BRICS ટ્રેડિશનલ એન્ડ ઇન્ડિજીનસ ડિમોન્સ્ટ્રેશન ગેમ્સ 2026 સોમવાર, 12 ઓક્ટોબર, 2026ના રોજ વીર સાવરકર સ્પોર્ટ્સ કોમ્પ્લેક્સ, નારણપુરા, અમદાવાદ, ગુજરાત ખાતે યોજાઈ હતી. આ દિવસભરના કાર્યક્રમમાં BRICS દેશોના સ્પોર્ટિંગ હેરિટેજ, સાંસ્કૃતિક વિવિધતા અને લોકો-થી-લોકોના જોડાણની ઉજવણી કરવા માટે મહાનુભાવો, દેશના પ્રતિનિધિ મંડળો, એથ્લેટ્સ, પ્રેક્ટિશનર્સ, ટેકનિકલ અધિકારીઓ અને ભાગીદાર સંસ્થાઓ એકસાથે આવ્યા હતા.

રમતોના ઉદ્ઘાટનની જાહેરાત કરતાં, કેન્દ્રીય યુવા બાબતોના મંત્રી ડૉ. મનસુખ માંડવિયાએ જણાવ્યું હતું કે ભવિષ્ય માટે તૈયાર રમતગમત ઈન્ફ્રાસ્ટ્રક્ચરમાં રોકાણ કરીને ભારત રમતગમતને રાષ્ટ્ર નિર્માણના કેન્દ્રમાં મૂકી રહ્યું છે. કેન્દ્રીય મંત્રીએ ગુજરાતના માનનીય નાયબ મુખ્યમંત્રી શ્રી હર્ષ સંઘવીની ગરિમામય ઉપસ્થિતિમાં આ કાર્યક્રમનું ઉદ્ઘાટન કર્યું હતું.

10 BRICS રાષ્ટ્રોના પ્રતિનિધિઓ અને અન્ય ઉપસ્થિતોને સંબોધતા, કેન્દ્રીય રમતગમત મંત્રીએ રમતગમત રાષ્ટ્ર બનાવવા તરફ ભારતની પ્રતિબદ્ધતા પર પ્રકાશ પાડ્યો હતો.

તેમણે જણાવ્યું, “ભારત રાષ્ટ્રનિર્માણના કેન્દ્રમાં રમતગમતને સ્થાન આપી રહ્યું છે. પ્રધાનમંત્રી શ્રી નરેન્દ્ર મોદીના નેતૃત્વ હેઠળ ભારત મેદાનથી લઈને ચંદ્રક જીતવા સુધીની તકો ઊભી કરીને પોતાની રમતગમતની સમગ્ર વ્યવસ્થામાં પરિવર્તન લાવી રહ્યું છે.”

“પાયાના સ્તરે રમતગમતમાં ભાગીદારી, પ્રતિભાની ઓળખ, કોચિંગ, રમતગમત વિજ્ઞાન, માળખાગત સુવિધાઓનો વિકાસ, ખેલાડીઓનું કલ્યાણ અને આંતરરાષ્ટ્રીય સ્તરે અનુભવ સહિતના સર્વાંગી અભિગમના માર્ગદર્શન હેઠળ ભારત ભવિષ્ય માટે ટકાઉ રમતગમતની વ્યવસ્થા ઊભી કરી રહ્યું છે,” એમ ડૉ. માંડવિયાએ જણાવ્યું.

“આ પરિવર્તનને સમર્થન આપવા માટે, અમે અમારી ખેલો ઈન્ડિયા (Khelo India) પહેલના ભાગરૂપે લગભગ 3.76 બિલિયન યુએસ ડોલર આપવા માટે પ્રતિબદ્ધ છીએ.”

ડૉ. માંડવિયાએ પરંપરાગત અને સ્વદેશી રમતોના સંરક્ષણ અને પ્રોત્સાહન માટે BRICS રાષ્ટ્રો વચ્ચે સહયોગના ત્રણ વ્યવહારુ ક્ષેત્રોનો પ્રસ્તાવ મૂક્યો હતો.

“BRICS ટ્રેડિશનલ એન્ડ ઇન્ડિજીનસ ગેમ્સ માત્ર રમત કેવી રીતે રમાય છે તે જ નહીં, પરંતુ તે દરેક પરંપરાને અનોખી બનાવતા ઇતિહાસ, મૂલ્યો અને સાંસ્કૃતિક સંદર્ભને પણ પ્રદર્શિત કરવા માટેનું એક મંચ પૂરું પાડે છે. જેમ જેમ આપણે આ પહેલને આગળ ધપાવીએ છીએ, તેમ ભારત સહયોગના ત્રણ વ્યવહારુ ક્ષેત્રોનો પ્રસ્તાવ મૂકે છે,” ડૉ. માંડવિયાએ જણાવ્યું હતું.

