পোষ্ট কৰা হৈছে:
22 OCT 2026 4:22PM by PIB Guwahati
ভাৰতীয় ডাক বিভাগে প্ৰথমবাৰৰ বাবে একেৰাহে দুটা ত্ৰৈমাসিকত ৪,০০০ কোটি টকাৰ ৰাজহৰ সীমা অতিক্ৰম কৰি এক ঐতিহাসিক কৃতিত্ব অৰ্জন কৰিছে। ২০২৬-২৭ বিত্তীয় বৰ্ষৰ প্ৰথম ছমাহত, অৰ্থাৎ ২০২৬ চনৰ এপ্ৰিলৰ পৰা ছেপ্টেম্বৰলৈকে, বিভাগটোৱে ৮,২১২.৭ কোটি টকাৰ ৰাজহ সংগ্ৰহ কৰে। ইয়াৰ ফলত পূৰ্বৰ বিত্তীয় বৰ্ষৰ একে সময়ছোৱাত সংগ্ৰহ কৰা ৬,৬৩৬ কোটি টকাৰ তুলনাত বছৰি ৰাজহৰ ২৪ শতাংশ বৃদ্ধি পঞ্জীয়ন কৰা হৈছে।
ফটোত—
নতুন দিল্লীত অনুষ্ঠিত দ্বিতীয় ত্ৰৈমাসিকৰ পৰ্যালোচনা বৈঠকত (বাওঁফালৰ পৰা সোঁফাললৈ) ডিজিপিএছ শ্ৰীমতী মনীষা সিনহা; কেন্দ্ৰীয় যোগাযোগ আৰু গ্ৰামোন্নয়ন বিভাগৰ ৰাজ্যিক মন্ত্ৰী ড০ চন্দ্ৰ শেখৰ পেম্মাছানি; কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী শ্ৰী জ্যোতিৰাদিত্য এম সিন্ধিয়া; আৰু ডাক বিভাগৰ সচিব শ্ৰী সুব্ৰত দাস।
কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী শ্ৰী জ্যোতিৰাদিত্য এম সিন্ধিয়াই আজি নতুন দিল্লীত অনুষ্ঠিত দ্বিতীয় ত্ৰৈমাসিকৰ (Q2) পৰ্যালোচনা বৈঠকত সভাপতিত্ব কৰে। বৈঠকত কেন্দ্ৰীয় যোগাযোগ আৰু গ্ৰামোন্নয়ন বিভাগৰ ৰাজ্যিক মন্ত্ৰী ড০ চন্দ্ৰ শেখৰ পেম্মাছানি, ডাক বিভাগৰ সচিব শ্ৰী সুব্ৰত দাস, ডাক সেৱা ব’ৰ্ডৰ সদস্যসকল, সকলো ডাক চক্ৰৰ মুখ্য ডাক অধীক্ষক আৰু সঞ্চালকালয়ৰ জ্যেষ্ঠ বিষয়াসকলে অংশগ্ৰহণ কৰে। ২০২৬ চনৰ জুলাইৰ পৰা ছেপ্টেম্বৰলৈকে দ্বিতীয় ত্ৰৈমাসিকত বিভাগটোৱে ৪,২০১.৫ কোটি টকাৰ ৰাজহ সংগ্ৰহ কৰে। ইয়াৰ ফলত পূৰ্বৰ বছৰৰ একে সময়ছোৱাৰ তুলনাত ২৫ শতাংশ বৃদ্ধি পঞ্জীয়ন হোৱাৰ লগতে প্ৰথম ত্ৰৈমাসিকৰ তুলনাত ৰাজহ ৫ শতাংশ বৃদ্ধি পায়।
ব্যৱসায়ৰ সকলো ক্ষেত্ৰতে বৃদ্ধি
