ਅੱਜ ਦੇ ਵਿਸ਼ਵ ਵਾਤਾਵਰਣ ’ਚ, ਹਰੇਕ ਵਿਅਕਤੀ ਕੋਵਿਡ–19 ਵਾਇਰਸ ਵਿਰੁੱਧ ਲੜਨ ਦਾ ਯਤਨ ਕਰ ਰਿਹਾ ਹੈ। ਇਸ ਵੇਲੇ ਕੋਰੋਨਾ ਤੋਂ ਖੁਦ ਨੂੰ ਸੁਰੱਖਿਅਤ ਰੱਖਣ ਦਾ ਇਹੋ ਰਾਹ ਹੈ ਕਿ ਪੂਰੀ ਤਰ੍ਹਾਂ ਸਾਫ਼–ਸਫ਼ਾਈ (ਸੈਨੀਟਾਈਜ਼ੇਸ਼ਨ) ਰੱਖੀ ਜਾਵੇ ਤੇ ਸਮਾਜਿਕ–ਦੂਰੀ ਬਣਾ ਕੇ ਰੱਖੀ ਜਾਵੇ। ਆਈਆਈਟੀ (ਬੀਐੱਚਯੂ) ’ਚ ‘ਮਾਲਵੀਯ ਸੈਂਟਰ ਫ਼ਾਰ ਇਨੋਵੇਸ਼ਨ, ਇਨਕਿਊਬੇਸ਼ਨ ਐਂਡ ਐਂਟ੍ਰੀਪ੍ਰਿਨਓਰਸ਼ਿਪ’ (ਐੱਮਸੀਆਈਆਈਈ) ਦੇ ਇੱਕ ਇਨਕਿਊਬੇਟ ਸ਼੍ਰੀ ਜੀਤੂ ਸ਼ੁਕਲਾ ਨੇ ਇੱਕ ਉਪਕਰਣ ਵਿਕਸਿਤ ਕੀਤਾ ਹੈ, ਜਿਸ ਦੀ ਵਰਤੋਂ ਸਮੁੱਚੇ ਸਰੀਰ ਨੂੰ ਸੈਨੀਟਾਈਜ਼ ਕਰਨ ਲਈ ਕੀਤੀ ਜਾ ਸਕਦੀ ਹੈ। ਇਹ ਉਪਕਰਣ ਕਿਸੇ ਵੀ ਥਾਂ ’ਤੇ ਸਥਾਪਿਤ ਕੀਤਾ ਜਾ ਸਕਦਾ ਹੈ ਤੇ ਇਹ ਆਪਣੇ–ਆਪ ਹੀ ਕੰਮ ਕਰਦਾ ਹੈ। ਇਹ ਉਪਕਰਣ ਸੈਂਸਰ ਉੱਤੇ ਅਧਾਰਿਤ ਹੈ ਜਿਹੜਾ ਕਿਸੇ ਵੀ ਕੈਂਪਸ ਦੇ ਬਾਹਰ ਸਥਾਪਿਤ ਕੀਤਾ ਜਾ ਸਕਦਾ ਹੈ। ਸੈਂਸਰ ਅਧਾਰਿਤ ਇਹ ਸਥਾਪਿਤ ਮਸ਼ੀਨ ਆਪਣੇ–ਆਪ ਹੀ ਪਤਾ ਲਾ ਲਵੇਗੀ ਕਿ ਕੋਈ ਵਿਅਕਤੀ ਇਸ ਦੇ ਸਾਹਮਣਿਓਂ ਲੰਘੇਗਾ ਤੇ ਇਹ 15 ਸੈਕੰਡਾਂ ਲਈ 10–15 ਮਿਲੀ ਲਿਟਰ ਸੈਨੀਟਾਈਜ਼ਰ ਦਾ ਛਿੜਕਾਅ ਕਰੇਗੀ ਤੇ ਇਹ ਵਿਅਕਤੀ ਦੇ ਸਮੁੱਚੇ ਸਰੀਰ, ਕੱਪੜਿਆਂ, ਜੁੱਤੀਆਂ ਆਦਿ ਨੂੰ ਸੈਨੀਟਾਈਜ਼ ਕਰ ਦੇਵੇਗੀ। ਇਹ ਉਪਕਰਣ ਕਿਸੇ ਵੀ ਅਜਿਹੀ ਥਾਂ ’ਤੇ ਸਥਾਪਿਤ ਕੀਤਾ ਜਾ ਸਕਦਾ ਹੈ, ਜਿੱਥੋਂ ਆਮ ਲੋਕਾਂ ਦਾ ਆਉਣਾ–ਜਾਣਾ ਹੋਵੇ, ਤਾਂ ਜੋ ਹਰੇਕ ਵਿਅਕਤੀ ਸਿਰਫ਼ ਸੈਨੀਟਾਈਜ਼ ਹੋਣ ਤੋਂ ਬਾਅਦ ਹੀ ਉਸ ਕੈਂਪਸ ਦੇ ਅੰਦਰ ਜਾ ਸਕੇ।

