থাগৎখিবা:
13 NOV 2026 4:17PM by PIB Imphal
প্রধান মন্ত্রী, শ্রী নরেন্দ্র মোদীনা ঙসি কর্নাতকাগী বেঙ্গালুরুদা লুপা করোর ১৫,৬০০ হেনবগী তোঙান-তোঙানবা চাউখৎ-থৌরাংগী প্রোজেক্তশিং শঙ্গাখ্রে, লৈবাক মীয়ামদা কত্থোকখ্রে, উরেপ-উয়ুং তমখ্রে, অমসুং হৌদোকখ্রে। থৌরম অদুদা তিল্লিবা মীয়ামদা ৱা ঙাংলদুনা, প্রধান মন্ত্রীনা কন্নরাদা মহাক্কী য়াইফ-পাউজেল পীখি অমসুং শহর অসিগী লাইরেম্বী ইমা অন্নম্মা তাই অমসুং নাদপ্রভু কেম্পেগৌদাগী মফমদা ইকায়খুম্নবা উৎখি, অমসুং ঙসিগী নুমিৎ অসি কনেক্তিবিতী অমসুং ইনর্জী সেক্যুরিতীগী প্রোজেক্তশিংগী খুত্থাংদা বেঙ্গালুরু অমসুং কর্নাতকাগী চাউখৎ-থৌরাংগী খোঙচৎতা অনৌবা খোঙজেল অমা পীবগী নুমিৎনি হায়না ফোংদোকখি। মেত্রো অমসুং রেলগা মরী লৈনবা প্রোজেক্তশিংদগী হৌনা ইনর্জী সেক্যুরিতীগী থবকশিং ফাওবা, প্রোজেক্তশিং অসি পুম্নমক্না কর্নাতকাগী ইনফ্রাস্ত্রকচরদা অনৌবা মপাঙ্গল অমা পীগদৌরি," শ্রী মোদীনা ফোংদোকখি।
ইনফ্রাস্ত্রকচর অমসুং ফগৎলবা কনেক্তিবিতীনা সমাজগী কাংলুপ খুদিংমক্তা য়ৌবা চাউখৎপা, থবক-শিনফম, অমসুং ইন্দস্ত্রীগী অনৌবা লম্বীশিং শেমগৎলি অমসুং লাইরবগী মায়োক্তা লান্থেংনবা অসি মপাঙ্গল কনখৎহল্লি, মসি হৌখিবা চহি খরা অসিদা নাগরিক করোর ৫০ রোম্না খ্বাইদগী অৱাবা লাইরবগী ফিবমদগী থোক্লকপদা মমি তারি হায়না ৱাফম অসি থম্লদুনা, প্রধান মন্ত্রীনা কর্নাতকাগী মীয়ামদা নৌনা হৌদোক্লিবা প্রোজেক্তশিং অসিগীদমক য়াইফ-পাউজেল পীখি। “মখোয়না বিক্সিত কর্নাতকা অমগী খুত্থাংদা বিক্সিত ভারত অমা শেমগৎপদা অনৌবা খোঙজেল অমা পীগনি, অমসুং মসিগা লোয়ন-লোয়ননা তেক সিতী অমা ওইনা বেঙ্গালুরুগী মশক অদুসু হেন্না মপাঙ্গল কনখৎহনগনি," পি.এম. মোদীনা হায়খি।
মতম খরগী মমাংদা বেঙ্গালুরু মেত্রোগী অনৌবা পিঙ্ক লাইন কত্থোকখিবা অদুবু থম্লদুনা, প্রধান মন্ত্রীনা কোরিদোর অসিনা আই.আই.এম. বেঙ্গালুরু, মহৈ-মশিংগী ইন্সতিত্যুসন কয়া, অমসুং শহর অসিগী চাউরবা ললোন-ইতিক, তেক্নোলোজী, অমসুং কমর্সিয়েল হবশিংদা কনেক্তিবিতী য়াম্না ফগৎহনগনি হায়খি। “বেঙ্গালুরুগী লাখ কয়াগী মীয়াম্না চত্থোক-চৎশিন তৌবদা লাইবা খক্তা নত্তনা, মখোয়গী শেল অমসুং মতমসু কনবা ঙমগনি,” শ্রী মোদীনা হায়খি।
ঙরাং লমদম অসিগা য়াম্না নক্নবা মরী লৈরমবা লৈখিদ্রবা অনন্থ কুমারগী পুন্য তিথি ওইখিবা অদু নিংশিংলদুনা, প্রধান মন্ত্রীনা লৈখিদ্রবা লুচিংবা অদুগী মফমদা থম্মোয় শেংবা ইকায়খুম্নবা উৎখি। "ঙসি মেত্রো লাইন অসি উবদা, মহাক্কী থৱায়সু য়াম্না নুংঙাইরমগনি," পি.এম. মোদীনা হায়খি।
