MYNJUR KA KYNHUN MYNTRI ÏA KA SONG PISA KABA T. 14,500 KLUR, KA SKHIM KI KAM PYNROI HALOR KA RUKOM PYLLANG BORDING JONG KA 92 GWh GRID-SCALE

Ka Kynhun Myntri ka sorkar India hapoh ka jingïalam jong U Myntri Rangbahduh ka Ri U Narendra Modi, ka la mynjur ïa ka skhim kaba tip kum ka Viability Gap Funding (VGF) Scheme na ka bynta ki kam pynroi jong ka Development of Grid-Scale Energy Storage Systems, kaba la kot sha ka T. 14 hajar 500 klur na ka bynta ka samoi treikam jong ka snem 2026–27 haduh u snem 2030–31. Ka thong jong kane ka skhim ka long ban kyrshan ïa ka jingpynroi ha kaba pyllang ïa ka bording ilektrik kaba lah ban pynmih haduh 92 GWh ha kylleng ka Ri. Kane ka skhim kan kyrshan ruh ïa ka jingpynmih ïa ki jingdonkam bathymmai kiba haduh 170% na ka jinglah jong ki jaka ban pyllang bording jong ka Grid-Scale Energy Storage Systems (ESS) kiba don mynta ha ka Ri, bad kane kan iarap ruh ban pyndap ïa ka jingdonkam kaba la khmih lynti, kaba long haduh 411 GWh, ha u snem 2031–32.

Kane ka skhim ka long ruh ka sienjam kaba kongsan na ka bynta ban pynkhlaiñ ïa ki jingtei kiba kongsan ha kaba ïadei bad ka tnat bording ha ka Ri India, ban pynsuk ïa ka jingpyndonkam lang ïa ka bording kaba heh na ki tyllong kiba lah ban pynthymmai, bad ban pynthikna ruh ïa ka jingsam bording kaba lah ban shaniah, kaba duna dor bad kaba don man la ka por, la ka long mynmiet ne mynsngi ruh. Kane ka skhim kan kyntiew ruh ïa ki jait jingshna hapoh ka Ri kiba kynthup ïa ki Battery Energy Storage Systems (BESS), ban pynduna ïa ka rukom wanrah tiar na shabar jong ka Ri bad ban pynbha ïa ki bynta kiba ïadei bad ka jingdon kham slem jong ka bording ha ka Ri.

Kane ka skhim ka thmu ruh ban pynroi ïa ka Hydro Pumped Storage Plant (PSP) kaba don ïa ka bor haduh 60 GWh, nangta ki Battery Energy Storage Systems (BESS) kiba haduh 30 GWh ka bor bad kiwei pat ki rukom jong ka juk stad teknoloji halor kumno ban pyllang bording ilektrik kiba don ïa ka bor haduh 2 GWh. Ka jingbei pisa baroh na ka bynta kine ki projek la khmih lynti ba kan kot sha ka T. 97,600 klur. Lyngba ka jingkyrshan jong ka VGF kan iarap ban pynbha ïa kine ki projek kiba lah ban pynïaid bad pynïoh jingmyntoi ha ka liang ka pisa tyngka, bad kan pynsted ruh ïa ka jingpynïaid shakhmat ïa ki kam pynroi bad ki jingtei kiba heh na ka bynta ban lum bad pyllang ïa ka bording ilektrik ha ka Ri.

Yn buh ruh ïa ka jaka pyllang bording ilektrik lyngba ka rukom jong ka jingïakop ha kaba ki nongïashimbynta kin tyrwa ïa ka dor jingsiew kaba heh(tariff-based competitive bidding). Ki kompani sam bording jong ka sorkar bad jong ki riew shimet kin ïoh ïa ka jingkyrshan pisa na ka VGF na ka bynta ki projek jong ka BESS bad ka Hydro PSP. Katba ïa ki projek kiba pyndonkam da kiwei pat ki teknoloji ban pyllang bording yn pyntreikam da ka kynhun jong ki riew shimet bad ka kynhun jong ka sorkar.

Kawei na ki thong ba kongsan jong kane ka skhim ka long ban pynkhlaiñ ïa ka rukom shna bad pynmih ïa ki tiar ban pynlang bording hapoh ka Ri India, lyngba ka jingkyrshan pisa na ka liang kaba donkam, bad ban pynduna ruh ïa ka jingshaniah ha kaban wanrah ïa ki tiar na shabar Ri. Ban kyntiew ïa ka jingshna tiar hapoh ka Ri, ki projek hapoh ka BESS kin hap ban pyndonkam da ki tiar kiba la shna hi hapoh ka Ri (Domestic Content Requirement – DCR) ym duna ïa ka 40%. Kane ka kyndon kan pynshlur ïa ka rukom shna tiar hapoh ka Ri, ban thaw ïa ki lad kamai bad ruh ki kabu ksiar na bynta ki karkhana hapoh India, bad kan kyrshan lang ïa ki skhim ai jingmyntoi kiba la don lypa na ka bynta ban kyntiew ïa ka jingpynmih ne shna ïa ki batteri hapoh ka Ri baroh kawei.

Shuh shuh kane ka skhim ka long ruh ka sienjam kaba kongsan na ka bynta ban tei bad pynbha ïa ka rukom sam bording kaba lah ban pynkylla katkum ka jingdonkam, kaba khlaiñ bad kaba la pynkhreh lypa na bynta ka lawei. Da kaba pynsted kham kloi ïa ki kam pynroi ha kaba ïadei bad ki jaka pyllang bording ilektrik kiba kham heh, kan pynsuk ïa ka rukom pyndonkam bording ba kham bun khamtam na ki tyllong kiba lah ban pynthymmai, ban weng ïa ka jingeh kaba mih na ka jingkylla jong ka jingpynmih bording, bad ban pynduna ïa ka jingshaniah ha ki tyllong pynmih bording tynrai ban pynbiang ïa ka jingsam bording kaba skhem man la ka por. Kane ka sienjam kan pynkhlaiñ ïa ka jinglong skhem jong ka Grid, kan kyntiew bad pynbha ïa ka rukom pyndonkam ïa ka bording kaba lah ban pynthymmai biang, kan kyntiew ïa ka rukom shna tiar hapoh ka Ri bad kan pynkhlaiñ ïa ka jingshngaiñ ha kaba ïadei bad ka jingdon jong ka bording ha India bad ruh kan pynurlong ïa ka jingthmu jong ka Atmanirbhar Bharat (Ka India kaba lah ban kyrshan hi halade) bad ka Viksit Bharat (Ka India kaba la kiew shaphrang).

*****