নমস্কাৰ!

মহামান্যসকল, সমগ্ৰ বিশ্বৰ প্ৰতিনিধি, ব্যৱসায় আৰু উদ্যোগৰ নেতা, নীতি নিৰ্ধাৰক তথা মোৰ বন্ধুসকল।

আপোনালোক সকলোকে ভাৰতলৈ আন্তৰিক স্বাগতম জনাইছো। কিছু সময় পূৰ্বে মিষ্টাৰ ব্লুমবাৰ্গে ইয়াত তেওঁৰ চিন্তাধাৰা প্ৰকাশ কৰিছিল। নিজৰ ৩০ বছৰীয়া যাত্ৰাৰ কথা উল্লেখ কৰি তেওঁ কয় যে মই তেওঁৰ বন্ধু। বয়সৰ ফালৰ পৰা তেওঁ মোতকৈ জ্যেষ্ঠ আৰু পেছাদাৰী ক্ষেত্ৰত তেওঁ এগৰাকী অত্যন্ত সফল ব্যক্তি। তেওঁ কেৱল সফল হোৱাই নহয়, অত্যন্ত দায়বদ্ধও। ভাৰতৰ প্ৰতি তেওঁৰ যি মৰম আছে সেয়া মই বাৰুকৈয়ে অনুভৱ কৰিছো আৰু সেয়েহে ব্যক্তিগত পৰ্যায়ত, মই সদায় তেওঁক সন্মান আৰু প্ৰশংসা কৰি আহিছো। আজিও ভাৰতৰ প্ৰতি তেওঁৰ মৰম আৰু আন্তৰ্জাতিক মঞ্চত ভাৰতৰ প্ৰতি তেওঁৰ ভাব-ধাৰা সদায় ইতিবাচক শক্তিৰ উৎস হৈ আহিছে। মহাশয়, ইয়াৰ বাবে মই মোৰ আন্তৰিক কৃতজ্ঞতা প্ৰকাশ কৰিছো। প্ৰতি বছৰে এই মঞ্চই বিশ্বৰ বিশেষ কেতবোৰ শ্ৰেষ্ঠ বৌদ্ধিক মানসিকতাৰ ব্যক্তিক একত্ৰিত কৰে। ইয়াত অৰ্থনীতি, প্ৰযুক্তি, শক্তি আৰু বিভিন্ন গোলকীয় বিষয় সন্দৰ্ভত আলোচনা অনুষ্ঠিত হয়। এইবাৰ প্ৰথমবাৰৰ বাবে ভাৰতত এই কাৰ্যসূচী অনুষ্ঠিত হৈছে। এই সিদ্ধান্তৰ বাবে মই মিষ্টাৰ ব্লুমবাৰ্গ আৰু তেওঁৰ সমগ্ৰ দলটোক আন্তৰিক অভিনন্দন জনাইছো। আপুনি সঠিক সময়ত সঠিক ঠাই বাছনি কৰিছে।

বন্ধুসকল,

এই বছৰৰ ব্লুমবাৰ্গ ইক’নমিক ফ’ৰাম বিশ্বজুৰি উদ্ভৱ হোৱা নতুন শক্তিৰ ওপৰত কেন্দ্ৰীভূত। প্ৰতিটো যুগৰ শক্তিৰ নিজস্ব উৎস আৰু সংজ্ঞা আছে। কিন্তু একবিংশ শতিকাত বিশেষকৈ তৃতীয় দশকটোত এক বৃহৎ পৰিবৰ্তন পৰিলক্ষিত হৈছে। আজি প্ৰযুক্তি হৈছে শক্তি, তথ্য হৈছে শক্তি, জ্ঞান হৈছে শক্তি আৰু উদ্ভাৱন হৈছে শক্তি।

কিন্তু বন্ধুসকল,

কাৰ হাতত ক্ষমতা আছে সেইটো প্ৰকৃত প্ৰশ্ন নহয়। ইয়াৰ পৰিবৰ্তে প্ৰশ্নটো হ’ল, সেই শক্তি কেনেদৰে ব্যৱহাৰ কৰা হৈছে। প্ৰযুক্তিয়ে কেৱল কিছু সংখ্যক লোকৰহে উন্নতি সাধন কৰিব নেকি? বা ই লাখ লাখ লোকৰ বাবে নতুন সুযোগ সৃষ্টি কৰিব নেকি? জ্ঞান কেৱল নিৰ্বাচিত কেইজনমান লোকৰ শক্তি হৈ থাকিবনে? বা ই সকলোৰে সামৰ্থ্য বৃদ্ধি কৰিব নেকি? ইয়াৰ পৰাই এটা নতুন ধাৰণাৰ উদ্ভৱ হয়। আৰু সেই ধাৰণাটো হ’লঃ সবলীকৰণৰ শক্তি। নিয়ন্ত্ৰণ কৰাৰ ক্ষমতাৰ বাহিৰেও সামৰ্থবান কৰাৰ ক্ষমতা আছে। প্ৰতিদ্বন্দ্বিতা কৰাৰ ক্ষমতাৰ বাহিৰেও সহযোগিতা কৰাৰ ক্ষমতা নিহিত। সফল হোৱাৰ ক্ষমতাৰ ঊৰ্ধ্বত আছে আনক সফল হোৱাত সহায় কৰাৰ ক্ষমতা। সেয়েহে আজি মই ইয়ালৈ যি দৃষ্টিভংগীৰে আহিছো, সেয়া হৈছে সবলীকৰণৰ শক্তি।