“પ્રથમ, આપણે પરંપરાગત અને સ્વદેશી રમતોની સ્વૈચ્છિક BRICS રિપોઝિટરી બનાવવા તરફ કામ કરવું જોઈએ, જેમાં તેમના ઇતિહાસ, સાંસ્કૃતિક મહત્વ, નિયમો, સાધનો અને રમત ક્ષેત્રની જરૂરિયાતોનું દસ્તાવેજીકરણ કરવામાં આવે.”

કેન્દ્રીય રમતગમત મંત્રીએ આગળ કહ્યું, “બીજું, આપણે BRICS દેશોના ખેલાડીઓ, કોચ, સંશોધકો, શૈક્ષણિક સંસ્થાઓ અને સાંસ્કૃતિક નિષ્ણાતો વચ્ચે પરસ્પર આદાન-પ્રદાનને પ્રોત્સાહન આપવું જોઈએ.”

તેમણે ઉમેર્યું, “ત્રીજું, આપણે ભવિષ્યની બ્રિક્સ રમતગમત સ્પર્ધાઓમાં પરંપરાગત અને દેશી રમતોના સમયાંતરે પ્રદર્શનની શક્યતાઓ તપાસવી જોઈએ.”

ડૉ. માંડવિયાએ વધુમાં જણાવ્યું કે ભારત 'ફિટ ઈન્ડિયા મૂવમેન્ટ' દ્વારા રમતગમતને જીવનશૈલીનો હિસ્સો બનાવવા માટે કેવી રીતે મહત્વપૂર્ણ પગલાં ભરી રહ્યું છે.

“ફિટ ઈન્ડિયા મુવમેન્ટ દ્વારા, અમે ફિટનેસને જીવનશૈલી તરીકે પ્રોત્સાહિત કરી રહ્યા છીએ,” તેમણે કહ્યું.

અમારા ‘સન્ડેઝ ઓન સાયકલ’ અભિયાનને અભૂતપૂર્વ સફળતા મળી છે, જેમાં દર રવિવારે 3 લાખથી વધુ સ્થળોએ 50 લાખ થી વધુ લોકો સાયકલ ચલાવવા માટે જોડાયા છે. અત્યાર સુધીમાં સમગ્ર ભારતમાં ‘સન્ડેઝ ઓન સાયકલ’ના 94 કાર્યક્રમો યોજાઈ ચૂક્યા છે.

10 સહભાગી BRICS રાષ્ટ્રોએ વીર સાવરકર સ્પોર્ટ્સ કોમ્પ્લેક્સ ખાતે તેમની સંખ્યાબંધ સ્વદેશી રમતગમત પરંપરાઓનું પ્રદર્શન કર્યું:

· બેલારુસ: ગોરોડકી

· બોલિવિયા: લુચા દ ચોલિટાસ, ટિંકુ, રાયુએલા, ટ્રોમ્પો, કચિનાસ અને કેરેરા દ સાકોસ

· બ્રાઝિલ: ઝારાબાટાના (સ્વદેશી બ્લોપાઇપ), કોરિડા દ ટોરાસ (લોગ રેસ), બ્રાઝિલિયન પેરા-જીયુ-જિત્સુ અને કેપોઇરા

· ચીન: વુશુ, લાયન ડાન્સ અને હેલ્થ ક્વિગોંગ

· ભારત: મલ્લખંભ, યોગાસન, કલરીપયટ્ટુ

· ઈરાન: ઝૂરખાનેહ, હફ્ત સંગ અને ઘાનિયેહ

· કઝાકિસ્તાન: અસિક અતુ, તોગીઝકુમલક અને કઝીક કુરેસી

· રશિયા: ગોરોડકી અને સામ્બો

· દક્ષિણ આફ્રિકા: કગાટી અને ઇંતોંગા

· યુનાઇટેડ આરબ અમીરાત: અલ તબ્બાહ

પ્રદર્શનની સાથે સાંસ્કૃતિક પ્રસ્તુતિઓ અને દર્શકોના જોડાણની પ્રવૃત્તિઓ પણ યોજાઈ હતી. કાર્યક્રમના અંતે ભાગ લેનાર ટીમોનું સન્માન કરવામાં આવ્યું હતું.

ગેમ્સે BRICS દેશોને તેમની પરંપરાગત રમતોનો ઇતિહાસ, મૂલ્યો, સાંસ્કૃતિક સંદર્ભ અને પ્રેક્ટિસ રજૂ કરવા માટે એક સમાન તક પૂરી પાડી હતી.

આ કાર્યક્રમે રમતગમતનું આધુનિકીકરણ કરતી વખતે, સમાવેશી ભાગીદારીનો વિસ્તાર કરતી વખતે અને BRICS પરિવારમાં મિત્રતા અને સહયોગને ઊંડો કરતી વખતે સામુદાયિક જ્ઞાનને જાળવી રાખવાના મહત્વને પુનર્જીવિત કર્યું.

BRICS Traditional & Indigenous Demonstration Games 2026! 📍 Ahmedabad https://t.co/T29nAZ1Hqq

— Dr Mansukh Mandaviya (@mansukhmandviya) October 12, 2026

SM/BS/JD

(રીલીઝ આઈડી: 2322326) મુલાકાતી સંખ્યા : 19