ਇਸ ਬਾਰੇ ਜਾਣਕਾਰੀ ਦਿੰਦਿਆਂ ‘ਮਾਲਵੀਯ ਸੈਂਟਰ ਫ਼ਾਰ ਇਨੋਵੇਸ਼ਨ, ਇਨਕਿਊਬੇਸ਼ਨ ਐਂਡ ਐਂਟ੍ਰੀਪ੍ਰਿਨਓਰਸ਼ਿਪ’ (ਐੱਮਸੀਆਈਆਈਈ) ਦੇ ਕੋਆਰਡੀਨੇਟਰ ਪ੍ਰੋ. ਪੀ.ਕੇ. ਮਿਸ਼ਰਾ ਨੇ ਦੱਸਿਆ ਕਿ ਇਹ ਉਪਕਰਣ ਅੱਜ ਦੀ ਜ਼ਰੂਰਤ ਅਨੁਸਾਰ ਬਣਾਇਆ ਗਿਆ ਹੈ। ਅਸੀਂ ਸਰਕਾਰ ਵੱਲੋਂ ਇਸ ਵੇਲੇ ਵਰਤਿਆ ਜਾ ਰਿਹਾ ਆਮ ਸੈਨੀਟਾਈਜ਼ਰ ਵਰਤ ਰਹੇ ਹਾਂ। ਇਸ ਸੈਨੀਟਾਈਜ਼ੇਸ਼ਨ ਕਾਰਨ ਮਨੁੱਖ ਨੂੰ ਨੁਕਸਾਨ ਪਹੁੰਚਾਉਣ ਵਾਲੇ ਬਹੁਤੇ ਵਾਇਰਸਾਂ ਤੋਂ ਬਚਾਅ ਸੰਭਵ ਹੈ। ਇਸ ਸੈਨੀਟਾਈਜ਼ੇਸ਼ਨ ਦੀ ਮਾਤਰਾ, ਛਿੜਕਾਅ ਦਾ ਸਮਾਂ, ਫ੍ਰੀਕੁਐਂਸੀ ਦਾ ਪੁਸ਼ਟੀਕਰਨ ਪ੍ਰਕਿਰਿਆ ਅਧੀਨ ਹੈ। ਇਸ ਉਪਕਰਣ ਨਾਲ ਸੈਨੀਟਾਈਜ਼ ਹੋਣ ਤੋਂ ਬਾਅਦ ਵਿਅਕਤੀ ਨੂੰ ਮਾਸਕ ਪਹਿਨਣ, ਸਮਾਜਿਕ–ਦੂਰੀ ਰੱਖਣ ਤੇ ਨਿਯਮਿਤ ਵਕਫ਼ਿਆਂ ’ਤੇ ਸਾਬਣ ਨਾਲ ਹੱਥ ਧੋਣ ਦੀ ਜ਼ਰੂਰਤ ਵੀ ਹੁੰਦੀ ਹੈ।

*****

ਐੱਨਬੀ/ਏਕੇਜੇ/ਏਕੇ