রোপর্তীগী ওইরিবা ফিভম অদু অদোম্না খঙলিবা অদুনি। স্বামিত্ব য়োজনা অসি মসিবু চুমথোক্নবা হোৎনবা অমনি। য়োজনা অসিগী মখাদা লৈবাক্কী খুঙ্গং খুদিংদা লৈরিবা য়ুম খুদিংমক দ্রোন্না মেপিং তৌগনি। মদুগী মতুং খুঙ্গংগী মীয়াম্বু প্রোপর্তীগী তাইতর দীদ পীগনি।

স্বামিত্ব য়োজনাদগী খুঙ্গংগী মীয়াম্না কানবা কয়া অমা ফংগনি। অহানবদা প্রোপর্তীগী ওইনা চমম্নবা লৈরম্বশিং কোকহল্লগনি। অনিশুবদা মসিনা খুঙ্গংদা দিবেলপমেন্ত প্রোজেক্তশিংগী হেন্না ফবা প্লানিংদা অহেনবা মতেং ফংলগনি। মসিনা য়াম্না চাউনা কান্নগদবা অমনা মসিদগী শহরগী মতৌগুম্না খুঙ্গংদসু বেঙ্কশিংদগী লোন ফংবগী লম্বী হেন্না লাইথোকহল্লগনি।

মরূপশিং,

হৌজিক উত্তর প্রদেশ, মহারাস্ত্রা, কর্নাতকা, হরিয়ানা, মধ্যপ্রদেশ অমসুং উত্তরাখন্দ রাজ্য তরুক অসিদা য়োজনা অসি এক্সপরিমেন্ত ওইনা হৌদোক্লি। মসিদগী ফংলকপা এক্সপরিয়েন্স অদুগী মতুং ইন্না শেমদোক শাদোকপা দরকার ওইবশিং অদু শেমদোক্লবা মতুং লৈবাক পুম্বদা চৎনহনগনি।

মরূপশিং, অসুক য়াম্না চাউবা ক্রাইসিস অমা লাক্লি, অসুক য়াম্না চাউবা মালেমগী লাইচৎ অমা লাক্লি, অদুবু মসিগী থা ২-৩ অসিদা ঐখোয়না মসিমসু উবা ফংলে মদুদি ভারতকী প্রজাশিংনা অকক্নবা রিসোর্শিংগী মরক্তা, খুদোং চাদবা কয়াগী মাংদা কোক নোন্দুনা লৈবগী মহুৎ, মদুগা মায়োক্নরি। অপনবা লাক্লি, খুদোং চাদবা মায়োক্নরি হায়বদি অচুম্বনি, অদুবু রিজোলুসনগী শক্তি উৎলদুনা, অনৌবা ইনর্জীগা লোয়ননা মাংলোমদা চংশিন্দুনা, অনৌ-অনৌবা মওং-মতৌ থিদুনা, লৈবাক অসিবু কন্ননবা অমদি লৈবাক অসিবু মাংলোমদা পুখৎনবা থবকসু লেপ্পা লৈতনা চত্থরি।

মরূপশিং, ফিভমশিং অসিদা খুঙ্গংশিংদা ওইরিবশিং অদু ঐহাক্না তোঙান-তোঙানবা সোর্সশিংদগী লেপ্পা লৈতনা ই-পাউ লৌরি। ঙসি ঐহাক্না অদোমগী মরক্তগী মরূপ খরগা লোয়ননা কোরোনাগী মনুংদা ফংলিবা এক্সপরিয়েন্সশিং অমদি অদোমগী ৱাখল্লোনশিংগী মতাংদা খঙজনীংই। অুদুনা লাকপীরো, খন্ন-নৈনবা অসি হৌরসি। অহানবদা জম্মু-কশ্মীর চৎসি হায়না ইফমদা হায়বীরে।

মোহম্মদ ইকবাল, জম্মু কশ্মীরগী বারামুলাগা কনেক্ত তৌরসি। মহাক ব্লোক পঞ্চায়ৎ নরবাবকী চিয়রমেন্নি। ইকবালজী খুরুমজরি!!

ইকবালজী, অদোমগী ব্লোক্তা কোরোনাগী মায়োক্তা শোক্নরিবা লান অসি করম্না চত্থরিবগে? অদোম মীয়াম্না গজ অনিগী অরাপ্পা অমদি লু-নান্নবগীদমক করি পায়খৎলিবগে?