বন্ধুসকল,

এই ধাৰণাটো ভাৰতৰ বাবে নতুন নহয়। আমাৰ পৰম্পৰাত কোৱা হয়ঃ ‘বিদ্যা বিবাদায় ধনং মদায়, শক্তিঃ পৰেষাং পৰিপীড়নায়।
খলস্য সাধোঃ বিপৰীতমেতৎ, জ্ঞানায় দানায় চ ৰক্ষণায়’৷ইয়াৰ অৰ্থ হ’ল যিজনৰ জ্ঞান, সম্পদ বা ক্ষমতা আছে, তেওঁ ইয়াক কেনেদৰে ব্যৱহাৰ কৰে। অৰ্থাৎ ক্ষমতাৰ প্ৰকৃত মূল্য ইয়াৰ উদ্দেশ্যৰ ওপৰত নিৰ্ভৰ কৰে। আজিৰ পৃথিৱীত এই দৰ্শন বুজি পোৱাটো অত্যন্ত গুৰুত্বপূৰ্ণ।

বন্ধুসকল,

ক্ষমতা প্ৰদানৰ এই মানৱীয় মনোভাৱ কেৱল আনৰ ওচৰত প্ৰচাৰ কৰিব পৰা শিক্ষা নহয়। ই এনে এটা গুণ, যাক আমাৰ পৰম্পৰাই হাজাৰ হাজাৰ বছৰ ধৰি শিকাই আহিছে। ভাৰতত আমি ইয়াক আমাৰ শাসন আৰু কৰ্ম সংস্কৃতিত অন্তৰ্ভুক্ত কৰিছো। সেয়েহে মই ভাৰতৰ উদাহৰণসহ মোৰ বক্তব্য অব্যাহত ৰাখিম।

বন্ধুসকল,

আপোনালোক সকলোৱে জানে যে ভাৰত হৈছে গণতন্ত্ৰৰ মাতৃ। ভাৰতত এশৰো অধিক ভাষা, প্ৰায় আশী হাজাৰ পঞ্জীয়নভুক্ত বাতৰি কাকত আৰু  অন্যান্য কাকত-আলোচনী , এহেজাৰৰো অধিক ছেটেলাইট টেলিভিছন চেনেল আছে। কেৱল সেয়াই নহয়, ছ’চিয়েল মিডিয়াৰ এই যুগত ভাৰতত পাঁচশ নিযুতৰো অধিক ইউটিউব ব্যৱহাৰকাৰী আৰু পাঁচশ নিযুতৰো অধিক ইনষ্টাগ্ৰাম ব্যৱহাৰকাৰী আছে। আমাৰ দেশত মানুহে বিভিন্ন বিষয় লৈ মুকলিভাৱে বিতৰ্ক কৰে আৰু জনসাধাৰণে বিভিন্ন দৃষ্টিভংগীৰ বিষয়ে আলোচনা কৰে। বৰ্তমান যুগত ইয়াক কৰি তোলাত এক গুৰুত্বপূৰ্ণ ভূমিকা পালন কৰা এটা অন্যতম কাৰক হ’ল ডিজিটেল শক্তি।

