কোভিদ-১৯ শন্দোরকপা অমসুং লাইচৎ অসি থিংনবা লৈবাক শীনবা থুংনা অথিংবা থমখিবদগী লৌমীশিংনা থেংনরিবা অৱাবশিং কোকহন্নবা ইন্দিয়ান কাউন্সিল ওফ এগ্রিকলচরেল রিচর্ছ(আই সি এ আর)না পায়খৎলিবা থবকশিং য়ুনিয়ন এগ্রিকলচর মিনিস্তর নরেন্দ্র সিংহ তোমারনা অমুক হন্না য়েংশিনখ্রে । আই সি এ আরগী ইন্সতিতুৎ অহুম্না মীওইবদা কোভিদ-১৯গী চাংয়েং তৌরিঙৈ মরক অসিদা, আই সি এ আরনা অথিংবা মনুংদা লৌমীশিং মতেং পাংনবা থবক কয়া পায়খৎলি অমসুং লৈবাক শীনবা থুংনা লৌমীশিংদা চেকশিনৱাশিং পীখি । এগ্রিকলচর য়ুনিভর্সিতিশিংনা ওনলাইন ক্লাসশিং পাংথোক্নবা মিনিস্তরনা পাউতাক পীখি ।

মীফম অদুদা আই সি এ আরগী দিরেক্তর জেনেরেল দোক্তর ত্রিলোচান মোহোপাত্রানা হায়খি আই সি এ আরনা লম লমগী লোল ১৫দা লৈবাক্কী অমসুং রাজ্যগী ওইবা অখন্নবা পাউতাকশিং লৌমীশিংদা পীরি অমসুং অথিংবা মনুংদা লৌউ-শিংউগী থবকশিং কোমথোকলিবা অসিগী মতাংদা দিজিতেল প্লেতফোর্মশিংদা লৌমীশিংদা খঙহনখি ।

য়ুনিয়ন মিনিস্তরগী পাউতাকশিং মতুংইন্না, রাজ্যশিংগী কৃষি বিগ্যান কেন্দ্রশিংগী খুৎথাংদা এমকিষান পোরতেল শীজিন্নদুনা লৌমী ক্রোর ৫.৪৮ হেনবদা পাউতাক ১১২৬ পীখ্রে । ৱাতসএপ্প গ্রুপশিং অমসুং অতৈ দিজিতেল প্লেতফোর্মশিংগী খুৎথাংদসু চেকশিনৱাশিং পীখি । পাউচেশিংদা কে ভি কেশিংনা চেকশিনৱাশিংগী পাউ ৯৩৬ ফোংখি , রেদিওগী ৱারি-ৱাতাই ১৯৩ অমসুং তি ভিগী থৌরম ৫৭ শন্দোকখি ।

আই সি তি তুলশিং শীজিন্নদুনা গেহু, ফৌ, চুজাক, হৱাইশিং, চনান, থাও থোকপা মরুশিং, চু, মশিং থোকপা পাম্বীশিং, হৈনৌ, চম্প্রা, লফোই, কফোই, অঙ্গুর, লিতচি, লৈ, মনা-মশিং, মেলোনশিং অমসুং য়ুবী, ক্বা, কোক্বা অমসুং তুবর ক্রোবশিং থাবগী মতাংদা লৌমীশিংদা পাউতাকশিং পীখি ।

আই সি এ আরগী মখাদা লৈবা ফিসরি চিছর্স ইন্সতিতুৎশিংনা ঙা য়োকপগী মতাংদা লৌমীশিংদা ই-পাউশিং অমসুং ইজুকেসনগী মচাকশিং ফংহল্লি । আই সি এ আরগী ইন্সতিতুৎশিংনা দাইরি, শা-ষন লোইবা অমসুং য়েন লোইবগী মতাংদা শা-ষনশিং মশা ফনা লৈহন্নবা অমসুং কোরোনাভাইরস থেংননবা হকচাংগী লায়না ঙাকথোকপা ঙম্বগী শক্তি হেনগৎহন্নবা শঙ্গোম, য়েরুম অমসুং য়েনশা পুথোক্নবা লৌমীশিংদা খঙহনখি ।

ওনলাইদা ক্লাসশিং পাংথোক্নবা এগ্রিকলচরেল য়ুনিভর্সিতিশিংগি ভি সিশিংদা আই সি এ আরনা খঙহনখি অমসুং হৌজিক মসি থবক ওইনা পাংথোক্লে । আই সি এ আরগী ইন্সিতিতুৎ অহুম্না ইনভাইরোনমেন্ত অমসুং ফোরেস্ত মিনিস্ত্রিনা জুগী শা-উচেকশিংদগী লৌরকপা সেম্পলশিং কোভিদ তেস্ত তৌবগী থবক পায়খৎলি । নিহসাদ ভোপালনা চিংনবা কোভিদ-১৯ সেম্পল ২৩ চাংয়েং তৌখ্রে অমসুং হায়রিবা সেম্পলশিং অদু নেগেতিব ওইখি । দোক্তর মোহাপাত্রানা হায়খি আই সি এ আরনা ক্লাইমেত চেঞ্জ, ভাইরোলোজি অমসুং অতোপ্পা লায়নাশিং অমসুং জুশিংদা লৈরিবা শা-উচেকশিংদগী মীওইবদা ভাইরস শন্দোরকপগী মতাংদা অমসুং অসিগুম্বা শিংনবা কয়া অসি মহৈ-মরোংশিংনা ঙাকথোকপা ঙমগদরা হায়বগী মতাংদা থিজিল্লি । 

কোভিদ-১৯ লাইচৎ ঙাকথোক্নবা অরোগ্যা সেতু মোবাইল এপ্প শীজিন্নবগী মতাংদা আই সি এ আর অমসুং কে ভি কেশিংনা পাউজেল শন্দোক্লি । মসিগী মহৈ ওইনা লৌমী লাখ ২৫.০৪দা পাউজেল য়ৌখ্রে অমসুং লৌমী লাখ ২.৯২ মখোয়না এপ্প অসি লৌথখ্রে ।

লৈবাক অসিগী মফম কয়াদা লৈরিবা আই সি এ আরগী গেস্ত হাওসশিং ক্বারেনতাইন সেন্তরশিং ওইহন্নবা অমসুং দরকার ওইবা খুৎলায়শিং ফংহন্নবা য়ুনিয়ন এগ্রিকচর মিনিস্তরনা পাউতাক পীখি । দোক্তর মোহাপাত্রানা হায়খি আই সি এ আরনা লায়রবশিংদা লেম্না চানবা পীদুনা মতেং পাংলি অমসুং পি এম-কিয়ারস ফন্দদা লুপা ক্রোর ৬.০৬ মতেং পাংখ্রে ।