U Myntri Rangbahduh ka ri, u Narendra Modi ula buh mawnongrim, ula plie bad aiti sha ka ri ïa ki projek kam pynroi kiba shongdor 14,000 klur tyngka ha Banaskantha, Gujarat.

U Myntri Rangbahduh ka ri, u Narendra Modi ula buh ïa u mawnongrim, ula plie bad ula aiti sha ka ri ïa ki projek kam pynroi kiba shongdor 14,000 klur tyngka hynne ka sngi ha Banaskantha, Gujarat. Haba ai jingkren ha ka khyndew kyntang jong ka Mother Amba tang hadien katto katne por jong ka Navratri, u Modi ula plie ïa kiba bun tylli ki sienjam na ka bynta jong ki kynthei, ki khynnah, ki nongrep, bad na ka bynta ki nongri jingri, katba ula pyllait thymmai ruh ïa ka pisa jong ka Kisan Samman Nidhi sha ki shiphew million ngut ki nongrep ha baroh kawei ka ri kiba kham duna ka ïoh ka kot.

Da kaba batai ïa ki nongrep bad ki Annadatas kum ki rishot bakhlaiñ jong ka Viksit Bharat, u Myntri Rangbahduh ka ri ula ong ba ka sorkar ïaibteng ban buh hakhmat eh ïa ka bha ka miat bad ka jingpynkupbor ïa ki, ka jingkiew ha ka mang tyngka jong ka rep ka riang ha ka ri palat san shah haba ïa nujor bad ka mang tyngka jong ka snem 2013-14. Da kaba kdew ruh ba ka PM Kisan Samman Nidhi ka la kylla long kawei na ki bynta ba kongsan ha ka jingim jong ki nongrep, ula pynpaw ruh ba palat 1,000 klur tyngka la dep ban pynpoi sha ki bank account jong palat 50 lak ngut ki nongrep ha Gujarat, kynthup jan 50 klur tyngka na ka bynta ki lak ngut ki longïing longsem jong ki nongrep ha Banaskantha. "Hynne ka sngi, palat 18 hajar klur tyngka la dep ban phah sha ki bank account jong kumba 10 klur ngut ki nongrep," pyntip u Myntri Rangbahduh ka ri, u Narendra Modi.

Da kaba pynpaw ba ki mat treikam jong ka sorkar ha kine ki khyndiat snem ka la wanrah lane la lah ban kynshew palat 50 lak tyngka na ka bynta ki nongrep, u Myntri Rangbahduh ka ri ula kdew ïa ki san tylli ki nuksa ba kongsan da kaba kdew ba jan 4.5 lak klur tyngka ka pisa la dep ban phah beit beit sha ki bank account jong ki nongrep kiba kham duna ka ïoh ka kot hapoh jong ka PM Kisan Samman Nidhi. Ula ong ba ki nongrep kiba kham duna ka ïoh ka kot ki kynthup palat 85 na ka 100 jong ki paid nongrep bad ka sorkar jong ngi ka shim khia bha na ka bynta jong ki bad ai jingïarap ruh ïa ki lyngba ka PM Kisan Samman Nidhi," ïathuh u Myntri Rangbahduh ka ri, u Narendra Modi.

Haba kdew halor ka jingkiewdor jong ki dawai sboh ha kylleng ka pyrthei hapdeng ka jingbym shong shngaiñ jong ki ri ka pyrthei ha kine ki khyndiat snem ba la lah, u Myntri Rangbahduh ka ri ula banjur ba ka sorkar jong u kaba buh hakhmat eh ïa ki nongrep kala ïada ïa ki nongrep na kane ka jingkiewdor. " Ka sorkar ka la pynlut kumba 16 lak klur tyngka ha kaba ïadei bad kane,' ong u Myntri Rangbahduh ka ri, u Narendra Modi.

U Myntri Rangbahduh ka ri ula pynpaw ba ka sorkar kala pynurlong ïa ka jingkut jingmut jong ka halor ka MSP. "Ha ki 12 snem ba la lah, ki nongrep kew bad nongrep kba kila ïoh pdiang palat 24 lak klur tyngka kum ka MSP," ïathuh u Myntri Rangbahduh ka ri, u Narendra Modi.