বিভাগটোৰ ব্যৱসায়ৰ ছটা ক্ষেত্ৰতে বছৰি ৰাজহৰ বৃদ্ধি পঞ্জীয়ন কৰা হৈছে। ডাক জীৱন বীমা (PLI) আৰু গ্ৰামীণ ডাক জীৱন বীমা (RPLI)ৰ ৰাজহ ৪৪ শতাংশ, চিঠি-পত্ৰ আৰু ডাক সামগ্ৰীৰ পৰা ৰাজহ ৩৬ শতাংশ, ডাকঘৰ সঞ্চয় বেংক (POSB)ৰ ৰাজহ ১৮ শতাংশ, আন্তঃৰাষ্ট্ৰীয় সম্পৰ্ক আৰু বিশ্বজনীন ব্যৱসায়ৰ ৰাজহ ৩৮ শতাংশ আৰু পাৰ্চেল সেৱাৰ ৰাজহ ৭১ শতাংশ বৃদ্ধি পাইছে। দ্বিতীয় ত্ৰৈমাসিকত পাৰ্চেল সেৱাৰ পৰা ৩১৮.৯ কোটি টকাৰ ৰাজহ সংগ্ৰহ কৰা হয়। কেৰালা, উত্তৰ-পূৰ্বাঞ্চল, উত্তৰ প্ৰদেশ আৰু বিহাৰে নিজৰ ত্ৰৈমাসিক লক্ষ্য অতিক্ৰম কৰে। প্ৰথম ত্ৰৈমাসিকৰ তুলনাত চিঠি-পত্ৰ আৰু ডাক সামগ্ৰীৰ ৰাজহ ২৬ শতাংশ বৃদ্ধি পায়। ১২টা ডাক চক্ৰই দ্বিতীয় ত্ৰৈমাসিকৰ ৰাজহৰ লক্ষ্যত উপনীত হোৱাৰ লগতে লক্ষ্য অতিক্ৰম কৰিবলৈও সক্ষম হয়। ডাকঘৰ সঞ্চয় বেংকে ১,৯৮৭ কোটি টকাৰ ৰাজহ আগবঢ়ায়। আনহাতে, ডাক জীৱন বীমা আৰু গ্ৰামীণ ডাক জীৱন বীমাই নিজৰ ত্ৰৈমাসিক লক্ষ্যৰ ৯২ শতাংশ অৰ্জন কৰে।
ডাক চক্ৰসমূহৰ প্ৰদৰ্শন আৰু কাৰ্যদক্ষতা
সাতটা ডাক চক্ৰই দ্বিতীয় ত্ৰৈমাসিকৰ নিৰ্ধাৰিত আনুপাতিক লক্ষ্যৰ ৯০ শতাংশ বা তাতকৈ অধিক অৰ্জন কৰে। বিহাৰে ৯৭.১৫ শতাংশ লক্ষ্য পূৰণ কৰি শীৰ্ষস্থান লাভ কৰে। ইয়াৰ পাছতে পশ্চিম বংগই ৯৭.০৭ শতাংশ আৰু উত্তৰ-পূৰ্বাঞ্চলে ৯৪.৭৯ শতাংশ লক্ষ্য পূৰণ কৰে। প্ৰথম ছমাহৰ হিচাপত পশ্চিম বংগই ৯৫.৭২ শতাংশ লক্ষ্য পূৰণ কৰি প্ৰথম স্থান লাভ কৰে। বিহাৰে ৯৫.১২ শতাংশ আৰু অন্ধ্ৰ প্ৰদেশে ৯৪.৬৩ শতাংশ লক্ষ্য পূৰণ কৰে। ২৩টা ডাক চক্ৰৰ ভিতৰত ১৮টা ডাক চক্ৰই প্ৰথম ত্ৰৈমাসিকৰ তুলনাত লক্ষ্য পূৰণৰ হাৰ উন্নত কৰিবলৈ সক্ষম হয়। পেঞ্চনৰ ব্যয়সহ মুঠ ব্যয়ৰ অনুপাত ৪২ শতাংশ আৰু পেঞ্চনৰ ব্যয় বাদ দিলে ৬২ শতাংশ হয়। ২২টা ডাক চক্ৰই প্ৰথম ত্ৰৈমাসিকৰ তুলনাত এই ব্যয়ৰ অনুপাত উন্নত কৰে।
