কেন্দ্রগী হকশেল অমসুং য়াইফ-য়ুম্বাল মন্ত্রী দা. হর্শ বর্ধন্না হায়খি, “ঐহাক্না ময়াম পুম্নমকপু অদোম-অদোমগা মরী লৈনবা রাজ্যশিং অমসুং য়ুনিয়ন তেরিতোরীশিংদা কোবিদ-১৯গী মায়োক্তা ঐখোয়না লান্থেংনরিবা অসিদা ফিভম লাকশিন্দুনা থম্বগীদমক নুংঙাইবা ফোংদোকচরি।” দা. হর্শ বর্ধন্না ঙসি হকশেল অমসুং য়াইফ-য়ুম্বালগী রাজ্য মন্ত্রী শ্রী অশ্বিনী কুমার চৌবেগা লোয়ননা ভিদিও কনফরেন্সকী থোংদা রাজ্য অমদি য়ুনিয়ন তেরিতোরী পুম্নমক্কী হেল্থ মিনিস্তরশিং, চিফ সেক্রেতরীশিং/হেল্থ সেক্রেতরীশিংগা লোয়ননা কোবিদ-১৯ থেংননবা লৌখৎলিবা খোংথাংশিং অমসুং শেম শারিবশিং য়েংশিন্নবা ভিদিও কনফরেন্স অমা পাংথোকখি।

ভিদিও কনফরেন্স অদুদা মহারাস্ত্রা, দিল্লী, রাজস্থান, হিমাচল প্রদেশ, উত্তর প্রদেশ, কেরলা, আন্ধ্র প্রদেশ, মধ্য প্রদেশ, গুজরাত, কর্নাতকা, পঞ্জাব, বিহার, তেলঙ্গনা, হরিয়ানা, ওরিশা, অসম, চান্দিগর, ঝার্খন্দ, অন্দমান অমসুং নিকোবর, ছত্তিসগর, মনিপুর, অরুনাচল প্রদেশ, গৱা, মিজোরাম, ত্রিপুরা, সিক্কিম, নাগালেন্দ, তমিল নাদু, মেঘালয়, অমদি দাদ্রা অমসুং নগর হভেলিদগী শরুক য়াখি।

দা. হর্শ বর্ধন্না ফোংদোকখি মদুদি লাইচৎ অসিগী মায়োক্তা লান্থেংনরক্লিবা অসি হৌজিক থা অহুম হেল্লক্লে অমদি লৈবাক অসিদা কোবিদ-১৯গী প্রিভেন্সন, কন্তেনমেন্ত অমসুং মেনেজমেন্ত রাজ্যশিংগা খুৎশম্নদুনা খ্বাইদগী ৱাংবা থাক্তা মোনিতর তৌরি। মহাক্না মখা তাখি মদুদি প্রধান মন্ত্রী শ্রী নরেন্দ্র মোদীগী লুচিং মখাদা লৈবাক অসিনা তোঙান-তোঙানবা প্রি-এম্পতিব, প্রোএক্তিব অমসুং ইফেক্তিব ওইবা খোংথাং কয়া পায়খৎলে। মসিগী মতম চানা লৌখৎখিবা খোংথাংশিং অসিনা ফিভম অসি লাকশিনবদা অমদি ফিভম অমা হেক্তগীদমক্তা ঐখোয়বু মতেং পাংলি।

লাইনা অসি শন্দোরকপগী চেন থুগায়নবগীদমক লাক্কদৌরিবা মথংগী হপ্তা খরা মরু ওইবগী মায়কৈদা ইঙ্গিৎ তৌরদুনা দা. হর্শ বর্ধন্না সোসিয়েল দিস্তেন্সিং ঙাক্না চৎনবা অমদি পর্সোনেল হাইজিনগী মতাংদা এৱ্যারনেস শন্দোক্নবা তকশিনখি মদুনা কোবিদ-১৯গী মায়োক্তা চপ য়ুংনা অমদি পুন্না লান্থেংনবদা মতেং ওইগনি।

দা. হর্শ বর্ধন্না লৈবাক অসিদা কত্থোক্লবা কোবিদ-১৯ হোস্পিতালশিংগী ফিভমসু য়েংশিনখি। মহাক্না হায়খি “লৈবাক্কী জিলা খুদিংমক্তা কত্থোক্লবা কোবিদ-১৯ হোস্পিতালশিং লিংখৎপা মথৌ তাই অমদি অথুবা মতমদা মীয়ামদা মদুগী মতাংদা খঙহনবা তাই।”

দা. হর্শ বর্ধন্না রাজ্য খুদিংমক্কী পি.পি.ই., এন.৯৫ মাস্ক, তেস্তিং কিৎ, দ্রগ অমসুং ভেন্তিলেতরগী দরকার ওইবা অমসুং ফংলিবশিং য়েংশিনখি অমদি ভারত সরকারনা মসিগী মরুওইবা পোৎলমশিং অসিগী সপ্লাই ৱাৎহন্দনবা হোৎনরি হায়না থাজবা পীখি। মহাক্না হায়খি মদুদি করম্বা কেতেগোরীগী হেল্থৱার্কর/প্রোফেস্নেলনা করম্বা কেতেগোরীগী পি.পি.ই. শিজিন্নগদগে হায়বগী অকুপ্পা গাইদলাইনশিং মিনিস্ত্রীগী ৱেবসাইত্তা (www.mohfw.gov.in) ফংগনি অমদি রাজ্যশিংনা মদু শিজিন্নবগী মতাংদসু এৱ্যারনেস পীবা মথৌ তাই। মহাক্না মসিমসু ফোংদোকখি মদুদি ফেস কভরগী গাইদলাইনশিংসু মন্ত্রালয়গী ৱেবসাইত্তা ফংলি অমদি মসিবু কম্ম্যুনিতীশিংদা কানবা মওংদা শিজিন্নবা য়াই।

মহাক্না মীপুম খুদিংমকপু আরোগ্য সেতু এপ্লিকেসন দাউনলোদ তৌনবা অমদি শিজিন্ননবসু তকশিনখি। স্মার্ত ফোন অমদা ইন্সতোল হেক তৌবগা এপ্লিকেসন অসিনা সোফিস্তিকেতেদ পেরামীতরশিংদা য়ুমফম ওইরগা ইনফেক্সনগী রিস্ক হোৎপা ঙমই হায়না মহাক্না হায়খি।

মীফম অদুদা শ্রীমতী প্রীতি সুদন, সেক্রেতরী (হকশেল অমসুং য়াইফ-য়ুম্বাল), শ্রী সনজীব কুমার, স্পিসিয়েল সেক্রেতরী, অমসুং হেল্থ মিনিস্ত্রীগী সেনিয়র ওফিসরশিংগা লোয়ননা আই.সি.এম.আর.গী মীহুৎশিংসু শরুক য়াখি।