প্ৰধানমন্ত্ৰী শ্ৰী নৰেন্দ্ৰ মোদীয়ে ২০২৬ চনৰ ১৭ ছেপ্টেম্বৰত নতুন দিল্লীৰ যশোভূমিত দিনৰ প্ৰায় ১০ বজাত ছেমিকন ইণ্ডিয়া ২০২৬ উদ্বোধন কৰিব। এই উপলক্ষে প্ৰধানমন্ত্ৰীয়ে সমাৱেশকো সম্বোধন কৰিব।

২০২৬ চনৰ ১৭ৰ পৰা ১৯ ছেপ্টেম্বৰলৈ এই তিনিদিনীয়া সন্মিলন আৰু প্ৰদৰ্শনীখন ‘ছিলিকন টু ছিষ্টেমছঃ বিল্ডিং দা ইক’ছিষ্টেম’ শীৰ্ষক বিষয়েৰে আয়োজন কৰা হৈছে। ই ছেমিকণ্ডাক্টৰ আৰু ইলেক্ট্ৰনিকছ মূল্য শৃংখলৰ আন্তঃৰাষ্ট্ৰীয় আৰু ভাৰতীয় কোম্পানী, নীতি নিৰ্ধাৰক, বিনিয়োগকাৰী, গৱেষক, ষ্টাৰ্ট-আপ, শৈক্ষিক প্ৰতিষ্ঠান আৰু শিক্ষাৰ্থীসকলক একত্ৰিত কৰিব। এই সন্মিলনত ভাৰতত সহযোগিতা, বিনিয়োগ, উদ্ভাৱন আৰু প্ৰতিভা বিকাশৰ ওপৰত গুৰুত্ব দিয়া হ’ব। একে সময়তে চলা সুকীয়া অধিৱেশনবোৰত ডিছপ্লে’ উদ্যোগৰ অগ্ৰগতি, সহযোগিতা আৰু যুটীয়া উদ্যোগৰ সুবিধাৰ বাবে যুগুত কৰা ছখন দেশৰ ঘূৰণীয়া মেজমেল, মহিলাৰ নেতৃত্বৰ ওপৰত এখন মঞ্চ আদি অন্তৰ্ভুক্ত থাকিব।

ছেমিকন ইণ্ডিয়া ২০২৬-এ ছেমিকণ্ডাক্টৰ সামগ্ৰী, সঁজুলি আৰু চিপ ডিজাইনৰ পৰা ফেব্রিকেচন, উন্নত পেকেজিং, ইলেক্ট্ৰনিকছ আৰু ছিষ্টেমলৈকে যাত্ৰা প্ৰদৰ্শন কৰি এক ব্যাপক মূল্য শৃংখল পদ্ধতি গ্ৰহণ কৰিব। ‘বালিৰ পৰা ছিলিকনৰ পৰা প্ৰণালীলৈ’ নতুন মূল্য শৃংখলৰ অভিজ্ঞতাই ছেমিকণ্ডাক্টৰ পৰিবেশতন্ত্ৰত এই যাত্ৰাটো উপস্থাপন কৰিব।

ছেমিকন ইণ্ডিয়া ২০২৬ত ৬০০তকৈও অধিক অংশগ্ৰহণকাৰী কোম্পানীৰ লগতে ৫২ খন দেশৰ প্ৰতিনিধি, ৪০০তকৈও অধিক কাৰ্যবাহী আৰু ১৫০তকৈও অধিক বক্তাকে ধৰি প্ৰায় ৫০,০০০ দৰ্শনাৰ্থীক আকৰ্ষণ কৰিব বুলি আশা কৰা হৈছে। এই প্ৰদৰ্শনীত ছখন দেশ জাপান, দক্ষিণ কোৰিয়া, মালয়ছিয়া, নেদাৰলেণ্ড, ছিংগাপুৰ আৰু ছুইডেনক প্ৰতিনিধিত্ব কৰা পেভিলিয়নৰ লগতে ১২ টা ৰাজ্যিক বুথ, এটা ষ্টাৰ্টআপ পেভিলিয়ন, উদ্ভাৱন প্ৰদৰ্শনী, ছাত্ৰ হেকাথন আৰু কৰ্মশক্তি উন্নয়ন পেভিলিয়ন থাকিব।

***

MJPS/SS/ST/HS