Ka Jingpynmih phlim ka la long barabor shaphang ki jingïathuhkhana kiba iaid shabar u pud u sam jong ki ri, kiba poi sha ki pateng bynriew bad ki dustur bapher bapher. Hynrei, shadien jong man la kawei pa kawei ka phlim, don sa kawei pat ka jingïathuhkhana kaba dang ap ban pynpaw, kata ka long shaphang u nongshna phlim, ka rukom thaw, ki jingeh kiba ki mad bad ki briew kiba don bynta ha kaban pynlong ïa kata ka phlim.
Ban pynpaw ïa kine ki jingïathuhkhana, ka International Film Festival of India (IFFI), kaba 57 hapoh ka phang pdeng jong une u snem, “Stories Without Borders” lane " Ki khana kiba ym don ka jingbuh pud' ka wanrah ïa ka bynta thymmai kaba pynleit jingmut ha ka pyrthei jong ka kam pynmih phlim. Lyngba ki jingïathuhkhana jong ki nongshna phlim bad ki aktor ba pawnam, kumjuh ruh ki phlim kiba khlem pat lah ban shna, kane ka bynta kan ailad ïa ki paidbah ban tip ïa ki jingïaid lynti bapher bapher kiba pynlong ïa ka kam shna phlim kumba ka long mynta.
Ka IFFI kaba 57 ka wanrah nyngkong eh ïa ka bynta ba thymmai kaba la tip kum ka ‘Films About Films’, kaba pynleit jingmut ha ki jingïathuhkhana shadien jong ka jingthaw phlim, kynthup ïa ka jingïaid lynti jong ki nongshna phlim bad ka rukom thaw ïa ki phlim. Kane ka bynta kan ailad ïa ki paidbah ban tip kham bniah ïa ka sap, ka jingtrei shitom bad ka jingstad kaba don shadien jong ka jingpynmih ïa ki phlim. Ka tamasa kan long ha Goa naduh ka 20 haduh ka 28 tarik u Naiwieng 2026.
Katkum ka jingai jingmut jong ki nongshna phlim ba pawnam, bad ban pynpaw shakhmat ïa ka sap bad ka rukom treikam ha ka kam shna phlim, kane ka bynta kaba pyni nyngkong eh kan kynthup ïa san tylli ki phlim na ki ri bapher bapher. Kine ki phlim ki dei kiba la shna bad pynmih lang da ki shiphew tylli ki ri, kata ka UK, USA, Russia, Georgia, Estonia, Turkey, Switzerland, France, Germany bad Italy. Kane ka bynta kan ai lad ïa ki nongieid phlim ban tip kham bniah ïa ka jingim bad ka jingnoh synñiang jong ki briew kiba la pynwandur ïa ka rukom shna phlim ha ka pyrthei.
Ka jingïaid lynti jong kane ka bynta ka sdang da ka jingïathuhkhana shaphang uwei u nongshna phlim uba la ieh ïa ka dak kaba neh shirta ha ka pyrthei jong ka kam shna phlim.
Ïa kane ka documentary kaba kyrteng ‘Maverick:The Epic Adventures of David Lean’ (UK, USA | 2026 | English | 105 minit), la thaw da u Barnaby Thompson, kaba pynpaw ïa ka jingim bad ka jingïaid lynti jong u David Lean, uwei na ki nongshna phlim ba pawnam. Ka documentary ka pyni ïa ki rukom pyrkhat bad ki buit thaw phlim kyrpang jong u, ki projek phlim kiba heh kiba u la trei, bad ka jingkut jingmut jong u ban wanrah ïa ki rukom thaw phlim kiba thymmai. Ka pyni ruh ïa ki jingeh kiba u la mad ha ka jingim shimet, wat hapdeng ki jingjop ha ka kam shna phlim, bad kumno ki kam jong u ki dang sah nam ha kane ka juk kaba mynta.

