প্রধান মন্ত্রী শ্রী নরেন্দ্র মোদীনা ঙসি ভিদিও কনফরেন্সকী থোংদা কোবিদ-১৯গা মায়োক্ননবা পাইখৎলিবা পাম্বৈশিংগী মতাংদা রাজ্যশিংগী মুখ্য মন্ত্রীশিংগা ৱারী শানখ্রে।

          প্রধান মন্ত্রীনা রাজ্যশিংদা মদুনা মরম ওইদুনা কোবিদ-১৯ শন্দোকপদা ভারতনা অথিংবা খরা পীবা ঙম্লিবা লোকদাউনগী ৱারেপ অসিবু শৌগৎপগীদমক থাগৎপা ফোংদোকখি। মহাক্না রাজ্য পুম্নমক্না ভাইরস অসি শন্দোকপা য়েংশিন্নবগীদমক তীম অমত্তা ওইনা পুন্না থবক তৌমিন্নখিবা অদুগীদমক্তসু থাগৎপা ফোংদোকখি। অদুম ওইনমক মহাক্না খঙহনখি মদুদি মালেমগী ফিভম অসি অপেনবা ওইদ্রি অমসুং নুমিৎ খরনি অসিদা ভাইরস শন্দোরকপগী ওইথোকপা য়াবা অনিশুবা ইথক্কী মরমদসু ফোংদোকখি।

         প্রধান মন্ত্রীনা হায়খি মদুদি লৈবাক অসিগীদমক্তা অমত্তা ঙাইরবা পান্দম অদুদি পুন্সি খ্বাইদগী য়াম্না মাংহন্দবনি। মথংগী চয়োল খরা অসিদা, তেস্তিং, ত্রেসিং, আইসোলেসন অমসুং ক্বারেন্তাইনগী লমদা মিৎয়েং থমগদবনি। মহাক্না মথৌ তাবা হিদাক-লাংথক ফংহনবা, হিদাক-লাংথক অমসুং মেদিকেলগী খুৎশু-খুৎলাই শানবগীদমক মচাক-মথুম মরাং কাইহন্নবগী মতাংদা ফোংদোকখি।    

        মহাক্না হায়খি মদুদি কোবিদ-১৯গী অনাবশিংগীদমক্তা তোঙানবা, কৎথোক্লবা হোস্পিতালগী খুদোংচাবশিং ফংহনবা মথৌ তাই। দোক্তরশিং মরাং কাইহন্নবা, মহাক্না রাজ্যশিংদা আয়ুশ দোক্তরশিং রিসোর্স পুলদা য়াওহন্নবা, ওনলাইন ত্রেনিং শিল-লাংনবা অমসুং পেরা-মেদিকেল স্তাফ, এন.সি.সি. অমসুং এন.এস.এস. ভোলুন্তীয়রশিং শিজিন্ননবা হায়খি।

       পুন্না থবক তৌমিন্নবগী মরু ওইবশিং অমসুং স্তেকহোল্দরশিংগী হোৎনরিবশিংদা ওভর্লেপ ওইহন্দনবগী মতাংদা পল্লদুনা প্রধান মন্ত্রীনা জিলাগী থাক্তা ক্রাইসিস মেনেজমেন্ত গ্রুপশিং লিংখৎনবা অমসুং দিস্ত্রিক্ত সর্ভিলেন্স ওফিসরশিং হাপ্পগী মতাংদসু ফোংদোকখি। মহাক্না হায়খি মদুদি তেস্ত তৌনবগীদমক দেতাশিং অদু মশক খঙলবা লেবশিংদগী লৌগদবনি – মসিনা জিলা, রাজ্য অমসুং কেন্দ্রগী দেতাশিং অদু চুনবা ওইগনি। মহাক্না হায়খি মদুদি বেঙ্কশিংদা মী ইন্নবদগী কন্ননবা প্রধান মন্ত্রী গরীব কল্যান য়োজনাগী মখাদা কান্নবা ফংলবশিংদা ফন্দশিং ফংহনবা অসি মথৌ তাই। 

        প্রধান মন্ত্রীনা হায়খি মদুদি মহৈ-মরোংশিং খাওবগী মতম ওইরকপা অসি য়েংলগা সরকারনা লোকদাউন্দা খরা কোমথোক্লে, অদুবু হেক ঙম্লিমখৈ অমগা অমগা লাপ্না লৈনবা হোৎনবা অমদি য়েংশিনবা অসি মথৌ তাই। মহাক্না রাজ্যশিংদা হায়খি মদুদি মহৈ-মরোং অসি লৈননবা এ.পি.এম.সি.দা নত্তনা অতৈ অতোপ্পা প্লেৎফোর্মশিংগী মরমদসু খনগদবনি অমসুং খুঙ্গংগী লমদমগীদমক্তা পুলিং প্লেৎফোর্মশিং শেম্বা য়াগদবা মফমশিং থিদোক্কদবনি, খুদম ওইনা শেয়রিং এপশিংদা থিদুনা পান্দম অসিবু মপুং ফাহনবা ঙমগদবা খঙদোক্কদবনি।

