صدر جمہوریہ ہند محترمہ دروپدی مرمو نے آج (22 ستمبر، 2026 کو) ایکتا نگر، کیوڑیہ ، گجرات میں منعقدہ ایک تقریب میں 72ویں قومی فلم ایوارڈس پیش کیے۔ انہوں نے اس موقع پر بزرگ اداکار جناب اننت ناگ کو، بھارتی سنیما کے تئیں ان کے شاندار تعاون کے اعتراف میں دادا صاحب پھالکے ایوارڈ برائے 2024 سے بھی نوازا۔

اس موقع پر خطاب کرتے ہوئے، صدر جمہوریہ ہند نے ان تمام ایوارڈ یافتگان کو مبارکباد دی جنہوں نے اپنی غیر معمولی صلاحیتوں اور محنت کے بل بوتے پر قومی سطح پر اپنا ایک منفرد مقام بنایا ہے۔ انہوں نے اس بات پر خوشی کا اظہار کیا کہ شری اننت ناگ کو دادا صاحب پھالکے ایوارڈ سے نوازا گیا ہے۔ انہوں نے کہا کہ فلموں میں ان کی اداکاری تھیٹر اور سنیما کے بہترین عناصر کے حسین امتزاج کی عکاسی کرتی ہے۔ وہ اپنی فطری، نپی تلی اور جاندار اداکاری کے لیے مشہور ہیں۔ وہ فنکاروں کی آنے والی نسلوں کے لیے ایک مثالی نمونہ ہیں۔

صدر جمہوریہ ہند نے کہا کہ تمام زبانوں اور خطوں کی فلموں میں بھارت کا عکس نظر آتا ہے۔ بھارتی سنیما بھارتی عوام کے خوابوں، روایات اور جدوجہد کے ساتھ ساتھ مستقبل کے امکانات کی بھی عکاسی کرتا ہے۔ انہوں نے اس بات پر خوشی کا اظہار کیا کہ شاندار فلموں کو نوازنے کی یہ تقریب 'اسٹیچو آف یونٹی' کے احاطے میں، 'وال آف یونٹی' کے قریب منعقد کی جا رہی ہے۔ انہوں نے کہا کہ یہ موقع بھارت کی وحدت کے معمار، سردار ولبھ بھائی پٹیل کی موجودگی کا احساس دلاتا ہے، جیسے وہ خود ملک کی ثقافتی یکجہتی کا جشن منانے والے اس تہوار کو آشیرواد دے رہے ہوں۔

صدر جمہوریہ ہند نے ایوارڈ جیتنے والی تمام فلموں کی ستائش کی۔ انہوں نے کہا کہ فلم ’آرٹیکل 370‘ ملک کی یکجہتی کو درپیش سنگین چنوتیوں اور ان کے حل کا ایک واضح اور جاندار احوال پیش کرتی ہے۔ نان فیچر فلم ’بھنگار‘ زندگی اور موت، مقصد اور بے مقصدیت سے جڑے ان دیکھے پہلوؤں کا اظہار کرتی ہے۔ ’سواتنتریہ ویر ساورکر‘ ویر ساورکر جی کی غیر معمولی زندگی کی کہانی کو ایک فنکارانہ خراجِ عقیدت ہے۔ فلم ’بھکشک‘ خواتین کے تحفظ کے انتہائی سنگین معاملے پر سماجی بیداری پیدا کرتی ہے۔ سنتھالی فلم ’انگن‘ کو قومی سطح پر ملنے والی پذیرائی نے ایک شاندار فلم کی حوصلہ افزائی کی ہے، اور اس سے ثقافتی تنوع اور سماجی شمولیت کو بھی فروغ حاصل ہوا ہے۔

صدرِ جمہوریہ ہند نے جیوری اراکین کی تعریف کی کہ انہوں نے ایسی فلموں کا انتخاب کیا جو معاشرے اور ملک سے جڑے اہم مسائل کو اجاگر کرتی ہیں۔ انہوں نے کہا کہ ہر علاقائی جیوری میں خواتین کی شرکت کو یقینی بنایا جانا چاہیے۔ انہوں نے اس بات پر زور دیا کہ کسی بھی شعبے میں خواتین کے نقطۂ نظر کو شامل کر کے ہی ایک مکمل انسانی زاویۂ نگاہ تشکیل دیا جا سکتا ہے۔

صدرِ جمہوریہ ہند نے کہا کہ ٹیم کے ہر رکن کے تئیں احترام اور حساسیت کا احساس برقرار رکھنا فلم انڈسٹری کے ورک کلچر کا لازمی حصہ ہونا چاہیے۔ انہوں نے تخلیقی معیشت کے اہم نمائندوں پر زور دیا کہ وہ اس بات کو یقینی بنائیں کہ مزدوروں، چھوٹے فنکاروں، معاونین اور جدوجہد کرنے والے کو مناسب احترام اور سماجی تحفظ حاصل ہو۔

صدرِ جمہوریہ ہند نے کہا کہ مقبول فلمی فنکاروں کے اندر ملک کے لوگوں، بالخصوص نوجوانوں کو متاثر کرنے کی بے پناہ صلاحیت ہوتی ہے۔ جب کامیاب فلمی ستارے ایک منظم طرزِ زندگی کے فوائد کے بارے میں بات کرتے ہیں، تو کروڑوں بچے اور نوجوان ان کی پیروی کرتے ہیں۔ انہوں نے مشہور شخصیات پر زور دیا کہ وہ ایسی مصنوعات کی تشہیر نہ کریں جو صحت کے لیے نقصان دہ ہوں۔ انہوں نے کہا کہ سچا اسٹار وہی ہے جو روشنی پھیلائے، اندھیرا نہیں۔

صدر جمہوریہ ہند کی تقریر ملاحظہ کرنے کے لیے یہاں کلک کریں-

**********

 (ش ح –ا ب ن)

U.No:3939