Naduh ka jingnoh synñiang jong u nongshna phlim ba pawnam, kane ka bynta mynta ka phai sha ki jingïathuhkhana shaphang ka jingim bad ki jingïadei jong ki briew, kiba pynpaw ïa ki jingsngew bad ki jingjia bapher bapher ha ka jingim.
ka phlim na Russi ka ‘Raul Geidarov’s Sidney Lumet’s Birthday (Russia | 2025 | Russian | 92 minit), kaba la thaw da u Raul Geidarov, ka batai ïa ka jingïathuhkhana jong u Dato, u khynnah shynrang ba 17 snem ka rta na Georgia, uba im bad ka kmie ieid jong u ha ka longïing kaba ju long ka longiing kaba heh. Haba ka kmie jong u ka wan phai kynsan hadien ka jingjah slem, ka jingim kaba jai jai jong ki ka kylla noh. Kane ka phlim ka pynpaw ïa ki jingïadei hapoh ka longïing, karukom heh rukom san, bad ka jingïaleh jong u briew ban bat ïa ka jinglong briew wat hapdeng ki jingeh jong ka jingim.

Ka jingïadei hapdeng ka jingim bad ka jinglong jingman ka long ka mat pdeng jong ka phlim kaba bud, ha kaba ka jingïapher hapdeng u nongak phlim bad ka bynta ba u ak ka sdang ban jah noh.
Ka phlim ‘Supporting Role’ (Meorekhariskhovani Roli) (Georgia, Estonia, Turkey, Switzerland, USA | 2026 | Georgian, Armenian | 139 minit), kaba la shna da ka Ana Urushadze, ka ïathuh ïa ka jingïaid lynti jong uwei u nongak phlim ba pawnam na Georgia, uba wanphai biang sha ka kam ak phlim hadien bun bun snem bad u la leit ban iakhun ban ioh shim bynta ha ka phlim ba nyngkong eh jong uwei u nongshna phlim uba dang samla. Hangne u lah sha jied ban ioh ak tang ha ki bynta kiba rit ba ria ha ka jaka ban ioh ia ki bynta kiba kongsan kiba u lah ju mlien ban ioh ak ha ki por kiba lah leit. Katba nangïaid ka por, u sdang ban sngewtynnad bad pynïadei ïalade bad kata ka bynta, kaba sdang ban pynkylla ïa ka jingim jong u.

Na ka jingiaid lynti ba shimet jong u aktor, ka jingjied ka leit sha ka jingiathuhkhana shaphang ka phlim kaba khlem lah ban pyni sha kiwei, kaba pynpaw kumno ba ka kam shna phlim ruh ka shah pynwan dur ha ki jinglong jingman jong ka sain pyrthei bad ka histori kiba ker sawdong ia ka jingthaw ia ka.
Ka documentary ‘The Mad Dog of Europe’ (France, Germany | 2026 | English | 83 minit), kaba la thaw da ka Rubika Shah, ka phai biang sha ka jingpynwandur kaba la thoh da u Herman J. Mankiewicz ha u snem 1932, hynrei kaba khlem shym la lah ban pynmih. Kane ka ka ïathuh ïa ka jingïakhun jong kawei ka longïing German-Jewish pyrshah ïa ka jingkiew jong u Hitler bad ka Nazism ha Germany. Ki studio jong ka Hollywood kim shym la pynmih ïa kane ka phlim namar ka jingshah khanglad na ka daw jong jingshah pynbor na ka liang saiñ pyrthei bad ki jingmyntoi ha ka kam khaii. Kane ka documentary ka wad bniah ïa ki daw kiba pynlong ïa kane ka jingiathuhkhana ban ym lah ban pynmih kum ka phlim, bad Ka jingïadei jong ka bad ki jinglong jingman ha kine ki sngi.
Ban pyndep ïa kane ka jingïaid lynti lyngba ki jingïathuhkhana shaphang ka jingim, ki jingeh ha ka kam thaw phlim bad ki jingnoh synñiang jong ki briew kiba la pynwandur ïa ka kam ak phlim, kane ka bynta ka kut da kaba pynpaw ïa ka burom ïa uwei na ki nongshna phlim uba la noh synñiang shibun eh ha ka histori jong kane ka bynta.