ইকবাল- খুরুমজরি সর, ঐাক্না জম্মু-কশ্মীরগী বারামুলা ব্লোক নরবাশিংদগী অদোম্বু থম্মোয় শেংনা তৌবীমল খঙবা উৎচরি। অদুগা ঙসি পঞ্চায়ৎ দিবসকী তাঞ্জা অসিদা নুংঙাইবা ফোংদোকচরি, সর। সর, মতম অসিদা ঐখোয়গী নরবাশিংদা কোরোনা ভাইরসকা লান্থেংনরিবা অসিদা, অদোমনা মথক্তগী পীরকখিবা পাউতাক, লোকদাউনগী দাইরেক্সন অদু চাদা ১০০ থবক ওইনা পাংথোক্লি। অদোম্না অহানবা নুমিৎ অমগী লোকদাউনগী তৌখিবা অদুদগী মদুগীদমক ঐখোয়না মমাংদগী থৌরাংদুনা লৈরবনি। নুমিৎ অদুদা ঐখোয়না ব্লোক লেবেলদা লৈরিবা ঐখোয়গী মেদিকেল ওফিসর, ঐখোয়গী আই.সি.দি.এস, অমদি পঞ্চায়ৎতগী ঐখোয়না বি.দি.সি.গী ওফিসতগী ওর্দর অমা থোকখি, অমদি আশা ৱার্কশিং, আই.সি.দি.এস, ৱার্করশিং অমসুং পঞ্চায়ৎ পি.আর.আই.গী মেম্বরশিংবু ত্রেনিং ফংহনখি। মখোয়বু ঐখোয়না কোরোনাগী ওইবা চেকশিন থৌরাংশিং খঙহনখি। মদুগী মতুং ঐখোয়না মখোয়বু ব্লোক্কী য়ুমথোং খুদিংদা থাখি।

অদুগা ঐহাক্না অদোমগী মফমদা অশেংবা হায়জরি মদুদি ঐখোয়গী ব্লোক্তা ঐখোয়গী তীমনা চৎখিদবা য়ুম অমত্তা লৈখিদে, য়ুমথোং খুদিংমক মীপুম খুদিংমকপু মতৌ করম্না কোরোনা ভাইরসতগী নান্থোক্কদগে হায়বদু এৱেয়র ওইহনখি। ঐখোয়গী ব্লোক্তা ঙসি ফাবদা পোজিতিব কেস অমা খক্তং লাকখি অদুবু মদুদসু খ্বাইদগী চাউবা মরমদি মসিনি মদুদি ঐখোয়গী মফম অসিদা পঞ্চায়ৎ ইস্তাব্লিস তৌদ্রি। মরমদি ঐখোয়গী মফম অসিদা পঞ্চায়ৎ মেম্বরশিং লৈরমদে অমদি কেস অদু ঐখোয় খঙদোকপা ঙমখিদে।

অদুবু লেমহৌরিবা খুঙ্গং খুদিংমক, লেমহৌরিবা ব্লোক খুদিংমক, দিস্ত্রিক্ত এদমিনিস্ত্রেসনগী মতেংদগী, হেল্থ দিপার্তমেন্তকী মতেংদগী ঐখোয়না য়ুমথোং খুদিংমকপু, ত্রাভেল হিসতরী লৈবা মীপুম খুদিংমকপু মশক খঙদোকখি, মখোয়বু ক্বরেন্তাইন তৌখি, মখোয়বু হোম ক্বরেন্তাইন তৌখি অমদি পি.আর.আই.শিংবু মফম অদুদা মথৌ তৌহনখি। মখোয়গী হোম ক্বরেন্তাইন অদু মায় পাক্নবা পুং ২৪x৭ মথৌ তৌহনখি। মীয়ামদা ৱাফম অনি থমখি, অহানবা ৱাফমনা রেস্পেক্ত ওল, সস্পেক্ত ওল। অনিশুবা ৱাফমনা স্তে হোম স্তে সেফ। ৱাফম অনি অসিদা চত্তুনা ঙসি ঐখোয়গী ব্লোক্তা ফিভম চাদা ৯৯ লাকশিনবা ঙম্লে, সর।

ইকবাল – থাগৎচরি সর।

প্রধান মন্ত্রীজী – অদোম্না ফোংদোক্লিবা ৱাফম অদুনা অদোম ফিল্দদা থবক তৌরি হায়বা তাক্লি। ঐহাক্না থাজবা থম্লি মদুদি গজ অনিগী অরাপ্পা- মন্ত্র অসি খুঙ্গং-খুঙ্গং, য়ুমথোং-য়ুমথোং অমদি জম্মু-কশ্মীরনসু অদোমদগী তম্ফম থোকই। ঐহাক্না অদোম্বু য়াইফ-পাউজেল পীজরি, য়াম্না ফবা থবক তৌরীরি অমদি অদোমগী ব্লোক্কী প্রজা পুম্নমকপুসু ঐহাক্কী মায়কৈদগী য়াইফ-পাউজেল পীজরি।

জম্মু-কশ্মীরগী মতুং দাইরেক্ত খাদা চৎলসি, কর্নাতকা চৎলসি। কর্নাতকাগী চিক্কাবালাপুরদগী ঐখোয়গা লোয়ননা শ্রী নবীন কুমারজী কনেক্ত তৌরে।

