گاندھی جینتی کے موقع پر ملک بھر میں خصوصی گرام سبھاؤں کا انعقاد کیا گیا، جن کے تحت جی پی ڈی پی پورٹل (https://gpdp.nic.in) اور پنچایت این آئی آر این اے وائی پورٹل (https://meetingonline.gov.in) پر 2.42 لاکھ سے زیادہ خصوصی گرام سبھائیں درج کی گئی تھیں۔ ان گرام سبھاؤں میں مقامی باشندوں، منتخب نمائندوں، پنچایت کے عہدیداروں اور دیگر عہدیداروں نے جوش و خروش کے ساتھ فعال شرکت کی۔ خصوصی گرام سبھاؤں کے انعقاد کے ساتھ عوامی منصوبہ مہم 2026-27، ’’سب کی یوجنا، سب کا وکاس‘‘ کا بھی آغاز ہوا، جس کے تحت پنچایتیں مالی سال 2027-28 کے لیے اپنے پنچایت ترقیاتی منصوبے تیار کریں گی۔

ان 2.42 لاکھ خصوصی گرام سبھاؤں میں حکومت ہند کی مختلف اسکیموں اور اہم اقدامات کو بات چیت کا مرکزی موضوع بنایا گیا۔ ان میں وزارتِ پنچایتی راج، محکمۂ دیہی ترقی، محکمۂ پینے کے پانی اور صفائی ستھرائی، محکمۂ صارفین کے امور، محکمۂ خوراک اور عوامی تقسیم، محکمۂ آبی وسائل، دریاؤں کی ترقی اور گنگا کی بحالی اور محکمۂ اراضی وسائل کے اہم اقدامات شامل تھے۔

خصوصی گرام سبھاؤں نے دیہی شہریوں کو اہم سرکاری اقدامات اور مقامی اہمیت کے حامل مسائل پر تبادلۂ خیال میں حصہ لینے کے لیے براہِ راست پلیٹ فارم فراہم کیا۔ وسیع تر بات چیت میں پنچایتوں کو مرکزی مالیاتی کمیشن کی گرانٹ کی منتقلی میں اضافہ، اپنے ذرائع سے حاصل ہونے والی آمدنی کے ذریعے مالی خود انحصاری، محفوظ جائیداد اور زمین کے حقوق، یقینی روزگار اور ذریعۂ معاش، صاف پینے کے پانی اور صفائی ستھرائی، آبی تحفظ، خوراک کا تحفظ، صارفین کے تحفظ اور خواتین کو معاشی طور پر بااختیار بنانے سمیت مختلف شعبوں کا احاطہ کیا گیا۔

گزشتہ بارہ برسوں کے دوران کی گئی تبدیلی پر مبنی حکمرانی کی اصلاحات اور شہریوں پر مرکوز اقدامات سمیت حکومت کے اہم اقدامات کو اجاگر کرنے والے ایجنڈے اور آگاہی مواد کو پڑھا گیا اور ان پر غور و خوض کیا گیا۔ مقامی باشندوں، منتخب نمائندوں، پنچایت کے عہدیداروں اور دیگر عہدیداروں نے فعال طور پر حصہ لیتے ہوئے اپنے تجربات، نقطۂ نظر اور تجاویز پیش کیں، جن سے گرام پنچایت کے ترقیاتی منصوبوں کو مزید مؤثر بنانے میں مدد ملے گی۔

ملک بھر میں ان خصوصی گرام سبھاؤں کے انعقاد کو شراکت دار وزارتوں اور محکموں کے ساتھ ساتھ ان کے فیلڈ اور نچلی سطح کے عہدیداروں اور ایم وائی بھارت رضاکاروں کی مربوط کوششوں سے تعاون حاصل ہوا۔ ریاست، ضلع، بلاک اور گرام پنچایت کی سطح پر ان کی شرکت نے شہریوں پر مرکوز اسکیموں اور اقدامات پر بامعنی بات چیت کو آسان بنانے کے ساتھ ساتھ نچلی سطح پر جن بھاگیداری اور سمواد کو مضبوط بنانے میں مدد کی۔

پنچایتی راج کی وزارت کے سکریٹری ڈاکٹر ونیت جوشی نے وزارت کے سینئر افسران اور حصہ لینے والی وزارتوں اور حکومت ہند کے محکموں کے افسران کے ساتھ مل کر پورے دن ریاستوں اور مرکز کے زیر انتظام علاقوں کے عہدیداروں سے مسلسل رابطہ برقرار رکھا۔ انہوں نے ملک بھر میں خصوصی گرام سبھاؤں کی پیش رفت کا جائزہ لیا اور تعاون پر مبنی وفاقیت کے جذبے کے تحت قریبی تال میل کو یقینی بنانے میں سہولت فراہم کی۔

