પ્રધાનમંત્રી શ્રી નરેન્દ્ર મોદીની અધ્યક્ષતામાં આર્થિક બાબતોની કેબિનેટ સમિતિ (CCEA) એ કર સહિત રૂ. 1,789.52 કરોડના અંદાજિત ખર્ચે દિલ્હી પોલીસ દ્વારા ITMS પ્રોજેક્ટના અમલીકરણને મંજૂરી આપી છે. આ પ્રોજેક્ટ 42 ઓળખાયેલા ટ્રાફિક કોરિડોરને આવરી લેશે અને 24 મહિનામાં ત્રણ તબક્કામાં અમલમાં મૂકવામાં આવશે, ત્યારબાદ પાંચ વર્ષ સુધી તેની કામગીરી અને જાળવણી કરવામાં આવશે.

રાષ્ટ્રીય રાજધાનીમાં ટ્રાફિક મેનેજમેન્ટ, પરિવહન ઇન્ફ્રાસ્ટ્રક્ચર અને શહેરી ગતિશીલતામાં સુધારો કરવા માટે કેન્દ્ર સરકાર અને દિલ્હી એનસીટી સરકારના વ્યાપક પ્રયાસોના ભાગરૂપે, ઇન્ટેલિજન્ટ ટ્રાફિક મેનેજમેન્ટ સિસ્ટમ (ITMS) દ્વારા હવે એક મુખ્ય ટેકનોલોજી-સંચાલિત પહેલ હાથ ધરવામાં આવશે. આ પ્રોજેક્ટ દિલ્હીના હાલના રોડ નેટવર્કને રિયલ-ટાઇમ ટ્રાફિક ડેટા, એડેપ્ટિવ ટ્રાફિક સિગ્નલ્સ, ઓટોમેટેડ એન્ફોર્સમેન્ટ અને ઇન્ટિગ્રેટેડ કમાન્ડ-એન્ડ-કંટ્રોલ સિસ્ટમ્સ દ્વારા વધુ બુદ્ધિપૂર્વક સંચાલિત કરવા માટે સક્ષમ બનાવશે.

દિલ્હીમાં લગભગ 71 લાખ સક્રિય નોંધાયેલા વાહનો છે. વાહનોની વૃદ્ધિ માર્ગ ઇન્ફ્રાસ્ટ્રક્ચરના વિસ્તરણ કરતાં નોંધપાત્ર રીતે વધી ગઈ છે, જ્યારે ટ્રાફિક નિયમન મુખ્યત્વે ફિક્સ્ડ સિગ્નલ ટાઇમિંગ અને મેન્યુઅલ હસ્તક્ષેપ પર નિર્ભર રહે છે. ITMS નો ઉદ્દેશ્ય ટ્રાફિક મેનેજમેન્ટને રસ્તા પરની વાસ્તવિક પરિસ્થિતિઓ સામે ગતિશીલ રીતે પ્રતિભાવ આપવા માટે સક્ષમ બનાવીને ઉપલબ્ધ રોડ ક્ષમતાનો વધુ સારો ઉપયોગ કરવાનો છે.

લાભો:

સ્માર્ટર ટ્રાફિક સિગ્નલ્સ અને વધુ સુગમ પરિવહન: એડેપ્ટિવ ટ્રાફિક કંટ્રોલ સિસ્ટમ્સ પ્રવર્તમાન ટ્રાફિક પરિસ્થિતિઓ અનુસાર સિગ્નલ ટાઇમિંગને ગતિશીલ રીતે સમાયોજિત કરશે અને ઓળખાયેલા કોરિડોર પર સિગ્નલોનું સંકલન કરશે, જેનાથી નિવારી શકાય તેવા સ્ટોપેજ અને વિલંબને ઘટાડવામાં મદદ મળશે.

એમ્બ્યુલન્સ અને ઇમરજન્સી વાહનો માટે પ્રાથમિકતા: આ સિસ્ટમ ઇમરજન્સી વાહનો માટે ગ્રીન કોરિડોર અને પ્રાથમિકતા ચળવળની સુવિધા આપશે, જેનાથી ભીડવાળા રસ્તાઓ પરથી ઝડપી પસાર થવામાં મદદ મળશે.

ટ્રાફિક જામ અને અકસ્માતો માટે ઝડપી પ્રતિભાવ: ટ્રાફિક જામ, ધીમી ગતિએ ચાલતા ટ્રાફિક અને માર્ગ અકસ્માતોની રિયલ-ટાઇમ શોધ દિલ્હી પોલીસ દ્વારા ઝડપી ડાયવર્ઝન અને ઓપરેશનલ પ્રતિભાવને સક્ષમ બનાવશે.