নবীন কুমার- লৈবাক্কী প্রধান সেবক অদোম্বু গ্রাম পঞ্চায়ৎকী মায়কৈদগী খুরুমজরি।

প্রধান মন্ত্রীজী- হন্দক মরক অসি ঐহাক খুঙ্গংগী প্রধানগসু ৱারী শানবগী খুদোংচাবা অদু ফংজরি অমদি মালেমগী চাউর-চাউরবা লৈবাকশিংগী অচৌ-অচৌবা প্রধানশিংগসু ৱারী শাননবা তাঞ্জাসু ফংজরি।

নবীন কুার- থাগৎচরি সর। ঐখোয়গী গ্রাম পঞ্চায়ৎতা কোরোনা নাবা মীওই অমত্তা লৈতে অমদি মীওই ১৪বু ঐখোয়না হোম ক্বরেন্তাইন তৌদুনা থম্লি। মখোয়বু পঞ্চায়ৎকী মায়কৈগী ঈশিং, শঙ্গোম, মনা-মশিং, রাশন অসিনচিংশিং ময়ুমদা ফংহল্লি। আশা ৱার্করশিং, হেল্থ দিপার্তমেন্তকী ওফিসিয়েলশিং অমদি গ্রাম পঞ্চায়ৎকী মীহুৎশিং অমসুং স্তাফকী তাস্ক ফোর্স অমা শেমগৎলে। হপ্তা খুদিংগী মীফম অনি-অহুম কৌদুনা কোরোনা করম্না থিংগনি অমদি মসিগীদমক করি-করি হোৎনবা য়াবগে হায়বা অসিদা খন্ন-নৈনৈ। আই.ই.সি., সোসিয়েল দিস্তেন্সিং অমসুং সেনিতেসনগী থবক নীংথিজনা চত্থরি।

প্রধান মন্ত্রী গরীব কল্যান য়োজনা, প্রধান মন্ত্রী কিসান সম্মান য়োজনা, উজ্জ্বলা য়োজনা অমদি পেন্সন য়োজনা – হায়রিবা য়োজনা মরি অসিগী মখাদা বেনেফিসরী লিশিং মঙা হেনবদা কানবা ফংহল্লে।

মফম অসিগী নহাশিংবু পুক্নিং থৌগৎতুনা গ্রাম পুলিস শেমগৎলে। পঞ্চায়ৎকী ঙমখৈদা চেকপোস্ত থমদুনা গ্রাম পুলিসশিং অসি মথৌ তৌরি। মসিনা মীয়ামগী দরকার ওইদবা কম্ম্যুনিকেসন থিংদুনা থম্লে। মসিনা কোরোনাবু রাজ্য অমদগী অতোপ্পা রাজ্য অমদা য়ৌহন্দ্রে।

লোকদাউন্না মরম ওইদুনা মহারাস্ত্রদগী লাকপা শিন্মী ১৭০ হেন্না ঐখোয়না স্কুল অমদা থম্লি। মখোয় পুম্নমকপু চান-থক্নবা অমদি হিদাক লাংথক্নচিংবা ফংহল্লি অমদি মখোয়বু ঐখোয়না থবক অমা নত্ত্রগা অমা পীরি।

উহৈ অমসুং মনা মশিংগীদমক বাজার অমা হাংদোক্লে। মসিনা লৌমীশিংদা শেল-থুমগী অমাংবা লৈহন্দ্রে। মখোয়গী শেনমিৎলোন ফৎহল্লে। হিদাক-লাংথক দরকার ওইবা ইমুং-মনুংশিংদা ঐখোয়না দোক্তরদগী পুরক্তুনা ময়ুমদা পীরি।

মহাত্মা গান্ধী রাস্ত্রীয় উদ্যোগ য়োজনাগী মখাদা পঞ্চায়ৎকী শিন্মীশিং অমসুং লৌমীশিংবু ঐখোয়না থবক ইনখাং অমসুং ঈশিং য়োক্তুনা থম্বগী থবক থৌরমদা শরুক য়ানবা তাঞ্জা পীরি। মসিনা গ্রাম পঞ্চায়ৎতসু মীয়ামগী মোরেলগী শক্তি হেঙ্গৎলক্লি।

প্রধান মন্ত্রীজী- নবীনজী অদোমগী খুঙ্গংগী মীশিং কয়ানো?

নবীনজী- সর ৮,৫০০নি।

প্রধান মন্ত্রীজী- হায়বদি অচৌবা খুঙ্গংনি। অদোম চহী কয়াদগী সর্পঞ্চ ওইরবগে?

নবীনজী- সর অহানবনি।

প্রধান মন্ত্রীজী- অহানবা ওইরিবনি হায়বা? অদুবু অদোম থবক য়াম্না তৌরি অমদি য়াম্না সিস্তেমেতিক ওইনা তৌরি, প্লানিংগা লোয়ননা তৌরি। খুঙ্গংগী মীয়াম্না অদোমগী ৱা তাব্রা?

