ಫಿಲಿಪೈನ್ಸ್‌ನಲ್ಲಿ ನಡೆದ ಎಡಿಎಂಎಂ-ಪ್ಲಸ್ ವೇಳೆ ಅಮೆರಿಕದ ರಕ್ಷಣಾ ಕಾರ್ಯದರ್ಶಿಯನ್ನು ಭೇಟಿ ಮಾಡಿದ ರಕ್ಷಣಾ ಸಚಿವರು

2026ರ ಅಕ್ಟೋಬರ್ 28 ರಂದು ಫಿಲಿಪೈನ್ಸ್‌ನ ಸೆಬುವಿನಲ್ಲಿ ನಡೆದ ಆಸಿಯಾನ್ ರಕ್ಷಣಾ ಸಚಿವರ ಸಭೆ-ಪ್ಲಸ್ (ಎಡಿಎಂಎಂ-ಪ್ಲಸ್) ಸಂದರ್ಭದಲ್ಲಿ ರಕ್ಷಣಾ ಸಚಿವರಾದ ಶ್ರೀ ರಾಜನಾಥ್ ಸಿಂಗ್ ಅವರು ಅಮೆರಿಕದ ರಕ್ಷಣಾ (ಯುದ್ಧ) ಕಾರ್ಯದರ್ಶಿ ಶ್ರೀ ಪೀಟ್ ಹೆಗ್ಸೆತ್ ಅವರೊಂದಿಗೆ ಸಭೆ ನಡೆಸಿದರು. ಭಾರತ-ಅಮೆರಿಕಾ ಪ್ರಮುಖ ರಕ್ಷಣಾ ಪಾಲುದಾರಿಕೆಯ ಅಡಿಯಲ್ಲಿ ಪ್ರಗತಿಯನ್ನು ಪರಿಶೀಲಿಸಲು ಈ ಸಭೆಯು ಒಂದು ಪ್ರಮುಖ ಅವಕಾಶ ಒದಗಿಸಿತು. ಹಾಲಿ ಪ್ರಗತಿಯಲ್ಲಿರುವ ಸಹಯೋಗದ ಬಗ್ಗೆ ಬೆಳಕು ಚೆಲ್ಲಿದ ಉಭಯ ನಾಯಕರು ತಮ್ಮ ಮೂಲಭೂತ ಭದ್ರತಾ ಒಪ್ಪಂದಗಳ ಬಲವಾದ ಪ್ರಗತಿಯನ್ನು ಪರಾಮರ್ಶಿಸಿದರು ಮತ್ತು ಕಾರ್ಯಾಚರಣೆಯ ಸಿದ್ಧತೆ, ತಂತ್ರಜ್ಞಾನ ವಿನಿಮಯ ಮತ್ತು ರಕ್ಷಣಾ ಕೈಗಾರಿಕಾ ಏಕೀಕರಣವನ್ನು ವೇಗಗೊಳಿಸಲು ಹೊಸ ಮಾರ್ಗಗಳನ್ನು ಅನ್ವೇಷಿಸಿದರು.

