অচাথাউগী মমল হন্থনবা, কঞ্জুমরশিং শাফনবা অমসুং মালেমগী ওইনা অচাথাউগী মমল হেনগৎলকপগী চৈথেং মায়োক্নবা ঙম্নবা ভারত সরকারনা মপান লৈবাক্তগী পুশিল্লকপা পাক-শন্না শীজিন্নবা রিফাইন তৌদ্রিবা অচাথাউদা বেসিক কষ্টমস দ্যুতি (বি সি দি) হন্থরে।

খোঙথাং অসিদগী, রিফাইন তৌদ্রিবা নুমিৎলৈ থাউদা লৌরম্বা বেসিক কষ্টমস দ্যুতি চাদা ১০ লৌরম্বদগী লৌদ্রে, রিফাইনা তৌদ্রিবা নুঙহৱাই থাউ অমসুং প্লাম থাউগী বেসিক কষ্টমস দ্যুতি চাদা ১০ দগী চাদা ৫ দা হন্থরে। রিফাইন তৌদ্রিবা অমসুং রিফাইন তৌরবা অচাথাউশিংগী মরক্ত ইম্পোর্ত দ্যুতিগী খেন্নবা চাদা ১৯.২৫ ওইহনবগা লোয়ননা রিফাইন তৌরবা অচাথাউশিংদা লৌরম্বা বেসিক কষ্টমস দ্যুতি সরকারনা হন্থরে।

মালেমগী ওইনা অচাথাউগী মমল হেনগৎলকপা অমসুং লৈবাক অসিদা য়ৌরকপদা মমল হেনগৎলকপা অসি য়েংলগা বেসিক কষ্টমস দ্যুতি কোমথোকপগী থবক অসি পায়খৎলকপনি। ইম্পোর্ত দ্যুতিশিংদা অচাথাউশিং মপান লৈবাক্তগী পুশিল্লকপদা চঙবা শেনফম অসি মরুওইবা শরুক অমা ওইরি অমসুং মরম অদুনা লৈবাক অসিদা থাউগী মমল হেনগৎহল্লি।

রিফাইন তৌদ্রিবা অচাথাউদা বেসিক কষ্টমস দ্যুতি হন্থহনবা অসিনা লৈবাক মনুংগী সপ্লাই চেনগী খুৎথাংদা মীয়ামদা কান্নবা ফংহনগনি। চীঞ্জাক্কী মমল হেনগৎলকপা অমসুং পোৎ-চৈশিংগী মমল হেনগৎলকপগী পোৎলুম হন্থহন্দুনা কঞ্জুমরশিং শাফনবা পান্দমদা থবক অসি পায়খৎলকপনি।

লৈবাক অসিগী রিফাইন্নিংগী থবক শৌগৎনবা অমসুং রিফাইন তৌরবা অচাথাউশিং কা হেন্না পুশিল্লকপা হন্থনবা সরকারনা রিফাইন তৌদ্রিবা অমসুং রিফাইন তৌরবা অচাথাউশিংগী মরক্ত বেসিক কষ্টমস দ্যুতিগী খেন্নবা থম্বনি। খোঙথাং অসিনা লৈবাক মনুংদা মখা তানা ভেলু এদিসন শৌগৎপগা লোয়ননা লৈবাক অসিগী রিফাইনরশিংদা হেন্না খুদোংচাবা অমা পীরগনি হায়না থাজবা থম্লি।

কঞ্জুমর কান্নবা ফংনবা উদ্যোগতা চেকশিনৱা

বেসিক কষ্টমস দ্যুতি হন্থবগী কান্নবশিং মপুংফানা কঞ্জুমরশিংদা য়ৌহন্নবা অচাথাউগী এসোসিএসনশিং অমসুং উদ্যোগকী মরী লৈনবশিংদা সরকারনা পাউতাক অমা পীখ্রে।

লেন্দেৎ কোষ্ট হন্থরকপগী মতুংইন্না প্রাইজ তু দিষ্ট্রিব্যুতরস (পি তি দি) অমসুং মেক্সিমম রিতেল প্রাইজ (এম আর পী) খুদক্ত শেমদোক্নবা উদ্যোগকী মরী লৈনবশিংদা হায়জখ্রে। থেংথবা তৌদনা মমল হন্থহন্নবা মখোয়গী মেম্বরশিংদা পাউতাক পীনবা অচাথাউগী এসোসিএসনশিংদসু হায়জখ্রে।

মালেমগী অচাথাউগী কৈথেলশিংগী ফিবম অমসুং লৈবাক মনুংগী মমলগী ফিবম সরকারনা মখা তানা য়েংশিনগনি অমসুং লৌমীশিং অমসুং লৈবাক অসিগী অচাথাউগী উদ্যোগকী থোঙ মান্নবা থৌশিল অমা লৈবগা লোয়ননা কঞ্জুমরশিংগী য়াইফনবা করিগুম্বা দরকার ওইরবদি, চুনবা থবক পায়খৎকনি।

*****