କେନ୍ଦ୍ର ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରଣାଳୟ (ଏମ୍‌ଏସ୍‌ଡିଇ) ପକ୍ଷରୁ ଇଣ୍ଡିଆସ୍କିଲ୍ସ ପ୍ରତିଯୋଗିତା ୨୦୨୬-୨୭ ପାଇଁ ପଞ୍ଜୀକରଣ ଅବଧିକୁ ଅକ୍ଟୋବର ୧୯ ପର୍ଯ୍ୟନ୍ତ ବୃଦ୍ଧି କରାଯାଇଛି। ବିଭିନ୍ନ ଅନୁଷ୍ଠାନ ଓ ଆଗ୍ରହୀ ପ୍ରତିଯୋଗୀଙ୍କ ଅନୁରୋଧକୁ ଦୃଷ୍ଟିରେ ରଖି ଏହି ପଦକ୍ଷେପ ନିଆଯାଇଛି। ୱାର୍ଲ୍ଡସ୍କିଲ୍ସ ପ୍ରତିଯୋଗିତା ସାଂଘାଇ ୨୦୨୬ରେ ଭାରତୀୟ ଦଳର ଉଲ୍ଲେଖନୀୟ ପ୍ରଦର୍ଶନ ପରେ ଏହି ଦକ୍ଷତାଭିତ୍ତିକ ପ୍ରତିଯୋଗିତା ପ୍ରତି ଆଗ୍ରହ ବଢ଼ିଛି। ଏହି ପ୍ରତିଯୋଗିତାରେ ଭାରତୀୟ ଦଳ ବିଶ୍ୱସ୍ତରରେ ଦଶମ ସ୍ଥାନ ହାସଲ କରିବା ସହ ୬ଟି ରୌପ୍ୟ ପଦକ ଏବଂ ୨୦ଟି ଉତ୍କର୍ଷତା ପଦକ ଜିତିଥିଲା।

ଏହି ସଫଳତା ପରେ ଅକ୍ଟୋବର ୯ ତାରିଖରେ ପ୍ରଧାନମନ୍ତ୍ରୀ ଶ୍ରୀ ନରେନ୍ଦ୍ର ମୋଦୀ ନୂଆଦିଲ୍ଲୀର ୭, ଲୋକ କଲ୍ୟାଣ ମାର୍ଗସ୍ଥିତ ନିଜ ବାସଭବନରେ ୱାର୍ଲ୍ଡସ୍କିଲ୍ସ ସାଂଘାଇ ୨୦୨୬ରେ ଭାଗ ନେଇଥିବା ଭାରତୀୟ ପ୍ରତିଯୋଗୀମାନଙ୍କୁ ଭେଟିଥିଲେ। ଏହି ଆଲୋଚନାରେ ଦେଶର ଦକ୍ଷ ଯୁବପିଢ଼ିଙ୍କ ସଫଳତାକୁ ପ୍ରଶଂସା କରାଯିବା ସହ ଜାତୀୟ ବିକାଶରେ ବୃତ୍ତିଗତ ଦକ୍ଷତାର ଗୁରୁତ୍ୱ ଉପରେ ଆଲୋକପାତ କରାଯାଇଥିଲା। ପ୍ରଧାନମନ୍ତ୍ରୀଙ୍କ ସହ ଏହି ସାକ୍ଷାତ ପରେ ଇଣ୍ଡିଆସ୍କିଲ୍ସ ୨୦୨୬-୨୭ ପାଇଁ ପଞ୍ଜୀକରଣ ଅବଧି ବଢ଼ାଇବାକୁ ବିଭିନ୍ନ ଅନୁଷ୍ଠାନ ଓ ଆଗ୍ରହୀ ପ୍ରତିଯୋଗୀଙ୍କ ପକ୍ଷରୁ ମନ୍ତ୍ରଣାଳୟ ନିକଟରେ ଅନେକ ଅନୁରୋଧ ପହଞ୍ଚିଥିଲା। ଏହାକୁ ବିଚାରକୁ ନେଇ ପଞ୍ଜୀକରଣର ଶେଷ ତାରିଖ ଅକ୍ଟୋବର ୧୯ ପର୍ଯ୍ୟନ୍ତ ବଢ଼ାଯାଇଛି। ଏହାଦ୍ୱାରା ଅଧିକ ସଂଖ୍ୟକ ଯୁବକଯୁବତୀ ନିଜ ଦକ୍ଷତା ପ୍ରଦର୍ଶନ, ଜାତୀୟ ସ୍ତରରେ ପ୍ରତିଯୋଗିତାରେ ଅଂଶଗ୍ରହଣ ଏବଂ ଅନ୍ତର୍ଜାତୀୟ ସ୍ତରରେ ଦେଶର ପ୍ରତିନିଧିତ୍ୱ କରିବାର ସୁଯୋଗ ପାଇପାରିବେ।

ଇଣ୍ଡିଆସ୍କିଲ୍ସ ୨୦୨୬-୨୭ ପ୍ରତିଯୋଗିତା ପାଇଁ ଏପର୍ଯ୍ୟନ୍ତ ପ୍ରାୟ ୪ ଲକ୍ଷ ପଞ୍ଜୀକରଣ ହୋଇଛି। ଏହା ନିଜ ଦକ୍ଷତା ପ୍ରଦର୍ଶନ କରିବା ସହ ଜାତୀୟ ଓ ଅନ୍ତର୍ଜାତୀୟ ମାନଦଣ୍ଡ ଅନୁଯାୟୀ ପ୍ରତିଯୋଗିତା କରିବା ପାଇଁ ଯୁବପିଢ଼ିଙ୍କ ଆଗ୍ରହକୁ ପ୍ରତିଫଳିତ କରୁଛି। ପୂର୍ବରୁ ପଞ୍ଜୀକରଣ କରିପାରି ନଥିବା ଯୋଗ୍ୟ ଆଶାୟୀମାନେ ଏବେ ସ୍କିଲ୍ ଇଣ୍ଡିଆ ଡିଜିଟାଲ୍ ହବ୍‌ (ଏସ୍‌ଆଇଡିଏଚ୍‌) ମାଧ୍ୟମରେ ଅକ୍ଟୋବର ୧୯, ୨୦୨୬ ସୁଦ୍ଧା ନିଜର ଆବେଦନ ପ୍ରକ୍ରିୟା ପୂରଣ କରିପାରିବେ। କେନ୍ଦ୍ର ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରଣାଳୟ (ଏମ୍‌ଏସ୍‌ଡିଇ) ତତ୍ତ୍ୱାବଧାନରେ ଏବଂ ଜାତୀୟ ଦକ୍ଷତା ବିକାଶ ନିଗମ (ଏନ୍‌ଏସ୍‌ଡିସି) ଦ୍ବାରା ଇଣ୍ଡିଆସ୍କିଲ୍ସ ୨୦୨୬-୨୭ ଆୟୋଜିତ ହେଉଛି। ଏଥିରେ ଉତ୍ପାଦନ, ଇଞ୍ଜିନିୟରିଂ, ନିର୍ମାଣ, ଡିଜିଟାଲ୍ ପ୍ରଯୁକ୍ତିବିଦ୍ୟା, ସୃଜନଶୀଳ ଶିଳ୍ପ ଓ ସେବା କ୍ଷେତ୍ର ସହ ଜଡ଼ିତ ୬୩ଟି ଦକ୍ଷତା ବିଭାଗ ସାମିଲ ହୋଇଛି।

ଏହି ପ୍ରତିଯୋଗିତା ଜିଲ୍ଲା ଓ ଜୋନ୍‌ସ୍ତରରୁ ଆରମ୍ଭ ହୋଇ ରାଜ୍ୟ, ଆଞ୍ଚଳିକ ଓ ଜାତୀୟ ସ୍ତର ଦେଇ ଆଗକୁ ବଢ଼ିବାର ସୁଯୋଗ ପ୍ରଦାନ କରୁଛି। ଏହାଦ୍ୱାରା ପ୍ରତିଭାସମ୍ପନ୍ନ ଯୁବକଯୁବତୀମାନେ ନିଜର ଦକ୍ଷତା ପ୍ରଦର୍ଶନ କରିବା ସହ ବିଶେଷଜ୍ଞଙ୍କ ମାର୍ଗଦର୍ଶନ ପାଇପାରିବେ। ଏଥିସହ ଅନ୍ତର୍ଜାତୀୟ ଦକ୍ଷତା ପ୍ରତିଯୋଗିତାରେ ଭାରତର ପ୍ରତିନିଧିତ୍ୱ କରିବା ଦିଗରେ ଆଗକୁ ବଢ଼ିବାର ସୁଯୋଗ ମଧ୍ୟ ପାଇପାରିବେ।