ریاستوں اور مرکز کے زیر انتظام علاقوں کی مربوط کوششوں، ان کے پنچایتی راج محکموں، ضلعی انتظامیہ اور فیلڈ عہدیداروں کی مدد سے، اس ملک گیر مشق کو بے مثال پیمانے پر بلارکاوٹ انجام دینا یقینی بنایا گیا۔

عوامی منصوبہ مہم 2026-27 ’’سب کی یوجنا، سب کا وکاس‘‘

حکومت ہند کی 21 وزارتوں اور محکموں کے اشتراک سے پنچایتی راج کی وزارت کی قیادت میں چلائی جانے والی عوامی منصوبہ مہم، وزیر اعظم جناب نریندر مودی کی قیادت میں حکومت کے مکمل حکومتی نقطۂ نظر کی عکاسی کرتی ہے۔وزارت 2018 سے تمام ریاستوں اور مرکز کے زیر انتظام علاقوں میں عوامی منصوبہ مہم چلا رہی ہے، تاکہ پنچایتوں کو شواہد پر مبنی، جامع اور شراکت دارانہ منصوبے تیار کرنے کے قابل بنایا جا سکے۔

راشٹریہ گرام سوراج ابھیان کے تحت وزارت مقامی ترقی کے نو موضوعات پر تربیت اور صلاحیت سازی کے لیے معاونت فراہم کرتی ہے۔ 2.55 لاکھ سے زیادہ گرام پنچایتیں شراکت دارانہ گرام پنچایت ترقیاتی منصوبے تیار کرتی ہیں اور انہیں ای-گرام سوراج پورٹل پر اپ لوڈ کرتی ہیں، جبکہ پنچایت ایڈوانسمنٹ انڈیکس ہر گرام پنچایت کو اپنی کامیابیوں اور خامیوں کی نشاندہی کرنے میں مدد فراہم کرتا ہے۔

اس بنیاد پر گرام سبھا ترجیحی شعبوں کے حوالے سے سنکلپ لے سکتی ہے، پائیدار ترقیاتی اہداف کے مقامی سطح پر نفاذ اور وکست بھارت کے وژن کو آگے بڑھا سکتی ہے۔

خصوصی گرام سبھاؤں میں پیش کی گئی کلیدی اصلاحات اور کامیابیاں

بااختیار اور خود کفیل پنچایتیں (پنچایتی راج کی وزارت)

سولہویں مالیاتی کمیشن نے 2026-31 کے لیے دیہی مقامی بلدیاتی اداروں کے لیے 4,35,236 کروڑ روپے کی سفارش کی ہے، جو پندرہویں مالیاتی کمیشن کے مقابلے میں تقریباً 84 فیصد کا اضافہ ہے۔ اس کے تحت سالانہ فی کس گرانٹ تقریباً 400 روپے سے بڑھ کر تقریباً 950 روپے ہو گئی ہے۔ سمرتھ پنچایت پورٹل پر 57 لاکھ سے زیادہ ٹیکس دہندگان اور 15 لاکھ جائیدادوں کا اندراج کیا گیا ہے، جبکہ آتم نربھر پنچایت اسپیشل ایوارڈ کے تحت 1 کروڑ روپے تک کی مراعات دی جاتی ہیں۔ پنچایتوں کے کھاتے اب مرکزی اور ریاستی حکومتوں کے زیرِ استعمال چھ سطحی ڈھانچے کی پیروی کرتے ہیں، جبکہ 2.5 لاکھ سے زیادہ پنچایتی راج ادارے آڈٹ آن لائن نظام سے منسلک ہو چکے ہیں۔

سروے آف ولیج آبادی اینڈ میپنگ ود امپرووائزڈ ٹیکنالوجی ان ولیج ایریاز (سوامتوا) اسکیم کے تحت 2.06 لاکھ دیہاتوں کے لیے 3.33 کروڑ پراپرٹی کارڈ تیار کیے گئے ہیں۔ ان کے تحت تقریباً 1713 کروڑ روپے کے قرضے منظور کیے گئے ہیں اور خواتین کو جائیداد کی مالکان کے طور پر تسلیم کیے جانے کی حوصلہ افزائی کی گئی ہے۔

روزگار اور روزی روٹی (محکمۂ دیہی ترقی)

