ପୋଷ୍ଟ କରାଯିବା ଦିନାଙ୍କ:
27 OCT 2026 4:34PM by PIB Bhubaneswar
ଗତକାଲି ଲୋକସଭା ବାଚସ୍ପତି ଶ୍ରୀ ଓମ୍ ବିର୍ଲାଙ୍କ ଦ୍ୱାରା ଉଦ୍ଘାଟିତ ଦ୍ଵାଦଶ ବ୍ରିକ୍ସ ସଂସଦୀୟ ଫୋରମ୍ ଆଜି ଏକ ମିଳିତ ଘୋଷଣାନାମା ଗ୍ରହଣ ସହ ସମାପ୍ତ ହୋଇଛି। ଏହି ଘୋଷଣାନାମାରେ ମିଳିତ ଜାତିସଂଘ ଚାର୍ଟରର ନୀତି, ସାର୍ବଭୌମ ସମାନତା, ପାରସ୍ପରିକ ସମ୍ମାନ, ଅନ୍ୟ ଦେଶର ଆଭ୍ୟନ୍ତରୀଣ ବ୍ୟାପାରରେ ହସ୍ତକ୍ଷେପ ନ କରିବା ଏବଂ ଅନ୍ତର୍ଜାତୀୟ ବିବାଦଗୁଡ଼ିକର ଶାନ୍ତିପୂର୍ଣ୍ଣ ସମାଧାନ ପ୍ରତି ସଦସ୍ୟ ରାଷ୍ଟ୍ରଗୁଡ଼ିକର ପ୍ରତିବଦ୍ଧତାକୁ ପୁନଃ ଦୃଢ଼ କରାଯାଇଛି। ବର୍ତ୍ତମାନର ଅଧ୍ୟକ୍ଷତା ସମୟରେ ଭାରତର ବୃଦ୍ଧି ପାଉଥିବା କୂଟନୈତିକ ପ୍ରଭାବକୁ ପ୍ରତିଫଳିତ କରୁଥିବା ଏହି ମିଳିତ ଘୋଷଣାନାମା, ନୂଆଦିଲ୍ଲୀର ମୁଖ୍ୟ ରଣନୀତିକ ପ୍ରାଥମିକତାଗୁଡ଼ିକ ସହିତ ସମ୍ପୂର୍ଣ୍ଣ ଭାବେ ସମନ୍ୱୟ ରଖିଛି। 'ନୂଆଦିଲ୍ଲୀ ଘୋଷଣାନାମା' (ଏନଡିଡି) ରେ ରହିଥିବା ସହମତିକୁ ପୁନଃଦୃଢ଼ କରି, ସଦସ୍ୟ ସଂସଦଗୁଡ଼ିକ ମିଳିତ ଜାତିସଂଘ ସୁରକ୍ଷା ପରିଷଦର ସଂସ୍କାର ପାଇଁ ସ୍ପଷ୍ଟ ସମର୍ଥନ ଜଣାଇଛନ୍ତି। ଏହି ସଂସ୍କାରର ଲକ୍ଷ୍ୟ ହେଉଛି ବିଶ୍ୱ ଶାସନ ବ୍ୟବସ୍ଥାରେ ଦକ୍ଷିଣ ବିଶ୍ଵ (ବିକାଶଶୀଳ ଦେଶଗୁଡ଼ିକ) ର ପ୍ରତିନିଧିତ୍ୱକୁ ଅଧିକ ବ୍ୟାପକ କରିବା; ଯାହା 'ନୂଆଦିଲ୍ଲୀ ଘୋଷଣାନାମା'ର ୧୩ ନମ୍ବର ଅନୁଚ୍ଛେଦରେ ଉଲ୍ଲେଖ କରାଯାଇଛି।
ଜାତୀୟ ସୁରକ୍ଷା ପ୍ରସଙ୍ଗରେ ଭାରତର ଦୃଢ଼ ଆଭିମୁଖ୍ୟ-ଯାହା ଆତଙ୍କବାଦ ବିରୋଧରେ ଏକ କଠୋର ଓ ଅପୋଷ ମନୋଭାବ ପ୍ରଦର୍ଶନ କରେ, ଏକ ବଡ଼ ବିଜୟ ହାସଲ କରିଛି। 