এম.ও.সি.এ কোর গ্রুপ অসি লৈবাক অসিগী মরুওইবা স্তেকহোলদরশিংগা লোইননা ভারতনা কোভিদ-১৯ লান্থেংনরিবা অসিদা মতেং শৌগত্তুনা লৈবাক অসিগী মনুং হঞ্জিনবা লমশিংদা চঙদবা য়াদ্রবা হিদাক লাংথক্কী কার্গো পুনবা লাইফ্লাইন য়ু.দি.এনগী থৌদাং লৌনবা শেমখিবনি অমসুং হব অমসুং স্পোক্কী থবক-থৌরমশিং ইং ২০২০গী মার্চকী তাং ২৬তগী হৌখ্রে হায়না এম.ও.সি.এগী এ.দি.জি (মেদিয়া) ওইরিবা এস.ঐচ রজিব জেননা ফোঙদোকখি। ঙসি পাঙথোকখিবা পাউগী মীফম অমদা এস.ঐচ রজিব জেননা এম.ও.সি.এনা লোকদাউন মনুংদা লৌখৎখিবা লাইফ্লাইন উরান থৌশিলগী ৱারোল থমখি অমসুং লাইফ্লাইন উরানগী মখাদা এয়র ইন্দিয়া, এলাইন্স এয়র, আই.এ.এফ অমসুং প্রাইবেত কেরিয়রশিংনা ফ্লাইৎ ২৪৭ মথৌ তৌখ্রে হায়না পনখি। হায়রিবা ফ্লাইৎশিং অসিগী মনুংদগী ১৫৪না এয়র ইন্দিয়া অমসুং এলাইন্স এয়রনা চলাইখি। হৌজিক ফাওবদা পুথোক-পুশিন তৌখিবা কার্গো মশীং অসি তন ৪১৮ হেনখ্রে। লাইফ্লাইন উরান ফ্লাইৎনা হৌজিক ফাওবদা নোংথক্তা কিলোমিতর লাখ ২.৪৫ হেন্না পাইখ্রে।

এয়র ইন্দিয়া, এলাইন্স এয়র, আই.এ.এফ অমসুং প্রাইবেত কেরিয়রশিংনা অৱাং-নোংপোক্কী লমশিং, ইথৎ ওইবা তেরিতোরিশিং অমসুং চীংগী রাজ্যশিংদা অহেনবা মিৎয়েং থমদুনা হিদাক লাংথক্কী পোৎচৈশিং য়াওনা চঙদবা য়াদ্রবা পোৎলমশিং থিনবগী থবক তৌনবা ফ্লাইৎশিং মথৌ তৌরি। এয়র ইন্দিয়া অমসুং আই.এ.এফনা মরুওইনা জে এন্দ কে, লদাখ, অৱাং-নোংপোক অমসুং ইথৎ ওইবা লমশিংগীদমক পুন্না হোৎনমিন্নরি। পৱন হন্স লিমিতেদ য়াওনা হেলিকোপ্তর সর্ভিসশিংনা জে এন্দ কে, লদাখ অমসুং অৱাং-নোংপোক্কী লমশিংদা মরুওইবা হিদাক-লাংথক্কী কার্গো অমসুং অনাবশিং পুবগী থবক তৌরি।

অন্তরজাতীগী থাক্তনা, ইং ২০২০গী এপ্রিলগী তাং ৪দগী এয়রব্রিদজনা চাইনাগা খুৎশম্নদুনা ফার্মাস্যুতিকেল, মেদিকেল ইক্বিপমেন্ত অমসুং কোভিদ-১৯ রিলিফকী পোৎচৈশিং পুথোক-পুশিন তৌরি। খা-এসিয়াগী শরুক্তনা এয়র ইন্দিয়ানা কোলোম্বোদা হিদাক-লাংথক্কী পোৎচৈশিং পুথোক-পুশিন তৌরি।

ইং ২০২০দা এয়র ইন্দিয়ানা ইহান-হানবা ওইনা কৃশি উরান প্রোগ্রামগী মখাদা মুম্বাইদগী লন্দন ফাওবা তন ২৯গী উহৈ অমসুং মনা-মশীংগী পোৎলম পুদুনা পাইখি অমসুং তন ১৫.৬কী কার্গোগী পোৎচৈশিং পুদুনা হল্লকখি। এয়র ইন্দিয়ানা মসিগী অনীশুবা ফ্লাইৎ ওইনা মুম্বাই অমসুং ফ্রেঙ্কফর্তকী মরক্তা ইং ২০২০গী এপ্রিলগী তাং ১৫দা কৃশি উরান প্রোগ্রামগী মখাদা তন ২৭কী মতম মতমগী উহৈ অমসুং মনা-মশীং পুদুনা চৎখি অমসুং তন ১০গী জেনরেল কার্গো পুদুনা হল্লকখি।