یکم جولائی 2026 سے نافذ روزگار اور اجیوکا مشن (گرامین) کے لیے وکست بھارت گارنٹی کے تحت اہل دیہی گھرانوں کو ہر مالی سال میں 125 دن کے اجرتی روزگار کی ضمانت دی گئی ہے۔ حاضری کے لیے چہرے کی شناخت کے ذریعے تصدیق اور ڈیجیٹل ادائیگیوں کا استعمال کیا جا رہا ہے۔ اب تک 31.69 کروڑ سے زیادہ افرادی دن پیدا کیے جا چکے ہیں، تقریباً 2.23 کروڑ گھرانوں کے 2.81 کروڑ سے زیادہ کارکنوں کو روزگار فراہم کیا گیا ہے، اور تقریباً 2.31 لاکھ گرام پنچایتوں میں کام جاری ہے۔

ریاستوں اور مرکز کے زیرِ انتظام علاقوں کے لیے 2026-27 میں 93,841 کروڑ روپے کی عبوری رقم مختص کی گئی ہے۔ وکست گرام پنچایت منصوبہ گرام سبھا کو مقامی ضروریات کے مطابق کاموں کا فیصلہ کرنے کے قابل بناتا ہے۔

محفوظ پینے کا پانی اور صفائی ستھرائی (محکمۂ پینے کے پانی اور صفائی ستھرائی)

جل جیون مشن کے تحت دیہی گھروں میں نل کے پانی کے کنکشن تقریباً 3.23 کروڑ گھروں (17 فیصد) سے بڑھ کر 16 کروڑ سے زیادہ گھروں (80 فیصد سے زیادہ) تک پہنچ گئے ہیں۔ جل ارپن کے تحت مکمل پانی کی فراہمی کی اسکیموں کو گرام پنچایتوں اور مقامی برادریوں کے حوالے کرنے کو بھی اجاگر کیا گیا۔

سوچھ بھارت مشن (گرامین) کے تحت 12.22 کروڑ گھریلو بیت الخلاء تعمیر کیے گئے ہیں اور 5.25 لاکھ سے زیادہ گاؤں (89.6 فیصد) نے خود کو کھلے میں رفع حاجت سے پاک پلس (ماڈل)  قرار دیا ہے۔ سوچھتا ہی سیوا 2026 کے اختتام کے موقع پر گرام سبھاؤں میں سالڈ ویسٹ مینجمنٹ رولز، 2026 پر بھی تبادلۂ خیال کیا گیا۔

آبی تحفظ (محکمۂ آبی وسائل، دریاؤں کی ترقی اور گنگا کی بحالی)

جل سنچی جن بھاگیداری: کیچ دی رین کے تحت کمیونٹی کی شراکت سے 1.55 کروڑ سے زیادہ مصنوعی ری چارج اور پانی ذخیرہ کرنے کے ڈھانچے تعمیر کیے گئے ہیں۔ پہلے مرحلے کے تخمینوں کے مطابق 2.43 بلین کیوبک میٹر زیرِ زمین پانی کے ری چارج کے اثرات کا بھی جائزہ لیا گیا ہے۔

واٹرشیڈ ڈیولپمنٹ کے نظرِ ثانی شدہ اصولوں کے تحت میدانی علاقوں میں فنڈنگ بڑھا کر 22,000 روپے فی ہیکٹر اور پہاڑی و دشوار گزار علاقوں میں 28,000 روپے فی ہیکٹر کر دی گئی ہے، جبکہ منصوبے کی مدت سات سال سے کم کرکے پانچ سال کر دی گئی ہے۔

کیچ دی رین کے تحت گرام سبھا کی سرگرمیوں میں بارش کے پانی کو ذخیرہ کرنے، زیرِ زمین پانی کو ری چارج کرنے اور کمیونٹی کی قیادت میں پانی کے تحفظ کے بارے میں بیداری پیدا کرنے پر توجہ مرکوز کی گئی۔ مقامی برادریوں، پنچایتی راج کے نمائندوں اور ضلعی عہدیداروں نے پروگرام میں فعال طور پر حصہ لیا۔ ان سرگرمیوں میں تکنیکی رہنمائی، بیداری پر مبنی ویڈیوز کی نمائش، شجرکاری، شرم دان اور جل شپتھ دلانے کی سرگرمیاں شامل تھیں۔

بارش کے پانی کے ہر قطرے کو محفوظ کرنے اور پائیدار آبی انتظام کے لیے اجتماعی کارروائی کو متحرک کرنے کے پیغام کو تقویت دینے کے لیے کیچ دی رین (سی ٹی آر) ترانہ بھی بجایا اور دکھایا گیا۔