'ନୂଆଦିଲ୍ଲୀ ଘୋଷଣାନାମା' (ଏନଡିଡି) ର ୪୦ ନମ୍ବର ଅନୁଚ୍ଛେଦକୁ ଆଧାର କରି, ଏହି ଦସ୍ତାବିଜ ସୀମାପାର ଆତଙ୍କବାଦ, ଏଥି ପାଇଁ ଆର୍ଥିକ ସହାୟତା ଏବଂ ଆତଙ୍କବାଦୀଙ୍କ ପାଇଁ ସୁରକ୍ଷିତ ଆଶ୍ରୟସ୍ଥଳୀର ଉପସ୍ଥିତିକୁ ନିନ୍ଦା କରିଛି। ଏହା ସହିତ, ଆତଙ୍କବାଦ ପ୍ରତି ଶୂନ୍ୟ ସହନଶୀଳତା ପ୍ରଦର୍ଶନ କରିବାକୁ ଏବଂ ଦୋମୁହାଁ ନୀତି ବନ୍ଦ କରିବାକୁ ଦାବି କରାଯାଇଛି। ଏହି ଚୂଡ଼ାନ୍ତ ଦସ୍ତାବିଜରେ ଭାରତର ନେତୃତ୍ୱାଧୀନ ବିକାଶମୂଳକ ଏବଂ ଜଳବାୟୁ ସମ୍ବନ୍ଧୀୟ ଏଜେଣ୍ଡାଗୁଡ଼ିକୁ ମଧ୍ୟ ଅନ୍ତର୍ଭୁକ୍ତ କରାଯାଇଛି। ଯେଉଁଥିରେ ଡିଜିଟାଲ୍ ପବ୍ଲିକ୍ ଇନଫ୍ରାଷ୍ଟ୍ରକ୍ଚର (ଡିପିଆଇ) ରିପୋଜିଟୋରୀ, ନୈତିକ କୃତ୍ରିମ ବୁଦ୍ଧିମତ୍ତା ପରିଚାଳନା, 'ସାଧାରଣ କିନ୍ତୁ ଭିନ୍ନ ଦାୟିତ୍ୱ' (ସିବିଡିଆର - ଆରସି) ନୀତିର ପାଳନ ଏବଂ ଭାରତର ବ୍ରିକ୍ସ ଅଧ୍ୟକ୍ଷତା ପାଇଁ ସର୍ବସମ୍ମତ ସମର୍ଥନ ଅନ୍ତର୍ଭୁକ୍ତ।
ସମାପନୀ ଭାଷଣ ଦେଇ ଲୋକସଭା ବାଚସ୍ପତି ଗୁରୁତ୍ୱାରୋପ କରିଥିଲେ ଯେ ବିଶ୍ୱସ୍ତରୀୟ ଆହ୍ଵାନଗୁଡ଼ିକର ସମାଧାନ କେବଳ ସଂଘର୍ଷ ନୁହେଁ ବରଂ ସ୍ଥିର ଆଲୋଚନା, ପାରସ୍ପରିକ ଶାନ୍ତି ଏବଂ ସହଯୋଗପୂର୍ଣ୍ଣ କାର୍ଯ୍ୟ ମାଧ୍ୟମରେ କରାଯାଇପାରିବ।
ବ୍ରିକ୍ସ ସଦସ୍ୟ ଓ ଅଂଶୀଦାର ରାଷ୍ଟ୍ରଗୁଡ଼ିକର ପ୍ରିଜାଇଡିଂ ଅଧିକାରୀ, ବିଶିଷ୍ଟ ପ୍ରତିନିଧି ଏବଂ ଅନ୍ତର୍ଜାତୀୟ ସାଂସଦମାନଙ୍କୁ ସମ୍ବୋଧିତ କରି, ଶ୍ରୀ ବିର୍ଲା ଗତ ଦୁଇ ଦିନ ଧରି ଚାଲିଥିବା ଗଭୀର ଆଲୋଚନା ଉପରେ ମତ ବ୍ୟକ୍ତ କରିଥିଲେ। ସେ ଉଲ୍ଲେଖ କରିଥିଲେ ଯେ ଅଂଶଗ୍ରହଣକାରୀ ରାଷ୍ଟ୍ରଗୁଡ଼ିକର ବିଭିନ୍ନ ପୃଷ୍ଠଭୂମି, ପରିସ୍ଥିତି ଏବଂ ଆହ୍ଵାନ ଥିଲେ ମଧ୍ୟ, ମାନବତାର କଲ୍ୟାଣ, ଶାନ୍ତି ଏବଂ ସମୃଦ୍ଧି ପ୍ରତି ସେମାନଙ୍କର ସହଭାଗୀ ପ୍ରତିବଦ୍ଧତା ବ୍ରିକ୍ସ ଗଠବନ୍ଧନର ସର୍ବୋତ୍ତମ ଶକ୍ତି ହୋଇ ରହିଛି।
