ملک کے کوئلے سے چلنے والے بجلی گھروں میں کوئلے کا ذخیرہ 29 ستمبر 2026 سے مسلسل 18 ملین ٹن (1 کروڑ 80 لاکھ ٹن) سے زیادہ برقرار ہے۔

29 ستمبر کو بجلی گھروں میں کوئلے کا ذخیرہ 18.932 ملین ٹن تھا، جبکہ 10 اکتوبر 2026 کو یہ 18.205 ملین ٹن ریکارڈ کیا گیا۔

اس کا مطلب ہے کہ بجلی گھروں میں کوئلے کی فراہمی تقریباً روزانہ کی کھپت کے مطابق جاری ہے۔ جن بجلی گھروں میں کوئلے کی کمی کا خطرہ ہے، ان پر خصوصی نظر رکھی جا رہی ہے۔ ضرورت کے مطابق دوسرے مقامات سے کوئلہ ان بجلی گھروں تک پہنچایا جا رہا ہے، تاکہ کوئلے کی مناسب مقدار دستیاب رہے اور بجلی کی پیداوار میں رکاوٹ نہ آئے۔

اکتوبر میں دو دن کوئلے کے ذخیرے میں اضافہ ہوا

اکتوبر 2026 میں دو دن ایسے بھی رہے جب کوئلے کے ذخیرے میں اضافہ ریکارڈ کیا گیا:

• 2 اکتوبر 2026: ذخیرے میں 0.024 ملین ٹن اضافہ ہوا۔
• 10 اکتوبر 2026: ذخیرے میں 0.017 ملین ٹن اضافہ ہوا۔

ستمبر کے مقابلے میں اکتوبر میں کوئلے کی کمی بہت کم ہوئی

وزارت کے مطابق، ستمبر کے مقابلے میں اکتوبر کے پہلے دس دنوں میں کوئلے کے ذخیرے میں کمی کی رفتار کافی سست ہو گئی ہے۔

• ستمبر 2026: پورےمہینے میں کوئلےکاذخیرہ تقریباً 7.28 ملین ٹن کم ہوا۔یعنی روزانہ اوسطاً 0.24 ملین ٹن کوئلہ کم ہوا۔
• اکتوبر کے پہلے دس دن: اس دوران مجموعی طور پر صرف 0.56 ملین ٹن کوئلے کی کمی ہوئی۔ یعنی روزانہ اوسطاً تقریباً 0.06 ملین ٹن کوئلہ کم ہوا۔

ملک کے بجلی گھروں میں کوئلے کی صورتحال پہلے سے بہتر اور مستحکم ہو رہی ہے۔ ستمبر میں کوئلے کا ذخیرہ تیزی سے کم ہو رہا تھا، لیکن اکتوبر میں اس کمی کی رفتار کافی کم ہو گئی ہے۔ کوئلے کی سپلائی بہتر ہونے اور بھارتی ریلوے کے تعاون سے بجلی گھروں تک کوئلہ پہنچایا جا رہا ہے۔

اس کا مقصد یہ ہے کہ بجلی گھروں میں کوئلے کی کمی نہ ہو اور ملک میں بجلی کی پیداوار مسلسل جاری رہے۔

کوئلے کی صورتحال میں بہتری کی ایک بڑی وجہ مال گاڑیوں میں کوئلے کی زیادہ لوڈنگ ہے۔

اکتوبر 2026 میں (1 سے 10 اکتوبر تک) بجلی گھروں کے لیے روزانہ اوسطاً 469 ریک کوئلہ لوڈ کیا گیا، جبکہ ستمبر 2026 میں یہ اوسط 426 ریک روزانہ تھی۔اس طرح اکتوبر میں کوئلے کی لوڈنگ میں تقریباً 10 فیصد اضافہ ہوا ہے۔اکتوبر کے دوران روزانہ کوئلے سے لدی مال گاڑیوں کے ریک کی تعداد 447 سے 482 کے درمیان رہی۔بھارتی ریلوے کے ذریعے بجلی گھروں تک پہلے کے مقابلے میں زیادہ کوئلہ پہنچایا جا رہا ہے۔ اسی وجہ سے کوئلے کے ذخیرے میں کمی کی رفتار سست ہوئی ہے اور بجلی گھروں میں کوئلے کی دستیابی بہتر ہوئی ہے۔

اس کے نتیجے میں، اکتوبر 2026 میں بجلی کے شعبے کو روزانہ اوسطاً 2.49 ملین ٹن کوئلہ فراہم کیا گیا، جبکہ ستمبر 2026 میں یہ مقدار روزانہ 2.21 ملین ٹن تھی۔اکتوبر 2026 میں 10 اکتوبر تک کوئلے کی اصل سپلائی، مقررہ ہدف یعنی روزانہ 2.37 ملین ٹن سے زیادہ رہی۔ ان دس دنوں میں سے نو دن کوئلے کی سپلائی مقررہ ہدف سے زیادہ رہی۔

 

وزارتِ کوئلہ، کوئلے کی مسلسل ترسیل اور فراہمی کو یقینی بنانے کے لیے کول انڈیا لمیٹڈ ، سنگارینی کولیریز کمپنی لمیٹڈ  وزارتِ ریلوے اور بجلی کے اداروں کے ساتھ مل کر کام کر رہی ہے۔اس کوشش کا مقصد تھرمل پاور پلانٹس (کوئلے سے بجلی بنانے والے بجلی گھروں) میں کوئلے کا مناسب ذخیرہ برقرار رکھنا ہے، تاکہ بجلی کی پیداوار میں کوئی رکاوٹ نہ آئے۔وزارتِ کوئلہ نے کوئلے کی نقل و حمل کو آسان اور مؤثر بنانے میں مسلسل تعاون اور پیشہ ورانہ ذمہ داری کا مظاہرہ کرنے پر انڈین ریلوے کا شکریہ ادا کیا اور اس کی کوششوں کو سراہا ہے

*****

ش ح۔ ش ت۔ ج

uno 4987

(ریلیز آئی ڈی: 2322080) وزیٹر کاؤنٹر : 9