Haba pynpaw ïa ka jingai jingïada kaba khlaiñ na ka bynta ki nongrep lyngba ka PM Fasal Bima Yojana, u Myntri Rangbahduh ka ri ula ong ba ki nongrep kila ïohpdiang palat 2 lak klur tyngka ka pisa na ka bynta ka jingsiew ïa ka bai lutksan ha kine ki 10 - 12 snem ba la lah, ryngkat ka jingïaibteng jong ki jingpyrshang ban pynduna ïa ka jinglut jingsep ha kaba ïadei bad ka jingai um ïa ki lyngkha lyngba ka jingpynïar shuh shuh ïa ka bynta jong ka skhim PM-KUSUM. Ula batai ba ka jingsam ïa jan 12 lak tylli ki pump ba pyndonkam da ka bor jong ka sngi hapoh jong kane ka skhim ka la pynmih shuh shuh ïa ka bording ilektrik bad kala pyllait ïa ki lak ngut ki nongrep na ka jingpynlut ha ka ban thied palat 80 klur liter ka umphñiang diesel, kaba la wanrah ïa ka jingïohnong tang na kine ki san tylli ki skhim baheh bad ki rai sha ka 50 lak klur tyngka. " Kane ka 50 lak tyngka kala ïarap ban kyntiew ïa ka ïoh ka kot jong ki nongrep ha ka ri bad kala ïarap ruh ban kyntiew ïa ka rep ka riang hapoh India," ïathuh u Myntri Rangbahduh ka ri, u Narendra Modi.

Da kaba banjur ba ka rep ka riang ka dei ka riti tynrai bad ka dei ruh ka bynta ba kongsan jong ka kolshor jong ki nong India, u Myntri Rangbahduh ka ri ula ong ba ka sorkar ka la pynïasoh ïa ka jingstad saian bad teknoloji bad ka rep ka riang kumjuh ruh bad ka ri jingri ha kine ki 12 snem ba la lah. U la kdew ïa ka Soil Health Card kum ka nuksa kaba biang tam kaba la weng ïa ki jingeh kiba ki paid nongrep ki ju mad kham hashwa ha kaban buh jingkheiñ ïa ka jait dawai sboh bad katno donkam ban ai na ka bynta ki lyngkha jong ki, ban wanrah ïa ki rukom rep bathymmai ha kylleng ka ri. " Mynta palat 26 klur tylli ki Soil Health Card ki la don bad ki paid nongrep jong ka ri," ong u Myntri Rangbahduh ka ri, u Narendra Modi

Haba kren halor ka jingkylla ha ka jinglong jong ka suiñbneng kaba la buh ïa ka jingeh bakhraw na ka bynta ki nongrep, u Myntri Rangbahduh ka ri u la ong ba ka sorkar ka dang ïai pyrshang ban ai ïa ki nongrep ïa ki jait symbai ba thymmai kiba lah ban ïaishah ïa ka jingkylla ha ka jinglong jong ka suiñbneng. "Dang ha kine ki khyndiat snem, kumba 3 hajar tylli ki jait symbai ba thymmai la lah ban ai sha ki nongrep," ïathuh u Myntri Rangbahduh ka ri, u Narendra Modi.

Haba kdew ïa ka ri jingri kum kawei na ki bynta ba kongsan jong ka ïoh ka kot ha ki thaiñ nongkyndong da ka jingïashimbynta  jong kiba bun ngut ki longkmie ha ki thaiñ nongkyndong, u Myntri Rangbahduh ka ri u la banjur ïa ka jingpynïasoh ïa ka jingstad saian bad teknoloji bad ka tnat dairy bad ri jingri ha kine ki phew snem ba la leit. Ua batai ba ki mrad kiba kham khlaiñ ki kham lah ban pynmih kham bun ka dud katba ka jingai tika bad ka jingsumar ki ïada ïa ki mrad na ka jingïap na kadaw jong ka jingpang. " Kaba mut, ba lada ki mrad ki long kiba khlaiñ, ka jingïoh jong ki hynmen shynrang bad kynthei jing nga kiba ri jingri kan kiewlang," pynskhem u Myntri Rangbahduh ka ri, u Narendra Modi.