বন্ধুসকল,

প্ৰায় বাৰ বা তেৰ বছৰ পূৰ্বে ভাৰতত এনে এটা সময় আছিল যেতিয়া ম’বাইল ফোন আৰু ইণ্টাৰনেটৰ ব্যৱহাৰ নিজেই এক প্ৰকাৰৰ শক্তি আছিল। যিয়ে এইসমূহ ব্যৱহাৰ কৰিছিল, তেওঁ তথ্য, জ্ঞান আৰু সুযোগ লাভ কৰিছিল। ২০১৪ চনৰ পিছত যেতিয়া ভাৰতত এখন নতুন চৰকাৰ ক্ষমতালৈ আহিছিল আৰু আমাক সেৱা কৰাৰ সুযোগ দিয়া হৈছিল, তেতিয়া ভাৰতে ম’বাইল ডে’টা সুলভ কৰি তোলাত যথেষ্ট গুৰুত্ব আৰোপ কৰিছিল। ফলস্বৰূপে আজি এখন সৰু চহৰৰ এজন শিক্ষাৰ্থীয়ে ডিজিটেল শিক্ষা লাভ কৰিব পৰা হৈছে। গাঁৱৰ এজন সৰু দোকানীয়ে নতুন গ্ৰাহকৰ কাষ চাপিব পৰা হৈছে। এজন যুৱকে অনলাইন পাঠ্যক্ৰমত নামভৰ্তি কৰিব পাৰে। অন্য অৰ্থত ক’বলৈ গ’লে ভাৰতত সংযোগে কেৱল মানুহক সংযুক্ত কৰাই নহয়, ই সুযোগসমূহকো সংযুক্ত কৰিছে। এইটো প্ৰকৃততে সবলীকৰণৰ শক্তি।

বন্ধুসকল,

বিদেশৰ পৰা অহা অতিথিসকল, মই আপোনালোকক ভাৰতৰ ডিজিটেল ধনাদায় পৰিবেশতন্ত্ৰৰ অভিজ্ঞতা লাভ কৰিবলৈ আহ্বান জনাম। আমাৰ দেশত পদপথৰ এজন বিক্ৰেতা আৰু ডাঙৰ গাড়ীৰ এটা শ্ব’ৰুমে সম্পূৰ্ণ পৃথক পৰিসৰত কাম কৰিব পাৰে, কিন্তু দুয়োটাই একেটা ডিজিটেল ধনাদায় পৰিবেশতন্ত্ৰ ব্যৱহাৰ কৰে। এয়া হৈছে অন্তৰ্ভুক্তিমূলক প্ৰযুক্তিৰ শক্তি।

বন্ধুসকল,

ভাৰতৰ যি সামৰ্থ্য আছে, সেইবোৰক আমি আমাৰ নিজৰ সীমাৰ ভিতৰত আবদ্ধ কৰি ৰখাত বিশ্বাস নকৰো। আমি সেইবোৰ গ্লোবেল ছাউথ আৰু আমাৰ অংশীদাৰী দেশসমূহৰ সৈতে নিৰন্তৰভাৱে আদান-প্ৰদান কৰি আহিছো। আমি ডিজিটেল ৰাজহুৱা আন্তঃগাঁথনিৰ ক্ষেত্ৰত আমাৰ অভিজ্ঞতা আন দেশৰ সৈতে আদান-প্ৰদান কৰি আছো, যাতে তেওঁলোকে নিজৰ প্ৰয়োজন অনুসৰি ডিজিটেল প্ৰণালী বিকশিত কৰিব পাৰে। ক’ভিডৰ সময়ছোৱাত আমি ক’ৱিন প্লেটফৰ্মো বিকশিত কৰিছিলো, যিটো মুক্ত উৎস আছিল। অন্য অৰ্থত ক’বলৈ গ’লে ভাৰতৰ সামৰ্থ্যই যাতে আন দেশৰ বাবেও সম্ভাৱনাৰ নতুন দুৱাৰ মুকলি কৰিব পাৰে, তাক নিশ্চিত কৰাৰ বাবে আমাৰ নিৰন্তৰ প্ৰচেষ্টা অব্যাহত আছে। অন্য অৰ্থত ক’বলৈ গ’লে, আমাৰ শক্তিয়ে মানৱতাক শক্তিশালী কৰা উচিত।

বন্ধুসকল,

উদ্ভাৱনৰ শক্তিয়ে একেধৰণে কাম কৰে। এটা ধাৰণাক এটা সামগ্ৰীলৈ ৰূপান্তৰিত কৰা, আৰু এটা সমস্যাক সমাধানলৈ ৰূপান্তৰিত কৰাটো নিজেই এক অতুলনীয় সামৰ্থ্য। কিন্তু যেতিয়া এনে সুযোগ সমাজৰ অধিক সংখ্যক লোকৰ ওচৰলৈ যায়, তেতিয়া ক্ষমতাৰ ভাৰসাম্য অধিক ন্যায়সংগত হৈ পৰে আৰু ইয়াৰ প্ৰভাৱ বহুগুণে বৃদ্ধি পায়। ভাৰতৰ ষ্টাৰ্টআপ যাত্ৰা এই পৰিবৰ্তনৰ এটা উদাহৰণ। ২০১৪ চনৰ পূৰ্বে ভাৰতত মাত্ৰ কেইশমান ষ্টাৰ্টআপ আছিল। আজি দেশত ২,৫০,০০০তকৈও অধিক ষ্টাৰ্টআপ আছে। এই ষ্টাৰ্টআপসমূহৰ প্ৰায় আধা সৰু চহৰ আৰু নগৰৰ পৰা আহিছে। ৪৫ শতাংশতকৈও অধিক ষ্টাৰ্টআপত কমেও এগৰাকী মহিলা সঞ্চালক বা অংশীদাৰ আছে। অৰ্থাৎ উদ্ভাৱনৰ সুযোগ অধিক লোকৰ কাষ চাপিছে, নতুন প্ৰতিভাৰ উদ্ভৱ হৈছে আৰু নতুন সমাধানৰ সৃষ্টি হৈছে।