Ban pyndep ïa kane ka thup jong ki phlim, ka documentary ‘Vittorio De Sica - Staging Life’ (Italy | 2026 | Italian, French, English, Russian, Farsi | 100 minit), kaba la thaw da u Francesco Zippel, ka pyni ïa ka dur jong ka jingim shimet jong u Vittorio De Sica, uba long uwei na ki nongshna phlim ba pawnam tam ha ka pyrthei. Da kaba pyndonkam ïa ki jingthoh bad ki dur naduh ki por mynshwa kiba ym lah ban ioh da kaba suk, ki jingïoh lad ban ïakynduh bad ki dkhot ka longïing jong u, bad ki jingphla na ki nongshna phlim bad ki nongtrei ha ki kam bapher bapher jong ka juk mynta, kane ka documentary ka pynpaw ïa ka jingim, ki kam bad ka jingnoh synñiang jong u ha ka pyrthei jong ka kam shna phlim.

Kine ki san tylli ki phlim ki pyni ïa kiba bun ki bynta jong ka jingthaw phlim, naduh ki briew kiba don shadien jong ka camera, ka jingim jong ki nongak phlim, ki jingïathuhkhana kiba khlem pat lah ban pynpaw, haduh ki jingnoh synñiang jong ki nongshna phlim kiba dang ai mynsiem ïa ki pateng ban wan. Lyngba kine ki jingïathuhkhana bapher bapher, kane ka bynta ba thymmai ka nang pynriewspah ïa ka phang pdeng jong ka IFFI, “Stories Without Borders” lane ‘Ki khana kiba ym don ka jingbuh pud'. Ka pyni ba ki phlim kim dei tang ki jingïathuhkhana kiba paw ha ki screen, hynrei ka kynthup ruh ïa ka jingtrei jong ki nongshna phlim, ki jingjia ha ka histori bad ki jingshem jong ki briew kiba don bynta ha ka jingthaw phlim. Kane ka bynta ‘Films About Films’ kan ai lad ruh ïa ki paidbah ban peit bad sngewthuh ïa ka jingthaw phlim na kawei pat ka liang.
Ka International Film Festival of India (IFFI), kaba 57 ka ban long ha Goa naduh ka 20 haduh ka 28 tarik u Naiwieng 2026, kan pynïasoh lang ïa ki nongshna phlim, ki briew kiba don bynta ha ka kam shna phlim bad ki nongieid phlim na India bad na kylleng ka pyrthei hapoh ka phang pdeng “Stories Without Borders” ‘Ki khana kiba ym don ka jingbuh pud'.
Ka ‘Films About Films’ ka pynpaw ïa kane ka phang pdeng lyngba ki jingïathuhkhana shaphang ki nongshna phlim, ki nongak phlim bad ki jingnoh synñiang ha ka pyrthei jong ka kam shna phlim na ki ri bad ki dustur bapher bapher. Kane ka pyni ba ka sap bad ka rukom thaw phlim ka bym don pud hapdeng ki ri.
Da kaba pynleit jingmut ha ki briew, ki jingmut bad ki jingshem kiba don shadien jong ka cinema, kane ka bynta ka pyni ïa ki jingïaid lynti jong ka rukom thaw phlim kiba pynïasoh ïa ki nongshna phlim bad ki paidbah ha kylleng ka pyrthei. Ka IFFI 2026, lyngba ki phlim na India bad ki ri bapher bapher, ki jingïapyni kyrpang bad ki jingïakop, ka bteng ban pynpaw ïa ka sap ka phong ha ka jingthaw phlim bad ban pynïasoh ïa ki dustur bapher bapher lyngba ki kam kiba iadei ban ka jingshna bad pynmih ia ki phlim.
***********