উৎকৃষ্ট প্ৰদৰ্শন কৰা ডাক চক্ৰসমূহক স্বীকৃতি প্ৰদান
প্ৰথম ত্ৰৈমাসিকত, অৰ্থাৎ ২০২৬ চনৰ এপ্ৰিলৰ পৰা জুনলৈকে, নিজৰ নিৰ্ধাৰিত আনুপাতিক ব্যৱসায়িক লক্ষ্য পূৰণৰ বাবে অন্ধ্ৰ প্ৰদেশ ডাক চক্ৰক বঁটা প্ৰদান কৰা হয়। একেদৰে দ্বিতীয় ত্ৰৈমাসিকত, অৰ্থাৎ ২০২৬ চনৰ জুলাইৰ পৰা ছেপ্টেম্বৰলৈকে, লক্ষ্য পূৰণৰ বাবে বিহাৰ ডাক চক্ৰক বঁটা প্ৰদান কৰা হয়। বিহাৰ ডাক চক্ৰই ৯৭.১৫ শতাংশ লক্ষ্য পূৰণ কৰি শীৰ্ষস্থান লাভ কৰে। ইয়াৰ পাছতে পশ্চিম বংগ ডাক চক্ৰই ৯৭.০৭ শতাংশ আৰু উত্তৰ-পূৰ্বাঞ্চল ডাক চক্ৰই ৯৪.৭৯ শতাংশ লক্ষ্য পূৰণ কৰে। এই প্ৰদৰ্শনে সুপৰিকল্পিত ব্যৱসায়িক প্ৰচেষ্টা আৰু বিভাগটোৰ ৰাজহ বৃদ্ধিৰ লক্ষ্যত উপনীত হোৱাৰ দিশত হোৱা অগ্ৰগতি প্ৰতিফলিত কৰে। এই স্বীকৃতিয়ে ডাক চক্ৰসমূহত নিৰন্তৰ উন্নত প্ৰদৰ্শন, ফলপ্ৰসূ ব্যৱসায়িক পৰিকল্পনা আৰু ৰাজহ বৃদ্ধিৰ বাবে অব্যাহত প্ৰচেষ্টাৰ গুৰুত্বও দাঙি ধৰে।
বহনক্ষম বিকাশৰ ওপৰত মন্ত্ৰীসকলৰ গুৰুত্ব আৰোপ
কেন্দ্ৰীয় যোগাযোগ আৰু উত্তৰ-পূৰ্বাঞ্চল উন্নয়ন মন্ত্ৰী শ্ৰী জ্যোতিৰাদিত্য এম সিন্ধিয়াই এই সাফল্যৰ বাবে ডাক বিভাগৰ বিষয়া আৰু কৰ্মচাৰীসকলক অভিনন্দন জনায়। তেওঁ গ্ৰাহক বৃদ্ধি, উন্নত সেৱা প্ৰদান আৰু গ্ৰাহক ধৰি ৰখাৰ জৰিয়তে বিকাশৰ ধাৰা অব্যাহত ৰখাৰ প্ৰয়োজনীয়তাৰ ওপৰত গুৰুত্ব আৰোপ কৰে।
তেওঁ ব্যৱসায়ৰ বৈচিত্ৰ্যকৰণ, শক্তিশালী নেতৃত্ব, উদ্ভাৱন আৰু গ্ৰাহককেন্দ্ৰিক দৃষ্টিভংগী অধিক শক্তিশালী কৰাৰ আহ্বান জনায়। প্ৰযোজ্য নীতি আৰু অনুমোদন সাপেক্ষে বৃহৎ পৰিমাণৰ ডাক সামগ্ৰী প্ৰেৰণ কৰা গ্ৰাহকসকলৰ বাবে নমনীয় মূল্য নিৰ্ধাৰণৰ ব্যৱস্থা গ্ৰহণৰ কথাও তেওঁ উল্লেখ কৰে। ইয়াৰ লগতে গ্ৰাহকৰ অভিজ্ঞতা উন্নত কৰা, কাৰ্যকৰী দক্ষতা বৃদ্ধি কৰা আৰু বিভাগটোৰ প্ৰতিযোগিতামূলক সক্ষমতা শক্তিশালী কৰাৰ বাবে ভাৰতীয় ডাক বিভাগৰ সেৱাসমূহৰ ডিজিটেলকৰণ ত্বৰান্বিত কৰাৰ ওপৰতো তেওঁ গুৰুত্ব আৰোপ কৰে।