Haba kdew ïa ka bynta jong ka Rashtriya Gokul Mission ha ka ban kyntiew ïa ka jingpynneh pynsah bad ka jingpynkharoi ïa ki mrad lyngba ka jingstad saian, u Myntri Rangbahduh ka ri ula ong ba ka shlem wadbñiah ba dang shu dep shna thymmai ha Banaskantha kan pynkhlaiñ shuh shuh ïa kane ka jingthmu da kaba pynneh pynsah bad kyntiew ïa ka rukom tynrai ha ka ban pynkha ïa ki masi kum ka Gir, ka Sahiwal, bad ka Kankrej, kumjuh ruh ka jingpynkha ïa ki masidab kum ka Mehsana, ka Murrah, bad ka Jaffarabadi, kiba long ki shlem ba nyngkong eh ha ka ri na ka bynta ka rukom pynkha Kankrej. Ula batai ba haba ki nongrep ki kwah ban pynhiar pateng ïa ki jait mrad kiba kham khlaiñ, kiba kham duna ka jingpynlut, na ki masi kiba koit ba khiah sha ki pateng ban nangwan, ki jingstad teknoloji bad mynta kum ka IVF ki kyntiew ïa ka jinglah ban pynkynriah ïa kito ki mrad kiba kham khlaiñ. " Ki nongri jingri kin ïoh beit beit ïa ki jingmyntoi jong ka ," ong u Myntri Rangbahduh ka ri, u Narendra Modi.

Ula ong ruh ba ka jingïada ïa ki jingri na ki jingshitom kum ka jingpang ha ki kjat bad shyntur ka long kaba donkam bha namarba Kum kine ki jingshitom ki ktah ïa ka koit ka khiah bad ïa ka jingpynmih jong ki mrad, u Myntri Rangbahduh ka ri ula pynpaw ïa ka jingpyllait ïa ka jingïalap ai dawai tika ba khlem donkam ban siew eiei ha baroh kawei ka ri. Ula kdew ruh ba kumba 150 klur tylli ki dawai tika ladep ban ai kat haduh mynta, na ka bynta ka jingai dawai tika ei ïa ki jingri jong palat 80 klur ngut ki nongrep. " Kane kala pynduna ruh ïa ka jingeh jong ka jinglut jingsep jong ki nongri jingri," ïathuh u Myntri Rangbahduh ka ri, u Narendra Modi.

Haba kdew halor ki jingmih kiba lah ban  ïohi na kine ki jingtuklar lem ha kaba ïadei bad ka jingpynmih jong ka dairy, u Myntri Rangbahduh ka ri ula ong ba ka jingpynmih dud jong kawei kawei ka masi ne masidab kala kiew na ka 5 liter ha ka snem 2013-14 sha jan 8 liter ha kine ki sngi, kaba la pynlong ïa ka India kum ka ri kaba kiew stet bha ha ka pyrthei ha kaba ïadei bad ka jingpynmih dud bad kaba long ruh ka jingmyntoi na ka bynta ki longïing longsem ha ki thaiñ nongkyndong. " Ka India kadei kaba nyngkong eh ha ka pyrthei ha kaba ïadei bad ka jingpynmih ïa ka dud," ong u Myntri Rangbahduh ka ri, u Narendra Modi.

Haba pynpaw ïa ka jingkut jingmut jong ka sorkar  ban ïarap ïa ki nongri jingri ba kin ïoh pisa na ka eit masi kumjuh ruh na ka dud, u Myntri Rangbahduh ka ri u la ong ba la tei ïa ki jingtei da ka jingïarap jong ki jaka treikam kum ka Banas Dairy na ka bynta ban pynmih ïa ka biogas, ka bio-CNG, bad ka sboh dawai ba la shna na ka eit masi bad na ki ba tam ba lait na ka farm, da kaba buh ruh ïa u mawnongrim na ka bynta ka jingtei ïa ki artylli ki karkhana pynmih bio-CNG, hynne ka sngi. Ula batai ïa ka jingthmu kaba shai halor ka jingkoit jingkhiah jong ki jingri, kaba kyntiew ïa ka jingpynmih dud jong ki jingri, bad pynthikna ïa ka jingpyndonkam pura ïa ka eit masi. " Ngi pynlong ïa ka ri jingri ym tang ka rukom tynrai, hynrei kum ka atiar kaba khlaiñ na ka bynta ban kyntiew ïa ka ïoh ka kot jong ki nongrep bad ïa ki thaiñ nongkyndong," ong u Myntri Rangbahduh ka ri, u Narendra Modi.

Haba batai ba ka sorkar kala trei bha ha kine ki khyndiat snem ba la leit na ka bynta ban pynthikna ïa ka jingpahuh pahai ha ki thaiñ nongkyndong, u Myntri Rangbahduh ka ri u la kdew ïa ka jingpynïar ïa ka tnat ki kam ri dohkha bad ban kyntiew ïa ka jingïatreilang hapoh jong ka. "Phin sa sngewkmen ban ïohsngew ba ka jingshalan jong ka India ïa ki jingbam duriaw kala long palat arshah," ong u Myntri Rangbahduh ka ri, u Narendra Modi.

