57th International Film Festival of India 2026
20 – 28 Nov 2026

ÏOH BYNTA KI ÏING PYNI PHLIM (CINEMA) KA THAIÑ SHATEI LAM MIHNGI HA KA TAMASA JONG KA 57TH IFFI LYNGBA KI SAW TYLLI KI PHLIM BA LA JIED HAPOH KA INDIAN PANORAMA.

Ha ka: 17 NOV 2026 2:25PMby PIB ShillongRelease ID: 2337614Views: 10

Ka jingpher jong ki jait lariti ki kolshor bad ki jaitbynriew nangta ki jingïathuhkhana kiba khring ïa ka jingmut jingpyrkhat bad ki rukom thaw bad shna ïa ki phlim kiba kyrpang jong ka thaiñ shatei lam mihngi ha ka Ri India, kin sa ïoh ïa ka jaka kaba kyrpang ha ka tamasa phlim jong ka 57th International Film Festival of India (IFFI), ha kaba saw tylli ki phlim kiba na kane ka thaiñ kila shah jied ban pyni paidbah ha ki bynta ba kyrpang jong ka Indian Panorama. Kane ka tamasa phlim kan long ha Goa naduh ka 20 haduh ka 28 tarik u Naiwieng, 2026, ha kaba yn pyni ïa ar tylli ki phlim kiba don ïa ka jingïathuhkhana kaba pura (Feature Films) bad ar tylli ki phlim bym don ïa ka jingïathuhkhana kaba pura (Non-Feature Films) kiba na ka thaiñ shatei lam mihngi, kaban ailad ïa ki nongpeit ba kin tip halor ka kolshor, ka lariti bad ka jinglong tynrai, ki jingkylla ha ka imlang sahlang bad ka jingim ba man ka sngi jong ki briew na kane ka thaiñ.

Ha ka thup jong ki phlim kiba don ïa ka jingïathuhkhana kaba pura, ka phlim kaba lamkhmat nyngkong ka dei ka Urum (Spirit), kaba la thaw ruh ïa ka histori kum ka phlim kaba nyngkong eh ha ka ktien Nyishi ban shah jied hapoh ka Indian Panorama jong ka IFFI. Kane ka phlim kaba pynkhih ïa ki jingmut jingpyrkhat (psychological thriller) jong ki nongpeit ïa kaba la pynïaid bad pynbit pynbiang da u Duyu Tabyo uba na Arunachal Pradesh ha kaba la thmu ruh ban pyni nyngkong eh ïa ka ha ka rynsan jong ka pyrthei (World Premiere) ha ka lympung jong ki phlim. Ka phlim ka dei kaba la pynshong nongrim ha kawei ka shnong kaba don shajngai na ki lum ki wah jong ka jylla Arunachal Pradesh, bad ka ïathuh ruh ïa ka jingïathuhkhana shaphang ki jingkynmaw ba kyrpang, ka jingsyier mynsiem bad ruh ki jingshisha kiba la buhrieh, lyngba ka jingïathuhkhana jong uwei u longkpa uba la shah pynshitom lyngba ki jingïohipaw bad ka jingsngewrem hadien ka jingduh noh jong u ïa la ka khun kynthei kaba dang khynnah.

Sa kawei pat ka phlim kaba donlang bad ka phlim Urum bad kaba don ïa ka jingïathuhkhana kaba pura, kaba dei ka sien kaba nyngkong eh ban shah jied ban pyni pyrthei ha kane ka lympung, ka long ka Surjyamukhi (Sunflower), kane ka dei ka phlim drama kaba ha ka ktien Assamese, ïa kaba la pynïaid bad pynbit pynbiang da ka Antara G.G. Choudhury, kaba long ka nongak phlim, nongpynïaid phlim bad ka nongtrei ha ki kam theatre. Ka jingïathuhkhana jong kane ka phlim ka dei halor ka jingjia kaba la jia ha ka jaka sor, kaba bud ïa ka jingim jong ki ar ngut shi paralok kiba dang samla bad kiba ïatreilang, kiba tip kum u Pushpal bad ka Prarthana, ha kaba na ka jingïashun bad ïashrut ba man ka por bad ka jingïakhun pyrshah iwei ïa iwei pat, suki pa suki ki kylla long pynban ki shi paralok bad ki la shoh jingieit ruh iwei ïa iwei. Hynrei, hadien ka jinglap ïa kawei ka pla kaba jah, kaba don pisa hapoh, ka pynmih ïa ki katto katne ki jingeh kiba ym shym la khmih lynti ha kaba ïadei bad ka jingbishar ïa ka bynta kaba bha bad kaba sniew, bad kaba tynjuh ruh ïa ki rai bad ka jingïadei jong ki.