বন্ধুসকল,

ক্ষমতাৰ উদ্দেশ্যৰ ওপৰত এই গুৰুত্ব প্ৰশাসনৰ ক্ষেত্ৰতো সমানেই তাৎপৰ্যপূৰ্ণ। চৰকাৰৰ কৰ্তৃত্ব আছে, কিন্তু ইয়াৰ উদ্দেশ্য নাগৰিকসকলক ব্যৱস্থাটোৰ ওপৰত নিৰ্ভৰশীল কৰি তোলা উচিত নহয়। ইয়াৰ পৰিবৰ্তে নাগৰিকসকলক সক্ষম আৰু সবল কৰি তোলা ইয়াৰ উদ্দেশ্য হোৱা উচিত। ভাৰত এই পথেৰে আগবাঢ়িছে। এই পথ অনুসৰণ কৰি ভাৰতে যোৱা দশকত ২৫ কোটি লোকক দৰিদ্ৰতাৰ পৰা মুক্ত কৰিছে, যি সংখ্যা বিশ্বৰ বহুতো দেশৰ জনসংখ্যাতকৈ অধিক।

বন্ধুসকল,

আপোনালোকে হয়তো জে এ এম ট্ৰিনিটি আৰু প্ৰত্যক্ষ লাভ হস্তান্তৰৰ বিষয়েও শুনিছে। প্ৰযুক্তি ব্যৱহাৰ কৰি আমি এনে এক ব্যৱস্থা সৃষ্টি কৰিছো, যাৰ জৰিয়তে চৰকাৰী সাহায্য প্ৰত্যক্ষভাৱে হিতাধিকাৰীসকলৰ বেংক একাউণ্টত জমা হয়। ই দুৰ্নীতি হ্ৰাস কৰিছে, নাগৰিকৰ বাবে সুবিধা বৃদ্ধি কৰি চৰকাৰ আৰু জনসাধাৰণৰ মাজত এক প্ৰত্যক্ষ সংযোগ সৃষ্টি কৰিছে।

বন্ধুসকল,

শক্তিৰ পৰা সবলীকৰণৰ এই একে দৰ্শন ভাৰতৰ গোলকীয় সম্পৰ্কত দৃশ্যমান। ক’ভিড মহামাৰীৰ সময়ত প্ৰতিষেধক উৎপাদন ক্ষমতা অত্যন্ত গুৰুত্বপূৰ্ণ হৈ পৰিছিল। সেই সময়ত প্ৰশ্ন আছিল যে এই সামৰ্থ্যৰ লাভালাভ কেৱল কেইখনমান দেশৰ মাজতে সীমাবদ্ধ থাকিবনে বা প্ৰতিষেধক সেই দেশসমূহ আৰু এনে সুবিধা তথা সামৰ্থ্যৰ অভাৱ থকা লোকসকলৰ ওচৰলৈও যাব নেকি। ভাৰতে মানৱতাৰ সবলীকৰণৰ পথ বাছি লৈছিল। আমি এশৰো অধিক দেশলৈ প্ৰতিষেধকৰ যোগান ধৰিছিলো। আমাৰ উৎপাদন ক্ষমতা আন দেশসমূহৰ বাবেও সহায়ৰ উৎস হৈ পৰিছিল। মই আপোনালোকক আৰু এটা উদাহৰণ দিওঁ। কেইমাহমান পূৰ্বে ভাৰতে এআই ইম্পেক্ট সন্মিলন আয়োজন কৰিছিল আৰু মিষ্টাৰ ব্লুমবাৰ্গে কিছু সময় পূৰ্বে সেই সন্মিলনৰ বিষয়ে অতি সুন্দৰকৈ উল্লেখ কৰিছিল। তাত আমি কেৱল মানৱতাৰ বাবে এআইৰ ব্যৱহাৰেই নহয়, জীৱ-জন্তুবোৰেও এআইৰ পৰা কেনেদৰে লাভান্বিত হ’ব পাৰে, সেই বিষয়েও আলোচনা কৰিছিলো। ইয়াত বহি থকা নন্দনে পিছত এইটো কেনেকৈ কৰা হৈছিল সেই সম্পৰ্কে অধিক তথ্য আদান-প্ৰদান কৰিব পাৰিব। অন্য অৰ্থত ক’বলৈ গ’লে ভাৰত যিমানেই অধিক সামৰ্থৱান আৰু শক্তিশালী হ’ব, মানৱতা আৰু বিশ্বৰ বাবে সিমানেই অধিক লাভজনক হ’ব।

