চিনময়া অমৃৎ মহোৎসব গ্লোবেল সম্মেলন হৌদোকপদা থমখিবা পি.এম.গী ৱারোলগী মনিপুরী ৱাহন্থোক

ইকাই খুম্নজরবা পুজ্য স্বামী তেজোময়ানন্দজী, পুজ্য স্বামী স্বরুপানন্দজী, পুজ্য স্বামী মীত্রানন্দজী, পুজ্য স্বামী বিবেকতানন্দজী, ইকাই খুম্নজরবা সেন্ত, আচার্য়, চিনময়া মিসনগী সেবক পুম্নমক, লৈবাক শিনবা থুংবদগী অমসুং মপাল লৈবাক্তগী লাকপা ভক্তশিং অমসুং সিকরশিং, নুপীশিং অমসুং নুপাশিং।

ময়াম পুম্নমক্কী মতেংনা ঙসি ঐহাক্না চিনময়া মিসনগী অমৃৎ মহোৎসবতা শরুক য়াবগী খুদোংচাবা ফংলে। মসি তোপ-তোপ্পা থাজবগী ওইবা এক্সপরিয়েন্স অমনি। মসি ঐঙোন্দা ঐখোয়গী সন্তশিংগী অখন্নবা নুংশিবা অমসুং য়াইফ-মঙ্গোলনি। মরমদি চিনময়া মিসন অসি ইন্সতিত্যুসন অমা খক্তমক নত্তে। মসি চিনময়াগী ৱাখল্লোন অমনি, মসি চিনময়া ঋষি অমনা লিংখৎখি। চহী তরাগী খুজিং কয়াগী খোঙচৎ অসিসু অশেংবা, কন্সিয়স রিজোল্যুসনশিংগা লোয়নদুনা লাক্লি। অমসুং চিনময়া অসি মহৌশানা অমোর ওই অমসুং অমৃৎনা থল্লি। মরম অদুনা, ঙসি ভারত মন্দপমদা, থৌরম অসিগী মমিং - 'চিনময়া অমৃৎ মহোৎসব' - অসিসু চপ মান্ননা ৱাহন্থোক লৈ। ঐহাক্না মালেম শিনবা থুংনা লৈরিবা চিনময়া মিসনগা মরী লৈনবা আচার্য়শিং অমসুং লাখ কয়াগী সিকরশিং অমসুং মতুং ইনবশিংদা চিনময়া অমৃৎ মহোৎসবকীদমক্তা থম্মোয় শেংনা নুংঙাইবা ফোংদোকচরি।

মরুপশিং,

ঙসি মফম অসিদা লাকপগা লোয়ননা ঐগী থম্মোয়দা ফাওরকখিবা ৱাখল্লোন অসি হৌজিক্কী মতমগী তেক্নোলোজীনা হেন্না ময়েক শেংহনখি। পুজ্য গুরুদেব স্বামী চিনময়ানন্দজীগী দর্শন অসি, মহাক্কী হোলোবোৎকা ৱারী শানবগী খুদোংচাবা অসিগা লোয়ননা ঐহাক্না চহী ৩৩গী মমাংদা চৎলমখিবগুম তৌখি। ঐহাক্না ১৯৯৩দা গুরুদেবগা ৱাদোদরাদা উনখিবা, মহাক্কা ৱারী শানখিবা, মহাক্কী নুংশিবা, মহাক্কী য়াইফ-পাউজেল - ঙসি পুম্নমক অসি ঐহাক্কী নাক্তা অমুক্কা হন্না উবা ফংলে। মতম খরাগী ওইনা, ঐহাকপু গুরুদেবকী হকথেংননা হকথেংননা উনবগুম তৌখি। ঐগী ওইনা, মসি য়াম্না ইমোস্নেল ওইবা এক্সপরিয়েন্স অমনি। অসিগুম্বা নুংঙাইরবা এক্সপরিয়েন্স অসিগীদমক ঐহাক্না চিনময়া মিসনগী মেম্বর পুম্নমকপু থাগৎপা ফোংদোকচরি অমসুং ঐহাক্কী থাগৎপা ফোংদোকচরি।