Ka bynta jong ka Indian Panorama Non-Feature Film ka wanrah ïa ar tylli ki jingïathuhkhana kiba kyrpang kiba napoh ka jylla Assam bad Mizoram. Ka rynsan ïaid jong ka Red Carpet ka dei ka phlim Documentary kaba 30 minit ha ka ktien Assamese, ïa kaba la thoh, pynïaid bad pynbit pynbiang da ka nongshna phlim kaba la ïoh khur ïa ki khusnam, ka Aimee Baruah ha kaba kane ka phlim ka la rakhe ruh da kaba leh burom ïa ka pateng kaba kordor jong ka jingshna ïa jaiñ tynrai da ki kti. Kane ka phlim ka dei kaba la pynshong nongrim ha ki lum jong ka Karbi Anglong, Assam, bad pynbud sa ka jingïaid lynti kaba phylla jong kawei ka nongthaiñ jaiñ Karbi kaba na ka shnong Donkamokam bad kaba la ïoh ïa ka lad ban pynpaw pyrthei ïa ki sap haduh ka rynsan ïaid jong ka Red Carpet ha ka tamasa jong ki phlim kaba la pynlong ha Cannes. Lyngba ka khana jong kane ka kynthei, ka phlim ba la pynshong nongrim (documentary) ka pyni ïa ka jinglah jong ki nongthaiñ bad suh jaiñ tynrai da ki kti ban ïaineh wat hapdeng ki jingeh kiba bun, kaba pyni ïa ka jingriewspah jong ka rukom thaiñ jaiñ tynrai jong ki jaidbynriew Karbi bad ruh ka jingdonkam ban pynneh pynsah ïa ki sap bad ki rukom trei kiba la hiar pateng na ki longshwa manshwa.

Sa kawei pat ka phlim non-feature kaba la jied ka dei ka Chalo India With Eric Ji - Mizoram, kaba dei ka phlim jong ka jingïathuhkhana (documentary) kaba jrong haduh 48 minit bad kaba dei ha ka ktien Phareng, ïa kaba la pynïaid bad la pynbit pynbiang da u Rajdeep Choudhury. Kane ka phlim ka bud ïa ka nuksa jong u Eric Ollerenshaw OBE, uba long u dkhot barim jong ka Ïingdorbar thawaiñ jong ka Britain bad ruh u nonghikai History, katba u dang wad bniah ïa ka rukom im, ka kolshor, ka lariti bad ka riti ka dustur jong ka jylla Mizoram. Kane ka phlim ka ai lad ruh ïa ki nongpeit ba kin tip shaphang ka jingbun jong ki briew kiba la nang la stad ha kane ka jylla, ka jinglong ryntih bad ka jingkitkhlieh jong ki nongshong shnong ha ka imlang sahlang, bad ka jingieid ïa ka jingïalehkai phutbol ha kaba ka pynpaw ruh ïa ka bynta kaba khraw jong ki jingnoh synñiang ki kynthei Mizo ha ki kam khaïi pateng, ka pule puthi bad ruh ka jingïalam ïa ki kam ki jam hapoh ka imlang sahlang. 

******


Great films resonate through passionate voices. Share your love for cinema with #IFFI2026 and #StoriesWithoutBorders. Tag us @pibindia on Instagram and @PIB_India on X, and we will help amplify your festival moments!

For accredited journalists, critics, bloggers, and vloggers seeking 1-on-1 interviews with filmmakers and festival juries, write to us at:
iffi.mediadesk@pib.gov.in with the subject line: Take One with PIB.


Official Release ID: 2337614
•
Media Centre: Goa
•
Festival Dates: Nov 20 – 28, 2026