কেন্দ্ৰীয় যোগাযোগ আৰু গ্ৰামোন্নয়ন বিভাগৰ ৰাজ্যিক মন্ত্ৰী ড০ চন্দ্ৰ শেখৰ পেম্মাছানিয়ে ভাৰতীয় ডাক বিভাগৰ বিপুল বিকাশৰ সম্ভাৱনাৰ কথা উল্লেখ কৰি কৰ্মচাৰীসকলৰ সক্ষমতা বৃদ্ধি, দায়বদ্ধতা আৰু উন্নত সেৱা প্ৰদানৰ গুৰুত্ব দাঙি ধৰে। পাৰ্চেল বিতৰণত হোৱা পলমৰ সমস্যা সমাধান আৰু গ্ৰাহকৰ সন্তুষ্টি বৃদ্ধিৰ বাবে মানক কাৰ্যপদ্ধতি প্ৰৱৰ্তন তথা বাস্তৱ সময়ত নিৰীক্ষণৰ ব্যৱস্থা গ্ৰহণ কৰিবলৈ তেওঁ আহ্বান জনায়। মন্ত্ৰীসকলে উৎসৱৰ বতৰ আৰু পাৰ্চেলৰ সৰ্বাধিক চাহিদাৰ সময়ছোৱাত ৰাজহ বৃদ্ধিৰ ধাৰা অব্যাহত ৰাখিবলৈ ডাক চক্ৰসমূহক নিৰ্দেশ দিয়ে। লগতে পাৰ্চেল সেৱা আৰু আন্তঃৰাষ্ট্ৰীয় সম্পৰ্ক তথা বিশ্বজনীন ব্যৱসায় শক্তিশালী কৰা, ৰাজ্য চৰকাৰসমূহৰ সহযোগত নাগৰিককেন্দ্ৰিক সেৱাসমূহৰ অন্তৰ্ভুক্তি ত্বৰান্বিত কৰা আৰু ব্যয়ৰ ক্ষেত্ৰত শৃংখলা বজাই ৰখাৰ ওপৰতো গুৰুত্ব আৰোপ কৰে। পৰ্যালোচনা বৈঠকত ক্লাষ্টাৰভিত্তিক পদ্ধতি গ্ৰহণৰ বিষয়টোও গুৰুত্বসহকাৰে আলোচনা কৰা হয়। এই পদ্ধতিৰ অধীনত তলত উল্লেখ কৰা ক্ষেত্ৰসমূহৰ ওপৰত বিশেষ গুৰুত্ব দিয়া হ’ব—কৃষিজাত সামগ্ৰীৰ পৰিবহণ আৰু যোগান ব্যৱস্থা তথা আন্তঃৰাষ্ট্ৰীয় ব্যৱসায়। ক্ষুদ্ৰ, লঘু আৰু মজলীয়া উদ্যোগ (MSMEs), এক জিলা এক সামগ্ৰী (ODOP) আৰু পৰ্যটন। নাগৰিককেন্দ্ৰিক সেৱা, বিত্তীয় অন্তৰ্ভুক্তি, বীমা আৰু গ্ৰাম্য পৰিবহণ ব্যৱস্থা। জনসেৱাৰ আদৰ্শৰে পৰিচালিত হৈ ভাৰতীয় ডাক বিভাগে নিজৰ বিস্তৃত নেটৱৰ্ক আৰু কৰ্মচাৰীসকলৰ সক্ষমতাক ব্যৱহাৰ কৰি নতুন ব্যৱসায়িক সুযোগ সৃষ্টি, কাৰ্যকৰী দক্ষতা বৃদ্ধি আৰু বিত্তীয়ভাৱে বহনক্ষম প্ৰতিষ্ঠান হিচাপে আগবাঢ়ি যোৱাৰ লক্ষ্য নিৰ্ধাৰণ কৰিছে।
***
AMK/ARJ/PB