‘ଧର୍ମନିରପେକ୍ଷତା ଓ ସମନ୍ୱୟ’ ଭାରତ ଓ ଭାରତୀୟଙ୍କ ପାଇଁ ‘ରାଜନୈତିକ ଫାସନ’ ନୁହେଁ ବରଂ ‘ଉପଯୁକ୍ତ ଆବେଗ’ ବୋଲି ଆଜି କେନ୍ଦ୍ର ସଂଖ୍ୟାଲଘୁ ବ୍ୟାପାର ମନ୍ତ୍ରୀ ମୁକ୍ତାର ଅବ୍ବାସ ନକଭୀ କହିଛନ୍ତି । ଏହି ସାମଗ୍ରିକ ସଂସ୍କୃତି ଓ ପ୍ରତିଶ୍ରୁତିବଦ୍ଧତା ଦେଶକୁ ‘ବିବିଧତାର ଏକତା’ ସୂତାରେ ବାନ୍ଧି ରଖିଛି ।

ଗଣମାଧ୍ୟମ ସହ ଆଲୋଚନା କରି ଶ୍ରୀ ନକଭୀ କହିଲେ ଯେ ଭାରତରେ ସଂଖ୍ୟାଲଘୁଙ୍କ ସମେତ ସବୁ ନାଗରିକଙ୍କର ସାମ୍ବିଧାନିକ, ସାମାଜିକ ଓ ଧାର୍ମିକ ଅଧିକାରର ସୁରକ୍ଷା ହେଉଛି ରାଷ୍ଟ୍ରର ସାମ୍ବିଧାନିକ ଓ ନୈତିକ ଅଧିକାର । ଯେକୌଣସି ପରିସ୍ଥିତିରେ ଆମର ‘ବିବିଧତାର ଏକତା’ର ବଳ ଯେପରି ଦୁର୍ବଳ ନ ହୋଇଯାଏ, ଆମକୁ ତାହା ସୁନିଶ୍ଚିତ କରିବାକୁ ପଡ଼ିବ। ଭୁଲ ତଥ୍ୟ ପ୍ରଚାରପ୍ରସାର କରିବା ପାଇଁ ଏବେ ବି ‘ପାରମ୍ପରିକ ଓ ପେସାଦାର ମିଥ୍ୟାବାଦୀ ବ୍ରିଗେଡ୍ ସକ୍ରିୟ ରହିଛନ୍ତି । ଏଭଳି ଖଳ ପ୍ରକୃତିର ଲୋକଙ୍କ ନିକଟରୁ ଆମକୁ ସଚେତନ ରହିବାକୁ ହେବ ଏବଂ ଆମକୁ ଏକତ୍ରିତ ଭାବେ ସେମାନଙ୍କର କୁଟିଳ ଯୋଜନାକୁ ଭଣ୍ଡୁର କରିବାକୁ ପଡ଼ିବ ।

ଶ୍ରୀ ନକଭୀ କହିଲେ ଯେ ଆମେମାନେ ମିଥ୍ୟା ସୂଚନା ଜରିଆରେ ସୃଷ୍ଟି କରାଯାଉଥିବା ଯେକୌଣସି ପ୍ରକାର ମିଥ୍ୟା ଖବର ଓ ଷଡ଼ଯନ୍ତ୍ରଠାରୁ ସତର୍କ ରହିବାକୁ ହେବ । ଦେଶର ସମସ୍ତ ନାଗରିକଙ୍କର ନିରାପତ୍ତା ଓ ମଙ୍ଗଳ ପାଇଁ ପ୍ରଶାସନ କାର୍ଯ୍ୟ କରୁଛି । କରୋନା ବିରୋଧୀ ଲଢ଼େଇକୁ ଦୁର୍ବଳ କରିବା ପାଇଁ ଗୁଜବ ଓ ଷଡ଼ଯନ୍ତ୍ର ଭଳି କୁଟିଳ ଡିଜାଇନ କରାଯାଉଛି । ଆମେ ଏଭଳି ଗୁଜବ, ଭୁଲ ସୂଚନା ଓ ଷଡ଼ଯନ୍ତ୍ରକୁ ପରାସ୍ତ କରି କରୋନା ବିରୋଧୀ ଲଢ଼େଇ ଜିତିବା ପାଇଁ ମିଳିତ ଭାବେ କାର୍ଯ୍ୟ କରିବା ଉଚିତ । ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀଙ୍କ ନେତୃତ୍ୱରେ ସାରା ଦେଶ କରୋନା ବିରୋଧୀ ଲଢ଼େଇରେ ଜାତି, ଧର୍ମ ଓ ଅଂଚଳର ଭେଦଭାବକୁ ଭାଙ୍ଗି ଏକାଠି ହୋଇଛି ।