লৈবাক অসিগী আই.তি. এক্সপোর্তকী শরুক অহুমথোকপগী শরুক অমদগী হেন্না শরুক য়ারিবা অমসুং ইন্নোভেসন অমসুং শেন্মিৎলোনগী চাউখৎ-থৌরাংগী অচৌবা ইঞ্জিন অমা ওইনা মথৌ তৌরিবা বেঙ্গালুরুবু ভারতকী সিলিকন ভেলীনি হায়না ফোংদোক্লদুনা, প্রধান মন্ত্রীনা সেন্ত্রেল গভর্নমেন্তনা বেঙ্গালুরু লমদম অসি য়াংনা চাউখৎহন্নবা অহানবা মীৎয়েং থম্লি অমসুং ২০১৪ দা কিলোমিতর ১৭ খক্তা লৈরম্বা নম্মা মেত্রো অসি ঙসি কিলোমিতর ১০০ দগী হেন্না পাকথোক-চাউথোকখ্রে, মসিনা বেঙ্গালুরুবু দিল্লী-এন.সি.আর. অমসুং মুম্বাই মেত্রোপোলিতেন রিজনগী মতুংদা মেত্রোগী কিলোমিতর ১০০ গী পন্দুপ লানবা অহুমশুবা ভারতকী শহর অমা ওইহল্লে হায়খি। "নম্মা মেত্রোগী মায়পাকপা অসি ইজ ওফ লিভিং অমসুং ইজ ওফ ত্রাভেলগী মতাংদা লৈবাক অসিগী অনৌবা ৱাখল্লোনগী মহৈনি, অমসুং মিদল-ক্লাস ইমুং-মনুংশিংগী পুন্সি ফগৎহন্নবা লৈবাক অসিগী ফিরেপকী মহৈনি," শ্রী মোদীনা ফোংদোকখি।
স্তেসনশিং, ইঞ্জিনশিং, অমসুং কোচশিংনা বন্দে ভারত ত্রেনশিং অমসুং অমৃত ভারত স্তেসনশিংগী খুত্থাংদা ভারতকী তোপ-তোপ্পা মশক অদু তাক্নবা ইন্দিয়ন রেলৱেজনা মহাক্কী অরিবা মতমগী ৱাখল্লোন অদু থাদোক্লদুনা অনৌবা লোনচৎ অমা শেমগৎলি, মসিদা চমরাজনগর, চিক্কমাগালুরু, সাকলেশপুর, অমসুং সুব্রহ্মন্য রোদ য়াওনা কর্নাতকাগী স্তেসন ৬০ দগী হেনবা য়াওরি হায়না ফোংদোক্লদুনা, প্রধান মন্ত্রীনা স্তেসনশিং অসিনা সেনিয়র সিতিজনশিং অমসুং দিব্যাঙ্গজনশিংগীদমক অখন্নবা খুদোংচাবশিং ফংহন্দুনা অনৌবা মতমগী ফিবমগা লোয়ননা মীৎয়েং চংবগী মওং অদু করম্না পুনশিনবগে হায়বা অদু থমখি। “মমাংদা এয়রপোর্তশিংদা ফংলম্বা খুদোংচাবশিং অদু, হৌজিক লাইরবা অমসুং মিদল-ক্লাস ইমুং-মনুংশিংদা রেলৱে স্তেসনশিংদা ফংহন্নবা হোৎনরি," পি.এম. মোদীনা হায়খি।
হৌখিবা চহি ১০-১২ গী মনুংদা ভারতকী রেলৱে বজেত অসি শরুক কয়া হেনগৎখ্রে অমসুং কর্নাতকাগী শেনফম অসি শরুক মাপল থোক্না হেনগৎখ্রে হায়বা অদু থম্লদুনা, প্রধান মন্ত্রীনা স্তেত অসিনা অহানবা বন্দে ভারত স্লীপর ত্রেন ফংলবা নুমিৎ খরনিগী মতুংদা, কর্নাতকাবু গোৱাগা শম্নহল্লিবা অনৌবা বন্দে ভারত ত্রেন অমগা লোয়ননা ঙসি অমৃত স্তেসন মরি অমসুং দবলিং অমসুং ইলেক্ত্রিফিকেসনগী প্রোজেক্ত অনী ফংলে হায়খি। “ত্রেন অসিগী খুত্থাংদা, মেঙ্গালুরু য়াওনা কর্নাতকাগী তোর্বানগী লম্বী পুম্বদা লৈরিবা মরুপশিংনা সেমি-হাই-স্পীদ ত্রেন অমগী অনৌবা এক্সপিরিয়েন্স অমা ফংগনি,” শ্রী মোদীনা হায়খি।