મુસાફરો માટે સમયસર માહિતી: વેરિયેબલ મેસેજ સાઇન બોર્ડ અને ડિજિટલ પ્લેટફોર્મ ભીડ, ડાયવર્ઝન, પાર્કિંગની ઉપલબ્ધતા અને ટ્રાફિક પરિસ્થિતિઓ અંગે માહિતી પૂરી પાડશે. નેવિગેશન સેવા પ્રદાતાઓ સાથે પણ માહિતી શેર કરવામાં આવી શકે છે, જે મુસાફરોને વધુ સારી મુસાફરી પસંદગીઓ કરવામાં મદદ કરશે.

વધુ સુસંગત અને ટેકનોલોજી-આધારિત અમલીકરણ: આ સિસ્ટમ રેડ-લાઇટ અને સ્ટોપ-લાઇન ઉલ્લંઘન, સ્પીડિંગ, રોંગ-વે ડ્રાઇવિંગ, હેલ્મેટ અને સીટ બેલ્ટનો ઉપયોગ ન કરવો, ગેરકાયદે પાર્કિંગ અને ડ્રાઇવિંગ કરતી વખતે મોબાઈલ ફોનનો ઉપયોગ જેવા ઉલ્લંઘનોની સ્વચાલિત શોધને મજબૂત કરશે. AI-આધારિત એનાલિટિક્સ ચોરાયેલા, હોટ-લિસ્ટ કરાયેલા અને બ્લેક-લિસ્ટ કરાયેલા વાહનો, પુનરાવર્તિત ઉલ્લંઘનકર્તાઓ અને હિટ-એન્ડ-રન અકસ્માતો સાથે સંકળાયેલા વાહનોની ઓળખ કરવામાં પણ મદદ કરશે.

સંકલિત શહેર-વ્યાપી ટ્રાફિક મેનેજમેન્ટ:

ટ્રાફિક નિયમન, અમલીકરણ અને માહિતી પ્રસારણને ટ્રાફિક કમાન્ડ એન્ડ કંટ્રોલ સેન્ટર્સ દ્વારા સિક્યોર ડેટા સેન્ટર અને ડિઝાસ્ટર રિકવરી ઇન્ફ્રાસ્ટ્રક્ચરના સપોર્ટ સાથે સામાન્ય પ્લેટફોર્મ પર એકસાથે લાવવામાં આવશે. ભવિષ્યના સંકલન અને ક્ષમતા વિસ્તારવા (સ્કેલેબિલિટી) ને સક્ષમ કરવા માટે આ સિસ્ટમ ઓપન સ્ટાન્ડર્ડ્સ અને APIs નું પાલન કરશે.

આ પ્રોજેક્ટ 1,092 એડેપ્ટિવ ટ્રાફિક કંટ્રોલ સિસ્ટમ અને 1,029 અમલીકરણ સ્થાનોને આવરી લેશે. અમલીકરણ પર્ફોર્મન્સ-આધારિત રહેશે, જેમાં નિર્ધારિત ટેસ્ટિંગ, કમિશનિંગ, સ્વીકૃતિ અને પર્ફોર્મન્સ પેરામીટર્સ સામે અગાઉના તબક્કાના મૂલ્યાંકન પછી દરેક આગળનો તબક્કો હાથ ધરવામાં આવશે.

દિલ્હી પોલીસ સ્પર્ધાત્મક બોલી દ્વારા પસંદ કરાયેલા માસ્ટર સિસ્ટમ ઇન્ટિગ્રેટર દ્વારા આ પ્રોજેક્ટનો અમલ કરશે. C-DAC પ્રોજેક્ટ મેનેજમેન્ટ કન્સલ્ટન્ટ તરીકે તકનીકી સહયોગ પૂરો પાડશે, જેમાં અમલીકરણ અને કામગીરી તથા જાળવણી દરમિયાન તકનીકી તપાસ, દેખરેખ, માન્યતા અને સ્વીકૃતિનો સમાવેશ થાય છે.

ITMS હાલના રોડ નેટવર્કનો વધુ કાર્યક્ષમતાથી ઉપયોગ કરવા માટે જરૂરી ટેકનોલોજી અને રિયલ-ટાઇમ ઇન્ટેલિજન્સ પૂરી પાડીને દિલ્હીના રોડ અને ટ્રાન્સપોર્ટ ઇન્ફ્રાસ્ટ્રક્ચરમાં સુધારો કરવાના ચાલુ પ્રયાસોને પૂરક બનાવશે. આ પ્રોજેક્ટ વધુ સુગમ ટ્રાફિક અવરજવર, વધુ સુરક્ષિત રસ્તાઓ, ઝડપી ઘટના પ્રતિભાવ, વધુ અસરકારક અમલીકરણ અને નાગરિકો માટે વધુ અનુમાનિત મુસાફરી અનુભવમાં યોગદાન આપે તેવી અપેક્ષા છે.

SM/BS/GP

સોશિયલ મીડિયા પર અમને ફોલો કરો :  @PIBAhmedabad    /pibahmedabad1964    /pibahmedabad  pibahmedabad1964[at]gmail[dot]com