ৰাজহ চোৰাংচোৱা সঞ্চালকালয়ে (ডি আৰ আই) সমন্বিত আৰু চোৰাংচোৱা তথ্যৰ ভিত্তিত ব্যৱস্থা গ্ৰহণেৰে নিচাযুক্ত দ্ৰব্যৰ চোৰাং সৰবৰাহৰ বিৰুদ্ধে অভিযান তীব্ৰতৰ কৰি তুলিছে। এনেদৰে চলোৱা তিনিটা সুকীয়া অভিযানত তিনিজন লোকক গ্ৰেপ্তাৰ কৰাৰ লগতে দুটা অভিযানৰ জৰিয়তে প্ৰায় ৭.১ কিলোগ্ৰাম এম্ফিটামিন আৰু আন এটা অভিযানৰ জৰিয়তে প্ৰায় ৩.১ কিলোগ্ৰাম কোকেইন জব্দ কৰা হৈছে। বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰত, নাগপুৰৰ সমীপত আৰু নতুন দিল্লীৰ ইন্দিৰা গান্ধী আন্তঃৰাষ্ট্ৰীয় বিমানবন্দৰত এই নিচাযুক্ত দ্ৰব্যখিনি জব্দ কৰা হয়।

নিৰ্দিষ্ট চোৰাংচোৱা তথ্যৰ ভিত্তিত ডি আৰ আইৰ বিষয়াসকলে ২০২৬ চনৰ ১৪ অক্টোবৰত দিল্লীৰ পৰা বেংগালুৰুৰ কেম্পেগৌড়া আন্তঃৰাষ্ট্ৰীয় বিমানবন্দৰত উপস্থিত হোৱা এজন যাত্ৰীক আটক কৰে। যাত্ৰীগৰাকীৰ বেগ পৰীক্ষা কৰাত ৫.১৬৬ কিলোগ্ৰাম এম্ফিটামিন উদ্ধাৰ হয়। উদ্ধাৰ কৰা দ্ৰব্যখিনি নিচাযুক্ত দ্ৰব্য আৰু মনঃপ্ৰভাৱী পদাৰ্থ (এন ডি পি এছ) আইন, ১৯৮৫ৰ বিধান অনুসৰি জব্দ কৰা হয় আৰু যাত্ৰীগৰাকীকো গ্ৰেপ্তাৰ কৰা হয়।

ইয়াৰ দুদিন পিছত আন এক চোৰাংচোৱাভিত্তিক অভিযানত ডিআৰআইৰ বিষয়াসকলে নাগপুৰৰ উপকণ্ঠ অঞ্চলৰ ছাওনেৰৰ খাপা ফাটাৰ সমীপত দিল্লীৰ পৰা হাইদৰাবাদলৈ বাছেৰে যাত্ৰা কৰা এজন ভাৰতীয় নাগৰিকক আটক কৰে। তেওঁৰ পিঠিত কঢ়িওৱা বেগটো পৰীক্ষা কৰাত মহিলাই পৰিধান কৰা এজোৰ নতুন বস্ত্ৰৰ ভিতৰত লুকুৱাই ৰখা বগা স্ফটিকসদৃশ পদাৰ্থ উদ্ধাৰ হয়।

বেগটো অস্বাভাৱিকভাৱে গধুৰ যেন লগাত বিষয়াসকলে ইয়াৰ ভিতৰৰ আৱৰণ পৰীক্ষা কৰে আৰু তাত একে ধৰণৰ পদাৰ্থ থকা আন এটা লুকুৱাই ৰখা পেকেট উদ্ধাৰ কৰে। ঘটনাস্থলীতে কৰা পৰীক্ষাত পদাৰ্থখিনি এম্ফিটামিন বুলি প্ৰমাণিত হয়। এনেদৰে মুঠ ১.৯৭ কিলোগ্ৰাম এম্ফিটামিন উদ্ধাৰ কৰি এন ডি পি এছ আইন, ১৯৮৫ৰ বিধান অনুসৰি জব্দ কৰা হয়। যাত্ৰীগৰাকীকো গ্ৰেপ্তাৰ কৰা হয়।

আন এটা পৃথক অভিযানত, ১৫ আৰু ১৬ অক্টোবৰ, ২০২৬ত নিৰ্দিষ্ট চোৰাংচোৱা তথ্যৰ ভিত্তিত ডি আৰ আইৰ বিষয়াসকলে ঘানাৰ পৰা নতুন দিল্লীৰ আই জি আই বিমানবন্দৰৰ টাৰ্মিনেল-৩ত উপস্থিত হোৱা এজন ভাৰতীয় যাত্ৰীক আটক কৰে। তেওঁৰ বেগ পদ্ধতিগতভাৱে পৰীক্ষা কৰাত বগা গুড়ি থকা ছটা স্বচ্ছ পেকেট উদ্ধাৰ হয়। পেকেটকেইটাৰ মুঠ ওজন আছিল ৩.১৩৪ কিলোগ্ৰাম। ঘটনাস্থলীতে কৰা পৰীক্ষাত পদাৰ্থখিনি কোকেইন বুলি নিশ্চিত কৰা হয়। দ্ৰব্যখিনি এন ডি পি এছ আইনৰ বিধান অনুসৰি জব্দ কৰাৰ লগতে যাত্ৰীগৰাকীক গ্ৰেপ্তাৰ কৰা হয়।

এই অভিযানসমূহে নিচাযুক্ত দ্ৰব্যৰ সৰবৰাহৰ শৃংখল ভংগ কৰা, সৰবৰাহৰ বাবে ব্যৱহাৰ কৰা অভিনৱ গোপন কৌশলসমূহ ধৰা পেলোৱা আৰু দেশৰ বিমান তথা স্থলপথেৰে বিপজ্জনক নিচাযুক্ত দ্ৰব্য আৰু মনঃপ্ৰভাৱী পদাৰ্থৰ সৰবৰাহ ৰোধ কৰাৰ ক্ষেত্ৰত ডি আৰ আইৰ ধাৰাবাহিক প্ৰচেষ্টাৰ প্ৰতিফলন ঘটাইছে।

KT/KMN/UD