ইরান অমসুং গল্ফ লমদমদা হৌজিক চত্থরিবা লান অসিনা ইনর্জী সেক্যুরিতীগী মরুওইবা অদু তাক্লে হায়না ফোংদোক্লদুনা, প্রধান মন্ত্রীনা হৌখিবা চহি ১০ গী মনুংদা পেত্রোল, দিজেল, অমসুং এল.পি.জি. পুথোকপা, ক্রুদ ওইল থমফম, সোলার, হাইদ্রো, অমসুং ৱিন্দ ইনর্জী, চাউরাক্না মপুং ফানা রেল ইলেক্ত্রিফিকেসন, অমসুং মেত্রো নেতৱার্কশিং পাকথোক-চাউথোকহনবা য়াওনা লৌখৎখিবা খোঙথাংশিংদগী ভারতনা অৱাবা মতম অসি মায়পাক্না লান্থোকপা ঙমখি হায়না তাকখি, অমসুং কর্নাতকাগী অনৌবা প্রোজেক্ত অহুম মরিক চুম্না থমখি: মেত্রিক তন ৮০,০০০ গী থমফমগী কেপাসিতী হাপচিল্লিবা মেঙ্গালুরু এল.পি.জি. প্রোজেক্ত, পেত্রোল, দিজেল, অমসুং এভিয়েসন ফ্যুল সপ্লাই ফগৎহল্লিবা দেভঙ্গোন্থি মার্কেতিং তর্মিনেল, অমসুং নোংমদা বায়োগ্যাস তন ১৩ পুথোক্লিবা বেঙ্গালুরু সি.বি.জি. প্লান্ত। “মসিনা ৱেস্ত মেনেজমেন্ত ফগৎহনগনি অমসুং নেচরেল গ্যাস মীরৈবাক্তগী পুশিল্লকপদা চাদিং তৌরিবা শেল অদুসু কনবা ঙমগনি,” পি.এম. মোদীনা হায়খি।
ভারতনা চিপশিংদগী হৌনা জহাজশিং ফাওবা অমসুং এ.আই. অমসুং দেতা সেন্তরশিংদগী ক্বান্তম কম্প্যুতিং ফাওবা অনৌবা তেক্নোলোজীশিংদা মালেমগী লুচিংবা ওইনবা হোৎনরিবা অসিদা থাজবা য়াবা মৈ পুথোকপা অসি য়াম্না মরুওই হায়বা থম্লদুনা, প্রধান মন্ত্রীনা লৈবাক অসিনা ক্লীন ইনর্জীগী পান্দমশিং ফংনবা ন্যুক্লিয়ার পাৱর প্লান্তশিং পাকথোক-চাউথোকহল্লি হায়খি। "ঙসি ভারতকী রিন্যুৱেবল ইনর্জীগী কেপাসিতী অসি গিগাৱাত ৩০০ দগী হেনখ্রে," শ্রী মোদীনা হায়খি।
সেন্ত্রেল স্কিমশিংনা ভারতকী নাগরিকশিংবু মৈ শিজিন্নবশিংদগী মৈ পুথোকপশিং ওইনা ওন্থোক্লি হায়বা অদু থম্লদুনা, প্রধান মন্ত্রীনা লৈবাক শিনবা থুংনা ইমুং লাখ ৬০ দগী হেনবনা, মসিদা পি.এম. সুর্য় ঘর মুফ্ত বিজলি য়োজনাগী মখাদা ইমুং খুদিংমক্তা লুপা ৮০,০০০ রোমগী সেন্ত্রেলগী মতেংগা লোয়ননা কর্নাতকাগী ইমুং ৪০,০০০ হেন্বনা রুফতোপ সোলার প্লান্তশিং খিনখ্রে, অদুগা অমরোমদা পি.এম. কুসুম য়োজনাগী মখাদা কর্নাতকাগী লৌউ-শিংউবশিংগীদমক পাৱরগী চাদিং হন্থহন্নবা অমসুং অনৌবা ইনকম অমসুং থবক ফংহন্নবা সোলার পম্প লাখ ৮ হেনবগী খুত্থাংদা ঈশিং ফংহনবগী থৌরাং তৌরি হায়খি। “হায়বদি, কর্নাতকাগী অন্নদাতাসিং অসি হৌজিক উর্ঝদাতাসু ওইরক্লি,” পি.এম. মোদীনা হায়খি।