মরুপশিং,

ইং ১৯৯৩গী ফেব্রুৱারী-মার্চকী মতমদা, ঐহাক্না পুজ্য গুরুদেবগা উনখি; ঐহাক্না মহাকপু য়ু.এস.এ.গী চিকাগোদা পাংথোক্কদৌরিবা পার্লিয়ামেন্ত ওফ ৱার্ল্দ'স রিলিজনসকী চহী চাম্মা শুবগী থৌরমদা কৌনবা চৎখি। মতম অদুদা স্বামী বিবেকানন্দজীগী পুৱারী ওইরবা ৱারোলগী চহী ১০০ মপুং ফারক্লি। পুজ্য গুরুদেবনা বর্তন অদুবু লৌশিনখি; পুজ্য গুরুদেবনা অমেরিকাদা চৎখি, অমসুং মফম অদুদা তোঙান তোঙানবা প্রোগ্রাম কয়াগী খুত্থাংদা মহাক্না মালেমগী ধর্মগী পার্লিয়ামেন্তকী চহী চা মপুং ফারকপগী থৌরমশিংগী মতাংদা মীয়ামদা খঙহনখি অমসুং মখোয়বু শরুক য়ানবা পুক্নিং থৌগৎখি। অদুম ওইনমক, লাইবকনা অতোপ্পা অমা তমলমখি। পার্লিয়ামেন্ত ওফ রিলিজিয়ন্স পাংথোক্নবগী চয়োল খরগী মমাংদা, ওগস্ত ৩দা, গুরুদেবনা ঐখোয় পুম্নমক থাদোক্তুনা, অমেরিকাগী সান দিএগোদা মহাক্না তাইবংপাল থাদোক্তুনা চৎখি। সেপ্তেম্বর ১১দা চিকাগোদা ধর্মশিংগী পার্লিয়ামেন্ত পাংথোকপা মতমদা, ঐহাক মফম অদুদা লৈরম্মি। ঐখোয় পুম্নমক্না পুজ্য গুরুদেব লৈখিদবগী অৱাবা অদু ফাওখি। গুরুদেবনা হায়রম্বা ৱাহৈ কয়া অমা ঐগী ৱাখলদা লেপ্তনা থোক্লকখি। মহাক্কা লোয়ননা ঐহাক্না অরোইবা ওইনা উন্নখিবা অদুদা ঐহাক্না য়াম্না কুপ্না খন্ন-নৈনখিবা অদু ঙসি ফাওবা ঐহাক্কী পুক্নিং ৱাখলদা লৈরি। মসিগী মরুওইবা ৱাখল্লোনদি: নহারোলশিংগী শক্তি শেমগৎপনি! অমসুং, নহারোলশিংগী শক্তিগী খুত্থাংদা, শক্তি লৈরবা অমসুং মতিং লৈবা ভারত অমা শেমগৎপা।

মরুপশিং,

মহাক্কা উনরবা মতুং চহী খরগী মতুংদা, মকোক থোংবা মীয়ামনা ঐঙোন্দা গুজরাতকী মুখ্য মন্ত্রী ওইবগী খুদোংচাবা পীখি। মদুদগী ঙসি ফাওবা, হৌখিবা চহী ২৫ অসিদা, সরকারগী মকোক ওইদুনা, ঐহাক্না ঐহাক্কী তৌবা ঙম্বগী মতুং ইন্না লৈবাক অসিগীদমক লেপ্পা লৈতনা থবক তৌরি। গুরুজীগী য়াইফ-মঙ্গোল ঐঙোন্দা লৈরি। মসিগী খোঙচৎ অসিদা, লৈবাক অসিগী নহারোলশিং অসি ঐহাক্কী হোৎনরিবশিং অমসুং পোলিসীশিংগী ময়াইদা থম্মি। ঐহাক্না হরাওবা ফোংদোকচরি মদুদি চিনময়া অমৃৎ মহোৎসবকী মতাংদসু নহারোলশিংনা মরুওইবা থৌদাংশিং লৌরি। ঐখোয়গী নহা ওইরিবা মরুপ-মপাং কয়া অমনা নুমিৎ ৩০০রোমগী মনুংদা কিলোমিতর ৪০,০০০গী খোঙচৎ অমা চৎখি। মতম অসিগী মনুংদা নহারোল লাখ অমা হেন্না কন্তেক্ত তৌখি। মসিগী শিংথানিংঙাই ওইবা থবক অসিগীদমক্তা ঐনা তীম পুম্নমকপু থাগৎপা ফোংদোকচরি।