বন্ধুসকল,

ক্ষমতা মানে কেৱল আগবাঢ়ি যোৱাৰ সামৰ্থ্যই নহয়, ই আনকো আগবাঢ়ি যোৱাত সহায় কৰাৰ সামৰ্থ্য। ভাৰতে বিশ্বাস কৰে যে প্ৰতিযোগিতাৰ দৰে সহানুভূতিও সমানেই গুৰুত্বপূৰ্ণ। উদ্ভাৱন অত্যাৱশ্যকীয়, কিন্তু ইয়াৰ সুবিধাবোৰো ব্যাপকভাৱে আদান-প্ৰদান কৰা উচিত। ৰাষ্ট্ৰীয় শক্তিৰ প্ৰয়োজন, কিন্তু গোলকীয় প্ৰত্যাহ্বানসমূহৰ সমাধানৰ ক্ষেত্ৰতো আমি অৰিহণা যোগাব লাগিব। জলবায়ু পৰিবৰ্তন, জল প্ৰশাসন, জনস্বাস্থ্য, বা নতুন প্ৰযুক্তিৰ উপযুক্ত ব্যৱহাৰ, বিশ্বক এনে সামৰ্থ্যৰ প্ৰয়োজন যি সমাধান প্ৰদান কৰে আৰু নতুন সুযোগ সৃষ্টি কৰে।

বন্ধুসকল,

মই আপোনালোকক আৰু এটা উদাহৰণ দিওঁ। পেৰিছ চুক্তিৰ অধীনত ভাৰতে জলবায়ু পৰিবৰ্তনৰ সৈতে যুঁজ দিয়াৰ বাবে এক গুৰুত্বপূৰ্ণ প্ৰতিশ্ৰুতি প্ৰদান কৰিছিল। ২০১৫ চনত আমি ২০৩০ চনৰ ভিতৰত অ-জীৱাশ্ম ইন্ধনৰ উৎসৰ পৰা আমাৰ স্থাপিত বিদ্যুৎ ক্ষমতাৰ ৪০ শতাংশ প্ৰাপ্ত কৰাৰ লক্ষ্য নিৰ্ধাৰণ কৰিছো। ভাৰতে ২০২১ চনৰ নৱেম্বৰত নিৰ্ধাৰিত সময়ৰ ৯ বছৰ পূৰ্বেই এই মাইলৰ খুঁটি অতিক্ৰম কৰিছে। এনে লক্ষ্য অতিক্ৰম কৰা ভাৰত হৈছে প্ৰথম জি-২০ ৰাষ্ট্ৰ। এয়া কেৱল প্ৰতিশ্ৰুতি পূৰণৰ বিষয়ে নাছিল; ই ভাৰতৰ বিকশিত শক্তি যাত্ৰাৰ প্ৰতিফলনো আছিল।

বন্ধুসকল,

২০১৪ চনত ভাৰতৰ নৱীকৰণযোগ্য শক্তিৰ ক্ষমতা আছিল প্ৰায় ৭৫ গিগাৱাট। আজি ই প্ৰায় ৩০০ গিগাৱাটত উপনীত হৈছে। অৰ্থাৎ আমি প্ৰায় চাৰিগুণ অধিক ক্ষমতা যোগ কৰিছো।

বন্ধুসকল,

ভাৰতৰ এই শক্তি পৰিবৰ্তনেও নতুন সুযোগৰ সৃষ্টি কৰিছে। আজি আমাৰ হাতত পিএম সূৰ্য ঘৰ আৰু পিএম-কুসুমৰ দৰে আঁচনি আছে। এখন আঁচনি হৈছে পৰিয়ালসমূহক সৌৰ শক্তিৰ সৈতে সংযোগ কৰা, আনহাতে আনখন আঁচনি হৈছে কৃষকসকলক সৌৰ শক্তি উৎপাদন কৰিবলৈ সামৰ্থ্য কৰা আৰু ইয়াৰ ব্যৱহাৰৰ জৰিয়তে তেওঁলোকৰ উৎপাদন ব্যয় হ্ৰাস কৰা। এই দুয়োখন আঁচনিৰ জৰিয়তে ভাৰতে ৩০ গিগাৱাটতকৈ অধিক সৌৰ ক্ষমতা লাভ কৰিছে। অনুমান কৰা হৈছে যে ই বছৰি ৩ কোটি টনতকৈও অধিক কাৰ্বন নিৰ্গমন হ্ৰাস কৰিব। অন্য অৰ্থত ক’বলৈ গ’লে সৌৰ শক্তি কেৱল প্ৰকৃতি সুৰক্ষা কৰাৰ মাধ্যমেই নহয়, বৰং ই জনসাধাৰণক শক্তিশালী কৰাৰো এটা মাধ্যম হৈ পৰিছে।