Haba pynpaw ïa ka kam ri ngap kum kawei na ki lad ïoh kam ïoh jam bad lad kamai na ka bynta ki nongrep, u Myntri Rangbahduh ka ri ula ong ba ka jingpynmih umngap kala long arshah ha kine palat 12 snem bad ula ai ruh ka jingïaroh ïa ka jingnangkiew jong ka jingnohsynñiang jong ki seng ïarap da lade ïa lade jong ki kynthei ha ka ban ïalap ïa kane ka Madhu Kranti. " Phin sa sngewsarong ban tip ba ka ri jong ngi kala kylla long ka ri kaba wan bacar ha ka jingshalan ïa ka umngap," ïathuh u Myntri Rangbahduh ka ri, u Narendra Modi.

Haba pynkynmaw biang sa shisien ba ha ka 7 tarik u Risaw ula pyndep 25 snem ka jingai jingshakri kum u khlieh nongïalam jong ka sorkar hadien ba ula dep ban shim ïa ka jingpynbamsmai myn ha ka 7 tarik u Risaw 2001, u Myntri Rangbahduh ka ri u pynpaw ïa ka jingieid bajylliew bad ïa ka jingïalam lynti ba ula ïoh na manla ki nong Gujarat ha ka por ba um pat tip ei ei ïa ki office treikam jong ka sorkar ne ïa ki kot ki sla ba donkam jong ka sorkar. Ula pynpaw ïa ka jingsngewnguh sha ki paidbah kiba la pynkhamti ha u briew uba wan na ka longïing longsem kaba suk, ha kaba ki kpa tymmen kim pat ju mutdur ba kin long tang kum u Sarpanch hapoh ka shnong, da ka jingkitkhlieh ban shakri nyngkong eh ïa ka Gujarat bad hadien ïa ka ri. " Bad kham palat ban ïa ka jingieid, manla ki nong Gujarat kila hikai ïa nga bad ïalam lynti ïa nga ha ka lynti kaba dei," ong u Myntri Rangbahduh ka ri, u Narendra Modi.

Da kaba ong ba u tip tang ïa ki artylli ki kyndon treikam jong ka jingshakri ïa ka ri lyngba ka jingshakri ïa u paidbah bad kyntiew ïa ka ri lyngba ki kam pynroi jong ka Gujarat da kaba tip lut ïa kiei kiei baroh na ki paidbah, u myntri rangbahduh ka ri ula ai nam sha ki nongshong shnong ïa baroh kiei kiei kiba ula ïohpdiang na ka bynta ka ri. " Na ka bynta kane, Ngan ïai sah ram sha phi shyrta, bad tat haduh ka sngi khatduh jong ka jingim, ngan ïai trei ha ka ban shakri ïa phi," ong u myntri rangbahduh ka ri, u Narendra Modi.

Haba pynkynmaw ïa ki nongshong shnong kiba la kham noh ryta halor ka jingeh na ka jingkyrduh um bad bording ilektrik kaba la ktah ïa ka thaiñ 25 snem mynshwa, u myntri rangbahduh ka ri ula pynkynmaw ba kumno ki briew kila sngap ïa ka jingkyrpad jong u ban pynneh pynsah ïa ki jingdon jingem jong ka mariang bad pynkylla ïa ki jinglong jingman ha kaba kita ki jingeh kiba rim mynta kin ïai sah tang ha ki jingkynmaw. " Ngan ïai ong biang ïa kajuh sha phi mynta ka sngi, ba ngi hap ban kynshew ïa ka um,  kynshew ïa ka bording ilektrik," kyntu u myntri rangbahduh ka ri, u Narendra Modi.

Da kaba pynpaw ba kumno ka um Narmada bad ki jingstad teknoloji bad mynta kum ka drip irrigation kala pynkylla ïa ka Banaskantha bad pynlong ïa ki phan jong ka kiba pawnam ha ka pyrthei ryngkatlang bad ka jingpynïar ïa ka Banas Dairy's jong ka cooperative movement sha Kashi bad palat, myntri rangbahduh ka ri ula kdew ba ka jinglah ban pyndonkam ïa u phan na ka bynta ban shna French fries kala nangkiew na ka bynta ban lah ban pynïoh ïa u phan. " Kane ka long ka lad kaba heh bha na ka bynta ki nongrep phan," ong u myntri rangbahduh ka ri, u Narendra Modi.