নবীনজী- হোয় সর।

প্রধান মন্ত্রীজী- ঐহাক্কী মায়কৈদগী অদোম অমদি অদোমগী খুঙ্গংবু অসুক য়াম্না ফবা থবক তৌবগীদমক অমদি য়োজনা পুম্নমক মীয়ামদা য়ৌহনবগীদমক ঐহাক্না ময়াম পুম্নমকপু য়াইফ-পাউজেল পীজরি।

হৌজিক অমুক বিহার চৎলসি।

বিহারগী জহানাবাদ জিলাদগী গ্রাম পঞ্চায়ৎ ঘরনিয়াগী প্রধান শ্রী অজয় সিংহ য়াদব ঐখোয়গা লোয়ননা কনেক্ত তৌরে। অজয়জী খুরুমজরি।

অজয়জী- খুরুমজরি সরজী। ঐহাক অজয় সিংহ য়াদব, মুখিয়া, পঞ্চায়ৎ ঘরনিয়া, বিহারগী মায়কৈদগী তৌবীমল খঙবা উৎচরি, সর।

প্রধান মন্ত্রীজী- অজয়জী মীয়াম্বু গজ অনিগী অরাপ্পগী মতাংদা ভাব তাহনবীয়ু।

অজয়জী- গজ অনিগী অরাপ্পা, সর?

প্রধান মন্ত্রীজী- হোই।

অজয়জী- খুঙ্গংদা সর ব্লিচিং পাউদর চাইথোকপনি। য়ুমথোং খুদিং চংদুনা আশা ৱার্কর, ৱার্দ পঞ্চ, সর্পঞ্চ সাহেবনা য়ুমথোং খুদিং চংদুনা সাপোন পীরি সর, হকচাং অমসুং খুৎ চামথোক্নবগীদমক তম্বীরি সর, পুং অমা – পুংখায় অমগী মমাংদগী খুৎ হাম্বীয়ু অমদি এৱেয়র ওইবীয়ু। হোম ক্বরেন্তাইনদা মীওই ১৮ থম্লি সর। মখোয়বুসু পঞ্চায়ৎনা মখোয়গী মায়কৈদগী খুদোংচাবশিং পীরি সর। সর ফমুং ৩০গী হোম ক্বরেন্তাইন সেন্তর অমা শেম্লে। মদুদসু চানা থক্নবা পীরি, এ.এন.এম.গী দ্যুতী তৌহল্লি, চৌকিদারগী দ্যুতী তৌহল্লি সর। মীওই ৪৫গী গ্রাম রক্ষা দল অমা ঐখোয়না থৌরাং তৌরে সর। মখোয়বুসু খুঙ্গং খুদিংক্তা সর, খুঙ্গংগী মীওইশিং মপান্দা থোক্তনবা খুঙ্গং হৌরকপা ৱা য়ুংদুনা বেরিয়র থম্লি সর। দরকার ওইবা মীওই খক্তমক মপান্দা চত্হল্লি। অদুগা হেল্থ দিপার্মেন্ত অমদি মেদিকেলগী মায়কৈদগী চয়োল অমদা অনিরক খুঙ্গংদা লাক্লি সর।

প্রধান মন্ত্রীজী- ফরে অজয়জী, অদোমগী পঞ্চায়ৎতগীসু মাইগ্রেতরী মরূপ কয়া অমা অতোপ্পা শহরশিংদগী য়ুমদা হলক্লমগনি, লাকপা ঙমখিদবশিং অদুসু লাকনীংঙমগনি।

অজয়জী- হোয়, হল্লকপা পাম্লিবনি সর, অদুবু মখোয়না লৈরিবা মফম অদুদা লৈনবা ঐখোয়না থিংদুনা থম্লি, লোকদাউন মপুংফানা হাংদোক্লবা মতমদা হল্লক্নবা হায়রি। মরমদি নুমিৎ ১৪নি ঐখোয়না স্কুলদা থম্লি। মখোয়না হায়রি মদুদি নত্তে মুখিয়াজী ঐখোয় হৌজিক মপান্দা লৈখিগে, হাংদোক্লবা মতমদা লাক্কে। নুমিৎ ১৪নি লৈরোই।

প্রধান মন্ত্রীজী- হায়বদি ময়াম্না অদোমগী ৱাফ ইল্লি হায়বনিনে?

অজয়জী- হোয়, মখোয়না ইল্লি সর।

প্রধান মন্ত্রীজী- ফরে, ময়াম পুম্নমক খুদোংথিবা থোক্তনা লৈবা ওইরসনু। অদুগা পাংথোক্লিবা থবকশিং অদুগীদমক য়াইফ-পাউজেল পীজরি।

হৌজিক ঐখোয় উত্তর প্রদেশকী বস্তী চৎলসি। বস্তী গ্রাম পঞ্চায়ৎ নক্তিদেহীগী প্রধান ইচন বর্শা সিংহ ঐখোয়গা কনেক্ত তৌরে। বর্শাজী খুরুমজরি।

বর্শাজী- খুরুমজরি সর। ঐহাক্না ঐখোয়গী গ্রাম পঞ্চায়ৎ মীয়ামগী মায়কৈদগী অদোম্বু খুরুমজরি। অমদি পঞ্চায়তি রাজ দিবসকী য়াইফ-পাউজেল পীজরি।

প্রধান মন্ত্রীজী- বস্তীদা লোকদাউনগী নিয়ম নীংথিজনা ঙাক্না চৎলিবরা?