মরুপশিং,

ঐখোয়গী উপনিষদশিংগী ৱারোলদি: “ভায়াম অমৃতস্য পুতরা”। হায়বদি, ঐখোয়না শিবা নাইদবা মচাশিংনি। মসিগী ৱাখল্লোন অসি লাইনিং লাইশোলগী ৱাংঙুলোল খক্তা নত্তে; মসি ঐখোয়গী চৎনবীগী ওইবা থাজবসু অমনি। মসিগী ৱাহন্থোকদি ঐখোয়গী হকচাংশিং অসি অমর ওই হায়বা নত্তে; মসিগী ৱাহন্থোকদি ঐখোয়গী ৱাখল্লোন অসি অমর ওই হায়বনি। ঐখোয়গী লৌশিং অমসুং ঐখোয়গী ৱাখল্লোন অসি শিবা নাইদে। অসিগুম্বা ৱাখল্লোন অসিনা মরম ওইদুনা, ভারত অসি চহী লিশিং কয়াদগী অমর ওইদুনা লাক্লি। মরমদি 'ভারত' হায়বা ৱাহৈ অসিগী ৱাহন্থোক অসিদি লৌশিং অমসুং মঙাল ফংনবা হোৎনবা অদুনি।

মরম অদুনা মরুপশিং,

লৈবাক অসিগী নীংতম্বা চহী ৭৫ মপুং ফারকপদা, ঐহাক্কী ৱাখলদা ৱাখল্লোন অসি লাকখি মদুদি ঐখোয়না মসিগী থৌরম অসি চাউখৎলবা ভারত অমগীদমক্তা ইথিল পীবা প্লেৎফোর্ম অমা ওইহনবতা নত্তনা, ঐখোয়না অমর ওইবা ঙম্বা ৱাখল্লোনগা লোয়ননা হিংবা ঙম্বা অমসুং চহী লিশিং কয়াগী এক্সপরিয়েন্সকী খুত্থাংদা, মতম কয়াগী মনুংদা মীওইবা খুন্নাইগীদমক খনবা ঙম্বা ভারতকী মগুন অদুসু অমুক হন্না পুথোরকপা তাই। মসিনা মরম ওইদুনা ঐহাক্না থৌরম অসিবু অমৃৎ মহোৎসব হায়না পাংথোক্নবা হায়জখি। অমসুং য়েংউ, মতমগী খোঙচৎকী মতুং ইন্না, অঙকপা খোঙচৎ অমগী মতুং ইন্না মসিগী ৱারেপ অসিগা লোয়ননা লেপ্তনা চৎমিন্নরি। মসিগী মতম অসিদা অয়াম্বা স্পিরিচুএল, কলচরেল অমসুং সোসিএল ওর্গনাইজেসনশিংনা মখোয়গী খোঙচৎকী মরুওইবা মাইলস্তোনশিংদা অমৃৎ রিজোলুসনশিং লৌখি। অমসুং হৌজিক, চিনময়া মিসনসু ভারতকী অমৃৎ কালগী মিসন অসিদা অমৃৎ মহোৎসবকী মওংদা শরুক য়াখ্রে। অমসুং মসি তশেংনা ভারতকী ৱারেপশিংগী অশেংবা পাঙ্গলনি। মসি ঐখোয়গী “অমৃতসিয়া পুত্রাহ” ওইবগী অশেংবা প্রমাননি।