        মুখ্য মন্ত্রীশিংনা প্রধান মন্ত্রীবু মহাক্কী লুচিং, অসিগুম্বা খুদোং থিরবা মতম অসিদা লেপ্তনা লম্তাক-লমজিংবীবগীদমক থাগৎপা ফোংদোকখি। মখোয়না প্রধান মন্ত্রীবু মতম চানা লোকদাউনগী ৱারেপ লৌরকখিবা অদুগীদমক থাগৎপা ফোংদোকখি মদুনা মরম ওইদুনা লৈবাক অসিদা ভাইরস শন্দোরকপা য়েংশিনবদা মতেং ওইখি। অমগা অমগা লাপথোক্ননবা, চিংনবা কেসশিং থিদোকপা, নিজামুদীন মরকজদগী ওইরকপা কেসশিং মশক খঙদোকপা অমসুং ক্বারেন্তাইন তৌবা, কম্যুনিতী ত্রান্সমিসনগী মচাকশিং, মেদিকেল ইনফ্রাস্ত্রকচর হেনগৎহনবা, মেদিকেল ৱর্কফোর্স মপাঙ্গল কলহনবা, তেলি-মেদিসিনগী ৱাফম, মেন্তেল হেল্থ কাউন্সেলিংগী ৱাফম, চাননবা পোৎলম অমদি অতৈ তঙাইফদবশিং, মথৌ তাবশিংগীদমক য়েংশিনবা অমদি মাইগ্রেন্ত ৱাকরশিংগী চেকশিন থৌরাং লৌখৎপগী মতাংদা লৌখৎলিবা মখোয়গী থৌরাংশিংগী মতাংদা ফোংদোকখি। রাজ্যশিংনা খুদোংথিবা অসি হন্থহন্নবা পাম্বৈশিং খোমজিনবা, শেল-থুমগা লোইননা অনা-লায়েংগী মরুওইবশিংগী মতাংদা ফোংদোকখি।

        প্রধান মন্ত্রীনা মখোয়গী ৱাফমশিং অদুগীদমক মুখ্য মন্ত্রীশিংদা থাগৎপা ফোংদোকখি অমসুং ওইরিবা ফিভম অসিগীদমক থাগৎপা শিংথাখি। মহাক্না হায়খি মদুদি ৱার ফুতিংদা থবক তৌবা, ভাইরসকী হোৎসপোৎশিং খঙদোকপা, মখোয়বু কোইশিনবা অমদি ভাইরস শন্দোকহন্দবা অসি য়াম্না মরু ওই। মহাক্না হায়খি মদুদি লৈবাক অপুনবা অসিদা শান্তি অমসুং লো & ওর্দর ঙাক্তুনা থম্বা মথৌ তাই। মহাক্না মসিসু পনখি মদুদি কোবিদ-১৯না ঐখোয়গী অচুম্বা অমদি থাজবা অদুদা লান্দারক্লি অমসুং ঐখোয়গী হিংবগী লম্বীদা কিহল্লক্লি। মহাক্না লাইচৎ অসিগা মায়োক্নবদা কাংলুপকী ওইবা অপাম্বগী মতুং ইন্না অমত্তা ওইনা লানবন শানবগীদমক রাজ্য, জিলা, শহর অমসুং ব্লোক্কী থাক্তা কাংলুপকী লুচিংবশিং অমসুং সোসিএল ৱেলফিয়র ওর্গনাইজেসনশিং ফাওবা য়ৌশিনবীনবা লুচীংবশিংগী মফমদা অপীল তৌখি।

         প্রধান মন্ত্রীনা হায়খি মদুদি লোকদাউন লোইরবা মতুংদা রাজ্যশিং অমসুং কেন্দ্রনা মীয়াম্না অমুক হন্না পুন্ননবা অমত্তা ওইবা লাল্লোং অমা য়াৎপা মথৌ তাই। মহাক্না রাজ্যশিংদা খন্ন-নৈনবীনবা অমদি লাল্লোং য়াৎপা অসিদা ৱাখল্লোন পুথোরক্নবা ফোংদোকখি। মহাক্না কোবিদ-১৯ শন্দোকপা থিংনবগীদমক অমগা অমগা লাপ্না লৈনবগী মরু ওইবা অদু অমুক হন্না পনখি।

         কেন্দ্রগী য়ুমলৈ-কৈরৈ মন্ত্রীনা রাজ্য খরদা লোকদাউন অসি খরগা হেন্না চেৎশিলহনবগী তঙাইফদবা অমদি কেন্দ্রনা থাদোকখিবা গাইদলাইনশিং অদু কান্নবা মওংদা জিলাগী থাক্তা থবক পাইখৎপগী মরু ওইবশিংগী মরমদা পনখি। 

         কেন্দ্রগী হেল্থ সেক্রেতরীনা ভারত্তা হেনগৎলক্লিবা কেস মশিং, নিজামুদীন মরকজদগী শন্দোরক্লিবা কেসশিং, মখা তানা ভাইরস শন্দোরকপদগী ওইরক্লিবা ফিভম লাকশিন্নবা পাইখৎলিবা মেদিকেলগী শেম-শারিবশিং অমসুং কেস অসি মশিং য়াম্না কনফার্ম তৌরবা জিলাশিংদা শন্দোকপগী চেন থুগাইবগী মথৌ তাবশিংগী মতাংদা শক্নাইরবশিংগী মফমদা খঙহনখি।

       ৱারী শানবা অদুদা কেন্দ্রগী ঙাকশেল মন্ত্রী, হকশেল মন্ত্রী, প্রিন্সিপাল সেক্রেতরী, কেবিনেৎ সেক্রেতরী, হোম সেক্রেতরী অমসুং আই.সি.এম.আর.গী দি.জি.সু শরুক য়াখি। লোইননা মরী লৈনবা রাজ্যশিংগী মুখ্য মন্ত্রীশিং, য়ুমলৈ-কৈরৈ মন্ত্রী, হকশেল মন্ত্রী, চীফ সেক্রেতরী, হোম সেক্রেতরী অমসুং হেল্থ সেক্রেতরীশিংসু ভিদিও কনফরেন্স অদুদা শরুক য়াখি।