বর্শাজী- সর, ঐহাক্কী খুঙ্গংদা লোকদাউনগী নিয়ম মপুং ফানা নীংথিজনা ঙাক্না চৎলি অমদি ঐহাক্না আশাগী ইচে-ইচলশিং, আঙ্গনৱারী ইচে-ইচলশিং অমসুং এ.এন.এম.শিংগী খুত্থাংদা মীয়াম্বু য়ুম-য়ুমদা চৎতুনা লোকদাউনগী নিয়ম ঙাক্না চৎনবা, সোসিয়েল দিস্তেন্সিং ঙাক্না চৎনবা অমদি য়ুংদা লৈনবা ভাব তাহল্লি।

প্রধান মন্ত্রীজী- অদোম প্রধান ওইবা কয়াম কুইরবগে?

বর্শাজী- সর, ঐহাক অহানবা ওইনা প্রধান ওইজবনি। মসিগী মমাংদসু ঐহাক প্রধানগী মতৌগুম থবক তৌখ্রে।

প্রধান মন্ত্রীজী- কেন্দ্র সরকারনা শেম্লিবা য়োজনাশিং পি.এম. গরীব কল্যান য়োজনা, পি.এম. কিসান সম্মান নিধী, মসি পুম্নমক য়ৌরকপদা মফম অদুদা করম তৌবীরিবগে অদোম ময়াম।

বর্শাজী- সর, ঐখোয়গী মফম অসিদা উজ্জ্বলা য়োজনাগী মখাদা বেনেফিসরী ২৫ লৈরিবা, কিসান সম্মান নিধীগী বেনেফিসরী ১৫৫ অমদি রেজিস্ত্রেসন তৌরবা মীওই ১০ অমদি জন-ধন য়োজনাগী মখাদা লৈরিবা মীওই ৫০দা কানবা ফংহনখ্রে।

প্রধান মন্ত্রীজী- মীয়ামগী এক্সপরিয়েন্স কমদৌই, মখোয় পুম্নমক নুংঙাইরিবা নত্ত্রা?

বর্শাজী- সর, মীয়াম য়াম্না হরাওই। অদোমগী লোকদাউনগী, য়াথং য়াম্না নীংথিজনা ঙাক্তুনা চৎলি অমদি মীপুম খুদিংমক মশানা-মশাবু খুদোংথিনীংঙাই ওইদে হায়না ফওনরি।

প্রধান মন্ত্রীজী- য়েংবীয়ু, কোরোনা ভাইরস অসি য়াম্না অঙকপা ভাইরসনি অদুবু মহাক্কী মগুন অমসু লৈরি। মহাক মশা মথনতা কনাগুম্বা অমত্তগী য়ুমদা চৎতে, মশা মথন্তা করুগুম্বা মফম অমত্তদা চৎতে। করিগুম্বা অদোম্না মহাকপু কৌবা চৎলবা, করিগুম্বা অদোম্না মহাকপু লৌবা চৎলবা অদু ওইরগদি অদোমগা লোয়ননা য়ুমদা চংলক্কনি। অদু ওইরগদি মহাক্না য়ুমদা কনা অমত্তসু লেম্না থারোই। মরম অদুনা গজ অনি লাপ্পা মন্ত্র অসি শোন্দুনা লৈগদবনি।

লাকপীরো, পঞ্জাবলোমদা চৎলসি। পঞ্জাব, পথানকোৎকী গ্রাম পঞ্চায়ৎ হারাগী সর্পঞ্চ ইচল পল্লবী থাকুর ঐখোয়গা লোয়নদুনা লৈরে। পল্লবীজী খুরুমজরি।

পল্লবীজী- খুরুমজরি, সর। অদোম্বু ঐহাক্কী মায়কৈদগী অমদি ঐহাক্কী পঞ্চায়ৎ অপুম্বগী মায়কৈদগী তৌবীমল খঙবা উৎচরি। ঐাক বেকৱার্দ এরিয়া অমা ওইরিবা অমদি বোর্দর এরিয়া অমা ওইরিবা গ্রাম পঞ্চায়ৎ হারাগী সর্পঞ্চনি। হৌজিক কোরোনা ভাইরস চত্থরিবা অসিদা য়ুমদা লৈনবা অদোমগী পাউজেল অদু ঙাক্না চৎলি। অদুনা সর, মসিগীদমক ঐখোয়না খুঙ্গংদা য়াম্না ফজনা এরেঞ্জমেন্ত তৌরি। ঐখোয়গী খুঙ্গংগী চংফম অনিমক্তা চেক পোস্ত থম্লি, মদুদা ঐহাক ইশামক চৎলি অমদি লৈরিবা পঞ্চ খুদিংমক অমদি মখোয়গা লোয়ননা ঐখোয়গী নহাশিং চৎতুনা মফম অদুদা দ্যুতী তৌদুনা মরম লৈতনা মীওই অমত্তা মপান্দা থোকহন্দে অমদি খুঙ্গংদা চংহন্দে। মসিগী মতুং ঐখোয়না য়ুম-য়ুমদা চৎতুনা মীয়াম্বু মসিগী মতাংদা ভাব তাহল্লি।