غذائی تحفظ اور صارفین کا تحفظ (محکمۂ خوراک اور عوامی تقسیم اور محکمۂ صارفین کے امور)

ون نیشن ون راشن کارڈ کے تحت ہر ماہ تقریباً 3.27 کروڑ پورٹیبلٹی لین دین ہوتے ہیں، جبکہ پردھان منتری غریب کلیان انا یوجنا کے تحت 81.35 کروڑ مستفیدین کو مفت اناج فراہم کیا جا رہا ہے۔ اس اسکیم کو 2028 تک بڑھا دیا گیا ہے۔

17 زبانوں میں دستیاب نیشنل کنزیومر ہیلپ لائن کو اگست 2019 میں موصول ہونے والی 78,477 کالز کے مقابلے میں اگست 2026 میں 3,42,371 کالز موصول ہوئیں۔ اپریل 2025 سے اب تک 105 کروڑ روپے سے زیادہ کے ریفنڈز کی سہولت فراہم کی جا چکی ہے۔

ای-جاگرتی پلیٹ فارم نے درج کیے گئے 2.81 لاکھ مقدمات میں سے 2.55 لاکھ سے زیادہ مقدمات کا تصفیہ کیا ہے۔ اسے ای-گورننس 2026 کے قومی ایوارڈز میں سلور ایوارڈ بھی حاصل ہوا ہے۔

ڈیجیٹل لینڈ ریکارڈز (محکمۂ اراضی وسائل)

ڈیجیٹل انڈیا لینڈ ریکارڈ ماڈرنائزیشن پروگرام کے تحت 99.90 فیصد ریکارڈ آف رائٹس اور 97.4 فیصد کیڈسٹرل نقشوں کو ڈیجیٹلائز کیا جا چکا ہے۔ 31 ریاستوں اور مرکز کے زیرِ انتظام علاقوں کے شہری اراضی کے ریکارڈ تک آن لائن رسائی حاصل کر سکتے ہیں، جبکہ 24 ریاستوں اور مرکز کے زیرِ انتظام علاقوں میں ڈیجیٹل طور پر دستخط شدہ ریکارڈ ڈاؤن لوڈ کیے جا سکتے ہیں۔ اس سے مالکان کو زمین کے ریکارڈ میں دھوکہ دہی پر مبنی انتقالات سے تحفظ حاصل ہوتا ہے اور قرض و دیگر مالی سہولیات تک رسائی آسان ہوتی ہے۔

دیگر اہم قومی اقدامات کے بارے میں آگاہی

کئی وزارتوں اور محکموں نے گاؤں کی سطح پر بیداری پیدا کرنے میں اہم تعاون فراہم کیا۔ وزارتِ داخلہ نے نئے فوجداری قوانین، یعنی بھارتیہ نیائے سنہتا، بھارتیہ ناگرک سرکشا سنہتا اور بھارتیہ ساکشیہ ادھینیم کے بارے میں آگاہی پیدا کرنے میں سہولت فراہم کی۔ وزارتِ تعاون نے کوآپریٹو اداروں کی ڈیجیٹل تبدیلی اور مضبوطی، وزارتِ خواتین و اطفال کی ترقی نے ’’بال ویواہ مکت بھارت‘‘ اور وزارتِ سماجی انصاف و تفویضِ اختیارات نے ’’نشا مکت بھارت ابھیان‘‘ کے بارے میں آگاہی فراہم کی، تاکہ محفوظ، صحت مند، بچوں کی شادی سے پاک اور منشیات سے پاک گاؤں کی تعمیر کی جا سکے۔

ان خصوصی گرام سبھاؤں نے شراکت دارانہ جمہوریت اور مقامی حکمرانی کی بنیاد کے طور پر گرام سبھا کے کردار کو مزید مستحکم کیا۔ پنچایتی راج کی وزارت وکست بھارت کی وسیع تر کوشش کے تحت بااختیار، خود کفیل اور ترقی یافتہ پنچایتوں کی تعمیر کے لیے عوامی منصوبہ مہم کے تحت 2027-28 کے لیے عوام پر مرکوز پنچایت ترقیاتی منصوبے تیار کرنے کی سمت میں آگے بڑھ رہی ہے۔

حصہ لینے والی وزارتوں/محکموں کی اصلاحات کی تفصیلات کے لیے: یہاں کلک کریں

***

UR-4569

(ش ح۔اس ک  )