বন্ধুসকল,

ক্ষমতাৰ এই গোলকীয় দৌৰত ভাৰতে এক পৃথক মানসিকতাৰে আগবাঢ়ি আছে আৰু এই দশকটোৱেই ইয়াৰ সাক্ষী।

বন্ধুসকল,

একবিংশ শতিকাৰ এই দশকে অভূতপূৰ্ব গোলকীয় প্ৰত্যাহ্বান কঢ়িয়াই আনিছে। পূৰ্বৰ ছবছৰলৈ ঘূৰি চালে দেখিম যে আমি এক বিশ্বব্যাপী মহামাৰীৰ সাক্ষী হৈছো। তাৰ পিছত বিভিন্ন অঞ্চলত যুদ্ধ আৰম্ভ হৈছিল। সেয়া যেন যথেষ্ট নাছিল, বাণিজ্য, গুৰুত্বপূৰ্ণ খনিজ পদাৰ্থ আৰু শক্তি যোগানৰ ক্ষেত্ৰত বাধাৰ সৃষ্টি হৈছিল। বিশ্বই এটা সংকটৰ পৰা পৰিত্ৰাণৰ উপায় বিচাৰিবলৈ আৰম্ভ কৰাৰ সময়ত আন এটা সংকটৰ উদ্ভৱ হয়। এসময়ত বিশ্বক সংযোগ কৰা সামগ্ৰীবোৰ এতিয়া অস্ত্ৰলৈ ৰূপান্তৰিত হৈছে। যোগান শৃংখল, শক্তি, খনিজ পদাৰ্থ, পৰিশোধ ব্যৱস্থা আৰু প্ৰযুক্তি ক্ৰমান্বয়ে চাপ আৰু আধিপত্যৰ সঁজুলি হৈ পৰিছে। বিগত দশকবোৰত গোলকীকৰণৰ দ্বাৰা সৃষ্টি হোৱা পথবোৰ বহু ক্ষেত্ৰত প্ৰতিবন্ধক হৈ পৰিছে। এই সকলোবোৰৰ মাজত কৃত্ৰিম বুদ্ধিমত্তাই প্ৰতিটো খণ্ডত কাম কৰাৰ পদ্ধতি সলনি কৰি আছে। একে সময়তে বহুতো দেশে বয়োজ্যেষ্ঠ জনসংখ্যাৰ সৈতে জড়িত বৰ্ধিত প্ৰত্যাহ্বানৰ সন্মুখীন হৈছে। এনে পৰিস্থিতিত বিশ্ব এটা মৌলিক প্ৰশ্নৰ সন্মুখীন হৈছেঃ বিশ্বাস। প্ৰয়োজনৰ সময়ত যোগান অব্যাহত থাকিব বুলি বিশ্বাস ৰাখক। প্ৰদান কৰা প্ৰতিশ্ৰুতিসমূহো পূৰণ হ’ব বুলি বিশ্বাস ৰাখক। এখন অংশীদাৰী দেশে সংকটৰ সময়ত আপোনাৰ কাষত থিয় দিব বুলিও বিশ্বাস ৰাখক আৰু ইয়াতেই ভাৰত এক পৃথক দৃষ্টিভংগী তথা চিন্তাধাৰাৰে আপোনালোকৰ কাষত থিয় দিছে।

বন্ধুসকল,

একবিংশ শতিকাত ভাৰতৰ প্ৰগতি হৈছে সকলোৰে সৈতে সহযোগিতাৰে আগবাঢ়ি যোৱা আৰু সকলোকে একেলগে লৈ যোৱাৰ কাহিনী। যেতিয়া বিশ্বক সুলভ মূল্যৰ ঔষধৰ প্ৰয়োজন হয়, তেতিয়া প্ৰতি পাঁচটা জেনেৰিক ঔষধৰ ভিতৰত এটা ভাৰতৰ পৰা যায়। যেতিয়া ডিজিটেল পৰিচয় আৰু পৰিশোধৰ বাবে সমাধানৰ প্ৰয়োজন হয়, বিশ্বই ভাৰতত বিকশিত আৰ্হিৰ ফালে দৃষ্টি নিক্ষেপ কৰে। যেতিয়া বিশ্বক প্ৰতিভাৰ প্ৰয়োজন হয়, তেতিয়া ই ভাৰতৰ দক্ষ যুৱক-যুৱতীসকলৰ ওপৰত আস্থা ৰাখে। আজি ভাৰতত বিশ্বৰ বিভিন্ন প্ৰান্তৰ কোম্পানীসমূহক সেৱা প্ৰদান কৰা ২,০০০তকৈও অধিক গোলকীয় সামৰ্থ্য কেন্দ্ৰ আছে।