অদুগা সর, হৌজিক ঐখোয়গী পঞ্জাবতসু মহৈ-মরোং লোকপগী সীজন ওইবনা পঞ্জাব সরকারগী মায়কৈদগী অখন্নবা নিয়ম ঙাক্না চৎনবা হায়রক্লিবা অদু পাংথোক্নবা মীয়ামদা খঙহল্লি। খুদম ওইনা লৌ খাওবা মতমদা মীতর অনি-অনি লাপ্না ফম্বা, খুৎ-শা তোইনা-তোইনা হাম্বা অসিগুম্বনি। অতোপ্পা খরসু খঙহল্লি মদুদি লৌ লোক্লবা মতুং মদুবু কৈথেলদা করম্না পুগনি হায়বসিনি। লৌমীশিংনা হান্না হোলোগ্রাম স্লিপ লৌগদবনি মদুগী মতুং কৈথেলদা চৎপা য়াগনি। হোলোগ্রাম স্লিপ লৌরবশিংনা ত্রেক্তরদা শুপ্নতংগী ক্বিনতন ৫০ দগী হেন্না পুবা য়ারোই। অদুগা ত্রেক্তরদা দ্রাইবর অমা অমদি হেল্পর অমদগী হেনবা য়ারোই। মখোয়সু সোসিয়েল দিস্তেন্সিং নীংথিবা পলন তৌগদবনি।

প্রধান মন্ত্রীজী- পল্লবীজী, অদোম্না য়াম্না নীংথিজনা হায়বীরে। ঐহাক্না খ্বাইগী য়াম্না অদোম্বু তৌবীমল খঙবা উৎচরি মরমদি অদোম্না য়াম্না ফজবা মওংদা অৱাবা মতম অসিদা অদোমগী খুঙ্গংবু ঙাক শেনবীরি অমদি খুঙ্গংগী মীয়াম্না অদোমগী ৱা তাবীরি। অদোমগী ৱাফম অচুম্বনি- লৌমীশিংনা মশা-মউ ফনা লৈবা য়াম্না মরু ওই। মরমদি ঐখোয়গী অন্নদাতানি অমদি মশাগী ওইজবা থিদনা লৈবাক পুম্বগী মপুক থাক্লি। লোকদাউনগী মতমদা লৈবাক অসিদা মরুওইবা চিঞ্জাক, শঙ্গোম, উহৈ ৱাৎহনদ্রিবা অসি লৌমী অমসুং শা-শন লোয়রিবা মরূপশিংনি।

হৌজিক ঐখোয় মহারাস্ত্রদা চৎলসি। মেদন করৱারী গ্রাম পঞ্চায়ৎকী প্রধান ইচন প্রিয়ঙ্কা ঐখোয়গা লোয়নদুনা লৈরে। প্রিয়ঙ্কাজী খুরুমজরি।

প্রিয়ঙ্কাজী- খুরুমজরি সর।

প্রধান মন্ত্রীজী- হায়বীয়ু প্রিয়ঙ্কাজী।

প্রিয়ঙ্কাজী- অদোম্না কোরোনাগী লোকদাউন লাউথোকখ্রবা মতুং তাং ২৬তগী খুঙ্গং পুম্বা সোদিয়ম হায়দোক্লোরাইৎ শিজিন্নদুনা খুঙ্গং পুম্বা সেনিতাইজ তৌরে। ঐখোয়না য়ুম খুদিংদা সাপোন য়েন্থোক্লে। মদুগী মতুং ফি তুবগী ত্রেনিং লৌরবা ঐখোয়গী খুঙ্গংগী স্কিল ইন্দিয়া নুপীশিংদা ঐখোয়না মাস্ক শেম্নবা থবক পীরে। মদু ঐখোয়না খুঙ্গং পুম্বদা য়েন্থোক্লি।

মদুগী মতুং ঐখোয়না দুকানশিংগী মাংদা সর্কল মার্ক তৌদুনা সোসিয়েল দিস্তেন্সিং থম্বদা মায় পাক্লি। মসিগা লোয়ননা ঐখোয়না হোম ক্বরেন্তাইনগী ফেসিলিতীসু হৌদোক্লি।

প্রধান মন্ত্রীজী- প্রিয়ঙ্কাজী, হৌজিক্তি খুঙ্গংগী মীওইশিং ৱারম্লগনি? মীয়াম শাওনীংবা ফাওরম্লগনি, নুমিৎ অসুক কুইনা থিংজিন্দুনা থম্লিবা মোদীজী অসি কমদৌরিবা জাৎনো।

প্রিয়ঙ্কাজী- মখোয় য়ুমদা লৈবগী হৈনবী লৈতে অদুনা খুঙ্গংগী মীওইশিং ৱানরে, অদুবু মখোয়না খঙই মদুদি ঐখোয়গী লৈবাক্কী প্রধান মন্ত্রীজীনা তৌরিবা অসি ঐখোয়গী হকশেলগীদমক তৌরিবনি, ঐখোয়গী লৈবাক্কীদমক তৌরিবনি।

প্রধান মন্ত্রীজী- অদোমগী খুঙ্গংগী মীশিং কয়ানো, প্রিয়ঙ্কাজী?