ଲୋକମାନେ ନିଜ ଘର ଭିତରେ ରହି ରମଜାନକୁ ପାଳନ କରନ୍ତୁ

ନକଭୀ କହିଲେ ଯେ ସବୁ ମୁସଲିମ୍ ଧାର୍ମିକ ନେତା, ଇମାମ୍, ଧାର୍ମିକ ଓ ସାମାଜିକ ସଂଗଠନ ଏବଂ ମୁସଲିମ୍ ସମାଜ ଏପ୍ରିଲ 24ରୁ ଆରମ୍ଭ ହେଉଥିବା ପବିତ୍ର ରମଜାନ ମାସରେ ଘର ଭିତରେ ରହି ପ୍ରାର୍ଥନା ଓ ଅନ୍ୟ ଧାର୍ମିକ କାର୍ଯ୍ୟ କରିବାକୁ ମିଳିତ ଭାବେ ନିଷ୍ପତ୍ତି ନେଇଛନ୍ତି ।

ଶ୍ରୀ ନକଭୀ ଗଣମାଧ୍ୟମକୁ କହିଲେ ଯେ ପବିତ୍ର ରମଜାନ ମାସରେ ସମସ୍ତ ମୁସଲିମ୍ ଧାର୍ମିକ ନେତା, ଇମାମ୍, ଧାର୍ମିକ ଓ ସାମାଜିକ ସଂଗଠନ ସହଯୋଗରେ କଠୋର ଲକଡାଉନ୍ ଓ କର୍ଫ୍ୟୁର କାର୍ଯ୍ୟକାରୀ ସହ ସାମାଜିକ ଦୂରତା ସୁନିଶ୍ଚିତ ପାଇଁ ରଣନୀତି ପ୍ରସ୍ତୁତ ଦିଗରେ 30 ରାଜ୍ୟର ୱାକଫ୍ ବୋର୍ଡଗୁଡ଼ିକ କାର୍ଯ୍ୟ କରୁଛନ୍ତି । କରୋନା ମହାମାରୀ ବିରୋଧରେ ସାରା ଦେଶ ଏକତ୍ରିତ ହୋଇ ଲଢ଼େଇ ଜାରି ରଖିଛି ।

ସୂଚନା ଥାଉକି, ପବିତ୍ର ରମଜାନ୍ ମାସରେ ଲକଡାଉନ୍, କର୍ଫ୍ୟୁ ଓ ସାମାଜିକ ଦୂରତା ନିୟମକୁ କଡ଼ାକଡ଼ି ଭାବେ ପାଳନ କରିବା ପାଇଁ ଗତ ସପ୍ତାହରେ ଶ୍ରୀ ନକଭୀଙ୍କ ଅଧ୍ୟକ୍ଷତାରେ ସମସ୍ତ ରାଜ୍ୟର ୱାକଫ୍ ବୋର୍ଡ ସହ ଏକ ଭିଡିଓ କନଫରେନ୍ସିଂ ବୈଠକରେ ନିଷ୍ପତ୍ତି ହୋଇଛି । ପ୍ରକାଶ ଥାଉକି, ସାରା ଦେଶରେ ରାଜ୍ୟ ୱାକଫ୍ ବୋର୍ଡଗୁଡ଼ିକ ଅଧୀନରେ 7 ଲକ୍ଷରୁ ଅଧିକ ପଞ୍ଜୀକୃତ ମସଜିଦ୍, ଇଦଗା, ଇମାମବାଦା, ଦରଗା ଓ ଅନ୍ୟ ଧାର୍ମିକ, ସାମାଜିକ ଅନୁଷ୍ଠାନ ରହିଛି । କେନ୍ଦ୍ରୀୟ ୱାକଫ୍ ବୋର୍ଡ ଭାରତର ରାଜ୍ୟ ୱାକଫ୍ ବୋର୍ଡଗୁଡ଼ିକର ନିୟାମକ ସଂସ୍ଥା ।

ଏହା ବ୍ୟତୀତ ଶ୍ରୀ ନକଭୀ ନିୟମିତ ଭାବେ ବିଭିନ୍ନ ମୁସଲିମ ଧାର୍ମିକ ନେତା ଏବଂ ବିଭିନ୍ନ ଧାର୍ମିକ ଓ ସାମାଜିକ ସଂଗଠନର ପ୍ରତିନିଧିଙ୍କ ସହ ଯୋଗାଯୋଗରେ ରହୁଛନ୍ତି ।

