ଶ୍ରମ ଓ ନିୟୋଜନ ମନ୍ତ୍ରଣାଳୟ

ଇଏସଆଇ ଯୋଗଦାନ ଦାଖଲ କରିବାର ଅବଧି ବଢ଼ାଇଲା ଇଏସଆଇସି
• 3.49 କୋଟି ବୀମାଭୁକ୍ତ ବ୍ୟକ୍ତି ଏବଂ 12,11,174 ନିଯୁକ୍ତିଦାତା ପାଇବେ ଲାଭ
• ଲକଡାଉନ ସମୟରେ ଘରୋଇ ଔଷଧ ଦୋକାନରୁ ଔଷଧ କ୍ରୟ ପାଇଁ ସୁବିଧା

Posted On: 14 APR 2020 4:51PM by PIB Bhubaneshwar

କୋଭିଡ-19 ମହାମାରୀ କାରଣରୁ ଦେଶରେ ଲକଡାଉନ ଜାରି ହୋଇଥିବା ଅଧିକାଂଶ ସଂସ୍ଥାରେ ବର୍ତ୍ତମାନ କାର୍ଯ୍ୟ ବନ୍ଦ ରହିଛି। ଏହାକୁ ଦୃଷ୍ଟିରେ ରଖି କର୍ମଚାରୀ ରାଜ୍ୟ ବୀମା ନିଗମ (ଇସଏଆଇସି) ପକ୍ଷରୁ ଏହାର ଅଂଶୀଦାର ବିଶେଷକରି ନିଯୁକ୍ତିଦାତା ଏବଂ ବୀମାଭୁକ୍ତ ବ୍ୟକ୍ତିଙ୍କ ପାଇଁ କେତେକ ରିହାତି ପଦକ୍ଷେପ ଘୋଷଣା କରାଯାଇଛି। ଏହାଛଡ଼ା ଇଏସଆଇସି ପକ୍ଷରୁ କୋଭିଡ-19 ମୁକାବିଲାରେ ନିଜର ଡାକ୍ତରୀ ସମ୍ବଳକୁ ମଧ୍ୟ ବିନିଯୋଗ କରାଯାଉଛି।

ଫେବୃଆରୀ ଏବଂ ମାର୍ଚ୍ଚ ମାସ ପାଇଁ ଇଏସଆଇ ଯୋଗଦାନ ଦାଖଲ କରିବାର ଅବଧି 15 ଏପ୍ରିଲକୁ ଧାର୍ଯ୍ୟ କରାଯାଇଥିବା ବେଳେ ଏହାକୁ ଏବେ ମେ 15 ତାରିଖ ପର୍ଯ୍ୟନ୍ତ ବଢ଼ାଇ ଦିଆଯାଇଛି। ସେହିପରି ନିଯୁକ୍ତିଦାତାଙ୍କ ଅସୁବିଧାକୁ ଆଖି ଆଗରେ ରଖି ଫେବୃଆରୀ ମାସର ଇଏସଆଇ ଯୋଗଦାନ ଦାଖଲ ଅବଧି 15 ଏପ୍ରିଲରୁ 15 ମେ ପର୍ଯ୍ୟନ୍ତ ବୃଦ୍ଧି କରି ଦିଆଯାଇଛି। ଏଥିପାଇଁ କୌଣସି ଜୋରିମାନା କିମ୍ବା ସୁଧ ଅଥବା ଶୁଳ୍କ ଲାଗୁ ହେବ ନାହିଁ। ରିଟର୍ଣ୍ଣ ଦାଖଲ ପାଇଁ ଏହି ଅବଧି ବୃଦ୍ଧି ଫଳରେ 3.49 କୋଟି ବୀମାଭୁକ୍ତ ବ୍ୟକ୍ତି ଓ 12,11,174 ନିଯୁକ୍ତିଦାତା ଉପକୃତ ହୋଇପାରିବେ

ଏହାଛଡ଼ା ବୀମାଭୁକ୍ତ ବ୍ୟକ୍ତି ଓ ହିତାଧିକାରୀଙ୍କ ପାଇଁ ଇଏସଆଇସି ପକ୍ଷରୁ ଆହୁରି କେତେକ ସୁବିଧା କରାଯାଇଛି। ଇଏସଆଇ ହିତାଧିକାରୀମାନେ ଲକଡାଉନ ସମୟରେ ଘରୋଇ ଔଷଧ ଦୋକାନରୁ ମଧ୍ୟ ଜରୁରି ଔଷଧ କିଣିପାରିବେ। ଏଥିପାଇଁ ଆବଶ୍ୟକ କ୍ଷତିପୂରଣ ଇଏସଆଇ ପକ୍ଷରୁ ଯୋଗାଇ ଦିଆଯିବ। ଯଦି ଇଏସଆଇ ହସ୍ପିଟାଲଗୁଡ଼ିକୁ ସ୍ବତନ୍ତ୍ର କୋଭିଡ-19 ହସ୍ପିଟାଲ ଭାବେ ଘୋଷଣା କରାଯାଏ ତାହେଲେ ହିତାଧିକାରୀମାନଙ୍କୁ ଅନ୍ୟ ସହଭାଗୀ ହସ୍ପିଟାଲ ଜରିଆରେ ଜରୁରି ଚିକିତ୍ସା ସେବା ଯୋଗାଇ ଦିଆଯିବ।

ଲକଡାଉନ କାରଣରୁ ବର୍ତ୍ତମାନ ପରିସ୍ଥିତିରେ ଏଭଳି ମାମଲା ମଧ୍ୟ ସାମ୍ନାକୁ ଆସିପାରେ ଯେ ଏହି ହିତାଧିକାରୀମାନଙ୍କୁ ଜାରି ହୋଇଥିବା ଚିକିତ୍ସା ସୁବିଧା କାର୍ଡର ବୈଧତା ସମାପ୍ତ ହୋଇଯାଇଥିବ ଏବଂ ଲକଡାଉନ କାରଣରୁ ସେ ଅଗ୍ରୀମ ବାର୍ଷିକ ଯୋଗଦାନ ଦେଇପାରିନଥିବେ। ଏପରି ହିତାଧିକାରୀମାନଙ୍କୁ 30.06.2020 ପର୍ଯ୍ୟନ୍ତ ଇଏସଆଇ (କେନ୍ଦ୍ରୀୟ ଆଇନ) ନିୟମର 60 ଏବଂ 61 ଅନ୍ତର୍ଗତ ଚିକିତ୍ସା ସୁବିଧା ପାଇବାର ଅନୁମତି ପ୍ରଦାନ କରାଯାଇଛି।

ମାର୍ଚ୍ଚ 2020 ମାସ ପାଇଁ ସ୍ଥାୟୀ ଭିନ୍ନକ୍ଷମତାର ଲାଭ ଏବଂ ଆଶ୍ରିତଙ୍କ ଲାଭ ବାବଦରେ 41.00 କୋଟି ଟଙ୍କା ହିତାଧିକାରୀଙ୍କ ବ୍ୟାଙ୍କ ଖାତା ଜମା କରି ଦିଆଯାଇଛି।

 

*************

 



(Release ID: 1614631) Visitor Counter : 101