প্রিয়ঙ্কাজী- ৫০,০০০

প্রধান মন্ত্রীজী- ঐহাক্না খঙই মদুদি ফার্ম প্রদ্যুসকী থবক্তা ভারত সরকারনা মতেং য়াম্না পীরি। মসিদা পুক্নিং থৌগৎলিবা মখৈ অদোমগী খুঙ্গংগী লৌমীশিংনা য়াম্না চাউবা শক্তি ফংগনি।

প্রিয়ঙ্কাজী- কোরোনাগী অৱাবা অসি করম্না মায়োক্নগদগে হায়বা অদোম্না লৈবাক পুম্বা, মালেম পুম্বদা লম্বী তাক্লিবা অদুগুম্না অদোমগীদমক পরেং খরা ফোংদোকচগে।

প্রধান মন্ত্রীজী- শোয়দনা হায়বীয়ু।   

প্রিয়ঙ্কাজী-

হোৎনবা লেপতরি অমদি থৌনা লেংদনা লৈরি,

মালেমদা লৈরিবা কোক অসি সানেগী ফিতুরনি।

ঐহাক্না কনাদসু থাজদে, ঐহাক্না হোৎনবদা থাজৈ,

নোংমা নত্ত্রগা নোংমদি ফিভম অসি শোইদনা হোংলক্কনি।

প্রধান মন্ত্রীজী- ৱাহ, অদোমগী ৱাহৈদসু থাজবা লৈরি, মদু লৈবাক অসিগী স্পিরিৎকী রিফ্লেক্সন্নি, ঐহাক্কী মায়কৈদগী য়াইফ-পাউজেল পীজরি।

লাকপীরো ঐখোয় নোংপোক মায়কৈ পাংলসি, অসমগী মায়কৈদা চৎলসি। অসমগী কসার জিলাগী গ্রাম পঞ্চায়ৎ সোতা- দুধপাতিলগী প্রধান শ্রীমান রঞ্জিৎ সরকারজী ঐখোয়গা লোয়নদুনা লৈরে। রঞ্জিৎজী খুরুমজরি।

রঞ্জিৎজী- খুরুমজরি সর। সর, অহানবমক্তদা লোকদাউন লাউথোকপগদা অদোমগী অসম রাজ্যনা অদোমগী মায়কৈদা লেপ্লি।

প্রধান মন্ত্রীজী- ফরে, অসমগী মীওইশিং ৱারৌরমলগনি। মরমদি ঐহাক্না মখোয়গী বিহু য়াম্না চাউনা নুংঙাইবা কুমৈ অসিদামোদীজীনা লোকদাউন থম্লে। হন্দক্তি কোরোনানা মরম ওইদুনা বিহুসু অকক্নবা থাক্তা পাংথোক্লে। কোরোনাগী মায়োক্তা লৈবাক অসিনা চত্থরিবা লান্দা অসমগী মীয়ামগী থৌদাং অসি থাগৎনীংঙাইনি। চেক তৌনবা লাক্লিবা হেল্থ ৱার্করশিং অদুগী তেংবাংগীদমক অদোমগী পঞ্চায়ৎনা করি থবক তৌরিবগে?

রঞ্জিৎ সরকার- লোকদাউন, অদোম্না পায়খৎলিবা থবক অসি অৱাবা থবক্নি সর। লৈবাক অসি প্রোতেক্ত তৌনবগীদমক থবক তৌখিবনি সর। প্রধান মন্ত্রী সর, ঐখোয়গী পঞ্চায়ৎনা হোৎনরিবা অসি ঐখোয়গী খুঙ্গং অসিবু কোরোনাদগী মপুং ফানা ঙাকথোকহনবনি। মপান্দগী লাকপশিংদা মিৎয়েং থম্লি। মফম অসিদা আশা ৱার্করশিং অমসুং অতোপ্পা মেদিকেলগা মরী লৈনবা মীওইশিং সর্বে তৌবা লাকই। মেদিকেলগী মরূপশিং অসিবু য়ুমথোং খুদিং য়ৌহনবদা অমদি মরুওইবা ই-পাউ ফংহনবদা ঐখোয়গী পঞ্চায়ৎকী তীম্না মপুং ফানা তেংবাংলি। অদোম্না দোক্তরশিং অমসুং অতোপ্পা হেল্থ ৱার্করশিংগীদমক অনৌবা আইন শেম্লিবা অদুগীদমক পঞ্চায়ৎকী মায়কৈদগী ঐহাক্না অদোম্বু তৌবীমল খঙবা উৎচরি। মতম অসিদা শুফম নোমফম লৈত্রবা মীওইশিং অদুবুসু ঐখোয়গী পঞ্চায়ৎনা মতেং পাংলি। কেন্দ্র অমসুং রাজ্য সরকারগী মায়কৈদগী পীরকপা তেংবাং খুদিংমক খোংজেল য়াংনা মীয়ামদা ফংহনবগী থবক চত্থরি।