মরুপশিং,

ঐখোয়গী বেদশিংনা হায়রি: "ভায়ম রাস্ত্র জগ্রীয়ম পুরোহিতাহ" - হায়বদি, লৈবাক অসিগী য়াইফনবা হোৎনবা ঐখোয়, লৈবাক অসিবু নিংশিংবা অমসুং ৱাংখৎহনবা ঙম্মী। স্বামী চিনময়ানন্দজীনা মহাক্কী পুন্সি চুপ্পা হায়রিবা মন্ত্র অসিনা লমজিংদুনা হিংখি। মহাক্না থাজবগী হীরমশিংদা পুক্নিং চিংশিন্দুনা ৱা ঙাংবগুম্না, লৈবাক অসিগী ওইবা হীরমশিংদসু মতিক চানা ৱা ঙাংখি। মরমদি ঐখোয়গী লৈবাক অসি ঐখোয়গী চৎনবীগী পোকফম্নি। লৈবাক অসিনা ঐখোয়গী লৈনবগী য়ুম্ফম্নি। স্বামীজীনা ঐখোয়দা মতম পুম্নমক্তা তাকপীখি মদুদি ঐখোয়না ঐখোয়গী স্পিরিচুএল এদভান্স অসি পর্সোনেল গ্রোথকা শম্নহনগদবনি, অমসুং পর্সোনেল গ্রোথ অসি নেস্নেল প্রোগ্রেসকী ভেহিকল ওইহনগদবনি। ভারতকী মীয়াম্বু ভারতকীদমক্তা মশাগী ইকাই খুম্নবা পীনবা অসি স্বামীজীগী মিসননি। পান্দম অসিগা লোয়ননা মহাক্না গীতা জ্ঞান য়জ্ঞ হৌদোকখি। মহাক্না উপনিষদ, বেদান্তা অমসুং ঐখোয়গী লাইরিকশিং অসি মীচম প্রজাশিংদা য়ৌহন্নবা কেম্পেন অমা হৌদোকখি। অমসুং ঙসিদি, ঐখোয়না মহাক্কী ৱারেপ অদুগী মহৈ কয়া অমা উবা ফংলি। চিনময়া মিসনগী থৌনাগী মতুং ইন্না ঙসিদি নহা লাখ কয়ানা ভারতকী কলচরেল ব্রান্দ এম্বেসেদর ওইনা থবক তৌরি। হায়রিবা নহাশিং অসিনা অনৌবা মীরোলদা ভারতকী মগুনশিং য়ৌহনলি। পুজ্য গুরুদেবকী থৌদাং অসি ভারতকী কলচরেল অমসুং স্পিরিচুএল রিনাইসেন্সকী মরু ওইবা চেপ্তর অমনি।

মরুপশিং,

ঙসি, ঐহাক্না পুজ্য গুরুদেবকী মপোক কুমওনগী থৌরম অদুসু নীংশিংজরি। ২০১৫দা ঐহাক্না মহাকপু নিংশিংদুনা অখন্নবা নীংশিং শেনয়েক অমা রিলিজ তৌবগী খুদোংচাবা ফংখি। অদুম ওইনমক, ঐহাক্না হায়জখি মদুদি স্বামীজীগী পুন্সি অসি লৌশিং, থবক অমসুং ইকাই খুম্নবা কয়াগী অপুনবা অমনি। মহাক্কী গুরু, স্বামি শিৱানন্দজীনা মহাকপু ৱাহৈশিং অসিগা লোয়ননা থৌজাল পীখি: “চৎলু, নোংশা অমগুম্না খোঙউ”। মহাক্না মহাক্কী পুন্সি চুপ্পা অসিগুম্বা ৱাখল্লোন অসিগা লোয়ননা হিংখি। মহাক্কী ৱারোলদা পীরকপা থাজবা অমসুং মনুংগী শক্তি অদুনা মীপুম খুদিংমক্কী থম্মোয়দা মহাক্কী ৱাখল্লোনগী তুং কোইনা চৎকদবা ইথিল অমা থাদোকখি। মহাক্কী ‘আর্ত ওফ মেন মেকিং’ হায়না মিংথোনবা রেদিও প্রোগ্রাম অসিনা মশীং থীঙমদ্রবা মীওইশিংদা লমজিং-লমতাক পীখি।

মরুপশিং,

শক্নাইরবা মীওইশিংগী মিসন অসি মখোয়না লৈখিদ্রবা মতুংদসু লৈরি। মরম অসিনা ঙসি ঐখোয়না উবা ফংলি মদুদি চিনময়া মিসনগী এজুকেস্নেল ইন্সতিত্যুসন ১০০ হেনবনা অঙাংশিং অমসুং নহা লাখ কয়াগী তুংলমচৎ শেমগৎলি। ইন্সতিত্যুসনশিং অসিদা, মখোয়না মোদর্ন এজুকেসন ফংলি অমসুং ভারতকী মগুনশিংসু খঙলি।

মরুপশিং,

স্বামী চিনময়ানন্দজীগুম্বা মীৎয়েং শানবা মীওইশিংনা নীংতম্বা ফংলবা মতমদা থমখিবা মীৎয়েং অদু ঙসিদি লৈবাক অসিনা মসিগী মায়কৈ অদুদা মশাগী থৌদাংশিং অদু মপুং ফাহল্লি। ঐখোয়গী এজুকেসন সিস্তেম অসি অনৌবা ভারত অমগী মথৌ তাবশিংগা চুনহন্নবা ঐখোয়না নেস্নেল এজুকেসন পোলিসী হৌদোক্লে। অনৌবা এজুকেসন পোলিসী অসিদা, ভারতকী লৌশিংগী চৎনবীশিং, মমা লোলদা মহৈ তম্বা, মোদর্ন সাইন্স, অমসুং অনৌবা তেক্নোলোজীদা অহেনবা মীৎয়েং থম্লি।