বন্ধুসকল,

এইটো স্পষ্ট যে যেতিয়াই বিশ্বৰ বাবে এটা সুস্থিৰ স্তম্ভৰ প্ৰয়োজন হয়, তেতিয়া ভাৰতে নিজৰ দায়িত্ব স্বীকাৰ কৰি সহায়ৰ হাত আগবঢ়ায়। আমি পৃথিৱীৰ সৈতে আৰু পৃথিৱীৰ বাবে বিকাশ অব্যাহত ৰাখিছো।

আৰু বন্ধুসকল,

ভাৰতে যি কৰে তাৰ বাবে কৃতিত্ব নিবিচাৰে। বিশ্বই গৌৰৱেৰে কয় যে ভাৰতে বিশ্বক ‘শূন্য’ দিছিল। এই শূন্যই সমগ্ৰ মানৱজাতিক উপকৃত কৰিছিল। তথাপি ভাৰতে কেতিয়াও ইয়াৰ বিনিময়ত ৰয়েল্টি বিচৰা নাছিল। আজিও ভাৰতে একেই মনোভাৱেৰে কাম কৰি আছে। সমসাময়িক প্ৰত্যাহ্বানৰ সৈতে যুঁজ দিয়াৰ বাবে আমাৰ ধাৰণাসমূহেও এই দৃষ্টিভংগীক প্ৰতিফলিত কৰে। ইতিহাসত বহুতো বিশ্বজনীন সংস্থা সৃষ্টি কৰা হৈছে, প্ৰত্যেকেই নিজৰ স্বাৰ্থ পূৰণ কৰিছে। কিন্তু ভাৰতে কেনেধৰণৰ গোলকীয় মঞ্চ সৃষ্টি কৰিছে, সেয়া বিবেচনা কৰক। আমি স্থাপন কৰা প্ৰতিষ্ঠানসমূহৰ কথা বিবেচনা কৰক আৰু সেইসমূহক বিশ্বৰ আন ঠাইত উদ্ভৱ হোৱা প্ৰতিষ্ঠানসমূহৰ সৈতে তুলনা কৰক। আমি কি অৱদান আগবঢ়াইছো? আন্তঃৰাষ্ট্ৰীয় সৌৰ মিত্ৰতা। আমি কি অৱদান আগবঢ়াইছো? দুৰ্যোগ প্ৰতিৰোধী আন্তঃগাঁথনিৰ বাবে মিত্ৰতা। আমি কি অৱদান আগবঢ়াইছো? বিগ কেট এলায়েন্স, বিশ্ব জৈৱ ইন্ধন মিত্ৰতা, ভাৰত-মধ্য প্ৰাচ্য-ইউৰোপ অৰ্থনৈতিক কৰিডৰ (আইএমইচি) আৰু মিছন লাইফ, পৰিবেশৰ বাবে জীৱনশৈলী। এইবোৰ এনে পদক্ষেপ যিয়ে সকলোকে উপকৃত কৰে আৰু সকলোৰে কল্যাণ সাধন কৰে।

বন্ধুসকল,

ভাৰতে যিবোৰ ধাৰণা আগবঢ়াই আহিছে, সেই সকলোবোৰ আপোনালোকৰ সন্মুখত আছে। এটা সূৰ্য, এখন বিশ্ব, এটা গ্ৰীডৰ দৃষ্টিভংগী। এখন পৃথিৱী, এটা পৰিয়াল, এটা ভৱিষ্যতৰ ওপৰত বিশ্বাস। এখন পৃথিৱী, এক স্বাস্থ্যৰ দৃষ্টিভংগী। অন্য অৰ্থত ক’বলৈ গ’লে ভাৰতে সংযোগ আৰু একত্ৰিত হোৱাৰ ওপৰত গুৰুত্ব আৰোপ কৰে। এই ক্ষেত্ৰত আনৰ সবলীকৰণৰ বাবে শক্তিৰ ব্যৱহাৰ কৰা হয়।