ଶ୍ରୀ ନକଭୀ ପୁନଶ୍ଚ କହିଲେ ଯେ ଆମେମାନେ ସ୍ୱାସ୍ଥ୍ୟ କର୍ମୀ, ନିରାପତ୍ତା ରକ୍ଷୀ, ପ୍ରଶାସନିକ ଅଧିକାରୀ, ପରିମଳ କର୍ମୀଙ୍କୁ ସହଯୋଗ କରିବା ଉଚିତ । ଏବେକାର କରୋନା ମହାମାରୀ ବେଳେ ସେମାନେ ନିଜ ଜୀବନକୁ ବିପଦରେ ପକାଇ ଆମର ନିରାପତ୍ତା ଓ ମଙ୍ଗଳ ପାଇଁ କାମ କରୁଛନ୍ତି । କ୍ୱାରେଂଟାଇନ୍ ଓ ଆଇସୋଲେସନ ସେଣ୍ଟରଗୁଡ଼ିକ କେବଳ ଲୋକମାନଙ୍କୁ, ସେମାନଙ୍କ ପରିବାରକୁ ଓ ସମାଜକୁ କରୋନା ମହାମାରୀରୁ ରକ୍ଷା କରିବା ଉଦ୍ଦେଶ୍ୟରେ ସ୍ଥାପନ କରାଯାଇଛି ବୋଲି ଲୋକମାନଙ୍କ ମଧ୍ୟରେ ସଚେତନତା ସୃଷ୍ଟି କରି ଆମମାନଙ୍କୁ ଏଗୁଡ଼ିକ ସମ୍ପର୍କରେ ପ୍ରଚାର କରାଯାଉଥିବା ଗୁଜବ ଓ ମିଥ୍ୟା ଖବରକୁ ମୂଳୋତ୍ପାଟନ କରିବାକୁ ହେବ ।

ଶ୍ରୀ ନକଭୀ କହିଲେ ଯେ କରୋନା ମହାମାରୀ ଚାଲେଞ୍ଜକୁ ଦୃଷ୍ଟିରେ ରଖି ସମସ୍ତ ଧାର୍ମିକ-ସାମାଜିକ କାର୍ଯ୍ୟକଳାପ ଓ ଦେଶର ସମସ୍ତ ମନ୍ଦିର, ଗୁରୁଦ୍ୱାର, ଚର୍ଚ୍ଚ ଓ ଅନ୍ୟ ଧାର୍ମିକ ଓ ସାମାଜିକ ସ୍ଥାନରେ ଜନସମାଗମକୁ ବନ୍ଦ କରାଯାଇଛି । ସେହିଭଳି ଦେଶର ସମସ୍ତ ମସଜିଦ ଓ ଅନ୍ୟ ମୁସଲିମ୍ ଧାର୍ମିକ ସ୍ଥାନରେ ମଧ୍ୟ ଜନସମାଗମକୁ ବନ୍ଦ କରାଯାଇଛି । ପବିତ୍ର ରମଦାନ୍ ମାସରେ ବିଶ୍ୱର ଅଧିକାଂଶ ମୁସଲିମ ରାଷ୍ଟ୍ର ମଧ୍ୟ ମସଜିଦ ଓ ଅନ୍ୟ ଧାର୍ମିକ ସ୍ଥାନରେ ଜନସମାଗମକୁ ନିଷେଧ କରିଛନ୍ତି ଏବଂ ଘର ଭିତରେ ରହି ପ୍ରାର୍ଥନା ଓ ଅନ୍ୟ ଧାର୍ମିକ ଦାୟିତ୍ୱ ନିର୍ବାହ କରିବାକୁ ନିର୍ଦ୍ଦେଶନାମା ଜାରି କରିଛନ୍ତି ।

ଶ୍ରୀ ନକଭୀ କହିଲେ ଯେ ଲୋକମାନଙ୍କ ନିରାପତ୍ତା ଓ ମଙ୍ଗଳ ଉଦ୍ଦେଶ୍ୟରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ସମସ୍ତ ରାଜ୍ୟ ସରକାରଙ୍କ ସହ ମିଳିତ ଭାବେ କାର୍ଯ୍ୟ କରୁଛନ୍ତି । ଲୋକମାନଙ୍କ ସହଯୋଗିତା କାରଣରୁ ଭାରତର କରୋନା ବିରୋଧୀ ଲଢ଼େଇକୁ ବିରାଟ ଆଶ୍ୱସ୍ତି ଦେଇଛି । ଏହା ସତ୍ତ୍ୱେ ଦେଶ ସମ୍ମୁଖରେ ଅନେକ ଆହ୍ୱାନ ରହିଛି । କେନ୍ଦ୍ର ଓ ରାଜ୍ୟ ସରକାରଙ୍କ ଦ୍ୱାରା ଜାରି ନିୟମାବଳୀକୁ କଡ଼ାକଡ଼ି ଓ ଠିକ୍ ଭାବେ ପାଳନ କରି ଆମେ କରୋନା ବିରୋଧୀ ଏହି ଆହ୍ୱାନଗୁଡ଼ିକୁ ହରାଇପାରିବା ।

****************