মরুপশিং,

স্বামীজীগী পুন্সিগী অতোপ্পা মিসনদি: ভারতকী হেরিতেজ অমসুং মদুবু ঙাক-শেন্দুনা থম্বদা চাউথোকচবনি! কন্যাকুমারীদা লৈরিবা বিবেকানন্দ রোক মেমোরিয়েল অসি ময়াম পুম্নমক্না খঙনরবনি। সমুদ্রগী ময়াইদা লৈরিবা অচৌবা নুংজাও অদুদা নিংশিং খুদমগী ৱারেপ অসি শ্রী একনাথ রানাদেজীনা লৌখি। মতম অদুদা, পুজ্য গুরুদেবনা মহাক্কী নাকলদা অচেৎপা ওইনা লেপখি। মসিগী অচৌবা থবক অসিগীদমক অহানবা শেলগী তেংবাং অসিসু পুজ্যা স্বামীজীনা পীখি। ঙসি, বিবেকানন্দ রোক মেমোরিয়েল অসি লৈবাক শিনবা থুংবদগী অমসুং মালেম শিনবা থুংবদগী লাকপা মীওই লাখ কয়াগী ইথিলগী হৌরকফম ওইরিবা মফম অমা ওইরে।

মরুপশিং,

ঙসিদি, অৱাংদগী খা ফাওবা, নোংপোকদগী নোংচুপ ফাওবা, ভারতকী কলচরেল সেন্তরশিং অসি রিনাইসেন্স অমা থোক্লি। কাশী বিশ্বনাথ ধাম, অয়োধ্যাদা ভগবান শ্রী রামগী চাউরবা লাইশঙ, উজ্জৈনগী মহাকল মহালোক, নত্রগা কেদর্নাথ অমসুং বদ্রীনাথকুম্বা ঐখোয়গী লাইশঙশিংগী অনৌবা মওং ওইরকপা। করিগুম্বা অদোম্না কেদর্নাথজীদা হন্দক্তা চৎলুবা তারবদি, অদী শঙ্কর, অদী শঙ্করচার্য়জীগী অচৌবা মীতম অমা মফম অদুদা থম্লে, অদী শঙ্করনা মফম অদুদা মহাক্কী হকচাং থাদোক্তুনা চৎখি। ঙসিদি, মখোয়না মখোয়গী শিংথানিংঙাই ওইবা মওং-মতৌদা হল্লক্লি। মতম অমদা, মীতম কয়া অমা ভারত্তগী য়ান্থৎলম্মি, মপান লমদা পুশিল্লম্মি অমসুং মফম অদুদা য়োল্লম্মি। মখোয়বু থিংবা, ৱাহং হংনবা কনা অমত্তা লৈখিদে - মখোয়বু ইকাই খুম্নবশিং নত্তনা, ৱাহং হংনবা কনা অমত্তা লৈখিদে। হৌখিবা চহী ১২ অসিদা, ঐখোয়না অসিগুম্বা হুরুরবা অরিবা মীতম ৬৫০ হেন্না পুরকখ্রে। ঐখোয়গী কলচরেল সেন্তরশিং অসি য়ু.এন.ই.এস.সি.ও.গী ৱার্ল্দ হেরিতেজ সাইতশিংগী শরুক অমা ওইরক্লি।

মরুপশিং,

স্বামীজীনা ঐখোয়গী ধর্ম অমসুং ফিলোসোফী মালেমগী মীয়ামদা শন্দোকখিবা অদুগুম্না, ঙসি ইন্তরনেস্নেল যোগ দেনা মালেমগী মীওইশিংবু ভারতকা অমসুং ঐখোয়গী অরিবা, শক্নাইরবা চৎনবীগা শম্নহল্লি। ঐখোয়গী হেরিতেজ অসিদা চাউথোকচবা পোকপগী অসিগুম্লবা থাজবা অসি, মীখা পোনবগী ৱাখল্লোনদগী নীংতম্বা ফংলগনি হায়বগী অচেৎপা থাজবা অসি, লৈবাক অসিনা ঙসিদি চহী চা কয়াগী মমাংদগী ঐখোয়গী ঋষিশিং অমসুং লৈবাক নুংশিজবশিংনা খল্লম্বা লম্বী অসিদা মাংলোমদা চংশিল্লি হায়বগী খুদম্নি। মখোয়গী ৱাখল্লোনগী মপাঙ্গল অসি ঐখোয়গী লম্বী অসিদা ঐখোয়গী খ্বাইদগী চাউবা পোৎলুম্নি।