বন্ধুসকল,

অনিশ্চয়তাৰে ভৰা বিশ্বত ভাৰতে নিৰ্ভৰযোগ্যতা আৰু সুস্থিৰতাৰ আশ্বাস প্ৰদান কৰে। চলিত বৰ্ষৰ এপ্ৰিল-জুন ত্ৰৈমাসিকত ভাৰতৰ বিকাশৰ হাৰ আছিল ৭.৮ শতাংশ। আৰু এই বিকাশ এক শক্তিশালী ভেটিৰ ওপৰত নিৰ্ভৰ কৰে। ১২-১৩ বছৰ পূৰ্বে ভাৰতৰ কাৰেণ্ট একাউণ্টৰ ঘাটি জিডিপিৰ চাৰি শতাংশতকৈও অধিক আছিল। যোৱা বছৰ ই প্ৰায় আধা শতাংশলৈ হ্ৰাস পাই ০.৬১ শতাংশ হৈছে। আজি আমাৰ বিদেশী মুদ্ৰাৰ ভাণ্ডাৰে ৭০০ বিলিয়ন ডলাৰ অতিক্ৰম কৰিছে। আমাৰ বেংকিং ব্যৱস্থা বহু দশকৰ ভিতৰত আটাইতকৈ শক্তিশালী স্থিতিত আছে।

বন্ধুসকল,

এই শক্তিৰ বাবেই ভাৰতৰ সাৰ্বভৌম ৰেটিং উন্নীত কৰা হৈছে। আজি ভাৰতৰ আত্মবিশ্বাস অভূতপূৰ্বভাৱে বৃদ্ধি হৈছে। আমি এক স্পষ্ট নীতি নিৰ্দেশনাৰ সৈতে সংস্কাৰ অনুসৰণ কৰি আছো। জিএছটিৰ জৰিয়তে আমি কৰৰ এক জটিলতাক ৰাষ্ট্ৰীয় বজাৰলৈ ৰূপান্তৰিত কৰিছো। আমি ইনছলভেন্সি আইন প্ৰণয়ন কৰিছিলো। ৩৯ খন শ্ৰমিক আইনক এতিয়া চাৰিখন সৰল শ্ৰমিক সংহিতাত একত্ৰিত কৰা হৈছে। কেইবাশ সৰু সৰু ব্যৱসায়-সম্পৰ্কীয় অপৰাধ ৰেহাই দিয়া হৈছে। আমি তাতেই থমকি ৰোৱা নাই। ভাৰতৰ সংস্কাৰ এক্সপ্ৰেছ দ্ৰুত গতিত আগবাঢ়ি গৈ আছে। আমাৰ বাবে সংস্কাৰ কোনো বাধ্যবাধকতা নহয়। ই হৈছে আমাৰ দৃঢ় বিশ্বাস।

বন্ধুসকল,

বহু হাজাৰ বছৰ পূৰ্বে আমাৰ বেদসমূহে আমাক এটা মন্ত্ৰ দিছিলঃ সংগচ্ছধ্বং সংবদধ্বং সং বো মনাংসি জানতাম্। আহক, আমি আজি সেই মন্ত্ৰৰ পুনৰাবৃত্তি কৰোঃ আমি একেলগে খোজকাঢ়ো। আহক, আমি একেলগে কথা পাতো। আহক, আমি ইজনে সিজনক বুজিবলৈ চেষ্টা কৰো। কিয়নো যেতিয়া আমি একেলগে খোজকাঢ়ো, তেতিয়া আমাৰ শক্তি বৃদ্ধি পায়। কথোপকথনৰ জৰিয়তে আমাৰ বুজাবুজি গভীৰ হয় আৰু ইজনে সিজনক বুজি পাই আমি একেলগে বৃহৎ প্ৰত্যাহ্বানসমূহৰ সমাধান কৰিব পাৰো। এয়া হৈছে ক্ষমতা প্ৰদানৰ মূল কথা। ইয়াৰ অৰ্থ হৈছে আমাৰ শক্তিক কেৱল আমাৰ নিজৰ প্ৰগতিৰ মাজতে সীমাবদ্ধ কৰি ৰখা নহয়, বৰং ইয়াক আনৰ বাবেও নতুন সুযোগ সৃষ্টি কৰিবলৈ ব্যৱহাৰ কৰা। মই আত্মবিশ্বাসী যে ব্লুমবাৰ্গ ইকনমিক ফ’ৰামে এই মনোভাৱক আগুৱাই নিয়াৰ ক্ষেত্ৰত গুৰুত্বপূৰ্ণ ভূমিকা পালন কৰিব। আকৌ এবাৰ এই অনুষ্ঠানৰ বাবে সকলো অংশগ্ৰহণকাৰীক মোৰ শুভেচ্ছা জনালো। বহুত বহুত ধন্যবাদ। ধন্যবাদ জ্ঞাপন কৰিলো।

(এয়া হৈছে প্ৰধানমন্ত্ৰীৰ ভাষণৰ থূলমুল অনুবাদ। মূল ভাষণ হিন্দীত প্ৰদান কৰা হৈছিল।)

****

MJPS/SS/VJ/ST/NB