সবকা সাথ, সবকা বিকাসকী ২০১৪ গী মতুংগী ফিরেপকী মখাদা পান্দম লৈবা নেস্নেলগী থবক-থৌরম, মীয়ামনা শরুক য়াবা, অমসুং তেক্সপীয়রগী শেলবু মতিক চানা শিজিন্নবনা মিদল ক্লাসপু পাকথোক-চাউথোকহনখ্রে অমসুং য়ুমগী মচাক-মথুমশিং, তু-হ্বীলরশিং, ক্বালিতী লৈবা ইজুকেসন, ন্যুত্রিসন, হেল্থকিয়র, অমসুং ত্যরিজমগী এক্সপিরিয়েন্সশিং পাম্লিবা অনৌবা এস্পিরেস্নেল ক্লাস অমা শেমগৎলে হায়বা উবদা, প্রধান মন্ত্রীনা হেনগৎলক্লিবা অপাম্বশিং অসিনা ওতোমোবাইল, ইলেক্ত্রোনিক্স, ত্যরিজম, অমসুং সর্ভিসেস পুম্নমক্তা অনৌবা ইন্দস্ত্রী অমসুং থবক চাউখৎহল্লি, মসিনা নিও মিদল ক্লাসপু ভারতকী শেন্মিৎলোনগী চাউখৎ-থৌরাংগী অচৌবা ইঞ্জিন অমা ওইহল্লি হায়না ফোংদোকখি। “কর্নাতকা অমসুং বেঙ্গালুরুদসু মশিং য়াম্না লৈরিবা নিও মিদল ক্লাস অসিগী কান্নবা অসি সেন্ত্রেল গভর্নমেন্তকী অহানবা মীৎয়েং থমফমশিংগী মনুংদা অমনি,” শ্রী মোদীনা ফোংদোকখি।
মিদল ক্লাসকী সেভিংস হেনগৎহন্নবা অমসুং মখোয়গী খুত্তা হেন্না শিজিন্নবা য়াবা ইনকম ফংহন্নবা সেন্ত্রেল গভর্নমেন্তনা লেপ্পা লৈতনা থবক তৌরি হায়না ফোংদোক্লদুনা, প্রধান মন্ত্রীনা লুপা লাখ ১২ ফাওবগী চহিগী ইনকমবু ইনকম তেক্সতগী কোমথোকপা, সেনিয়র সিতিজনশিং অমসুং য়ুমগী ভারা লৌরিবশিংদা কান্নবা ফংহন্নবা তি.দি.এস. কাংলোনশিং শেমদোকপা, অমসুং নেক্সত-জেনেরেসন জি.এস.তি. রিফোর্মশিংগী খুত্থাংদা নুমিৎ খুদিংগী শিজিন্নবা পোৎলমশিংগী মমল হন্থহনবা অসিগুম্বা খোঙথাংশিং অদু থমখি। “পর্সনেল হেল্থ অমসুং লাইফ ইন্সুরেন্সতা জি.এস.তি. লৌথোকপগী খুত্থাংদা, ঐখোয়না ইন্সুরেন্স অসি হেন্না মমল হোংনা ফংহনখ্রে,” পি.এম. মোদীনা হায়খি।
ঙসি কর্নাতকাগী প্রোজেক্তশিং অসিনা লৈবাক অসিগী চাউখৎ-থৌরাংগী লম্বীবু হেন্না য়াংখৎহনগনি হায়না মহাক্কী ৱারোল লোইশিনবদা অমসুং মীয়ামদা মহাক্কী য়াইফ-পাউজেল পীবগা লোয়ননা, প্রধান মন্ত্রীনা মিদল-ক্লাস ইমুং-মনুংশিংবু মপাঙ্গল কনখৎহন্নবা সরকারনা লৌরিবা ফিরেপ অদুদা মীৎয়েং থমখি। “ঐখোয়না হোৎনরিবা অসি মিদল ক্লাসকী সেভিংস হেনগৎহনবা, মখোয়গী পোৎ লৈবগী শক্তি হেনগৎহন্নবা, অমসুং মখোয়গী ইমুং-মনুংগী মঙলানশিং ফংবা খক্তা নত্তনা, মখোয় লৈবাক অসিগী শেন্মিৎলোনগী চাউখৎ-থৌরাংদা শরুক য়াবা মীওইশিং ওইহনবনি,” শ্রী মোদীনা ফোংদোকখি।
*****