Haba batai bñiah halor ka cluster development prokram na ka bynta ki nongrep soh bad ki nongrep jhur kaba dang ïaid mynta sha khmat, ha kaba hynne ka sngi la dep ban mynjur 12 tylli ki cluster na ka bynta ka jingrep sohsaw, jingrep phan, sohmynken, soh krep, ka kait, u piat, u soh ñiamtra, u soh pomegranate, bad u cocoa, u myntri rangbahduh ka ri u la ong ba ki nongrep ki ïohpdiang ïa ki subsidy na ka bynta ban thung thymmai ïa ki soh bad pynthymmai ïa ki kper soh bala rim. "Kine ki artylli ki cluster kiba la ïohpdiang ha North Gujarat kin ai jingmyntoi shibun ïa ki nongrep phan jong ka Banaskantha bad Sabarkantha," ong u myntri rangbahduh ka ri, u Narendra Modi.

Haba ñiew ïa ki projek jingtei ba kongsan kiba la dep ban plie lane kiba la sdang na ka bynta ka roi ka par jong ka Gujarat hynne ka sngi, u myntri rangbahduh ka ri ula pynpaw ïa ka jingplie ïa ki artylli ki lynti rel bathymmai, kata ka Ahmedabad - Varanasi Sabarmati Express bad ka rel Mehsana-Becharaji-Sabarmati MEMU, ryngkat ka jingpynheh ïa ka Ahmedabad Metro da ka a buh ruh ïa u mawnongrim na ka bynta ki projek metro kiba pynïasoh ïa ka nongbah GIFT bad ka kad liengsuiñ. " Ka surok bah Ahmedabad -Mehsana mynta kan sa kylla long ka surok phra lane na ka saw lane," ong u myntri rangbahduh ka ri, u Narendra Modi.

Haba pynpaw ïa ka jingplie ïa ki jingtei bathymmai na ka bynta ka bha ka miat jong ki khynnah jong ka jylla hynne ka sngi, u myntri rangbahduh ka ri ula pynpaw ba palat 4000 tylli ki shlem sam jingbang na ka bynta ki khynnah rit ne ki Anganwadi kiba long katkum ka juk ba mynta la dep ban plie ha kylleng jong ka Gujarat. "Kane kan ai jingmyntoi ïa kumba 4 lak ngut ki khynnah bad ki longkmie kiba armet," ïathuh u myntri rangbahduh ka ri, u Narendra Modi.

Da kaba ong ba manla ki kam pynroi kum kine ki thmu na ka bynta ban tei ïa ka India kaba roi ba par namarba manla u ne ka nongrep, ki samla, ki hynmen ne para kynthei, bad ki khun kynthei ki ïaid artet da ka jingkut jingmut jong ka Viksit Bharat, u myntri rangbahduh ka ri ula ong ba ka long kaba sngewsih ban ïohi ba ki don katto katne ki bym sngewtynnat ïa kane ka jingkiew bad ki kwah ban ïohi ïa ka ri ba kan mad ïa ka jingeh. "Haba ki jingeh ki wan ban lynshop ïa ka ri, ki sngewkmen," ong u myntri rangbahduh ka ri, u Narendra Modi.

Haba pynpaw ïa ka thma kaba dang ïaid mynta shakhmat hapdeng ka ri Iran bad ki ri Gulf kum kawei na ki nuksa ba dangshen ha kaba ka India ka ïeng tylli kawei ban ïakhun ïa kane katba katto katne ki pynsaphriang ïa ki khubor lamler ban pyntieng ïa ki nongrep shaphang ka jingduna jong ki dawai sboh bad ïa ki kynthei halor ka jingduna jong ki tyndong lyer shet, u myntri rangbahduh ka ri u la ong ba ka jingthmu jong ki ka long ban wanrah jingkulmar hapoh ka ri na ka bynta ban pynjahburom ïa u. " Haba ka India ka ïatyllilang kawei  ban ïakhun ïa kane ka jingeh, kine ki briew ki sdang ban pynsaphriang ïa ki khubor lamler," ong u myntri rangbahduh ka ri, u Narendra Modi.

Haba pynkynmaw ïa ka kynhun jong ki nongrep ïa ka jingpynthikna jong u ba un ïengskhem ha syndah jong ki, u myntri rangbahduh ka ri u la pynpaw ba ka sorkar ka khanglad ïa kano kano ka jingduna ha kaba ïadei bad ki tiar jingdonkam ha ka rep ka riang wat hapdeng ka jingiaumsnam kaba dang ïaid mynta shakhmat.

