गोंय, 21 नोव्हेंबर 2026
आदित्य धर हांणी दिग्दर्शित केल्लो हिंदी चित्रपट ‘धुरंधर’ हो 57व्या भारतीय आंतरराष्ट्रीय चित्रपट महोत्सवाच्या (इफ्फी) भारतीय पॅनोरमा विभागांतल्या मुखेल प्रवाहांतल्या चित्रपटांच्या विभागाचो उक्तावण चित्रपट आशिल्लो. महोत्सवाच्या दुसऱ्या दिसा पणजेंत, गोंयच्या मीडिया सेंटरांत जाल्ल्या पत्रकार परिषदेंत ह्या चित्रपटाचेर खासा चर्चा जाली.
ह्या संवादात्मक सत्रांत म्हालगडे अभिनेते राकेश बेदी आनी नामनेचे निर्मिती तज्ञ सैनी एस. जोहरे हांणी वांटो घेवन चित्रपटाचो सर्जनशील प्रवास, बारकायेन व्यक्तिरेखा साकारप तशेंच चित्रपटांत संवसार उबारपाच्या प्रक्रियेचेर आपले विचार मांडले. म्हायती आनी वितरावण मंत्रालयाचे अतिरिक्त म्हासंचालक श्री महेश कुमार हांणी ह्या सत्राचें संचालन केलें.
_20261121214057_ae92c4.jpeg)
जमील जमाली साकारपाविशीं उलयताना राकेश बेदी हांणी आधुनिक चित्रपटांत पैलु आशिल्ल्या व्यक्तिरेखांच्या लेखनाचेर भर दितना, आपल्या दीर्घ नाट्य क्षेत्रांतल्या अणभवाचो उल्लेख करून, ती आपल्या अभिनय कलेची कायमस्वरूपी बुनयाद आसा, अशें सांगलें. व्यक्तिरेखा विकसित करपाखातीर आपुण केल्ल्या सखोल अभ्यसाविशींय तांणी म्हायती दिली. व्यक्तिरेखेचीं कृत्यां त्या प्रसंगाच्या गरजेप्रमाणें आसपाक फावो, फकत दुसऱ्याची नक्कल करचेपरस व्यक्तिरेखा पुरायपणान साकारप गरजेचें आसा, अशें तांणी सांगलें.
विंगड विंगड आनी आव्हानात्मक भूमिका साकारिल्ल्या आपल्या पांच दशकांच्या अभिनय कारकिर्दीचेर उजवाड घालतना, बेदी हांणी चित्रपटांची पोच आनी सिनेमाची दृष्यता बदलूंक जाय, अशेंय सांगलें. ‘एक दूजे के लिए’, ‘तिरंगा’ आनी ‘चश्मे बद्दूर’ सारख्या आदल्या चित्रपटांच्या लोकप्रियतेची याद काडटना, त्या काळांत लेगीत चित्रपटांक लोकांचो व्हड प्रतिसाद मेळ्ळो, पूण डिजिटल कनॅक्टीविटी नाशिल्ल्यान तांची पोच मर्यादित आशिल्ली, म्हण तांणी नमुद केलें.
ताचे उलट, सोशल मीडियान प्रेक्षकांक चित्रपट आनी सादरीकरण पळोवपाचीं आनी समरस जावपाक दिवन, आज एका क्लिकान अभिनेत्याचें काम जगभरांतल्या प्रेक्षकां मेरेन पावता.

आपल्या विनोदी आनी गंभीर अभिनयांतल्या अचूक वेळेविशीं एका चित्रपटमोग्यान विचारिल्ल्या प्रस्नाक जाप दिताना बेदी हांणी, अभिनयांतली हि बारसाण योगायोगान घडना, अशें सांगलें. प्रत्येक हालचाल आनी हावभाव पटकथा आनी व्यक्तिरेखेचेर मंथन करून ठरयतात म्हण तांणी नमुद करून, व्यक्तिरेखेक प्रामाणीक रूप दिवपाखातीर ह्यो गजाली जाणीवपूर्वक केल्ले अभिव्यक्तीचे प्रकार आसात, अशें तांणी मुखार सांगलें.
भावनांमदीं इतक्या सहजपणान बदल कशें करतात आनी हारश्या मुखार अभिनयाचो सराव करतात काय, अशें विचारिल्ल्या प्रस्नाक जाप दितना बेदी हांणी आपल्या अभिनयाच्या पद्धतीविशीं म्हायती दिली. हारश्या मुखार अभिनयाचो सराव करप टाळचें, अशें सुचयतना सराव करताना स्वताक हारश्यात पळोवपी अभिनेत्याच्या वाडीन आडमेळी येवन ताका सराव करताना स्वताच्या कामाचें प्रामाणीक मूल्यमापन करप कठीण जाता, अशें तांणी सांगलें. ताचे बदला व्यक्तिरेखेचें सखोल आकलन करून ती मनांत पुरायपणान रुजवप गरजेचें, हाचेर तांणी भर दिलो. एकदां अभिनेत्याक व्यक्तिरेखेचो मानसिक संवसार होलमल्यार ताजी भास, प्रतिक्रिया आनी भावनिक बदल आपोआप नैसर्गिकपणान येता, अशें तांणी मुखार सांगलें.
चित्रपटाचे निर्मिती तज्ञ सैनी एस. जोहरे हांणी चित्रपटांतल्या वास्तुकलेच्या वास्तववादी मांडणीविशीं सविस्तर म्हायती दितना, चित्रपटाच्या पंगडान 40 परस चड प्रत्यक्ष सेट उबारिल्ल्याचें सांगलें. पाकिस्तानांतल्या प्रत्यक्ष सुवातींक भेट दिवप शक्य नाशिल्ल्यान, जोहरे हांणी सविस्तर संशोधन करून बातम्यांचे संग्रह, थळाव्या टोळीझुजांचे अहवाल, शारांतल्या वास्तूंरचना आनी गुगल मॅप्सचो अभ्यास करून चित्रपटाची वातावरण निर्मिती निष्ठेन उबारल्या, अशें सांगलें.

57व्या इफ्फी महोत्सवांत जाल्ल्या ह्या पत्रकार परिशदेंत चित्रपटांविशीं प्रभावी माची म्हण चित्रपट निर्माते, कलाकार आनी प्रेक्षकांक एकठांय हाडून चित्रपटनिर्मितीच्या सर्जनशील प्रक्रियेची अर्थपूर्ण चर्चा घडोवन हाडपाची भूमिका दाखोवन दिली.
अशा संवादांच्या माध्यमांतल्यान हो महोत्सव फकत पडद्याचेर दाखयल्ल्या प्रभावी कथांचोच उत्सव न्हय, जाल्यार त्यो कथा जिवंत करपी अभिनयकला, संशोधन आनी जोड यत्नांचोय भौमान करता आनी चित्रपटांतल्या अभिव्यक्तीच्या तरेकवार पैलूंची जाण आनी कदर करपाक शिकयता.

Read IFFILOID here: https://www.pib.gov.in/iffi/57/iffiLoid.aspx?yr=2026&lang=1®=48
* * *
पीआयबी मुंबई | मनाली प्रभूगांवकर/प्रियंका वेलिंगकर/दर्शना राणे