ବର୍ତ୍ତମାନର ବିଶ୍ୱ ପରିସ୍ଥିତିରେ ଦେଖାଦେଇଥିବା ଅସ୍ଥିରତା, ଅର୍ଥନୈତିକ ଅନିଶ୍ଚିତତା ଏବଂ ଆଞ୍ଚଳିକ ସଂଘର୍ଷଗୁଡ଼ିକ ଉପରେ ଆଲୋକପାତ କରି ଶ୍ରୀ ବିର୍ଲା ଭାରତର ମୂଳ ଦର୍ଶନକୁ ପୁନର୍ବାର ଦୋହରାଇଥିଲେ। ସେ କହିଥିଲେ ଯେ, ସ୍ଥାୟୀ ସମାଧାନ ଯୁଦ୍ଧରୁ ନୁହେଁ ବରଂ ଆଲୋଚନାରୁ, ସଂଘର୍ଷରୁ ନୁହେଁ ବରଂ ଶାନ୍ତିରୁ ଏବଂ ପ୍ରତିଯୋଗିତାରୁ ନୁହେଁ ବରଂ ସହଯୋଗରୁ ହିଁ ମିଳିଥାଏ। ସେ ଜାତୀୟ ସାର୍ବଭୌମତ୍ୱ ପ୍ରତି ସମ୍ପୂର୍ଣ୍ଣ ସମ୍ମାନ, ଅନ୍ତର୍ଜାତୀୟ ବିବାଦର ଶାନ୍ତିପୂର୍ଣ୍ଣ ସମାଧାନ ଏବଂ ସମସ୍ତଙ୍କ ପାଇଁ ସମାନ ବିକାଶ ସୁଯୋଗ ଉପରେ ନିର୍ମିତ ଏକ ବିଶ୍ୱସ୍ତରୀୟ ଢାଞ୍ଚା ପାଇଁ ଆହ୍ୱାନ କରିଥିଲେ। "ବିଶ୍ୱ ଶାନ୍ତିର ପ୍ରକୃତ ଅର୍ଥ ହେଉଛି ସୁରକ୍ଷା, ସମ୍ମାନ, ନ୍ୟାୟ ଏବଂ ସମସ୍ତଙ୍କ ପାଇଁ - ବିଶେଷ କରି ଯୁବ ପିଢ଼ି ପାଇଁ - ଏକ ଉତ୍ତମ ଭବିଷ୍ୟତର ସୁନିଶ୍ଚିତତା," ବୋଲି ସେ କହିଥିଲେ। ସେ ଆହୁରି ମଧ୍ୟ ଉଲ୍ଲେଖ କରିଥିଲେ ଯେ, ଆଗାମୀ ପିଢ଼ିମାନେ ବର୍ତ୍ତମାନର ନେତାମାନଙ୍କୁ ସେମାନେ ଛାଡ଼ି ଯାଉଥିବା ବିଶ୍ୱର ସୁରକ୍ଷା ଏବଂ ସମୃଦ୍ଧତା ଆଧାରରେ ବିଚାର କରିବେ।
ଗଣତାନ୍ତ୍ରିକ ଅନୁଷ୍ଠାନଗୁଡ଼ିକର ବିକଶିତ ଦାୟିତ୍ୱକୁ ବୁଝାଇ ଲୋକସଭା ବାଚସ୍ପତି ଗୁରୁତ୍ୱାରୋପ କରିଥିଲେ ଯେ ସଂସଦଗୁଡ଼ିକ କେବଳ ଆଇନ ପ୍ରଣୟନକାରୀ ସଂସ୍ଥା ନୁହେଁ, ବରଂ ଆଲୋଚନା, ସହମତି, ଉତ୍ତରଦାୟିତ୍ୱ ଏବଂ ଜନସାଧାରଣଙ୍କ ବିଶ୍ୱାସର ଗୁରୁତ୍ୱପୂର୍ଣ୍ଣ କେନ୍ଦ୍ର। ସେ ବିଶ୍ୱ ବୈଧାନିକ କେନ୍ଦ୍ରଗୁଡ଼ିକୁ ଅଧିକ ପ୍ରଭାବଶାଳୀ, ସ୍ୱଚ୍ଛ ଏବଂ ନାଗରିକ-କେନ୍ଦ୍ରିକ ହୋଇ ପରିବର୍ତ୍ତନଶୀଳ ସମୟ ସହିତ ଖାପ ଖୁଆଇବାକୁ ଅନୁରୋଧ କରିଥିଲେ। ଆଧୁନିକ ଉପକରଣଗୁଡ଼ିକର ଅନ୍ତର୍ଭୁକ୍ତିକରଣ ସମ୍ପର୍କରେ ଶ୍ରୀ ବିର୍ଲା କହିଥିଲେ ଯେ, କୃତ୍ରିମ ବୁଦ୍ଧିମତ୍ତା ଏବଂ ଡିଜିଟାଲ୍ ପ୍ରଯୁକ୍ତିବିଦ୍ୟା ଗ୍ରହଣ ସଂସଦୀୟ କାର୍ଯ୍ୟକାରିତାକୁ ଉଲ୍ଲେଖନୀୟ ଭାବରେ ବୃଦ୍ଧି କରିପାରିବ ଏବଂ ନାଗରିକଙ୍କ ଅଂଶଗ୍ରହଣକୁ ବୃଦ୍ଧି କରିପାରିବ। ଯଦି ସେମାନଙ୍କର ବିକାଶ ମାନବୀୟ ମୂଲ୍ୟବୋଧ, ନୀତିଶାସ୍ତ୍ର, ସ୍ୱଚ୍ଛତା ଏବଂ ଦାୟିତ୍ୱ ସହିତ ସମ୍ପୂର୍ଣ୍ଣ ଭାବରେ ସମନ୍ୱିତ ରହିଥାଏ ତେବେ ଏହା ଉଲ୍ଲେଖନୀୟ ଫଳାଫଳ ଦେବ।
ଶ୍ରୀ ବିର୍ଲା ଗୁରୁତ୍ୱାରୋପ କରିଥିଲେ ଯେ ବ୍ରିକ୍ସର ସଫଳତା ଏହାର ବ୍ୟକ୍ତିଗତ ସଦସ୍ୟ ରାଷ୍ଟ୍ରଗୁଡ଼ିକର ପ୍ରଗତିଠାରୁ ବହୁ ଦୂରକୁ ପ୍ରସାରିତ ହେବା ଉଚିତ୍। ଯାହା ଦ୍ୱାରା ବ୍ୟାପକ ଅନ୍ତର୍ଜାତୀୟ ସମୁଦାୟକୁ ଲାଭ ମିଳିବ, ବିଶ୍ୱ ନିଷ୍ପତ୍ତି ଗ୍ରହଣ ପ୍ରକ୍ରିୟାରେ ଦକ୍ଷିଣ ବିଶ୍ୱର ଆକାଂକ୍ଷାକୁ ଉପଯୁକ୍ତ ପ୍ରତିନିଧିତ୍ୱ ପ୍ରଦାନ କରାଯିବ।
୧୨ତମ ବ୍ରିକ୍ସ ସଂସଦୀୟ ଫୋରମ୍ ସଫଳତାର ସହ ଉଦ୍ଯାପିତ ହେବା ଅବସରରେ ଶ୍ରୀ ଓମ୍ ବିର୍ଲା ୨୦୨୭ ବର୍ଷ ପାଇଁ ବ୍ରିକ୍ସର ଅଧ୍ୟକ୍ଷତା ଗ୍ରହଣ କରୁଥିବା ଚୀନ୍କୁ ହାର୍ଦ୍ଦିକ ଅଭିନନ୍ଦନ ଓ ଶୁଭେଚ୍ଛା ଜଣାଇଛନ୍ତି। ଚୀନ୍ର ନେତୃତ୍ୱରେ ସଦସ୍ୟ ରାଷ୍ଟ୍ରଗୁଡ଼ିକ ମଧ୍ୟରେ ସହଯୋଗ ଆହୁରି ସୁଦୃଢ଼ ହେବ ବୋଲି ସେ ଦୃଢ଼ ବିଶ୍ୱାସ ପ୍ରକାଶ କରିଛନ୍ତି। ବିଶ୍ୱର ସମସ୍ତ ସଂସଦକୁ ଶାନ୍ତି, ସହଯୋଗ ଓ ସମୃଦ୍ଧିର ସମାନ ଲକ୍ଷ୍ୟ ପାଇଁ ଏକ ପ୍ରଭାବଶାଳୀ ସ୍ୱର ଭାବେ କାର୍ଯ୍ୟ କରିବାକୁ ଆହ୍ୱାନ ସହ ଫୋରମ୍ର ପରିସମାପ୍ତି ଘଟିଛି।
***
SSP