Da kaba ong ba ka thma jaka wanrah ïa ka jingkiewdor kynsan jong ki dawai sboh bad ki chemical, u myntri rangbahduh ka ri u la pynpaw ba ka sorkar kala ïada ïa ki nongrep na ka jingbankhia, da kaba ai ïa ki song jing ka dawai urea ha ka dor 300 tyngka ha India ha kaba ha kiwei ki ri jong ka pyrthei ka dor jong ka ka long 3000 tyngka shi song, kumjuh ruh ïa ka DAP ha ka dor kaba tang 1,350 tyngka ïa kaba ha kiwei pat ki ri ka dor jong ka ka poi haduh palat 5000 tyngka. " Ka ri ka ai ïa kane ka lad jingïarap khnang ba ki nongrep jong ngi kin ïoh ïa ka jingpynkupbor, bad ka jingim kaba kham bha," ong u myntri rangbahduh ka ri, u Narendra Modi.

Haba banjur halor ka jingkiew stet jong ki kam pynroi jong ka India kiba wanrah ïa ka jingkyrmen kaba thymmai na ka bynta ka pyrthei ka bym thikna bad kaba donkam ban ïaibteng ïa ka jingïaid lynti jong ka Ek Bharat, Shrestha Bharat, u myntri rangbahduh ka ri ula ong ba ka 31 tarik u Risaw ka dei ka sngi rakhe ïa ka National Unity Day ha kaba ka ri baroh kawei ka tyllun da ka jingai mynsiem jong ka jingïatylli hapdeng ka jingpynkhreh ïa ka jingïamareh ba la tip kum ka Run for Unity. "Nga kwah ban kyntu ïa baroh ki para ri, khamtam eh ïa ki para samla jong nga, ban ïashimbynta shitrhem ha kane ka jingïamareh ka ban long lashai mynstep," ong u myntri rangbahduh ka ri, u Narendra Modi.

Haba pynpaw ïa ka jingpynkylla ïa ka tamasa Unity Festival ba shisien shi snem ka ban long ha Ekta Nagar ha ka 31 tarik u Risaw, u myntri rangbahduh ka ri ula pynbna ba ka jingrakhe mynta u snem kan long lashai ka sngi ha ka por 5:30 janmiet, ha kaba kan don ka jingïaid parade jong ki pulit bad ki kynhun ïada ri bad ki tableau, bad ula kyntu ïa ki nongshong shnong naduh na Kashmir shaduh sha Kanyakumari bad naduh na Kutch shaduh sha Kamakhya ba kin ïasnohktilang ha kane ka sngi ban kynmaw burom ïa u Sardar Patel da kaba pynskhem ruh ïa ka jingkut jingmut na ka bynta ka Ek Bharat, Shrestha Bharat. "Da kane ka jingkyrpad, sa shisien pat nga ai khublei kitbok kitrwiang ïa phi baroh na ka bynta ki kam pynroi," pynkutnoh u myntri rangbahduh ka ri, u Narendra Modi.

From farms and dairy to infrastructure and connectivity, Banaskantha is making new strides in development. https://t.co/PCTYAW27DN

— Narendra Modi (@narendramodi) October 30, 2026

हमारे किसान, हमारे अन्नदाता, विकसित भारत के सबसे मजबूत स्तंभों में से एक है। और हमारी सरकार ने हमेशा किसानों के कल्याण को, किसानों को सशक्त करने को प्राथमिकता दी है: PM @narendramodi

— PMO India (@PMOIndia) October 30, 2026

पशुपालन हमारी ग्रामीण अर्थव्यवस्था का महत्वपूर्ण अंग है। इसमें हमारी बहनों की बहुत बड़ी भागीदारी है। बीते दशक में हमने पशुपालन और डेयरी सेक्टर में भी विज्ञान और टेक्नोलॉजी के इस्तेमाल पर जोर दिया है: PM @narendramodi

— PMO India (@PMOIndia) October 30, 2026

हम पशुपालन को केवल परंपरा नहीं बल्कि किसान की आमदनी बढ़ाने और गांवों को समृद्ध बनाने का मजबूत साधन बना रहे हैं: PM @narendramodi

— PMO India (@PMOIndia) October 30, 2026

जीवन के अंतिम क्षण तक... आपकी सेवा में ही जुटा रहूंगा: PM @narendramodi in Banaskantha

— PMO India (@PMOIndia) October 30, 2026

*****