প্রধান মন্ত্রীজী- রঞ্জিৎজী, অদোম্না য়াম্না নীংথিজবা মওংদা ৱাফমশিং থম্বীরি। ঐহাক্না অদোম্বু নুংঙাইবা ফোংদোকচরি অমদি অসমগী মীপুম খুদিংমকপুসু ঐহাক্কী মায়ৈদগী নুংঙাইবা ফোংদোকচরি। অদোম্বু হন্না-হন্না থাগৎচরি।   

​মরূপশিং, অদোমগা লোয়ননা ৱারী শানজবা অসিনা ঐহাক্তা নত্তনা অদোম্বু তারিবা প্রজা খুদিংমক নুংঙাইবা ফাওরি। মখোয়দা অনৌবা থাজবা অমা ফাওরমগনি মদুদি অরাপ্পা খুঙ্গং লমদমশিংদা ঐখোয়গী মীয়াম্না মতৌ করম্না লৈবাক অসিবু শেন্নরিবগে। অসিগুম্লবা অৱাবা ফিভম অসিদসু অদোম ময়াম্না খুঙ্গংশিংদা পুন্সিবু অশোই অঙাম থোকহন্দনবা অমদি লায়থোকহন্নবা লমজিংলি, থৌদাং লৌরি।

খুঙ্গংদা সেনিতাইজেসনগী কেম্পেন ওইগেরা, শহরদগী লাকপা মীওইশিংগীদমক অতেনবা মতমদা ক্বরেন্তাইন সেন্তরশিং শেম্বা ওইগেরা, মীপুম খুদিংমক্কী চান-থক্নবা অমদি দরকার ওইবশিংগী চিন্তা ওইগেরা , মদু নত্ত্রগা মীচম প্রজাবু ভাব তাহনবগী থবক ওইগেরা, থবকশিং অসি ঐখোয়না লেপ্পা লৈতনা, চোকথবা নায়দনা তৌগদবনি।

ঐখোয়না মসি পুক্নিংদা থমগদবনি মদুদি সোসিয়েল দিস্তেন্সিং, গজ অনিগী অরাপ্পা, মন্ত্র অসি কাওরোইদবনি। অদোম ময়াম্না পুক্নিং চংগদবা ৱাফম অমনা আরোগ্য সেতু মোবাইল এপ্লিকেসন্নি। ঐহাক্না হৌজিক তি.ভি.দা কলাকার অমা উখি, মহাক্না মসিগী আরোগ্য সেতু মোবাইল এপ্লিকেসন অসিবু বোদীগার্দনি হায়খি। মসিগা মোবাইল এপ্লিকেসন অসি কোরোনাগা থেংনরিবা লানগীদমক য়াম্না কান্নবা অমনি।

মরূপশিং, লৈবাক অসিগী খুঙ্গং লমদমশিংদা লৈরিবা ইচিল-ইনাও অমসুং ইচল-ইচেশিংগী হকশেল অসি ঐখোয়গী সরকারগী খ্বাইদগী চাউবা প্রায়োরিতীশিংগী মনুংদা অমনি। অদোমগী দরকার ওইবা অমমম খঙনা সরকারনা লেপ্পা লৈতনা থবক তৌরি।

হান্নদগী হৌনা হোৎনরিবশিং অসিনা ঐখোয়গী খুঙ্গংশিংবু কোরোনাগী মায়োক্তা চত্থরিবা লান্দা মরুওইবা থৌদাং লৌনবগীদমক থৌরাং তৌরে। ঐহাক্না থাজবা থম্মি মদুদি অদোম ময়াম পুন্না হোৎনদুনা কোরোনাবু শোইদনা মায়থিবা পীগনি।

থাজবা অসিগা লোয়ননা অমুক হন্না মরূপ পুম্নকপু পঞ্চায় রাজকী অসিগুম্লবা মরুওইবা পঞ্চায়তি রাজ দিবসকীদমক য়াইফ-পাউজেল পীজরি। অদোমগী, অদোমগী ইমুং-মনুংগী, অদোমগী খুঙ্গংগী প্রজাশিংগী হকচাং ফনা লৈনবা থৌনিজরি। অদুগা অমুক হন্না অদোম্না মতম কায়থোকপীরি, অদোমগী ৱাফম কয়া থম্বীরি, অনৌবা ইফোর্মেশন কয়া অমা ফংলে, অদোমগী থাজবা অদু ঐহাক্না ফাওরি।

ঐহাক্না অমুক হন্না ময়াম পুম্নমকপু হন্না-হন্না থাগৎচরি।

খুরুমজরি!!!