പരിസ്ഥിതി, വനം മന്ത്രാലയം
ഇന്ത്യ- ജപ്പാൻ 'ജോയിന്റ് ക്രെഡിറ്റിംഗ് മെക്കാനിസ'ത്തിനായുള്ള പ്രവർത്തന മാർഗ്ഗരേഖ പുറത്തിറക്കി
പോസ്റ്റഡ് ഓണ്‍:
05 OCT 2026 8:26PM by PIB Thiruvananthpuram
ഇന്ത്യയിലെ ജപ്പാൻ അംബാസഡർ H.E കെയ്‌ചി ഒനോയും അന്നത്തെ പരിസ്ഥിതി, വനം, കാലാവസ്ഥാ വ്യതിയാന മന്ത്രാലയം (MoEFCC) സെക്രട്ടറി ശ്രീ. തന്മയ് കുമാറും ചേർന്ന് 2026 സെപ്റ്റംബർ 30-ന് ന്യൂഡൽഹിയിൽ നടന്ന ചടങ്ങിൽ വച്ച് ഇന്ത്യ–ജപ്പാൻ 'ജോയിന്റ് ക്രെഡിറ്റിംഗ് മെക്കാനിസ'ത്തിന്റെ (JCM) പ്രവർത്തന മാർഗ്ഗരേഖ (Operational Manual) പുറത്തിറക്കിയിരുന്നു.
കുറഞ്ഞ അളവിൽ മാത്രം കാർബൺ പുറത്തുവിടുന്ന നൂതന സാങ്കേതികവിദ്യകളുടെ ഉപയോഗം പ്രോത്സാഹിപ്പിക്കുക, കാലാവസ്ഥാ സംബന്ധമായ പദ്ധതികൾക്കായി ധനസമാഹരണം നടത്തുക, ഇരുരാജ്യങ്ങളും തമ്മിലുള്ള സാങ്കേതികവിദ്യാ കൈമാറ്റവും സഹകരണവും മെച്ചപ്പെടുത്തുക, ഇന്ത്യയിൽ ഹരിതഗൃഹ വാതകങ്ങളുടെ പുറന്തള്ളൽ കുറയ്ക്കുന്നതിനും അവ നീക്കം ചെയ്യുന്നതിനുമുള്ള വിശ്വസനീയമായ നടപടികളെ പിന്തുണയ്ക്കുക എന്നിവയാണ് ഇന്ത്യ-ജപ്പാൻ ജോയിന്റ് ക്രെഡിറ്റിംഗ് മെക്കാനിസത്തിന്റെ (JCM) ലക്ഷ്യങ്ങൾ. ഒപ്പം, ഇന്ത്യയുടെ സുസ്ഥിര വികസനത്തെ പിന്തുണയ്ക്കാനും അന്താരാഷ്ട്ര കാർബൺ വിപണികളെ കൂടുതൽ വിശ്വസനീയവും സുതാര്യവുമാക്കാനും ഈ സംവിധാനം സഹായിക്കും.
2025 ഓഗസ്റ്റ് 7-ന് സഹകരണത്തിനായുള്ള ധാരണാപത്രം (MoC) ഒപ്പുവെച്ചതിനും 2026 ജൂൺ 8-ന് നിർവ്വഹണ ചട്ടങ്ങൾ (RoI) അംഗീകരിച്ചതിനും ശേഷം, പാരീസ് ഉടമ്പടിയുടെ 6.2-ാം അനുച്ഛേദപ്രകാരം ഇന്ത്യയും ജപ്പാനും തമ്മിലുള്ള ഉഭയകക്ഷി സഹകരണം പ്രാവർത്തികമാക്കുന്നതിലെ സുപ്രധാന നാഴികക്കല്ലാണ് ഈ പ്രവർത്തന മാർഗ്ഗരേഖയുടെ (Operational Manual) പ്രകാശനം.
ആവശ്യമായ സ്ഥാപന സംവിധാനങ്ങൾ ആസൂത്രണം ചെയ്ത് സജ്ജമാക്കുന്ന ഘട്ടത്തിൽ നിന്ന് ഇന്ത്യ–ജപ്പാൻ ജോയിന്റ് ക്രെഡിറ്റിംഗ് മെക്കാനിസത്തിന്റെ (JCM) പ്രായോഗിക നിർവഹണത്തിലേക്കുള്ള നിർണായക പരിവർത്തനത്തെയാണ് ഈ പുരോഗതി അടയാളപ്പെടുത്തുന്നത്. JCM-ന് കീഴിലുള്ള പദ്ധതികൾ ഫലപ്രദമായി നടപ്പാക്കുന്നതിനായി വ്യക്തവും സുതാര്യവും സമഗ്രവുമായ നടപടിക്രമ ചട്ടക്കൂടാണ് ഇതിലൂടെ രൂപപ്പെടുന്നത്. ‘പ്രോജക്റ്റ് ഐഡിയ നോട്ട്’ (PIN) സമർപ്പിക്കുന്നതുമുതൽ JCM കാർബൺ ക്രെഡിറ്റുകളുടെ വിതരണം, അംഗീകാരം എന്നിവ വരെയുള്ള പദ്ധതിയുടെ മുഴുവൻ ഘട്ടങ്ങളും നടപടിക്രമങ്ങളും ഈ മാർഗ്ഗരേഖ വിശദമായി പ്രതിപാദിക്കുന്നു.
*******
( റിലീസ് ഐ.ഡി: 2319450)
സന്ദര്‍ശക കൗണ്ടര്‍ : 5