মরুপশিং,

তোঙান-তোঙানবা ইন্সতিত্যুসনশিং অমসুং ওর্গনাইজেসনশিংনা মখোয়গী মশাগী ওইবা পান্দমশিং লৈ, অদুবু পান্দম অমা খক্তনা মীপুম খুদিংমকপু পুনশিনহল্লি, লম্বী পুম্নমক্কী পান্দম, পান্দম অদুদি: লৈবাক্কী চাউখৎপা, লৈবাক্কী চাউথোকচবনি। স্বামী চিনময়ানন্দজীগী মতমদা, লৈবাক অসিগী মায়োক্তা লৈরিবা শিংনবশিং অদুগী মতুং ইন্না মহাক্না মহাক্কী ৱারেপশিং অদু শেমখি। হৌখিবা চহী তরাগী খুজিংশিংদা, মতমশিং অসি হোংখ্রে, লৈবাক অসিগী মমাংদা অনৌবা শিংনবশিং লাকখ্রে, অমসুং খুন্নাইদা অনৌবা অপনবশিং লাকখ্রে। ঙসিদি, ৱারোইশিন পুরকপগী থৌদাং অসি ঐখোয় পুম্নমক্কী মথক্তা লৈ। ঙসিদি, ঐখোয়না সমাজবু অপনবা পীরিবা ফোর্সশিংগী মায়োক্তা পুনশিনগদবনি, অমসুং ঐখোয়গী নাগরিকশিংবু মশা মথন্তা থাজবা লৈনবা খঙহনগদবনি। ২০৪৭ ফাওবদা চাউখৎলবা ভারত অমা ওইহন্নবগী ৱারেপ অদুদা ঐখোয়না মীপুম খুদিংমকপু শম্নহনগদবনি। ঐখোয়না পান্দমশিং অসি ফংনবগীদমক হেন্না থৌনা লৈগদবনি।

মরুপশিং,

২০৪৭তা ভারতনা মনিংতম্বা ফংলবা চহী ১০০ মপুং ফারকপা মতমদা, মতম অদুৱাইদা, চিনময়া মিসনসু মসিগী চহী ১০০শুবা কুমওন অসি পাংথোক্কনি। হায়বদি, চিনময়া মিসনগী চহী চাগী খোঙচৎ অমসুং চাউখৎলবা ভারত অমগী খোঙচৎ অসি অমত্তা ওইনা খুমাং চাউশিল্লগনি। মরম অদুনা, ঐখোয়গী পান্দমশিং অসি অমা খক্তনি, ঐখোয়গী পান্দমশিং অসি অমা খক্তনি, অমসুং ঐখোয়না পুন্না চৎমিন্নদুনা খোংচৎ অসিবু মাংলোমদা চংশিনগদবনি। অদোম্না গুরুদেবকী অচৌবা লিগেসি অমসুং চহী কয়াগী এক্সপরিয়েন্স লৈ। মালেম শিনবা থুংনা অদোমগী অচৌবা ইমুংগী অখন্নবা আচার্য়শিং, থিজিনবশিং, অমসুং থবক তৌবশিং লৈ। ঐহাক্না থাজবা থম্লি মদুদি ময়াম পুম্নমক্না পুন্না চাউখৎলবা ভারত অমা শেমগৎপদা মরু ওইবা থৌদাং অমা লৌগনি। মসিগী থাজবা অসিগা লোয়ননা, ঐহাক্না অমুক্কা হন্না পুজ্য গুরুদেবকী মফমদা ইকাই খুম্নবা উৎচরি। ঐহাক্না অমৃৎ মহোৎসবকীদমক্তা চিনময়া মিসনগী সন্ত, আচার্য়, সিকর অমসুং সর্ভিস ওরিএন্তেদ কম্পেনিয়ন পুম্নমকপু থম্মোয় শেংনা নুংঙাইবা ফোংদোকচরি।

হরি ওম।

হরি ওম।

হরি ওম।

হন্না-হন্না থাগৎচরি।

খঙহঞ্জবা: মসি প্রধান মন্ত্রীগী ৱারোলগী চাউরাকপা ৱাহন্থোক্নি। তশেংবা ৱারোলদি হিন্দীদা পীখি।

***