ಪ್ರಾದೇಶಿಕ ಭದ್ರತೆಯ ಪರಾಮರ್ಶೆಯು ಈ ಸಂವಾದದ ಪ್ರಮುಖ ಅಂಶವಾಗಿತ್ತು, ಈ ಸಂದರ್ಭದಲ್ಲಿ ಉಭಯ ರಾಷ್ಟ್ರಗಳು ಜಾಗತಿಕವಾಗಿ ಭಯೋತ್ಪಾದನೆಯ ಬೆದರಿಕೆ ಸಂಪೂರ್ಣವಾಗಿ ತೊಡೆದುಹಾಕಲು ತಮ್ಮ ಜಂಟಿ ಸಂಕಲ್ಪವನ್ನು ಬಲವಾಗಿ ಪ್ರತಿಪಾದಿಸಿದವು. ಜಾಗತಿಕ ಸಮುದಾಯವು ಭಯೋತ್ಪಾದಕ ಸಂಘಟನೆಗಳನ್ನು ಬೆಂಬಲಿಸುವ, ತರಬೇತಿ ನೀಡುವ ಅಥವಾ ಹಣಕಾಸು ಒದಗಿಸುವ ರಾಷ್ಟ್ರಗಳ ಬಗ್ಗೆ ರಾಜಿಯಾಗದ, ಶೂನ್ಯ-ಸಹಿಷ್ಣುತೆಯ ಕಾರ್ಯವಿಧಾನವನ್ನು ಹೊಂದಬೇಕು ಎಂದು ರಕ್ಷಣಾ ಸಚಿವರು ಪ್ರಮುಖವಾಗಿ ಪ್ರಸ್ತಾಪಿಸಿದರು. ಭಾರತದ ಗಡಿಯಾಚೆಗಿನ ಭಯೋತ್ಪಾದನೆಯ ವಿರುದ್ಧದ ಹೋರಾಟಕ್ಕೆ ಅಮೆರಿಕ ಅಚಲ ಒಗ್ಗಟ್ಟು ಮತ್ತು ಸಂಪೂರ್ಣ ಬೆಂಬಲ ನೀಡಲಿದೆ ಎಂದು ಕಾರ್ಯದರ್ಶಿ ಹೆಗ್ಸೇತ್ ಪುನರುಚ್ಚರಿಸಿದರು. ಅಮೆರಿಕವು ನೀಡಿರುವ ಸ್ಥಿರ ಮತ್ತು ಬಲವಾದ ಬೆಂಬಲಕ್ಕೆ ಭಾರತದ ಆಳವಾದ ಮೆಚ್ಚುಗೆಯನ್ನು ವ್ಯಕ್ತಪಡಿಸುತ್ತದೆ ಎಂದು ರಕ್ಷಣಾ ಸಚಿವರು ಹೇಳಿದರು.  

10 ವರ್ಷಗಳ ಭಾರತ-ಅಮೆರಿಕಾ ರಕ್ಷಣಾ ಚೌಕಟ್ಟಿನ ಪ್ರಗತಿಯನ್ನು ಇಬ್ಬರೂ ನಾಯಕರು ಪರಾಮರ್ಶಿಸಿದರು ಮತ್ತು ಭಾರತ-ಯುಎಸ್ ರಕ್ಷಣಾ ಸಂಬಂಧವನ್ನು ಕಾರ್ಯತಂತ್ರದ ಒಮ್ಮುಖಕ್ಕೆ ಮತ್ತಷ್ಟು ಉನ್ನತೀಕರಿಸುವ ತಮ್ಮ ಹಂಚಿಕೆಯ ಬದ್ಧತೆ ಪುನರುಚ್ಚರಿಸುವ ಮೂಲಕ ಮುಕ್ತಾಯಗೊಳಿಸಿದರು. ಎರಡೂ ದೇಶಗಳ ನಡುವೆ ಮಿಲಿಟರಿ ವಿನಿಮಯ ಮುಂದುವರಿಕೆ, ಕಡಲ ಭದ್ರತಾ ಸಹಯೋಗ ಹೆಚ್ಚಳ ಮತ್ತು ಹಾಲಿ ಪ್ರಗತಿಯಲ್ಲಿರುವ ರಕ್ಷಣಾ ಉದ್ಯಮ ಸಹಯೋಗವನ್ನು ಮತ್ತಷ್ಟು ಬಲಗೊಳಿಸಲು ಮತ್ತು ವಿಸ್ತರಿಸಲು ಬಲವಾದ ರಕ್ಷಣಾ ಪೂರೈಕೆ ಸರಣಿಗಳನ್ನು ಸಂಯೋಜಿಸುವ ಬಗ್ಗೆ ಚರ್ಚೆಗಳು ನಡೆದವು.

ಸಭೆಯ ನಂತರ ರಕ್ಷಣಾ ಸಚಿವರು ತಮ್ಮ ಸಾಮಾಜಿಕ ಮಾಧ್ಯಮ X ಪೋಸ್ಟ್‌ನಲ್ಲಿ, ಭಾರತ ಮತ್ತು ಅಮೆರಿಕಾ ನಡುವಿನ ಸದೃಢ ಪಾಲುದಾರಿಕೆಯನ್ನು ಉಚಿತ, ಮುಕ್ತ ಮತ್ತು ಸುರಕ್ಷಿತ ಇಂಡೋ-ಪೆಸಿಫಿಕ್‌ಗೆ ಒಂದು ಮೂಲಾಧಾರವಾಗಿದೆ ಎಂದು ಬಣ್ಣಿಸಿದರು.

*****