ପଞ୍ଜୀକରଣ ଅବଧି ବୃଦ୍ଧି ସମ୍ପର୍କରେ ଅଧିକ ଯୁବକଯୁବତୀଙ୍କୁ ଅବଗତ କରାଇବା ଏବଂ ପଞ୍ଜୀକରଣରେ ସହଯୋଗ କରିବା ପାଇଁ କେନ୍ଦ୍ର ଦକ୍ଷତା ବିକାଶ ଓ ଉଦ୍ୟମିତା ମନ୍ତ୍ରଣାଳୟ ପକ୍ଷରୁ ରାଜ୍ୟ ସରକାର, କେନ୍ଦ୍ରଶାସିତ ଅଞ୍ଚଳ ପ୍ରଶାସନ, ଶିଳ୍ପ ତାଲିମ ପ୍ରତିଷ୍ଠାନ (ଆଇଟିଆଇ), ପଲିଟେକ୍‌ନିକ୍‌, ମହାବିଦ୍ୟାଳୟ, ଦକ୍ଷତା ତାଲିମ ପ୍ରତିଷ୍ଠାନ ଓ ଶିଳ୍ପ ସଂସ୍ଥାଗୁଡ଼ିକୁ ଆହ୍ୱାନ କରାଯାଇଛି। ଅଧିକ ଯୁବକଯୁବତୀଙ୍କୁ ଏହି ପ୍ରତିଯୋଗିତାରେ ଭାଗ ନେବାର ସୁଯୋଗ ଦେବା ଏବଂ ଦକ୍ଷତା କ୍ଷେତ୍ରରେ ପ୍ରତିଭାସମ୍ପନ୍ନ ଯୁବପିଢ଼ିଙ୍କୁ ସାମିଲ କରିବା ଏହି ଅତିରିକ୍ତ ସୁଯୋଗର ଉଦ୍ଦେଶ୍ୟ।

ୱାର୍ଲ୍ଡସ୍କିଲ୍ସ ସାଂଘାଇ ୨୦୨୬ରେ ଭାରତୀୟ ଦଳ ୬ଟି ରୌପ୍ୟ ପଦକ ଓ ୨୦ଟି ଉତ୍କର୍ଷତା ପଦକ ଜିତି ବିଶ୍ୱସ୍ତରରେ ଦଶମ ସ୍ଥାନ ହାସଲ କରିଛି। ଏହା ୨୦୨୪ରେ ୱାର୍ଲ୍ଡସ୍କିଲ୍ସ ଲିଅନ୍‌ ପ୍ରତିଯୋଗିତାରେ ହାସଲ କରିଥିବା ତ୍ରୟୋଦଶ ସ୍ଥାନ ତୁଳନାରେ ଉନ୍ନତ ପ୍ରଦର୍ଶନ। ଭାରତ ଏଥର ୬୩ଟି ଦକ୍ଷତା ବିଭାଗରେ ନିଜର ସର୍ବବୃହତ୍‌ ୭୦ ଜଣିଆ ପ୍ରତିଯୋଗୀ ଦଳକୁ ପଠାଇଥିଲା। ଏହି ସଫଳତା ଦକ୍ଷତା ବିକାଶ, ବିଶେଷ ତାଲିମ ଓ ନିରନ୍ତର ପ୍ରସ୍ତୁତି ଯୁବ ଭାରତୀୟଙ୍କ ପାଇଁ କିପରି ନୂଆ ସୁଯୋଗ ସୃଷ୍ଟି କରିପାରେ, ତାହା ଉପରେ ଦେଶବ୍ୟାପୀ ଦୃଷ୍ଟି ଆକର୍ଷଣ କରିଛି।

ପଞ୍ଜୀକରଣର ଶେଷ ତାରିଖ: ୧୯ ଅକ୍ଟୋବର ୨୦୨୬।

ପଞ୍ଜୀକରଣ ଲିଙ୍କ୍: https://www.skillindiadigital.gov.in/india-skills-competition

TKM