কমর্স অমসুং ইন্দস্ত্রী মন্ত্রালয়না ঙসি ভিদিও কনফরেন্সকী থোংদা লৈবাক অসিগী তোঙান তোঙানবা ইন্দস্ত্রী অমসুং ত্রেদর্স এসোসিয়েসনগা কোবিদ-১৯ অমসুং মসিগী মতুংদা তৌখিবা লোকদাউন্দা মিৎয়েং থম্লদুনা ওইরিবা ফিভম অসিগা লোইননা লৈরিবা সমস্যাশিং য়েংশিল্লদুনা খন্ন-নৈনখ্রে। কেন্দ্রগী কমর্স অমসুং ইন্দস্ত্রী অমসুং রেল মন্ত্রী শ্রী পীয়ুশ গোয়ল, রাজ্য মন্ত্রী শ্রী রাম প্রকাশ অমসুং কমর্স অমসুং ইন্দস্ত্রী মন্ত্রালয়গী ওফিসরশিংনা মীফম অদুদা শরুক য়াখি।

ইন্দস্ত্রী এসোসিয়েসন্না লোকদাউন লাওথোকখিবা অমদি মসিগী মতুংদগী হৌরগা হৌজিক ফাওবা পাংথোকখিবা অসিগুম্বা মখলগী মীফমগী মতুংদগী হৌজিক্কী ওইরিবা ফিভমগা লোইননা হৌখিবা নুমিৎ খরনিদা মাইকৈ অসোমদা খুমাং চাউশিল্লিবা অসিগী মতাংদা পাউদমখি। এসোসিয়েসনশিং অসিনা লিক্বিদিতীগী অৱাৎপা, মশিং থিঙমদ্রবা ওর্দর য়ৈথোকপা, শিন্মীশিংগী অৱাৎপা, রাজ্য অমসুং জিলাশিংগী ওথোরিতীশিংনা কেন্দ্র সরকারগী য়াথংশিংবু তোঙান তোঙান্না শন্দোক্না তাকপা, তোঙান তোঙানবা মফমশিংদা ত্রকশিং পন্দুনা লৈবা অমসুং স্পিয়র পার্তশিং ফংবদা মায়োক্নরিবা অৱাবা অসিনচিংবা ৱাফমশিং পুখৎখি। মসিগা লোইননা এসোসিয়েসন অসিনা ফোংদোকখি মদুদি হৌখিবা থাখাই অসিদা ফিভম য়াম্না ফগৎলে। ফগৎপা অসিনা আই.তি. ইন্দস্ত্রীদা ফিবমগী মথৌ তাবা চাংগী ৯৫% ফাওবা কোনশিনবা ঙমহল্লে। এসোসিয়েসনশিং অসিনা মখোয়গী সি.এস.আর.গী থবক-থৌরমশিং, খ্বাইদগী ফবা থৌওং নত্ত্রগা মওং-মতৌ অমসুং ইন্দস্ত্রী অমসুং ত্রেদর্সগী থোংদা চলাইরিবা কম্যুনিতী কিচনগী মতাংদসু পাউদমখি।

শ্রী গোয়লনা হায়খি মদুদি মন্ত্রালয়না হান্নদগী লোজিস্তিক্স অমসুং ইম্পোর্ত-এক্সপোর্তকা মরী লৈনবা সমস্যাশিং লোইশিন্নবগী মাইকৈদা থবক পাইখৎতুনা লাক্লি অমসুং মসিগা লোইননা ইন্দস্ত্রী অমসুং ত্রেদর্সকী অতৈ সমস্যাশিংসু তোঙান তোঙানবা মন্ত্রালয়শিংগী মাংদা পুখৎলি। মন্ত্রীনা হায়খি মদুদি হন্দক্তা মাগী মাগী রাজ্যশিংদা চৎখ্রবা শিন্মীশিং কোবিদকী কেস নেমথরবা মতুংদা অমুক হল্লক্কনি। ইন্দস্ত্রীদমক্তা তেংবাংগী পেকেজ থুনা লাওথোকপগা মরী লৈননা পার্তিসিপেন্ত খরগী অপাম্বা মতুং ইন্না মন্ত্রীনা হায়খি মদুদি ফংলিবা ফীদবেক অসি মন্ত্রালয়দা খন্ননবা থারি। শ্রী গোয়লনা এসোসিয়েসনশিং অদুগী মীহুৎশিংগী মীওইবগীদমক মতেং পাংলিবা থবকশিং অদুগা মরী লৈননা মখোয়বু থাগৎপা ফোংদোকখি। মহাক্না এসোসিয়েসনশিং অদুদা হায়খি মদুদি মখোয়না মখোয়গী মীহুৎশিং অমসুং অতৈ মীওইশিংদা আরোগ্য সেতু এপ দাউনলোদ তৌনবগীদমক্তা পুক্নিং থৌগৎকদবনি, মসিবু মহাক্না কোবিদ-১৯ মায়োক্নবা কান্নরবা তেক্নিক তুল নত্ত্রগা পাম্বৈনি হায়না ফোংদোকখি।

মীফম অদুদা সি.আই.আই., এফ.আই.সি.সি.আই., এ.এস.এস.ও.সি.ঐচ.এ.এম., আই.সি.সি., লঘু উদ্যোগ ভারতী, এফ.আই.এস.এম.ই., এন.এ.এস.এস.সি.ও.এম., পি.ঐচ.দি., চেম্বর ওফ কমর্স অমসুং ইন্দস্ত্রী, এস.আই,এ.এম., এ.সি.এম.এ., আই.এম.তি.এম.এ., আই.ই.ই.এম.এ., সি.এ.আই.তি. অমসুং এফ.এ.এম.ই.গী ওফিস বিয়ররশিংনা শরুক য়াখি।